2009/07/08

مين هيعملنا البانيه




الوقت : بعد المغرب
المكان :  المسجد .


قول ورايا " زوجتك موكلتي .. زوجتك موكلتي .. الانسه دعاء .. الانسه دعاء .. على كتاب الله ..على كتاب الله .. وسنه رسول الله ... وسنه رسول الله .. وعلى مذهب الإمام الأعظم أبو حنفية النعمان .. وعلى مذهب الإمام الأعظم أبو حنفية النعمان .. وعلى الصداق المسمى بيننا .. وعلى الصداق المسمى بيننا .. عاجله واجله .. عاجله واجله

" وأنا قبلت زواج الانسه دعاء .. وأنا قبلت زواج الانسه دعاء .. بنفسي لنفسي .. بنفسي لنفسي .. على كتاب الله .. على كتاب الله ... وسنه رسول الله .. وسنه رسول الله .. وعلى الصداق المسمى بيننا .. وعلى الصداق المسمى بيننا .. وعلى مذهب الإمام الأعظم أبو حنيفة النعمان .. وعلى مذهب الإمام الأعظم أبو حنيفة النعمان.
ألف مبروك ألف ألف ألف مبروك ... للولوولولوولولولوولولولوولولوولولولوولولولوولوى
الوقت : بعد العشاء
المكان : قاعه الفرح
ألف مبروك .. عقبال فرحك يا دكتور ..  وناس كتير بيباركوا لامي .. وعقبال محمود ومحمد ياااااااارب
" وأنا عمال أقول امين "
الوقت : الساعة اتنين
المكان : البيت
أنا صاحي من النوم ورايح اصحي ماما من النوم
ماما فين دعاء؟؟
في بيت جوزها .. وسيبنى أنام أنا تعبانه ومش قادرة
يعنى إيه في بيت جوزها ... دعاء مش هنا فى البيت ؟؟!! انتوا بتهرجوا
يا بنى أنت مش كان فرحها امبارح وأنت اللي كاتب الكتاب
وده يبقى معناه انها تبات فى بيت جوزها .. مش لاعب .. محدش قالي كده
محدش قالك ايه؟؟ هو أنت لما تبقى تتجوز ان شاء الله .. هتسيب مراتك فى بيت اهلها
محدش له دعوه بمراتى .. ثم مين هيحب اخته اد ما انا بحبها
طب اخررررررررج بقى عاوزه انام
المكان : اوضه ماما
2:05
ماما اصحى ياله
عاوز اييييييييييييييييه؟
ياله نروح نجيب دعاء كفايه كده
نجيبها منين؟
انتى مش قلتى انها فى بيت جوزها .. نروح نجيبها من هناك
طب اصبر للصبح
يا حاجه انتى .. نسيبها للصبح ازاى؟ .. مش نافع احنا نروح دلوقتى
ابوس ايدك سيبنى اناااااااااااااااااااام انا قرفت منك
2:10
ماما دعاء وحشتنى ... ياله نروح نزورها ومش هناخدها
نزورها الساعه اتنين ؟؟!! احنا اتهبلنا .. روح نااااااااااام والصبح هنروح وريحنىىىىىىى
طب تعالى نروح نوديلها الاكل .. هتلاقيها جعانه
لا ملكش دعوه
هو ايه اللى مليش دعوه .. قومى بقى كفايه نووووووووم
الله يخرب بيت اللى يزعلك سيبنى انااااااااااااااام
2:30
ماما انا عاوز اكل كفته
حاضر لما يجى الصبح
لا انا عاوز دلوقتى .. وكمان انتى مبتعرفيش تعليمها .. دعاء اللى كانت بتعرف تعملها
حاضر بكره ..هبقى اقولها تعملنى ازاى بتتعمل
طب والبانيه؟؟!!
حاااااااااااااااضر لما يجى الصبح هعملك كل حاجه
طب واحنا ايه اللى يخلينا نعمل فى نفسنا كده .. ما كانت دعاء هنا
