2010/02/09

اقرا البوست دا وبعدين اكتب؟



البوست اللى فات جاتلى عليه تعليقات قلت لازم انشرها لوحدها فى بوست لوحده
اللى مقراش البوست اللى فات .. هختصره له هنا قبل ما اكتب اهم نقط جت فى التعليقات عليه
انا كنت بسأل المفروض الواحد يكتب الصح فى المدونه؟ ولا يكتب كل حاجه؟
وضربت امثله للموضوع دا كل مثال كنت اقصد بيه شئ معين
اول مثال له علاقه باذا كان البوست هيتكلم عن حاجه انا علمتها والحاجه دى .. مخالفه للشرع
والمثال التانى .. لو الحاجه دى هتخلى شكلى مش حلو .. سواء ضعيف او فاشل او او او
المثال التالت لو الحاجه دى هتخلينى اظهر بصوره شخص قليل الادب
واخر مثال لو الحاجه دى عشان احكيها لازم هستخدم لفظ ( مش كويس)
التعليقات اتقمست لجزئين 
اول جزء قال 
 ان الصح والغلط اصلا امر نسبى ..
انت ممكن تكتب حاجه انا اشوفها صح .. غيرك يشوفها غلط .. يبقى اكتب بمزاجك
انت بس . اهم حاجه الواحد يحس بسلام نفسى 
وعلى حد تعبير عادل 
لو الناس فاهماني ... هتفهم كلامي
لو مش فاهماني .. يبقي متفرقش معايا يفهموا ولا لا
وتقريبا اتفق الاتجاه دا كله ان اهم حاجه تؤمن بكلامك ..
وكمان
على حد تعبير ديدى
ماتدوسش على نفسك ومشاعرك في سبيل ارضاء الاخرين وتنال استحسان منهم
وفى منهم اقترح ان طبعا الكتابه بالنك نيم ممكن تكون حل 
وشخص غير معروف
قال انه بطل تدوين عشان السؤال دا

الاتجاه التانى
بقى اتكلم عن نقط معينه وتقريبا كل اصحاب الاتجاه دا قالوا نفس الجمله بتعبيرات مختلفه
اكتب اللى انت عاوزه بس جهز اجابه تقولها لربنا .. لما تقابله ودا اللى شددت عليه اوى  د ستيته
 د احمد عبد العدل 
اضاف حته كمان ..المفروض الواحد يسأل نفسه لو واحد قرا المدونه هيدعيلى .. هتيتعظ .. هيعمل زيي ؟؟

وأن الصور الخاصة جداً تصلح للنشر بشرط تحويلها لصورة عامة و مراعاة ذلك ،،،
وكمان صمم ان الكلام .. سواء كان باسمنا الحقيقى او باسم مستعار سيان
لانه بينشر فكر وبينشر تجارب هتتسأل عنها يوم القيامه فمش فارقه كانت باسمك او لأ

مروه 
  ان دى مشكله الناس اللى بتحاول تلتزم .. ولسه عندها صراع داخلى بين اللالتزام والهوى
وقالت فى الاخر ان مينفعش تكتب حاجه تضرك فى اخرتك  وان الحريه فى الكتابه لازم يكون عليها رقيب .. لان الحريه المطلقه هتثير النزعه الحيوانيه عند كل واحده فينا
وهيليوم اتو 
قالت ان الموضوع كله متعلق بالايمانيات .. لما بتكون ايمانيتنا عاليه .. بيكون تعبيرنا عن كل مشاكلنا بطريقه عاليه وراقيه
د مروه 
ركزت على تأثير الكلام دا على  الناس... مش طالبه خالص فضفضتك وكلامك مع نفسك يأثر علي حد بالسلب ويوصل حاجه ماكنتش مفرووض توصل دي حاجه

الاتجاه التالت بقى كان اتجاه الخصوصيه


الشعب لابد له من حكومه تشكمه
  شايفه  ان كل كلام وليه سقف مش لازم يتعداه,مش فكره حرام ولا عيب’اللى اقصده فكره خصوصيتك انت.
KINK TOOOT
قال الموضوع هنا مالوش علاقة بالصح و الغلط ، بيكون له علاقة أكثر بما هو خاص وما هو عام

المدونة دي زي العلاقة بينك و بين الناس بالظبط
د احمد عبد العدل
المدونه مش مكان للفضفضه ... محدش بيفضفض يمسك ميكروفون ويفضفض .. والمدونه زى الميكروفون
وفى اتجاه رابع زى
عاوز اصحي
التدوين تبادل منفعه يعني ممكن تكتب بوست او تجربه عن نفسك تنفع واحد مر او هيمر بنفس التجربه
وممكن تكتب مشكله ليك واحد مر بيها وعنده خبره ويقدر يفيدك
The illusionist
قالى ان اللى هيحصل حاجه من اتنين لو كتبت بكل حريتى
اما الناس هتبصلى انى سافل ومنحط .. واما محدش هيعلق عندى غير السفله

