2010/10/03

مدونين بقى وانت عارف


انا مكنتش اعرف ناس كتير فى لقاء المدونين الاخير بتاع اسكندريه .. عشان كده هكتب كتابه سريعه عن حاجات معينه تمام

اكتر حاجه بحبها فى لقاءات المدونين هى لحظات التفكير اللى بتحصل بعد ما بيخلص .. اصل دايما بتحصل مفاجأت فى الشخصيات اللى انت متوقعها.
مدونات كتير بتشوفها بنظره تانيه بعد ما تقابل صاحبها .. فى مدونات هاديه هدوء مبالغ فيه .. من هدوؤها كنت بتخيل اللى بيكتبها حد قاعد فى جزيره ادام بحر موجه خفيف جدا .. وجنبها موسيقى هاديه .. لدرجه انى كنت بخاف اطلع صوت وانا فى المدونه .. بخاف اعمل دوشه وسط الهدوء دا .. يا راجل دا انا كنت لو فتحت المدونه والنت علق مثلا كنت بخاف اعمل ريفرش للصفحه احسن الناس اللى جوه تقلق .. لو جيت اكتب كومنت بخبط على الكيبورد بصوت واطى وبرضه كنت حاسس انى عامل دوشه فبقيت اقرا وامشى بسرعه  .. تخيل بقى كنت متخيل صاحبه المدونه دى شخصيتها ازاى .. يعنى لو المثل اللى بيقول " تحطها تنحط تبطها تنبط " ينطبق على حد مظنش كان هينطبق على حد زى ما بينطبق عليها .. الغريب بقى واللى يفطس من الضحك ان صاحبه المدونه دى يا نهااااااااار على الهزار والضحك واللماضه .. لدرجه انى قعدت اقولها احلفى انك انجى صاحبه مدونه المهم هات من الاخر .. وفى الاخر لما زهقت منى قالتلى انا اختها التوأم ومش عارف مين اللى اتحرق زى فيلم ايه بس هو فى حد اتحرق فى فيلم هوه واخته التوأم ودى قصه عظه يعنى ملهاش اى علاقه بالكلام اللى فوق دا.
عموما يا كابتن انجى من النهارده انا هدخل المدونه بطبله وشخليله تعويضا عن الايام الخوالى .. دا انا كنت بعدى من جنب المدونه وكأن جدى نايم جوه ولو عملت صوت وصحى امى هتولع فيا.
يخرب بيت خفه الدم والانطلاق بتاعها بجد .. ولو طلعت تكذيب عن البوست دا وقالت انها مكنتش هى انا شخصيا هصدق.
انجى كانت الشخص الوحيد - على ما افتكر - اللى انا متابع مدونته بس مشفتهوش لكن باقى الناس اللى حضرت اللقاء  اما مكنتش اعرف مدونتهم .. او احنا اصحاب اصلا من زمان.

فى مدونات لما بتقراها بتحب اصحابها .. وكل ما تشوفهم تحبهم اكتر ..الكلام دا طبعا طبعا لازم نجيب فيه سيره فاتيما .. كل ما اشوفها ابقى نفسى احدفها بطوبه .. حد يقولى ليه يا مفترى؟! .. معرفش بصراحه ليه بس لما انت بتشوف كائن كده مخلوق من حنيه وحب وطيبه .. بتتفجر جواك نزعات شريره ..بتخيل موضوع الطوبه دا بس بخاف اصلى عارف انى هتقطع تقطيع لو دا حصل من الكتير اللى بيحبوها  .. فبروح ابلطج بقى , مره اخد جنيه معدن منها جديد وبيلمع من البنك , مره اخد منها مصاصه ,, اهو اى اذى وخلاص 
بس بجد والله يا طماطم كل ما بشوفك بحبك زياده .. بس نفسى اشوفك على استنفراد عشان نفسى اشوف رد فعلك لو رميت طوبه وجريت :D
طبعا الكلام اللى فوق بقى دا عكسه على طول يبقى الاخ سووو .. قبل ما تفكر تحدفه بطوبه هتلاقى دماغك اتفتحت متعرفش ازاى .. كائن شرير شرير يعنى ... والاخ صباغ ينطبق عليه نفس الكلام .. قبل ما تفكر تحدفه بالطوبه اكيد هيكون مصورك ودماغك مفتوحه.
والكابتن خالد رقصنى يا جدع .. تصدق يا واد انا حبيتك .. على ايه معرفش بس هو كده وخلاص 

وطبعا لو نسينا حد مننساش التورته والجاتوه .. احنا مناكلش وننكر ابدا .. وتحيه خاصه لكل اللى ساهم فى الجاتوه واتبرع ولو بجنيه وكل سنه و حنين القلب طيبه 
بجد استمتعت باليوم جدا بقالى كتير مخرجتش خروجه حلوه كده وكل الناس كانت بجد روعه طبعا انا مش بعرف اكتب بوستات عن اللقاءات دى بس انا كنت عاوز اعبر عن فرحتى باليوم لانى بجد حبيت كل الى شفتهم فى اليوم وسعيد انى اتعرفت على ناس زى العسل زيهم
ملحوظه : اى حد يروح اسكندريه بعد كده اوعى يروح عند القلعه .. لان هناك ادام جيلاتى عزه .. فى بنت بتغرر بالشوباب .. ولو كنت انت الولد صدقنى هتاخد تريقه كتير لانك عمرك ما هترضى طموحها :D

هناك 20 تعليقًا:

мαησηα يقول...