بكره انت راخر  تتجوز .. وتاخد مراتك من اهلها .. ولا هتسيبها فى بيت اهلها؟؟
قلت لك ملكيش دعوه بمراتى .. اخوها مش هيبقى بيحبها اد ما انا بحب اختى
طب يا اخويا ربنا يخليكم لبعض وابوووووووووس ايد اللى مخلفينك سيبنى انام
3:00
ماما انا مش عارف اتفرج على التلفزيون .. دعاء اللى كانت عارفه ترتيب القنوات .. والحاجات الحلوه بتيجى فين .. وكانت حافظه المواعيد
يا بنى انت اساسا مش بتحب التلفزيون ..
لأ بقى بحبه ومش عارف اتفرج على حاجه
طب بكره ابقى خد منها المواعيد
يوووووووووووووووووووه
3:10
ماما قومى نتكلم شويه
لااااااااا انا تعبانه يااااااااارب ارحمنى
دعاء كانت بتسهر تتكلم معايا
حاضر هنبقى نتصرف
3:20
ماما خلاص انا جاتلى فكره هتريح جميع الاطراف
قووووووووووول وخلصنى
هى تقعد عندنا اسبوع وترجع تقعد عنده اسبوع
لأ مينفعش
يووووووووووووووووووووه انتى عماله تعقديها ليه
ابوووووووووووس ايدك سيبنى انااااااااام والصبح نشوف حلولك العبقريه دى
المكان : أوضه محمد
الوقت 4:00
محمد مين هيعملنا البانيه .. مين هيعمل الكفته .. هنكلم بين لما نسهر .. مين اللى هيغير التلفزيون ويحفظ المواعيد
يا بنى انت بص للجزء المشرق .. , الدولاب هيتقسم على اتنين .. مواعيد الكمبيوتر هتتقسم على اتنين  .. هنتفرج بمزاجنا على التلفزيون بدل الاحتلال اللى اختك عملاه , بقى عندنا سرير فاضى لما نزهق من سريرنا ننام عليه , النفس قل فى البيت , المكتب بقى فاضى , يا بنى دا احنا ممكن نطالب بعلاوه فى المصروف ونقسم مصروف دعاء
امممممممممممممم تصدق فعلا عندك حق .. احنا ليه مجوزنهاش من زمان ؟؟.. بس الكفته والبانيه امك مش اد كده فى عمايلهم
اممممممممم فعلا مشكله .. بس اطمن ان شاء الله هنحلها .. وسيبنا موضوع جواز البونيه .. وقعدنا ندور لحل لموضوع الكفته البانيه .. ولحد دلوقتى مش لاقيين حل
مااماااااااا خلاص انا داخل انااااااااااااام
***************************
انتهى البوست ونيجى دلوقتى لـ
شويه فلسفه بقى
طبعا البوست دا محصلش بالشكل دا .. ببساطه لان امى اساسا منامتش فى اليوم دا .. رغم انها كانت تعبانه بدرجه لا توصف.
عارفين لما الأب بيتوفى والأولاد فى سن صغير .. أمهم دايما بتحطهم تحت جناحها .. بضمهم أوى .. بيبقوا قريبين من بعض بدرجه لا توصف .. وأظن انهم بيحبوا بعض اكتر من لو كان باباهم معاهم .. يمكن الاحساس بالضعف بعد وفاه الوالد بيخليهم يحسوا انهم ملهمش غير بعض .. ويمكن التربيه بحنان الام من غير شده الاب هى اللى بتزرع دا جواهم ..  لو حد منهم ساب العش .. العش مبيبقاش له طعم .. ويمكن عشان كده انا حاسس ان البيت مبقاش له طعم
ربنا يوفقك يااااااارب يادعاء ويسعدك وسعد ايامك كلها واشوفك دايما فى احسن حال .. الواحد معرفش فعلا اد ايه بيحبك الا اليومين دول
 بس السؤال دلوقتى اللى شاغل دماغى انا ومحمد اخوايا .. يا ترى مين هيعملنا البانيه؟