 فاتيما 
بقى قالت فصل الخطاب
قالت اكتب اللى نفسك فيه .. بس انشر الصالح للنشر بس  .. والباقى خليه بس فى المسودات .. وبالحرف قالت
ساعات الواحد يكتب حاجة  ..عشان حاسس انه لازم يكتبها …فى هذا التوقيت بعينه ..و الا جراله حاجة…و عشان بيكون محتاج رأى  ..و ونس و طبطبات و نصايح الاخرين اللى بيحبوه و يحبهم ..بعد ما تعدى المرحلة  …خلاص ... يشيل الحاجات دى …و يحتفظ بيها لنفسه
الملخص ان الواحد
يكتب الصح
و بعدين يغربل هذا الصح

يعنى فاتيما بتقول مينفعش تكتب اصلا حاجه غلط وتنشرها .. والصح اللى هيبينك ضعيف .. حطه وقت ما تحتاج له وامسحه بعد كده وسيبه مسوده

يارب اكون لخصت كل الاراء صح 
ويارب يكون كل اتجاه وضح

هناك 32 تعليقًا:

adel يقول...

لا تعليق لاني علقت البوست اللي فات
بس الحقيقة انت جمعت الكلام بشكل تمام قوي :)

star in the sky يقول...

حلو التلخيص

جبت فيه كل الاراء وبينت مميزات وعيوب كل اتجاه

ـ-ـ- أحمد عبد العدل-ـ-ـ يقول...

تسلم الأيادى يابطوط ،، لخصت الآراء بشكل رائع فعلاً ،،، اسمح لى بالمتابعة :)
تقديرى

Unique يقول...

أنا قريت البوست اللي فات ومعظم الآراء فيه وتقسيمك ليها
وممكن أقولك ان فيه جزء خامس
بيقول
ان ممكن جدا يكون اللي بتكتبه مالوش علاقة بالصح والغلط او الخاص والعام او الحلال والحرام
ومع ذلك بتلاقي عندك حواجز نفسية نابعة منك ومن نوعية قراءك بتخليك ممكن تتكلم عن نفسك بحاجة وممكن لا

لو تلاحظ مثلا التغييرات اللي بيعملها بعض المدونين لما مدوناتهم بتتوسع قاعدة انتشارها نتيجة لدخولهم في تجربة النشر الورقي بتلاقيه بيتخلص من الحاجات الحميمية أكتر في مدونته ويحولها لشكل "فورمال" وجادّ أكتر

الحل من وجهة نظري ان يكون عندك مدونتين او اكتر .. واحدة رسمية بتحط فيها كل حاجة منتقاة ومش ممكن تسبب لك أي حرج مهما كان نوعية قراءها ومعرفتهم بيك
والتانية تكون تلقائية أكتر مش معنى كده انها هتكون قليلة الادب او غلط لا كل الحكاية انها هتكون انت من غير فلترة وفي الحالة دي اما انك تفتحها للجمهور من غير ما تتيح التعليق عليها مثلا او انك تخليها لزوار محددين او حتى تقفلها على نفسك

أما فكرة الهويتين فاعتقد انها فاشلة جدا والانسان مستحيل يكون مهذب وطيب في مكان ويكون على النقيض في مكان تاني الا لو كان مريض

غالبا .. في المدونتين "بالهويتين" هتلاقي ان انت نفس الشخص بس الفرق انك حر في التعبير عن نفسك في مكان اكتر من التاني

مش عارفة وجهة نظري وضحت ولا لا

بس بجد نصيحة مني بلاش تحصر نفسك في مدونة واحدة وتعرض نفسك ان كل ما تخطر على بالك فكرة موضوع تتردد الف مرة وتكون بتفوت على نفسك فرصة انك تكتب حاجة عظيمة او تفضفض عن حاجة لازم تخرج منك
المهم بس انك تكتب وتفصل الكتابات لجزء رسمي وجزء عفوي تلقائي

غير معرف يقول...

بص انا اول مرة اعلق عندك......يمكن لان الموضوع بجد شدني وكتيييييييير كنت بفكر فيه
انت بتتكلم هل ممكن تكتب كل الي نفسك فيه في المدونه الي بيقراها ناااااااااس كتييييير بغض النظر عن ده هيكون تاثيره ايه عليهم او علي رايهم؟
انا بقي بفكر ازاي الانسان ديما بيخبي جواه كلام كتيييير علشان مش يجرح الي قدامه ويجرح مشاعره مع ان لسان حالنا بيقول كل الي جوانا؟
عارفه انكوا اتلغبطوا معايا بس دي حاله انا بجد فيها مخبيه كتيييييير جوايه مش عارفه خوفا علي مشاعر ناس قريبه مني ولا علشان لو قلت هيتاخد عني فكره وحشه هي اني انانيه ومعنديش مشاعر وبجرح الي معايا
وكتييير فكرت اكتب كل الي جوايا في مدونه بس مقدرتش ...مش عارفه اواجه بيه نفسي ولا خوفا ان الي بخاف اجرحهم يقروا كلامي ولا يمكن خوفا من انتقادات ممكن اوجها من الي هيقرا
مش عارفه بجد....لو قدرت تقولي انا ممكن اعمل ايه وافكر ازاي يمكن اقدر انا اقولك تقول كل الي في نفسك ولا لا
هههههههههههه
جيبتك يا عبد المعين تعني لقيتك عايز تتعان......ههههههههه

Zika يقول...

