2010/02/25

طلب سلفه عيد الام









امى العزيزه .. بينى وبينك كده انا كنت ناوى اكتب بوست اقول اد ايه انتى احسن ام .. والكلام اللى بيتقال ايام عيد الام دى
وبينك وبينك برضه كنت ناوى انى مجبش هديه عيد ام واكتفى بالبوست .. 
بس بما ان ( البت دعاء .. وام زعبله هه بقى) خدت منى تحويشه العمر عشان عيد الام .. فيبقى اعذرينى بقى يا حاجه انا هكتب اندد بافعال ام زعبله القمعيه .. وانتى كده كده عارفه مكانتك فى القلب.
وكمان انتى يعنى ميرضكيش ان ام زعبله تجردنى من كل ما احكتم غصبا وبلطجه واقعد ساكت .. فى حين اقدر -على الاقل-  اكتب بوست اندد بما فعلته.
واحنا كده قاعدين يا حاجه فى امان الله - اه والله فى امان الله - نلاقى خير اللهم اجعله خير .. الست دعاء (و أم زعبله للأبد) جايه كده وعلى وشها ابتسامه كبيره من النوع اللى يخض دى يا حاجه... اكيد عارفها.
- ياله يا حلوين كل واحد يطلع بكل اللى معاه لـ أشقه
( طبعا تملكنا الذعر )
= ليه حصل ايه؟
- عيد الام يا كابتن انت وهو
=( فى نفس واحد انا ومحمد اخويا) عيد الام بدعه وحرام
- ادفع وابقى توب يا خويا انت وهوه .. احسن والله اللى مش هيدفع فيكم .. اللى هعمله فيه التوبه منه هتبقى صعبه اوى .. وانتوا ميرضكوش كده .. امشى انجر يا شاب انت وهو وادفعوا بالذوق
=يعنى هتعملى ايه يعنى
-هحط السيخ المحمى فى صرصور ودنكم
= دا إرهاب بقى
- اه هو ارهاب وبلطجه .. وبسرعه ادفعوا مش عاوزه اعلى صوتى امكم نايمه
= من الاخر تاخدى كام وتحلى عنا
- كل ما تحتكم عليه .. يا امور انت وهو
= انا منفض جدااااااااااااا .. ومحمد قال نفس الكلام
- هسلفكم
= لأ محبش السلف
- اهى فرصه تحبه ..من الاخر .. انا هشترى هديه عيد الام بتاعتكم بكره وهنقسم تمنها عليكم .. وهساهم معاكم رغم انى كده كده جبت .. رفعت الجلسه.
طبعا يعنى انا والواد محمد مسكتناش يعنى .. فى نفس واحد بقى وورا بعض .. ام زعبله اهى .. ام زعبله اهى.. لحد ما ماما صحيت.


المشكله بقى انها بتبقى محوشه وعامله حسابها .. وتيجى تطب علينا زى القضى المستعجل .. واحنا اساسا اساسا كنا مصدقنا انها اتجوزت .. قلنا خلاص هتحل عننا .. وهترجع ماما تانى ترضى بالورده .. او بكل سنه وانتى طيبه .. او حتى بكلمه انا هديتك ياماما.. وتنسى بقى الهدايا اللتى لا تعبر عن الحب ابدا اللى بتجبها ام زعبله .. ولعلمك فى علم النفس بيقولك اى هديه تزيد عن 10 جنيه مصرى .. هديه لا تعبر عن الحب ابدا .. بل بالعكس تعبر عن اى حاجه تانيه خالص ( حقيقه علميه .. بس مش كتير من العلماء عارفينها .. تقريبا ولا واحد)


تقوم برضه تيجى وتمارس قهرها الابدى علينا .. وتاخد كل ما نحتكم؟!! .
لذا يا أمى العزيزه احب اقولك استمتعى السنه دى بعيد الام عادى جدا زى اى ام ولادها جابولها هديه .. وعادى بقى ممكن تتنططى على الجيران وتقوليلهم شوفى العيال جابولى ايه ...وعيشى بقى ولا يهمك ..
بس أبوس ايدك يا حاجه.. ابوس ايدك  توافقى على طلب السلفه- المرفق مع الهديه - اللى انا متقدم بيه .. وعليه امضاء 7 مدونين .. لا تقل بوستاتهم عن 10 كومنتات .


وطبعا لو وافقتى على طلب السلفه يبقى هكتب عنك البوست .. بيزنس اذ بيزنس ولا ايه؟
ابنك اللى ابد.. حلوه للابد دى
محمود

هناك 26 تعليقًا:

sony2000 يقول...

ههههههههههههههههههههه
بجد بوست جامد جدا
ادي الاخوات ولا بلااااااااااااش مقشطاكو اولابأول
ربنا يخليكو لبعض ويخليي مامتكو ليكو
وانا بقولها لممتي من هنا
كل سنه وانتي طيبه ياحلي حاجه فالدنيا
الحق أجري بقي لحسن تسأل علي الهديه ولا حاجه
هههههههه

Silver Eyes يقول...