ههههههههههه هاروح افتن عليك عند فاتيما واقولها محمود عايز يضربك بطوبة ويعورك ويعملك عاهة مستديمة
هههههههه

كل اللى قولتهم دول ناس بجد حلوين اوى

وفعلا اليوم كله كان حلو ربنا يديم ايامكم ع طول حلوة يارب

انا مش متغاظة ع فكرة

мαησηα يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

يانهار اسوح ومنيل هههههههههههههههههههههههههههههههههههه انا هاموت من الضحك اصل انا شوفت الصورة

بس لزمن تنزلها علشان النا تتعرف عليها بسهولة

عاشقه الرومانسيه يقول...

نورتنا يامحمود والله
انت من الشخصيات اللى حضورها كان مفاجئه بالنسبه لى وكنت فرحانه جدا بيه
ربنا يديم المعروف ونورت اسكندريه تانى وتالت ومليون

Haytham Alsayes يقول...

علي فكرة انا زعلان منك
كدة تنساني
ماشى ياحودة

FAW يقول...

كده تنسي تعزمني . . D:

enjy يقول...

أنا جيييييييييييييت

يا دكتور استنى لما أحكيلك الفيلم هو كان فيلم كدة كان فى أختين توءم واحدة كئيبة وواحدة مجنونة والكئيبة محروقة وكان فيلم غم الله يخربيوتهم يا عم متاخدش فى بالك انت بس وركز معاااااااايا

أنا هستنى الطبلة والشخليلة عشان خاطر أنا أعز الهلس زى عنيا وطبعاً دة كان واضح لما كنت بحاول أضيع مستقبل فاطمة أخت حونان بس هى تمسكت بمبادئها ومرضتش تنحرف نياااااااهاهاهاااااا


سووو بقى كان إكتشاف اليوم بالنوسبة لى...اتقابلنا قبل كدة كذا مرة بس اللى هو مكناش بنتكلم خالص وتحس ان فى حقد دفين كدة بينا وبين بعض بس لقيت ان دى كانت هلاوس من عقلى الباطن المريض وطلع الشخص دة فى منتهى العسل اللى فى الدنيا وطبعاً انت عارف ان انا عندى شيزوفرينيا فممكن هو يكون مكانش طايق أختى التؤم...ما علينا متركزش

الصباغ بقى التعليق الوحيد اللى أقدر أقوله هو اييييييييييه دة العفريت جاب الطول دة كله منيييييييييين...ايه صحيح الطول دة؟؟؟ هو واخد تصريح بكام دور يا عم؟؟؟ بس عسول بالجامد برضو

فى ناس كتير بقى مكنتش اعرفهم ولا ارعف مودناتهم بس استنتعت جداً جداً جداً

أما أنت بقى...انت كنت اكتشاااااااف والله..أولاً انت ابن ناس جداً وتربية كليات طب بجد يعنى...شخص كدة محترم وطيب خالص خالص...ب انت جيت على آخر اليوم وكنت حاسة انك أرهقت أوى أوى يعنى

وموتشكرييييييييييين يا فندم عالواجب الجامد لما دفعتلنا فى المواصلات ياااااه ىدى كرم المنايفة..ولن ننسى طبعاً إنى جبت معلقة وقعدت آكل من النجرسكو بتاعك ودة لأسباب جعانية بحتة..بس انت كنت كريم كريم كريم ولا كنت هتغزنى ولا أى حاجة ولا كنت معترض إطلاااااااقاً

كنت منور اسكندرية بجد وانا فعلاً منبسطتش كدة بقالى كتييير أوى وفعلاً اليوم كان حلو حلو حلو بالناس اللى فيه وبالجو والصحبة

ابقى تعالى كتير بقى أوكاى؟؟؟

فاتيما يقول...