طيب
اولا
مع احترامي لدكتور احمد عبد العدل والناس اللي اتكلمت عن يوم القيامه

والناس اللي قالت عن ان الكلام ده هيأثر على ناس تانيه بالسلب
المهم يعني

ربنا بيحاسب الناس على نيتهم مش على الناس فهمت ايه من اللي قالوه

ثم ان كلمه هاقولها للمره المليون
والله على ما اقول شهيد
يا جدعان
" التدوين مالوش هدف "
اي حد يقولك ان التدوين له هدف قوله لأ التدوين مالوش هدف
كل واحد حر
واحد بيكتب انه كل يوم بيصحا الصبح بيفطر
وواحد تاني بيسب الدين
واحد بيكتب في السياسه
واحد بيكتب يومياته
واحد بيكتب اللي ييجي على باله
واحد بيكتب كلام سكس
كل واحد حر
اما بخصوص البوست اللي فات فانا قريته قبل ما اعلق ع البوست ده
وعلى فكره
لحد امتا هانقول ان الرقص حرام . وهو علاج للاكتئاب
ولحد امتا هاتحبس نفسك في الصوره ( اللي مش حقيقيه عنك ) اللي بتحاول تديها للناس
على انك مابتغلطش
ومابتزعلش مامتك
ومابتبشتمش
ومابتعرفش بنات
ومابتحبش
ومابتحتلمش
رغم ان اي حد بيقرا كلامك اللي شايف فيه مثاليه اللي انت عاوز توصلهالهم
هايكون في وقت من الاوقات بيتعصب على اهله وعلى الناس اللي بيحبها
وبيضعف لما حد بيحبه يسيبه
ولو مش متجوز او لو مش بيعط هتلاقيه بيحتلم
وهتلاقيه بيعمل حاجه بصفو نيه لواحد . والواحد ده يفهم ( غلط ) انه كان قصده يتجاهله او يهينه
كلنا بنغلط
يبقا من حقنا كلنا نقول ع اللي احنا بنعمله
من حق كل واحد بيفكر في حاجه يقولها بدل ما يحسبها جوه عينيه
بدل ما تكتم الكلمه اللي حرقاك اصرخ بيها
مش مهم صورتك قدام الناس .لان الناس عمرها ما هاتتفق عليك .. الناس اختلفت على ربنا هايتفقوا عليك انت .. ليه يعني انت مين؟
وماتقولش حرام .لان انت نيتك مش انك تنشر رزيله ولا تقول للناس استهبلوا كل الحكايه انك تعبر عن نفسك
ده لو عندك الجرأه انك تواجه نفسك

Zika يقول...

المدونه مش مايكروفون
لان حتى لو كتبت حاجه وماقولتش ان الحاجه دي حصلتلك فعلا . فهي على الاقل شوفتها او نفسك تشوفها
والا يبقا الادب كله حرام
ويبقا الممثلين يتحبسوا على جرايم القتل اللي بيعملوها في الافلام
وعلاء الاسواني يتحبس لانه عصام عبد العاطي
---
أما لو كان عندك الجرأه الكافيه انك تكتب زي ما بتتكلم وماتخبيش حاجه
فاظن ان الناس اللي هاتقدرك وتحبك رغم ارائك اللي يمكن تكون مختلفه عنهم
ورغم عيوبك اللي بتقولها
ورغم ضعفك
اظن ان هم دول الناس اللي يستاهلوا يبقوا صحابك
أما الناس اللي شايفينك محمود الولد اللي بيحب عيلته اللي مابيغلطش اللي بيتكلم عن عيوب الحياه اللي بيتكلم عن الدين الكويس اللي بيجيب تقديرات وبيذاكر وبيشرب اللبن الصبح وبيغسل رجليه قبل ما ينام
ومش شايفينك على حقيقتك
انك بني ادم
بتغلط وبتعمل الصح
وبتاخد سيئات وبتاخد حسنات
بتكره وبتحب
بتتكلم جد وبتهزر
بتتضايق وبتتكلم وبتسكت وبتزعق وبتصرخ وبتهدى وبتخاصم وبتصالح وبتلوم نفسك وبتلوم غيرك
يبقا معلش يا صاحبي
دي الناس اللي ماينفعش تبقا اصحابك لانهم شايفينك ملاك
وانت يا صاحبي مش ملاك

-------

ماعرفش حاسس انك هاتزعل مني على الكلام ده بس عموما . انا قلت اللي يريحني
وربنا عارف " نيتي " من الكلام ده وانت عارف انا حاولت اني ماخرجش عن الحدود اللي انت حاططها في مدونتك ولازم احترمها
تصبح على خير

Zika يقول...