صباح الخير يا دوك :)

والله البوست تحفة بجد
والبلوج دمها خفيف زى ما قلتلك قبل كدا

ههههههههههه
حلوة معلومة علم النفس دى .. بتنفع وقت الزنقات :)

كل سنة ووالدتك بخير
وربنا يخليهالك يارب واخواتك كمان

المنفضين بيشجعوا .. واحنا معاهم :)
تحياتى ليك

Wanda يقول...

:-)))))
10 بوستات للمدونين بكام؟؟ بامضاء واحد
:-)))

امضى يا سيدى :-)) و اكتب جنب الامضاء

يا سيدته الوالدة
ارجو انى توفقى على طلبان كمدونين برفض السلفة
وزقه ليقوم من البيت ينزل يدورله على شغل :-))
زجاج العربيات فى الاشارات محتاج لرجالة منورين كده
و اعندها حايجيبلك 10 هدايا :-)) مش هدية واحدة شرك
مع احتراماتى
مدونة :-)))بعشر مدونين

اى خدمة :-)

مي يقول...

بطوطى والمجتمع والناس ايه ياعم بتفح عيون الامهات من بدرى ليه
طبعا ده انت لازم تجيب لدعاء هدية خلاص دخلت كادر الامومة
ههههههههه بالنسبة لعلم النفس اللى انت دايما تقوله زهقتنى فى العلم ده
انا موفقاك طبعا
بص كده انا همضى على طلب السلفة بس تنصص معايا هع هع
كل سنة ومامتك والامهات كلهم طيبين

بطوط مش انا اكبر منك
فين هدية عيد الام اللى هتجيبهالى؟

ايوشة يقول...

نفس الازمة فى كل البيوت بس انا ناصحة بجبلها الهدية وفى نفس ذات الشهر باخد تمنها اضعاف اضعاف :D

نهر العاص يقول...

اول مرة اعرف ان الهدية لما بتزيد عن عشرة جنية مبتعبرش عن الحب انا عن نفسى بجيب هدية شيك وغالية تفرحلها بيها يومين واخدها بعد كده لنفسى هههههههههههههههههه

ست البيت يقول...

والله انت حر تقول عليها ام زعبلة أما أنا حقولها أم الخلول
وتبقى انت خال الخلول
وسمعوني سلام البيت بقى حرملك
عقبالك يا حاجة ام بطوط اما تجوزي بطوط ومحمد وتخلصي منهم للأبد
ما جتش ليه يا واد فرح ميسرة
وقعتك ملونة زي بيض شم النسيم

وبست جميل ويضحك
حلوة قوي انا احلى هدية
تصور مرة قلتها لماما
وبعدها ما انا كل سنة بجيب لها حاجة مرة الضغط ومرة النظر ومررررات مختلفة وجع عظام ومرة غضروف
يعني تشكيلة حلوة
حتفتري هتنهب يعني ؟
عموما كل يوم وأمهاتنا اللي شايلين همنا بخير
وصحة وعافية
ومعلومة حلوة قوي بتاعة العشرة جنيه تفك زنقة فعلا
طب والله سعاعات بتبقى الهدية لا تزيد عن 50 جنيه وبتبقى زي الفل اصل انا متخصصة في الهدايا القيمة بسعر رخيص
اضحك الله سنك يا د

صيدلانيه طالعه نازله يقول...

ايه ده
هو طلع بدعه زى الفلانتين و لا ايه

عيب عليكم بقى الست جايه من بيتها عشان تشتريلكم هديه و انتوا بهوات فى البيت و كمان مش عاجبكم و معترضين
عيال اخر زمن

و بعدين هديه ايه دى اللى بعشره جنيه
عايزه اشوفها و اتعرف عليها

انا بقى مش حامضى على طلب السلفه دى و ابقى شوف مين يمضيلك بقى

marwa mahdy يقول...

البوست لذيذ جدايابطوط

مع انك فكرتني بموضوع الهديه

ده ومش عارفه هاعمل ايه بس شكلي

هامشي ورا معلومه علم النفس بتاعتك
دي عجبتني وجت علي هوايا.

مش بمزاجى يقول...

ههههههههههههههههههههههههههه
ه
هههههههههههههههههههههههههههههههه
هههههههههههههههههههههههههههههههه
انا بقول ان عيد الام حرام
مش بنحتفل بيه
وبعدين مش بيقولوا الام عطاء لاينتظر مقابل
انا قلت ل ماما انا معييش فلوس
ملحوظة مكعبرة
ابقى استلفلى فلوس معاك

ستيته حسب الله الحمش يقول...