نادية

الفيلم اسمه نادية
بتاع سعاد حسنى و احمد مظهر
فين الثكافة السينمائية اللولبية عتفضحونا قصاد الاوجانب
معلش انتا ليك عذرك
كنت بتذاكر عشان تنجح و مش فاضى
فمنقدرش نتكلم
و كفاية المآساة اللى انتا فيها دنتا دكتور يا نضرى
ربنا يتولاك برحمته



ثانياً
البت انجى
انا مسمياها
شقاوة ع الآخر
مش هات م الآخر
لأنها مجرمة و خفة دمها مش على حد
تجسيد كدا للبنت المصرية الجدعة الشقية اللى دمها شربات ورد احمر مزهزه تحب تتفرج بس عليه حتى عشان شكله حلو و لونه فرايحى
انا برضو زيك لما شوفتها
وبحس كتير ان اللى بتكتبه مختلف
عن شكلها ف الحقيقة
اصلها بتكتب جد قوى
و كلام كبير قوى
و عميكككك قوى
و تتخيل انك لما تشوفها
هتلاقيها مخلوقة حزينة
و الدنيا مكسرة عضمها
فتكتشف العكس
انها هيا اللى هتدى الدنيا
بمفك (الله يصبحك بالخير يا آبى) وهيا اللى بتتريقأ ع كل حاجة
انا بعتبر دى شطارة
وثراء ف الشخصية
و قدرة على التكيف
مش انفصام زى هيا ما بتقول
تواضعا منها طبعا



ثالثا بقى
يا جدع احدف طوبة
و لا يهمك
محدش يستجرى يهوب نواحيك
و انا معاك

و لا استنفراد و لا حاجة
ف وسط الجمع الغفيرى و متخفش


انا اصلاً هلقف الطوبة دى
واشيلها تذكار منك يا واد
و بعدين اصورها
و احطها ف الشريط الجانبى
و استخدمها ف تهديد العالم اللى هتضايقنى
يعنى اللى هييجى منك
هينفعنى
متقلقش
يا بطابيطو انتا اخويا الصغير
و بجد غلاوتك عندى مش عادية


و اتمنى البوست دا
يكون احد معانيه المستترة
انك بخير و كويس
و انك مبسوط
و مفيش حاجة مضيقاك


انا اصلاً اول ما شفتك
قلبى ضحك و الله
بجد
انتا ابتسامتك حلوة يا واد
طالعة من قلبك
زى طفل صغير
وانا مش بعاكس


و بمنوسبة المعاكسات
ايه حوار عزة دا ؟
هوه احنا نتورب عنكم شويتين
نلاقيكم ف مرمى النيران كدا
و بيتغرر بيكم؟!
ينفع هذوها الكلام ؟!!

خلاص متمشوش لوحدكم تانى
من غير نون نسوة المدونات
عشان جو الرعب النفسى دا

عقبال كل سفرية
و اشوفك فيها برضو
على الف خير
و احسن حال يا رب

خالص ودى
يا اجدع و اطيب
دكتور سنان ف مصر

مهيج الجماهير يقول...

ماهو أنا أتحب بصراحة يا حودا
:D

والله انا كنت مبسوط جداً انى شوفتك يا حودا

بس زعلان اننا متكلمناش فى موضوع : الدهن فى العتاقى

عامة تتعوض

و زعلان أكتر انى مخدتلكش أى صور فضايح

بس تتعوض برضه

هههههههههههههههههههههههه

الحب الجميل يقول...

بطوط حبوب من غير ألف ولام
صح كدا ؟؟
ههههههههههه

نورت اسكندريه والقاء يا محمود
كل لقاء مدونين وانت معانا ووسطينا
مبسوطه انى شفتك واتعرفت عليك
ومبسوطه اكتر انك انبسطت من اللقاء
مبسوطه وخلاص
مستنية زيارتك على بوست التجمع
سلاااام

richardCatheart يقول...

نورتنا يا محمود انت والله جميل اووووووووى
وشخصيه حلوه مبسوطين اوى اننا اتعرفنا عليك

بس احيه حكايه بتتغرغر بالشوباب دى
انت هاتطلع سومعه على اسكندريه

لالالالالالالالالالا كده شكلك انت اللى هاتتحدف طوبه ههههههههههههه

يارب منورنا ديما
والله عندك حق خالد رقصنى ياجدع انسان جميل ويتحب فعلا
ويارب ديما متجمعين فى الخير

Mahmood البطراوى يقول...