معلش بارضه انا اسف يا بطوط لازم اكمل اخر نقطه

الناس اللي بتقولك تعمل مدونتين عشان تخلي واحده كده وواحده كده
ماتعملش مدونتين الا لو كانوا موضوعين مختلفين زي مانت عامل كده
او زي مانا عامل عندي
لكن طريقتك لازم تبقا واحده

وبالنسبه للاقتراح اللي بيقول انك تعمل مدونه وتقفلها على نفسك او انك تكتب وتسيبها في المسودات
اسمحلي
ده كلام .... بلاش
لأن ايه فايدة الكتابه لو ماحدش غيرك هايشوفها ويعلق عليها ويشاركك الاحساس بيها ؟

مجرد مدونة يقول...

والله آراء أحلى حاجة فيها التنوع وهى بتكمل بعضها عموما يعنى التقسيمة اللى انت مقسمها دى مش تقسيمة تضاد قد ما هى تقسيمة تنوع
انا بصراحة استفدت جزاكم الله خيرا :)

بطوط حبوب يقول...

تسلم ايد كل واحد علق وقال رأيه .. ومش هعرف اضيف جديد على اللى اتقال

انا بس عاوز اعلق على كومنت زيكا

صوت من مصر يقول...

قليل الادب تقصد مين ؟
ههههههههههههههههههههههههه
عموما يا بطوط
كل واحد حر

بطوط حبوب يقول...

زيكا
====


كومنتك عجبنى اوى يا مان بس طرح فى دماغى كام سؤال

مين بيقرا مدونتى ؟ اصحابى بس ؟
انا بيقرا مدونتى واحد زى محمد .. بقابله فى اليوم 5 مرات فى كل صلاه وبنقف نتكلم مع بعض
وواحد زى هايدى .. معايا فى الكليه وبشوفها كل ما بروح
وواحد زى نصر .. صديقى الانيتم
وواحد زيك .. بشوفه كل فتره بس نعتبر لحد ما اصحاب
وواحد زى د احمد عبد العدل بشوفه كل سنتين وصدقتنا اقل
وواحد بكرهه كل ما بيدخل بحذف كومنته
والبنت اللى كنت بحبها زمان
وواحده عاوز تصاحبنى


مش كل دول اصحابى ومش كلهم عاوزهم يعرفوا تفاصيل حياتى.
فى حاجات لو كتبتها ناس بتحبنى هتفرح .. وناس تانيه هتزعل والعكس.

ودا يخلى المدونه ميكروفون .. لأن مش بس اصحابى اللى بيدخلوا .. وحتى اصحابى درجاتهم مختلفه

هنتظر ردك فى الحته دى يا مان وبالمناسبه احنا لسه فاتحين باب المناقشه

Zika يقول...

أي حد بيتوجهله كلامك ككاتب يبقا صاحبك
المدونه ازا كانت مايكروفون فهي مايكروفون عشان تزعق فيه تقول للدنيا كلها انت ايه
مش لصحابك بس
وبعدين الناس اللي مش صحابك مالهمش حاجه عندك . ومش من حقهم يحجروا على طريقة كلامك
طالما مش صحابك يبقا مش مهم شكلك ايه قدامهم
ومش مهم هايحبوك ولا لأ
ومش مهم هايحترموك ولا لأ

ـ-ـ- أحمد عبد العدل-ـ-ـ يقول...

السلام عليكم بطوووط
اشكرك بجد للبوست القيم جداً ده و طريقة النقاش بجد هايلة و ممتعة و تدعو للتفاؤل الحقيقة،،
تسمحلى بتعقيب على كلام الجميل زيكا
،،،

أولاً اشكرك يازيكا لكتابة رد لطيف فى الجزء الخاص بيوم القيامة رغم انى عارف انطباعك عن اللى بيستخدم الأسلوب ده فى الحوار