هناك 44 تعليقًا:

احساس طفلة محبة للرومانسية بس واقعية يقول...

مبروك ليها يا بطوط عقبالك انت واخوك

ياه الفوايد كتير اهو بس لو جت على الكفتة والبانية بسيطة ما انتوا اكيد هتزروها وابقوا قولولها فى اليوم دا تعملهولكم عقبال ما ماما تعرف ازاى تعملها

هو شعور صعب بأختفاء احد افراد الاسرة من البيت حتى لو كان قريب مننا بس مع الوقت هتتعودوا ان شاء الله
وهى ربنا يسعدها

تقبل مرورى

Zika يقول...

ازيك يا بطوط
اولا مبروك لاختك وربنا يسعدها في حياتها يارب
وبعدين يعني هي المشكله دلوقت في البانيه والكفته يا عم اذا كان عليهم تعالي عندنا انا امي مابتعرفش تعمل غير بانيه وكفته
بس جامد البوست واكيد انت عارف بس تصدق اول مره ادخل مدونتك ياض
واحشني يا دكتور

Appy يقول...

لا دى معضله دى مصيبه نأجل كل حاجه الا الكفته والبانيه
اشوف فيك يوم يا بطوط يكون بمبى مزهزه
اولا مبروك لاختك ثانيا فيه اختراع فى السوق اسمه كوكى او امريكانا او حتى المتنيل على عينه بتاع الفرخ بيبيع البانيه متبل او استنضف وروح ممترو او كارفور هتلاقى الحاجات معموله زى اللى فى البيت روح هات وسيب البنوته فى حالها
وبعدين صحيح البيت وسع اهو عليك
ربنا يخليكوا لبعض يا رب

سمو الأميرة سارة يقول...

هههههههههههههههههههههههههههههههههههههههههههه بجد بوست ممتع اوي

معاك حق لو حد طار بعيد عن العش ما بيبقاش ليه طعم

ربنا يسعدها يااااااااارب

سمر امام يقول...

بس بقه عشان حاسه انى عاوزه اعيط

لالالااا بس انت مالكش حق ازاى تسيب اختك تبات بره البيت

صاحب المضيفة يقول...

على فكرة يا حلو انا شفتك من البلاكونة وانت معدي من قدام البيت عندنا وكنت عاوز انادي عليك بس امي قالت لي انهم معزومين على .... جنبنا بشكل عائلي قلت ياهناه يا عم مين قده

يعني انت سايب ال.... وجاي تمسك في البانيه

شكرا ياعم لانك عزمتني على الفرح مع ان امي واختي راحوا لانهم كانوا معزومين

مش عاوز اقول اكتر من كده

سلام يا ابن اختي

samarpinky يقول...

3o2baliiiiiiiiiii :D
w law eni 3arfa eni m7dsh hayfakar la fe banee' wala kofta wala 7atta beid :)))
mabrooook ya batoooot

ňįĝŗő يقول...

مبدئيا كده و بدون أي مقدمات
ألف ألف ألف مبرووووووووووووووووووووووووووك لأختك يا دكترة
و عقباااااااالي يا رب قريب
و عقبالك يا عم انت كمان علشان ماتزعلش
ثانيا كده و بدون أي مقدمات برضه
من الواضح إن اخوك محمد شخصية سياسية محنكة كيك و دماغ جبارة فحت و حكيمة لأبعد الحدود
يا أخي سبحان الله كل المحمدات كده
ابقى سلملي عليه الهي تتستر

ألف مبروك لأختك .. و ربنا يباركلهم في بعض و يجمع ما بينهم على خير



يلا سلام

ليس فقيرا من يحب يقول...

السلام عليكم
اولا وقبل كل شيىء دمك عسل بجد
ثانيا مبروك لدعاء وعقبالك وعقبالى انا كمان من نفسى برده هههههههه
ثالثا لو الحوار الاولانى ده حصل معايا فى يوم يعنى وابنى المستقبلى ان شاء الله جه يرزل عليا كده وانا نايمه هاقوم اخرطه وارتاح منه
بجد مدونه جميله تقبل تحياتى

دعاء مواجهات يقول...

ياربنا على العيال اللى همها على بطنها ياجدعان

اية ياابنى اعتق شوية

وبعدين لو مفيش دعاء اختك

انا موجودة

انا ممكن اعملك البانيه

- المعنى فى بطن الشاعر -

هههههههههههههههههههههههههه

بيس يابطوط وعقبال كل النااس ياارب ..

أبو خالد يقول...

الف مبروك لأختك يا محمود و عندك حق نشعر بفراغ كبير لخروج احد أركان الأسرة من البيت

صيدلانيه طالعه نازله يقول...

تصدق اول مره اجى عندك و اعيط
اصلك فكرتنى باخويا ساعه ما انا اتجوزت كان كل ما ماما تعمله اكل كان يقولها علا بتعمله احسن من كده
اصلنا قعدنا مع بعض سنتين لوحدنا ايام الكليه و بعدين بقى يجى عندى فى ايام الجمعه لغايه ما خلص
هيا دايما البنت بتبقى سكره البيت ووجوازها بيسيب فراغ هايل
الف مبروك ليها و ربنا يهنيها و عقبالك يا بطبط اما نفرح فيك بس تنقيها بتعرف تعمل بانيه

Me7'o يقول...