منونا

هههههههههههههههههههههه
لعلمك بقى انتى اللى قلتيلى احدف فاتيما بالطوبه وفاتيما عارفه
وحرضتينى اكتب البوست دا
وبالاماره قلتيلى هتدينى ورقه بمتين ولسه مختش منك حاجه
ما تجيبى الفلوس اللى عليكى يا كابتن :))

كان نقصك اليوم يا منونا بجد بس تتعووض ان شاء الله

=============================================
عاشقه الرومانسيه
ربنا يخليكى يااااااااارب وسعدت بلقائك :)
ربنا يديم الود يارب :)
=========================================
Haytham Alsayes

يا بنى هو انا جبت سيره حد اصلا :))
واله بجد يا هيثم انت من الناس اللى دخلت القلب كدهون من غير اى حاجه :)
وعقبال المره الجايه :)
============================================
FAW

نفسى تقتنع يا كبير انى بتعزم مش بعزم :)
===========================================
enjy

بطبله وشخليله من هنا ورايح
ال توأم واتحرق ال

والله يا فندم انتى كنتى مفاجأه اللقاء ليا
وانا مكنتش اجهدت فى الاخر انا بس فصلت شحن لانى تلقيت خبر على التيلفون بوظ لى المود شويه :))
لكن احنا نلف اسكندريه كعب داير ولا نقول اه
==========================================
فاتيما
انا برضه لما سألت خالد فى العربيه وقالى فاتيما جايه قلبى رفرف من الفرحه :)
هو انا هفضل كل مره اشوفك احبك اكتر كده؟ مش لاعب انا ..كده مش هعرف احدف الطوبه

ويا فندم اوعى تقلق عليا
انا مره القطر عدى وداسنى ومامتش :)
ربنا ياااااااارب يسعد ايامك يا فاتيما زى ما بتسعدينى لما بشوفك
===========================================
مهيج الجماهير

فكرتنى والله يا خالود
:))
المره الجايه بقى ان شاء الله قول يارب
مش عارف اقولك فرحت انى شفتك اد ايه فمش هقول بقى :D
===========================================
الحب الجميل
انا والله اللى سعدت بلقائك واليوم بجد كان تحفه بيكم :)
ربنا يارب يديم الود
=========================================
richardCatheart
هو بصى خلى منونا تديكى لنك الصوره اللى على الفيس بوك
هتحل لغز اخر سطر :))

سعدت بجد بمعرفتك يا فندم وربنا يارب يديم الود

gogo!sf يقول...

طبعا فى الاول انا سعيده جدا انى اتعرفت عليك وزى ما انت قولت كده لوحد نسى اسم حد اوعى يزعل ابدا هههههههههههههههههههههه

طبعا انا مقدرة موقف كل الناس اللى كانت هناك وكتبت عن جمال اليوم وعارفه انهم مش هيتذكرو تلت تربع الاشخاص اللى كانو هناك عشان كلنا مش كنا نعرف بعض ولا حتى نعرف مدونات بعض
بس اكيد ان شاء الله هنعرف بعض اكتر فى اللقاءات القادمه
وبجد كان يوم جميل جميل وانت من الشخصيات الهاديه بردو يا حودا

ربنا يحفظك ويحميك
واوعى تروح عن جيلاتى عزة مرة تانيه
ملكش دعوة بالناس يا محمود خالص
سلام يا جميل

كيــــــــــــارا يقول...

هههههههههههههههههههههههههههه

ربنا يسعدكم يااااااااااارب


بس ملش بئا الا فاااااااااااااتى دى حبيبتى انا

wa7ed w5las يقول...

انت بجد حد لذيذ خالص يا محمود وشبه واحد صاحبي بعزه جدا وعايز اقولك انت كلامك فعلا صح وانا بايده بخصوص انجي .. دنا حاسس اني شوفتها من ييجي 99 سنة كده :D:D

تحياتي ليك ..
حمدي -> واحد وخلاص

محمد التركى يقول...

السلامو عليكم

عم محمود

بجد والله نورتنا جدا
انته من الشخصيات الجميله اللى تتحب بسرعه والمحترمه جدا جدا

أنا سعيد جدا انى اتعرفت عليك ياحوده

واكيد هشوفك كتير

وبعدين فاتيما ياحوده
فاتيما بالطوب كمان
لالالا ياراجل
ديه من الشخصيات الجميله جدا
ههههههههههههههه

انا عارف انك بتقول كده من ورى قلبك
ههههههههههههه

بجد انا سعيد انى شفتك واتعرفت عليك

تقبلى مرورى واكيد يكون هناك تواصل مابينا

محمـــد التركـــى

دنيا....اوحياة يقول...

انا عجبني عنوان المدونة :)

mrmr يقول...

هو انتا من الجماعه اللى بيحدفوا الناس بالطووووووب
يا خراشىىىىىى

بس فعلا كان يوم جميل ربنا يعيد علينا الايام بخير ومتجمعين فى الخير

وبالزمه بلاش اسلوب تحديف الطوب اى نعم مش جاتت فيا طوبه بس بخاف من منظر الدم هههههههههه

كل لقاء وانت واحنا بخير ومتجمعين

مدونه هنا السناهره يقول...

مدونه رائعه وموضوع اروع
واتمني مروك في مدونتي

ميشوو يقول...

بجد بجد يا لتني كنت معاكم ‏:‏))‏

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى
www.ouregypt.us