طبعاً ربنا هيحاسبنا على نوايانا فى حالة اننا ننوى نعمل شئ واحنا معتقدين انه عمل نافع و يطلع غير كده زى اختراع الديناميت مثلاً ،،، أما أن تنشر كلاماً و صوراً حقيقية و صوراً كلامية محددة التصنيف و معروفة التاثير على القارئ و نحن لسنا بأنبياء عندما نقرأ الكثير من (الإبداعات )و قد تجاوزت كل الخطوط الحمراء استناداً للشرع أو للعرف أو لأى مرجعية ،،، فى هذه الحالة لا أعفى الكاتب من المسئولية عن المساهمة و لو ( بما تيسر ) فى انفلات أخلاقى نعانى منه فى كل مكان و فى أى مناسبة ما دام بالغاً عاقلاً عالماً بلغة الفقهاء
نعم من ضمن هؤلاء الكثيرين الذين ألومهم الكثير من الأدباء و الكتاب و المخرجين أتهمهم مباشرة بقيادة المجتمع المصرى إلى حافة الانهيار الأخلاقى و يكفى أننا لم نعد نجد فيلماً تجتمع حوله العائلة المصرية بكل افرادها لأن الأفلام الحالية فى معظمها تصلح للتوزيع على المراهقين و قد كسوها و كسوا أنفسهم بقشور الثقافة و هم فى الواقع كتجار المخدرات لا يهمهم إلا تحقيق مصالحهم الشخصية و ليحترق المجتمع بدعوى الثقافة و الإبداع ،،،
حسب علمى أن الرقص فى حد ذاته غير محرم ( و أنا طبعاً لست من أهل الذكر فى ذلك ) و فى الغالب التحريم ينعكس على الحالة و الظروف التى تحيط بالراقص أو ( الراقصة ) ،، ولكن من المؤكد أن الابتذال محرم و أن الرقص فى الأماكن العامة محرم ليس فقط فى الإسلام على حد علمى

أمّا عن هدف التدوين ،،، تصورت أن آخر النقاط الخلافية هى مدى تأثير التدوين أمّا أن يكون بلاهدف ،، فلا يمكننى اعتبار ذلك إلا امتداداً لقبول حياتنا مفرغة المحتوى فى معظم الأصعدة و ارى أن من يصل لهذه القناعة فعليه أن يتوقف عن التدوين توفيراً لجهده المبذول - من وجهة نظره - فى شئ بلا هدف

أمّا عن ما يبدوا أنه ازدواجية فى دعوة فلترة الكلام للنشر فيكفى عرض أن هناك معصية و هى ذنب بذاتها ،،، أمّا المجاهرة بالمعصية فذنب آخر لما يترتب عليها من فساد يتجاوز الشخص نفسه إلى المجتمع المحيط و الأجيال التالية - طبعاً ياجماعة سامحونى فى الأمثلة و التعبيرات المستخدمة فهى للتوضيح فقط و أربأ بنا جميعاً عن قصد توجيه هذه التعبيرات لنا -
وهل عورة الإنسان شئ غير موجود أو مصطنع فلماذا إذا مكلفون نحن بإخفائها ،،،
ليست كل الموجودات صالحة للعرض ياسيدى ،، وهى من مميزات عالم البشر التى توشك على الانهيار ،،
و سيدنا آدم و أم البشرية حواء كان عقابهم الأول ( فبدت لهما سوءاتهما ) ،،، مكلفون نحن سيدى بالستر
عندما نجد فى أنفسنا ما يخالف قواعد الإنسانية أو الشرع أو حتى العرف الحسن فينبغى أن نضع نفسنا تحت مظلة ( و إذا بليتم فاستتروا ) أعلم أن تقنين الأوضاع فى حالة التردى التى نحياها اسهل من تصحيحها و إعادة تسمية التردى باسماء أخرى اسهل من مواجهته و تغييره فى أنفسنا بعد أن تمكن منا
لا أرى إلا غزواً بالسئ من الثقافات الأخرى و هو بالمناسبة غزو سلبى بعيد عن المؤامرات التى اراها عذر أقبح من ذنب بقانون الكوب الفارغ سهل أن تملؤه بأى شئ ،،، فى ظل غياب ثقافتنا الخاصة يسهل تقبل أن الرقص يعالج الاكتئاب و هلم جراً و كأن علاجات الاكتئاب الأخرى التى تناسبنا قد انقرضت من الوجود ،،،
بالمناسبة طرحت فى البوست السابق تحويل الخاص لعام لمناقشته على مستوى التفاصيل و الألفاظ المستخدمة ،، فكل التصرفات ناتجة عن قناعات فبدلاً من مناقشة العلاقات المحرمة يمكننا مناقشة أسباب الانحراف الأخلاقى و كيفية التعامل مع و كيف نتعامل مع النتائج المترتبة عليها و الدعوة مفتوحى لكل أفراد الأسرة للنقاش ،،،
أطلعك على سر ؟ ( بالمناسبة هل يمكننى أن أطلعك على سر فى المدونة ؟ مع التعليل :))))) تناولت أكثر من كتاب لمدونين فى المعرض ثم أعدته إلى الرف سالماً حتى لا أتأذى و لا أؤذى من يلتقط الكتاب منى بعد ذلك بالألفاظ المستخدمة فى العناوين رغم علمى أنها بهدف زيادة المبيعات و أن هذه الكلمات لن تتكرر كثيراً فى مواضيع الكتاب ولكن الناشر اختار هذه الكلمات لعلمه أنها ستلاقى قبولاً عند القارئ ،، وده جزء من الكارثة اننا نستخدم الانحلال الأخلاقى فى الدعاية و نداعب رغبة الجميع فى الانفلات و الاسم فى الآخر كتب تتكلم عن الأخلاق و عن مصر و عن و عن ،،،،
أما عن التعليق الأخير ،،، أتفق معك تماماً أننا نتصرف بما تمليه علينا ضمائرنا بغض النظر عن رد فعل المتلقى ليبقى ما كتبته إن كان نافعاً أو ضاراً هو الفيصل فى صلاحية النشر من عدمه
،، اعذرونى للإطالة و أكرر شكرى لبطوط على السماح لنا بهذا النقاش الثرى الذى استفدت منه كثيراً
وتقديرى لزيكا على اتساع صدره لمناقشتى :)