ألف مبروك يا دكترة

معلش هو ده حال الدنيا
خروج أختك من البيت مابيجيش إلا بخلع الضرس
هههههههه


أنا قعدت سنة بعد ما اختى أتجوزت وأنا مش فاهم أساساً إيه اللى حصل مع إن كان اختصاصها بيتزا
هههههههههههه


ربنا يخليكم لبعض وعقبال ما يطلع ضرس جديد كده صغنن علشان يكمل الطقم وما ينيمكوش الليل
هههههههههه

mohamed ghalia يقول...

بطوط
عندما أتى إلى هنا أتى دائما لأبتسم ولكن هذه المرة مختلفة تماما فلقد أبكيتنى
ربما لأنى عشت معك تلك اللحظات وربما لأنى من أكثر الناس التى تشعر بك وربما للظروفنا المتشابهة وقرابتنا التى أعتز بها
دمت بكل خير يا اخى الغالى
وأسعد الله أختى دعاء
واهى ترتاح منكم هى كمان ههههههههههههههه

جحا المصرى يقول...

مبروووووووووووووووووووووووووووك
وعقبالك يا بطوط

مهندس مصري يقول...

هههههههههههههههه
ألف مبروك يا دكتور
أنت فكرتني بجوازة أختي
فضلت بعدها بتاع سنة حاسس إن البيت ناقص كتير قوي و ما راحش الإحساس ده غير لما خلفت بنتها الأولانية و بقيت أنا خال و هاتك يا لعب مع بنتها
و دلوقت بقيت بألعب مع بناتها الإتنين لما بأنزل أجازة

ست البيت يقول...

الله يسامحك يا بطوط
خلتني اعيط
بس انظر للجانب المشرق
هي مرتاحه من وشوش حضرتك أنت ومحمد افندي الجميلة
وبعدين هي في بيت واحد جوزها يعني بتحبه وبيخاف عليها
وبعدين ماما بكره لما دعاء تيجي تزوركم هي اللي حتقولها روحي لو باتت عندكم كام يوم
سنة الحياة يا بطوط
وليك عليا لما تيجي اسكندرية
الحاجة أم منوسي
تعملك أجدعها بانيه
أي خدمه
بس انت انوي
وهات ماما ومحمد ودعاء وجوزها كمان
هو احنا عندنا كام بطوط يعني
بس اللي غايظني انك تكتب كتاب البونية فجأة كده
ضيعت على نفسك علبة الجاتوه انت الخسران
عموما هي فعلا مشاعر حلوة قوى ومحزنة قوي ويمكن لأني نفس الظروف فحاسيتها قوي يوم كتب كتاب محمد اخويا الكبير
كنا فرحانيين لدرجة ان احنا كنا بنعيط
الحمد لله
عقبالك يا بطوط انت والواد عكروووت اخويا
اللهم آمين
وسلامي لدعاء وباركلها جدا
قولها
بارك الله لكما
وبارك عليكما
وجمع بينما في الخير

Saturn يقول...

lma tla2t 7ad y3mlko baneeh matnsash tb3aaaaaatly :P

وومن يقول...

يا خبر صحيح إية المعضلة دي مين هايعمل الكوفتة والبانتية فكرتني لما شيماء اختي اتجوزت كنا شايلين هم مين هايعملنا المكرونة الباشميل وصنية البطاطس ودلوقتي الحمد لله حلينها كل ما نروح نزرو اختي وتسألنا عاوزين تتغدوا ايه طبعا مش محتاج اقولك :)

الف مبروووووك لأختك ربنا يباركلها في جوزها ويسعدها

كيــــــــــــارا يقول...

هههههههههههههههههههههه شوف الناس اللي بتبص للناحيه الحلوه الدولاب مقسوم لاتنين ههههههههه والكمبيوتر يالهوووووووووووووي هههههههههههه

ربنا يباركلها في بتها ويرزقها الذرية الصالحه بس مين اللي هيعمل البانيه ؟؟ سؤال يطرح نفسه

جمعاوي صاحب "عيادة أسنان" يقول...

عععااااااااااااااااااااااااااااااااا

انت بتهرج يا بطراوى

حد فى فرح اخته يكتب بوست يعيط :(

انت بتستهبل ياد

كمان يا تعبان انته ما عزمتنيش ع الفرح

مااااااااااااااااااااااااااااشى يابطوط
لما اشوفك بس


عموما الف مبروووووووووك وعقبالك تتجوز وتريحنا:)

و........

