2008/01/29

ماما .. انا عايز اتجوز



المشهد: انا نايم فى الصاله ع الارض ومتغطى وجابنى كوم مناديل وطبق فيه تلج وامى جنبى بتعملى كمادات وكمان عندى امتحان الصبح


-انا شكلى هموت ياماما

*كل ده عشان شويه برد

-بجد انا شكلى هموت بس الى صعبان عليه انى هموت من غير ما اتجوز

*شوف احنا فى ايه وهوه فى ايه

-لا بجد طب مين هيصوت عليه لما اموت وانتى شكلك كده مفيش فيكى حيل للصوات

*لا مقلقش انت خالص هنبقى نتصرف

-طب قوليلى كلمه حلوه وانا فى اخر ساعاتى فى الدنيا

*اقولك ايه يعنى

-قوليلى انك هتجوزينى

*حاضر

-اقولك انا خطرت فى دماغى فكره بلاش حكايه تجوزينى دى

*ايه عقلت وربنا هداك

-هتسى ..... لا انا خطرت فكره هترضى كل الاطراف

*ايه؟؟؟؟؟؟؟؟؟

- اشتريلى جاريه

امى تفطس من الضحك ووووووووو طش......... ده صوت طبق الميه الى بقى فى وشى

-ايه ده عشان انا مريض ومش هقدر ادافع عن نفسى
* لا والله غصب عنى طب وهتجيب لك جوارى منين

-فى جنوب افريقيا بيبيعوا جوارى لسه
تتدخل اختى وتقول يا عينى عليك يا محمود اخرتها جاريه من جنوب افريقيا وده اثر افلام الرعب الى بتشوفها

- (انا فى نفسى) الظاهر البت دى بتتكلم صح شكلى هدبس نفسى فى جاريه سوده جداااااااااااا وانا مش بحب اللون الاسود خالص ومش ناوى اخلف بكار

*خلاص انا موافقه

-( اسرح تانى بخيالى ) اه وكمان ساعتها امى ايام الامتحانات تقولى مفيش جوارى الاسبوع ده فى مذاكره ولما تحب تعاقبنى تشيل الجاريه فوق الدولاب او تبوظ البور بتاعها

*هاااااااا قلت ايه

-بصى ياحاجه انتى ناويه تجوزينى امتى ؟؟؟؟؟؟؟؟

*بعد الكليه ب 2 سنه

-والله ليه ناويه تخليلينى ولا بتساعدينى ع الانحراف ؟؟؟؟؟؟؟؟؟ هوه ايه الذل ده ولا عشان جوزك وابوكى ماتوا محدش هيمشى كلامه عليكى لأ فوقى انا هنا الكل فى الكل الكلمه كلمتى والشورى شورتى

اتخن صوتى وافرك شنبى واقول بصوت عالى ::::::: امينه ارجع من الامتحان الاقيكى روحتى بيت ابويكى يا امينه
*حراااااااام عليك يا سيى السيد

- من امتى بتردى على يا امينه؟؟؟؟؟؟؟

*والنبى اسفه يا سى السيد

-طب انا هخطب فى امتياز يا امينه وشيلى بقى الفوطه دى عشان اقوم اذاكر

*بعينك يا سى السيد

وفى الصباح

- امينه فلوسى خلصت وعايز فلوس عشان اروح الكليه

* انت ياواد لحقت تصرف مصروفك نفسى اعرف انت بتصرف فلوسك فى ايه

-( وانا بجرى بسرعه من ادمها) بحوش عشان اتجوز من وراكى يا امينه