2010/07/10

اتكلموا



من فتره زمان اوى شفت اتنين خرس بيخانقوا فى المترو .. الموقف كان غريب جدا .. هم بيشاوروا بإيدهم لانهم مش بيتكلموا .. والناس شايفاهم هايجين فبيمسكوا ايديهم عشان يهدوهم .. مسك ايديهم بيخليهم يتنرفزوا اكتر لانهم مش عارفين يوصلوا الكلام لبعض .. والناس مش مستوعبه انها كده مش بتحوش بنهم دى كده بتنرفزهم زياده.  الموقف على الرغم من انه كان مؤلم بس كان مسخره 
كل واحد فيهم بيحاول يفك ايده من الناس اللى مسكاه .. والناس فاكره انهم هيضربوا بعض فبيمسكوا اكتر .. وفضل الموقف دا يجى كام دقيقه لحد ما الناس استوعبت انهم مش هيضربوا بعض دول بس معندهمش وسيله تانيه للكلام الا الاشاره.
أكبر عقاب تعاقب بيه اى شخص انك تحرمه من انه يشرحلك حقيقه موقفه .. واكتر حاجه ممكن تغيظ اى شخص انك تبقى عارف ان مواقفك نرفزته ومتجيش وتتكلم وتشرح موقفك
يوم ما شفت الموقف دا .. رغم انى ابتسمت غصب عنى لأن الموقف كان للوهله الاولى يضحك .. ورغم انه صِعب على اوى الشخصين دول .. الا انى حمدت ربنا من قلبى انه محرمنيش من متعه الكلام.
خناقات كتير الواحد بيشوفها وفى الاخر يطلع سببها سوء تفاهم .. والسبب ان فى شخص كان لازم يتكلم ومتكلمش. .. توقع ان موقفه واضح , ان الشخص التانى هيفهم لوحده .. او لأى سبب متكلمش... غلطه كبيره كلنا بنقع فيها
ولو كان لازم نطلع من البوست دا بحاجه .. بلاش نزعل ناس مننا عشان بخلنا عليهم بشويه كلام
وعلى رأى جاهين
اتكلموا
اتكلموا .. اتكلموا .. اتكلموا ... محلا الكلام ، ما ألزمه و ما أًعظمه ... فى البدء كانت كلمة الرب الاله ، خلقت حياه ، و الخلق منها اتعلموا ...
فاتكلموا
فى البدء كانت كلمة الرب الاله روح بجناحين شطار ، و صار للكون مداه . آخر مطافها ، جت و حطت ع الشفاه ، لما البشر ملكوا الوجود ، و استحكموا ...
فاتكلموا
الكلمة ايد ، الكلمة رجل ، الكلمة باب ، الكلمة نجمه كهربيه فى الضباب الكلمة كوبرى صلب فوق بحر العباب ، الجن يا أًحباب من ما يقدر يهدمه ...
فاتكلموا
الرمل مرمى تحت قبة السما ، مشتاق لقطره من المطر فيها النما ، ملايين سنين عمره ما داقها ، انما فيه كلمة تقدر فى المراوى تِعَوَّمه ..
فاتكلموا
فيه كلمة تقدر تزرع البور حور ضليل ، و كلمة تقدر تجعل الكوخ بيت جميل ، و ابو العيال و الجلابية الهلاهيل ، فيه كلمه تعطيه مال ، و كلمة تِهندمه ..
فاتكلموا
لكم السلام ، يا ملفوفين حول اللهب ، يا غواصين فى القلب ع الكلنه العجب ، فى البدء كانت كلمة الرحمن سبب و ما عادش غير الحق كلمة تِتَمَّه
فاتكلموا
متنسوش تقولوا رأيكم فى الثيم الجديد بتاع المدونه

هناك 21 تعليقًا:

أنا - الريس يقول...

ما أحلي الكلام إن كان حق .. وما اسوءه علي صاحبه إن كان باطل .. المشكل أن الناس ربما تبدأ الكلام بحكمة وتنهيه أنها تريد اثبات أنها صح .. وهنا الخرس أحساً الكلمة ربما تكون فعل وفي الخير تلك أفضل الكلام وفي الشر ذلك أسوءها .
تحياتي لشعر صلاح جاهين تقريبا .

sony2000 يقول...

المهم الكلام ابو فايده موش ابو الررررررررررغي وبس
وبجد صلاجح جاهين ده
لاتعليق علي كلامه:)

Maha Shahen يقول...

جميل الموضوع برغم انه موقف مؤلم فعلا بس نتعلم نقول الحمدلله علي نعمه علينا بجد الحمدلله الذى عفانا مما ابتلى به كثيرا ممن خلق
اما عن الكلام فهواحيانا بيكون سهل جدا بس فى اوقات تانيه بيصعب فيها الكلام مش علشان بنتصور ان موقفنا واضح وبس لكن احيانا بيكون مش سهل فعلا نتكلم ولا ندافع وكأننا بنرضى بلى هيحصل مهما كان
يلا ربنا ميجبش خلافات بأذن الله
وموضوع بجد تسلم عليه وزينته بكلمات لعمنا صلاح جاهين كلمات ليها العجب
خالص تحياتى ليك

ميشوو يقول...