بجد بقى :

------------------

لو حد منهم ساب العش .. العش مبيبقاش له طعم ..
------------------

كلام مؤثر اوى
حاسس بيك والله يا حبيبى

ربنا يحفظكم لبعض


بس ما عزمتنيش ليه ع الفرح يا تعبان

هبة المنصورى يقول...

: ) بقالي كتير ماجيتش هنا بس حلو إن آجي ف مناسبة حلوة
مبروك لدعاء.. ويارب دايماً أفراح.. بانيه ايه بس!

موناليزا يقول...

الف مبروك لاختك وعقبالك ان شاء الله
ربنا يسعدها ويباركلها فى حياتها

لماضة يقول...

ابقى تعالى اعملهملك انا
بشرط تيجي فرحي زي دعاء

فاتيما يقول...

تعرف يا محمود
لوهلة كدا حسيت إن الحوار اللى بينك و بين والدتك دا حاصل من ييجى عشر سنين مثلاُ
و إن دعاء تبقى اختك الكبيرة و ف يوم فرحها من زمان دا كان رد فعلك
طفل صغنن متعلق بجنون باخته
و مش فاهم إن جوازها معناه إنها هتبات فى بيتها
و الوالدة بتحاول تفهمك الحقيقة دى بشويش
و من غير ما تزعلك ...
لكن لما فوجئت إن الحوار مبقلوش أيام
بدل ما أبتسم ..جاتلى حالة شجن جميل
ألف مبروك لدعاء يا محمود
عقبال ما تشيل ولادها عن قريب
و عقبالك إن شاء الله

انا حره يقول...

مبرووووووووووك

بقى كدا بتجوز اختك من ورايا من غير ماتعزمنى

هيا بقت كدا مااااااااااشى لينا كلام تانى مع بعض

دودو يقول...

اول مرة ادخل المدونة
بجد انت زى العسل
على قد ماموتنى من الضحك
على قد ماقلبت عليا المواجع
لان انا كمان والدى اتوفى واحنا صغيرين وعلشان كدة حاسة بلارتباط القوى اللى بينكم
ربنا يسعدها ويوفقك

عصفور المدينة يقول...

زوجكما الله عاجلا وأقر أعين والدتكم بكم

حمامة يقول...

الف مبروك يا دكتور وعقبالك يارب ان شاء الله
ضحكتني جداً ماشاء الله الحوار رائع وعندك قدرة هايلة على التخيل ربنا يسعدها يارب ويسعدك :)

ابقى زورنا

أبو كريم يقول...

عجبنى جدا كلام الواد محمد أخوك business is business وعلى رأى أحمد مطر


..
تبكي فرار قائد المسيرة ..!؟
وشكلت على الأثر ..
محكمة .. ومؤتمر
فقائل قال : قضاء وقدر ..
وقائل : لقد كفر
وقائل : إلى سقر ..!!
وبعضهم قال : امنحوه فرصة أخيرة ..
لعله يعود للحظيرة ..
وفي ختام المؤتمر ..
تقاسموا مربطه .. وجمدوا شعيره ..



انا طبعا شلت شويه كلام منها انته طبعا حافظه


تمنياتى بالسعاده لكل أفراد الاسره

غير معرف يقول...

سلاااااااام عليييكم

أنا قلت اعدى أشوف الجديد

لقيت احلى جديد

عديت رغم انى اعرف انه ..ز ما علينا


مبااااااااااااارك للجميلة دعاء
بجد مبااااااارك لها و عليها
و بارك الله لهما و بارك عليهما و جمع بينهما فى خير

اه صح و عقبااااااااالك

تحياتى للجميلة

غير معرف يقول...

سلام عليكم
قلت كل اللى كان نفسى اقوله وزياده شويه...كان نفسى اكتب بعد فرح اختى الاسبوع اللى فات لكن للاسف معرفتش اعبر زيك كده...مبروك لاختك...كانت حالتى اصعب من حالتك على الاقل انت لسه عندك اخ يونسك لكن انا مفيش...عموما كله قاللى شويه وهتنسى...
عقبالى :)

روز

EMMY BABY يقول...