بطوط حبوب يقول...

وعليكم السلام جميعا ورحمه الله وبركاته
د احمد
كل كومنت لحضرتك بيزيد الموضوع ثراء بجد .. وسواء اتفقنا او لأ فانا حاسس انى طلعت من المناقشه دى بعقل اكبر
وسعيد جدا جدا بكل كومنت لحضرتك ومع حضرتك كارت بلانش فى عدد الكومنتات المسموح بيها لأنى بجد بستفيد من كل كومنت اكتر من اللى قبله فاعتبر المدونه بتاعتك واكتر.

انا متفق مع زيكا ان التدوين ملوش هدف

اه التدوين ملوش هدف

يمكن انا متفق مع حضرتك فى ان مش المفروض اطلع الناس على خصوصياتى .. وكمان المفروض اجهز اجابه ادام ربنا للى بكتبه

بس دى ضوابط .. انما اى كلام تانى انا حر فيه .. انا من بكتب فى جرنال ولا بنزل كتاب انا بكتب هنا لنفسى اولا واخيرا .. بس لأنى عارف ان فى ناس تانيه بتقرا يبقى لازم احافظ على خصوصياتى ومجاهرش بذنوبى.

التدوين هدفه التنفيس عن صاحبه ودا هدفه الوحيد.
مش هدفه دعوى , ولا تثقيفى , ولا اجتماعى.
رغم اننا ممكن نعمل كده ودا حلو .. بس التدوين اللى هو التدوين دا مش هدفه.
وحتى لو كان دا هدفه فدا مش هدفى فيه... واى بوست كتبته وحد استفاد منه فدا مكنش الغرض من البوست .. دا بناءا عن اننا بنحمل قضايا وبنقى مهمومين بيها .. فلما بنيجى نكلم نفسنا القضايا دى بتطرح.
انما مكنش الغرض طرح القضاي فى حد ذاتها .. ولا الفايده كانت هدف
لان التدوين ملوش هدف.

ملخص كلامى
التدوين هدفه المدونه نفسه مش القارئ .. وبحكم ان المدون شخص بيحمل افكار فدا بيتنقل اوتوماتك فى كتاباته .. وبحكم ان فى قارئ فلازم يبقى فى قيود على الخصوصيات للكاتب.

ياريت يكون وضح وجه نظرى فى كلمه ملوش هدف

Zika يقول...

د- احمد عبد العدل
يا ريس يسعدني جدا المناقشه معاك
ورغم اني باطلب منك تعذرني لاني بافهم جملك بصعوبه شويه .

خلينا مع بعض واحده واحده
اولا

رغم انى عارف انطباعك عن اللى بيستخدم الأسلوب ده فى الحوار

معلش بس يا باشا احب استفهم منك اللي انت فاهم انه وجهة نظري عن الموضوع ده


أما أن تنشر كلاماً و صوراً حقيقية و صوراً كلامية محددة التصنيف و معروفة التاثير على القارئ و نحن لسنا بأنبياء عندما نقرأ الكثير من (الإبداعات )و قد تجاوزت كل الخطوط الحمراء استناداً للشرع أو للعرف أو لأى مرجعية

مافيش حاجه للاسف اسمها معروفة التأثير على القارئ لان فيه فرق كبير بين قارئ واعي وقارئ غير واعي القارئ الواعي هايفهم انا قصدي ايه
والقارئ الغير واعي واللي سهل التأثير عليه او انه يفهمني غلط فدي حاجه ترجعله هو وهو اللي يتحاسب عليها وانا مش بتحاسب بطريقة فهم الناس لكلامي او طريقة تاثيره عليهم

نعم هناك أزمة مخرجين وادباء يستخدمون اسلوب رخيص ظاهره انه بيحل مشاكل وبيعالجها بجرأه وباطنه قبيح و بجح وقليل الادب والحيا والامثله شبه معروفه

حسب علمى أن الرقص فى حد ذاته غير محرم ( و أنا طبعاً لست من أهل الذكر فى ذلك ) و فى الغالب التحريم ينعكس على الحالة و الظروف التى تحيط بالراقص أو ( الراقصة ) ،، ولكن من المؤكد أن الابتذال محرم و أن الرقص فى الأماكن العامة محرم ليس فقط فى الإسلام على حد علمى