ولعلمك فى علم النفس بيقولك اى هديه تزيد عن 10 جنيه مصرى .. هديه لا تعبر عن الحب ابدا .. بل بالعكس تعبر عن اى حاجه تانيه خالص

ههههههههههههههههههههههههههه

ربنا يخلي دعاء
هي دي أمثلة البنات اللي بيجبروا خاطر المامهات
مش انا أحلى هدية

وبدل يا فندم ما تقدم طلب السلفة مع الهدية
اصبر عشرة ايام وقدمه
يمكن تاخد منحة غير مردودة :)

جنــــــــــة الله يقول...

هههههههههههههههههههههههههه
بجد بوست راائع
وانا عارفة انى متأ×رة جدا في الردود
رغم انى مشتركة في الجروب بتاع مدونة بطوط حبوب
بس بجد والله ومش بجامل المدونة حلوووة اووى
وكل عيد ام وحضرتك طيب ^_^
سلامى لطنط
ولاختك برده :)

أبو حميد يقول...

كل سنة وأمهاتنا جميعا طيبيين

ويل دكتور اللى يشوف بلوة غيره تهون عليه بلوتة

أنا مطلوب منى الأتى
1- هدية لأمى
2- هدية لحماتى
3- هدية لجدة مراتى
4- هدية الولاد لأمهم اللى هى مراتى

وجاى تشتكى وعاوز سلفة؟

adel يقول...

وهل عاوز مع البوستات و الـ10 كومنتات طابع بوسطة و دماغات ولا لا ؟؟؟

بما اني اكتشفت ان 12-3 اللي هو عيد الام هو هو نفس اليوم اللي توفي فيه مخرج بحبه جدا (محمد شبل) فقررت اتلكك وواقولها هاروح ازوره قبره افضل :)

TIMMY !! يقول...

السلام عليكم و رحمة الله و بركاته ,
و اسمح لي من أول زيارة إني أقول لك يا " حودة " , مش عارف ليه قلبي انشرح لمدونتك من أول نظرة :)

بص يا عم محمود , أنا هضيف مدونتيك للقائمة عندي لحد ما أروق لهم ,

حاسس إنك شبهي حبتين يا عم محمود ,
ربنا ديم المعروف - اللي ما اتعملش لحد دلوقتي :) - ,

و لي عودة لكلتا مدونتيك ,

بس اقتراح بسيط - من أولها نازل نقد - لو جعلت اسم كل مدونة معبراً عما بداخلها و محتواها , بدلا من أن تكون كلاهما باسمك الشخصي ,

و بس :)

P A S H A يقول...

هههههههههه

جامده الحقيقة العلمية دي .. استأذنك انقلها واترجمها واطبعها واقولها لست الحبايب :))))

سلام يا دوك

Helium Atom يقول...

mosh kont ta5ud taman el pizza badal el fadaye7 di :D

عصفور طل من الشباك يقول...

خلاص يا محمود إنت صعبت علي على فكرة

هسلفك، بدل ما شكلك يبقى وحش قدام ماما

تستلف منها عشان تجيب لها

نهر الحب يقول...

انا باخد من ماما قبلها بفترة ههههههههههههه فلوس اجيب الهدية
هههههههه مانا مفلسة مستمرة
بس النهاردة بعد البوست دا
خلاص هخد منك بس طبعا اكتر من 10 ج

ههههههههههههههه
بوست جميل

Sharm يقول...

هههههههههه

كلنا كده

الباحث عن الصفر يقول...

ايه الجمال ده يابطوط بوست اكتر من رائع
وربنا عارف ان انا غلبان وفى نفس حالتك دى بردك عشان كده وقعنى عندك وعرفت الحقيقة العلمية بتاعت العشرة جنية

بس سيادتك ممكن خدمة المعلومة دى انا هابروزها وهابعتهالك تمضيهالنا عشان بس ست الحبايب تصدق ربنا ما يوقعك فى ضيقة عيد ام

بوست جميل ياريس

بيقولوا سايكو يقول...

جامدة :D :D :D

بطوط حبوب يقول...

شكرا لكل اللى مضى على طلب السلفه

والويل والثبور وعظائم الامور للى ممضاش او حرض ضدى

وشكرا

Zika يقول...

يخرب بيت كده بجد
البوست ده تحفه يابني والله
وواقعي هههههههههههه
بس انا معود أمي الحمد لله على كل سنه وانتي طيبه نظرا لجيب العبد لله اللي رايح ع المصاصات والمورو :D

غير معرف يقول...

( حقيقه علميه .. بس مش كتير من العلماء عارفينها .. تقريبا ولا واحد)
لا بس احنا خلاص عرفنا والمعلومة دي هتبقي راسخة ف كل المناسبات حلوة"راسخة"دى والذنب هيبقي عليك ف الأاااخر......
بس جميلة جدا"
بالمناسبة"كل سنة وانتي طيبة يا ماما" ;)

غير معرف يقول...

السلام عليكم
مدونة جميلة جدا
وبوست حلو

بدري عليا منا عارفة

:)
ألوناتك :)