والله ضحكتنى فى اول البوست

وخليت عينى تدمع فى اخره

بجد اسلوبك جميل اوى

ربنا يسعدها والف مبروك ليها وعقبالك انت ومحمد يارب

بالنسبة للبانية روح خد الوصفة من اختك واعملها انت

او ياسيدى ابقى روح كله عندها وامرك لله بقى

سعيدة بزيارتى مدونتك

تحياتى

ايمى

حـــلـــم كــــان يقول...

الف مبروك للدعاء
وبصراحه طول منا بقرا البوست شغاله ضحك
ع الرغم ان كنت ف مود زباله بس عجبنى الحوار
وزعلت اوى عشان لما اختى اتجوزت مجاش فى بالى موضوع
العلاوه ده وحكايه تقسيم المصروف

اول مره ازور مدونتك وعجبتنى جدآ ان شاء الله مش
هتكون الاخيره

عصفور طل من الشباك يقول...

أولا بقالي كتير ما قرتش مواضيعك وأنت كمان ما تزورش البلوج بتاعي

ياريت يا فندم تشرفنا عشان افتقدناك

ثانيًا الحل إنك تروح تتغدى عندها مرة كل أسبوع أو اتنين وتكون عاملة لك كفتة وبانيه

ثالثًا المرة دي بجد والله

حنان الأخ وحزنه على فراق أخته يؤثر في وبشدة، لأن غالبًا الإخوة الأولاد ما بيكونوش بنفس حنان الأخت عليهم...........عشان كده بجد ومن قلبي ربنا يديم عليكم المحبة دي

๓คภ๏ภค يقول...

الف مليووووووووون مبرووك يا محمود ويارب عقبالك

كده لما ماما تخلص منك وناخد احنا منك اجازة شوية

هههههههه

تعرف فعلا الفايدة الوحيدة من الجواز انك بتعرف ان

كان ف ناس ببيحبوك وانت مش واخد بالك ولا هما

واخدين بالهم اساسا انهم كانوا بيحبوك اوى كده

الجواز شبه المووت الاتنين مابتحسش بقيمة اللى فقدتهم

بسبببهم الا لما بيروحوا يا يتجوزوا يا يموتوا هههههه

الف مبرووووووك تانى ياباشا وخليك فاكر معزمتناش هه

سومه...مجنونه فى بلد عاقل يقول...

ربنا يخليلكم طنط ومبروك لدعاء انا عاوزه اقولك ان يوم ما جالى عريس ابراهيم اخويا عامله معامله العبيد واول مره اعرف يعنى ايه اخ وغيران على اخته :)) مع انه كان صغير قوى وقتها ..
بس دلوقت قاعد بيدعى ربنا يبعت بطيخ يخلصنا منك وانا مش حعيط تانى خالص الله يكون فى عونه :))

وابن خالى فضل سنه ميسلمشى على خطيب اخته ويوم ما اتجوز اتخانق مع ابوه عشان مش حتبات فى بيتهم :)
لاحظ انى مقولتش لاختك الكلام اللى قولته ع البنات المصريات :)) ها شيلهالى جميله يا دك وابقى طمنى عملت ايه فى الالتماس
سلام

سومه...مجنونه فى بلد عاقل يقول...

نسيت اقولك ربنا يصبركم على غيابها ويستحن تعمل انت واخوك البانيه:))

ميرام يقول...

بطوط
متأخرة ... كعادتي السيئة
بس تفتكر ده يمنع اني أقولك ألف مبرووك
(:
ويارب يرزقها الذرية الصالحة
ويسعدها دايما
(:
تحيـــــاتي

نهــــــــــار يقول...

السلام عليكم......
مبارك زواج أختك ونسأل الله أن يجمع بنها وزوجها خير ...
.........
والبانيه مش مشكله هي دعاء تعمله في بيتها وتروح زي الشاطر إنت وأخوك وتاكلو........
من غير ما تدفعو مليم.....
إيه رأيك ....
.......
في أمان الله

الرخمة يقول...

قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم

و مش هقول سلاااام
رخامه بقى هه

قهوة الرخمين
:D

Heba يقول...

ألف مبروك يا محمود وعقبالك كده إن شاء الله

ربنا يحمع بينهم بالخير ويسعدهم

معلش متأخرة شويتين

نعكشة يقول...

ربنا يسعدها

:D

غير معرف يقول...

السلام عليكم

انا بقول بقا تاخد منها الطيقة :p

ربنا يخليكم لبعض يا دوكتور

ألوناتك