الحمدلله على نعمة الرغي :‏)‏

مع اني هاديه كتير بس لما اكون متعصبه بيخرج كلام معرفش جا منين ربنا يكون في عونهم ‏

أنا كنت فاكره انهم مش عايشين معانا في الدنيا لاني مكنتش اعرف عنهم كتير الا لما قعدت مع بنت من الصم والبكم بنت ماشاءالله عليها تجنن

بس كانت بتموت ضحك عليا لاني مبعرفش لغة الاشاره وحركاتي على قدي ‏:‏)

وعلى فكره الموضوع لاول وهله كمان مضحك بشكل موقف الناس التانيه قصدي


ربنا يديني طولة العمر واشوف عيالك وعيال عيالك‏<‏‏<كتبت التعليق وانا في سريري يعني الباتري خلص ههههههههههههههه

AHMED SAMIR يقول...

تصدق بالله
بوست رائع بجد
الكلام و القدرة على التعبير متعة و نعمة
تحياتي

دنيا الحياة.... يقول...

فعلا لغة الصم والبكم دول من كتر مابجد بتأثر بيها كان نفسي اتعلمها اوي ..والحقيقة كان نفسي اشوف اللي بيتخانقو دول بجد ..ربنا يصبرهم

والثيم بتاع المدونة جامد ;)

ويكا يقول...

بغض النظر عن الكلام والقدره عليه

المغزى من البوست عجبنى بصراحه ، وطريقة التعبير عنه او ايصال الفكره عموما كانت طيبه حقيقى.

بطوط ، انا عاجبنى فيك بصراحه ، حسن المنطق

تحياتى

غير معرف يقول...

كلام جميل ...كلام معقول ...مقدرش اقول حاجه عنه
D:

روز

محمد فاروق الشاذلى يقول...

الله عليك يا بطوط يا جميل
بوست جامد جدا والله العظيم.
فعلا لازم نتكلم علشان حقوقنا ماتضعش، وعلشان مايحصلش سوء تفاهم بينا.
الله ينور عليك.

عصفور طل من الشباك يقول...

ياااااااااااه على نعم ربنا علينا

رحلتنا في الحياة يقول...

البوست دا جميل اوى عجبنى جدا
لاسباب كتير انى اتعاملت عن قرب مع ذوى الاعاقة السمعية وحمدت ربنا بجد على نعمة انا كنت مش واخدة بالى منها
الناس دى بتتعب بجد علشان توصل اللى جواها لينا
الحاجة التانية ياما بيكون جوانا كلام كتير نفسه يخرج بس الف سبب وسبب يمنعنا

ست البيت يقول...

ربنا يكرم وتخرج من حالة الكآبة دي يا بطوط
الدنيا فيها حاجات حلوة
ايه رأيك في الكلمتين دووول
يموتوا من الضحكك أساسا
الدنيا غابة في ديابة
في ايه يابني
محسسني انك كملت الأفية الثالثة من عمرك
روق يا دك روق

وفعلا الحمد لله إن الواحد قادر يتكلم ويمشي ويشوف

اصل النظر دا نعمة ما تتوصفش

غير معرف يقول...

ما اروعك
اعجب و اغرب من الخيال

ما اروعك
ملكتنى بسحر الجمال

سحرتنى ملكتنى خلتنى استتبعك
اكتب كلام اسهر ما انام
لما اشوفك اسمعك

سحرتنى
ما اروعك
ملكتنى
ما اروعك

امضاء ... اخوك الليمبى

z!zOoOo يقول...

السلام عليكم

ازيك يا بطوط يارب تكون بخير

صدقني الكلام مابقاش ليه فايده

ولا بيجيب نتيجه

:(

حـــــ الــجــنــة ـــــور يقول...

سلام عليكم


الكلام حلو والحمد لله على النعمة دي

بس كما يقال خير الكلام ماقل ودل


دمت بخير

تقبل مروري

يــوم جــديد يقول...

مواقف زي دي الواحد بيتعلم منها كتير وبيمشي بيها في حياته بعد كده

بس المهم اللي يتكلموا يلاقوا حد يسمعهم عشان دلوقتي ناس كتييير أوي مش عندها استعداد تسمع

هو يعني ايه (الكلنة) ؟

القالب الجديد للمدونة : كل ما سبق :)

babosha يقول...

البوست جميل جدا والفكرة منه اجمل وعجبنى قوى

غير معرف يقول...

بجد حلوة
اولا لاننا لازم ننظر للامور الحياتية بهذا العمق عشان نحمد ربنا بيقين وصدق
ثانيا :لان الحياة مكلكعة لوحدها ومش محتاجة زيادة كلكعة باننا ما نشرحش مواقفنا لبعض

FAW يقول...

الحمدلله الذي عافانا

غير معرف يقول...

طول عمرك عسل

pinky يقول...

مؤلم جدا الموقف دة
الحمد لله على نعمة الكلام
و بالنسبالك انت بجد بجد يا بطوط انت اكتر ولد رغااااااااى شوفته ف حياتى
:D