ماعرفش حكاية ان الرقص حرام في الاماكن العامه او حتى الخاصه ومايخصنيش غير الاسلام مع احترامي للجميع ولكن انا يهمني الاسلام بس في الموضوع ده وسواء كان محرم او غير محرم . فانا مبتكلمش عنه من ناحيه دينيه . واذا كانت كل الامثله المتاحه لينا كشرقيين لعلاج امراض كتير غير استخدام الرقص مردوم عليها التراب وعفى عليها الزمن .. ايه العيب اننا نستخدم الرقص . ولا عشان احنا عندنا حاجات غير مستخدمه يبقا نسيب المرض بدون علاج لحد ما ربنا يكرمنا ونستخدم اللي عندنا

نفس الكلام بينطبق ع الكلام
التدوين مالوش هدف
لان التدوين اخد الصوره الادبيه او السياسيه
عندنا بس
العالم كله التدوين بالنسباله مش اكتر من يوميات بنسبة 90 %
التدوين ده مجرد اجنده الكترونيه عملهالنا عم جووجل
اكتب فيها اللي انت عايزه

وانا قلت وبعيد
ان اللي بيكتب في المدونه بحريه وبيناقش مشاكله وبيقدر يكتبها ومش مكسوف منها هو اللي عنده حالة صفاء مع نفسه وبيقدر يواجه نفسه
اما اللي بيخاف على صورته
فاكيد هو كمان قدام نفسه بيخاف على صورته قدام نفسه ومابيقدرش يواجهها .

أمّا عن ما يبدوا أنه ازدواجية فى دعوة فلترة الكلام للنشر فيكفى عرض أن هناك معصية و هى ذنب بذاتها ،،، أمّا المجاهرة بالمعصية فذنب آخر لما يترتب عليها من فساد يتجاوز الشخص نفسه إلى المجتمع المحيط و الأجيال التالية
اظن انك كده خرجت بره الموضوع لان انا مش باقول للناس تدعو للرذيله او باقول للناس انا بازني ازنوا زيي ولا باقول للناس تعمل كل اللي انا باعمله

أطلعك على سر ؟ ( بالمناسبة هل يمكننى أن أطلعك على سر فى المدونة ؟ مع التعليل :)))))
اسف جدا ولكني لم أفهم الجمله !

للمره الاخيره يا دكتور لا توجد صلاحيات للنشر على المدونه ولا توجد رقابه ولا توجد حدود
ولا يوجد ما يسمى بالصالح او بالغير صالح
لان في النهايه الأمر كله لا يتعدى كونه اجنده اجنده انا ينفع اقولك تكتب ايه في أجندتك او ماتكتبش ايه ؟

اشكرك على قبول المناقشه وباشكر بطوط بارضه انه سايبهالنا مفتوحه كده :D

بطوط حبوب يقول...

زيكا
====
انا مفهمتش ردك على حته الجهر بالمعصيه .. اللى فهمته انك بتقول ان الجهر بالمعصيه لا يساوى الدعوه ليها . بس دا مش موطن النزاع
د احمد بيقولك الجهر بالمعصيه منهى عنه فى الايه على تفسير ليها
{ لا يحب الله الجهر بالسوء من القول إلا من ظلم وكان الله سميعا عليما }
فى حديث الرسول صلى الله عليه وسلم
{ كل أمتي معافى إلا المجاهرين، وإن من الإجهار أن يعمل العبد بالليل عملا، ثم يصبح قد ستره ربه، فيقول: يا فلان! قد عملت البارحة كذا وكذا، وقد بات يستره ربه، ويصبح يكشف ستر الله عنه } [متفق عليه].


الحاجه التانيه لـدكتور احمد وليك متتناقشوش عن الرقص هنا دا مش موطن النزاع ومش عاوز الموضوع يتشعب وخصوصا انى مش موافق على كلامكم انتوا الاتنين :P
انا اساسا مقلد لرأى الجمهور فى تحريم الموسيقى... وبدعى ربنا انى اقدر أبطل نهائيا
ايا كان دا مش موطن النزاع

ـ-ـ- أحمد عبد العدل-ـ-ـ يقول...

بطوط ياجميل
حضرتك و زيكا و أنا مختلفين شكلياً بس فى موضوع الهدف لكن متفقين تماماً فى المضمون ،،، اختلاف طريقة التعبير مش أكتر
و بالنسبة للرقص مش خارج الموضوع ولا حاجة ،،، حرية التعبير اللى بلا حدود جزء من ثقافة غربية هيا نفسها اللى بتدعو للرقص لعلاج الاكتئاب و تدعو برضو لحرية الشذوذ حفاظاً على السلام النفسى و إن الناس نفسيتها متوجعهاش
،،، محاولة لإظهار الإغراق فى الماديةو الرغبة فى الانفلات فى ثقافة الغرب بشكل إنسانى
على أى حال سأحاول الرد سريعاً على زيكا بعيداً عن الخوض فى التفاصيل ،، و سامحنا بقى للإثقال عليك ،، لو تقدر تعمل دعاية أكبر للبوست ده تبقى مشكور نفسى كتير من المدونين الكبار و القدام يضيفولنا آرائهم أكيد هنستفيد منها جداً ،،، الموضوع بيشغلنى فعلاً
تقديرى

ـ-ـ- أحمد عبد العدل-ـ-ـ يقول...

الجميل زيكا :)
بطوط كده هيرش ميه هنا و ممكن نيجى المرة اللى جاية نلاقيه عملنا بلوك ،، يلّأ ألحق ارد عليك قبل ما يقفل :))

* فيه فرق كبير بين قارئ واعي وقارئ غير واعي القارئ الواعي هايفهم انا قصدي ايه
- إذن تدرك أن هناك قارئ ( غير واعى ) و أنت مسئول من وجهة نظرى عن الرسالة التى وصلت للآخر ما دمتَ مدركأً للاختلاف مش الرسالة اللى حضرتك تقصدها و انتَ عارف ان فى جزء من قراءك هيفهمم غلط
*
العالم كله التدوين بالنسباله مش اكتر من يوميات بنسبة 90 %
- بغض النظر عن التسمية احنا امام مادة منشورة ولتكن تحت اسم (سرى و خاص للغاية ) لكن يقرأها عدد و أنواع غير محددة من البشر إذن ينطبق عليها قوانين النشر العام كالجرائد


- بالنسبة للسلام النفسى أو التصالح مع الذات لا يقصد به اعتباره أمراً عادياً و لكن يقصد به عدم جلد الذات بشكل يؤثر سلبياً لدرجة أنه يقود بعض الناس للانتحار ،،،،فقط أن نقتنع أننا لسنا أنبياء و لا ملائكة و عندما نكتشف قصوراً نحاول علاجه دون أن نقسوا على أنفسنا لأننا بشر و ليس معنى ذلك أن أذهب لأنشر قصورى على المدونة ،،، فلا داعى على الإطلاق لأن أقرأ لمدوناً أنه شرب خمراً مغشوشة ليلة أمس على سبيل الحكاية و لكن ربما طلب المعونة فى الإقلاع عن ذلك ،، يبدو ذلك منطقياً ،،، الفضفضة مع الأصدقاء و الزوجة و الأهل فقط ثم بعد ذلك مع الأطباء النفسيين و بعض الأشياء مينفعش نفضفض فيها غير مع ربنا و نقوللـه يسترها علينا ،، حتى زملاء العمل ليسوا أهلاً للفضفضة إلا إذا تحولوا لأصدقاء
*لان في النهايه الأمر كله لا يتعدى كونه اجنده اجنده انا ينفع اقولك تكتب ايه في أجندتك او ماتكتبش ايه ؟
- و هل أنا ينفع آخد أجندتك اللى بتكتب فيها حاجاتك الخاصة اقرأها ؟


=== سعيد بجد بالنقاش و شكراً لردك و شكراً تانى يابطوط ،،، بس مش ملاحظ ان بقالنا يومين على المدونة هنا و مفيش حتى سندوتش و كباية شاى :))

تقديرى للجميع ،، ربنا يجمعنا دايماً فى الخير و فى الجنة بفضله :)

Zika يقول...

بطوط
مش مختلفين يا سيدي في حكاية الجهر بالمعصيه
حرام
بس ده اذا اساسا الناس مش متفقين على ايه الحرام والحلال
انا باقول الرقص كذا
و هو بيقول الرقص كذا
انت بتقول السلسله كده
وانا باقول السلسه كده
لكن الجهر بالمعصيه اعتقد انه بيشمل التفاخر بالمعصيه ولا ايه
اظن ان انتوا افضل مني في تحديد النقطه دي

Zika يقول...

د/ احمد

اه يا دكتور ده حتى معزمش علينا بصينيه بطاطس ولا حتى سندوتشين شاورما كده :P

عموما يا دكتور انا حاسس اننا مش مختلفين على أسس عشان كده مش هادخل في مناطق جدليه واضح ان احنا مختلفين على حاجات بسيطه
فمفيش جاعي لجدل يعوق حرية راي كل واحد فينا

لكن انا هاعلق على اخر نقطه عندك بس
" و هل أنا ينفع آخد أجندتك اللى بتكتب فيها حاجاتك الخاصة اقرأها ؟
"

لو انا عرضت عليك تقرا اجندتي من حقك يا تقراها يا ترفضها
فهمت قصدي
المدونه هي اجنده . انا قلت كده
وكنت مستنيك تسال السؤال والله
لكن المدونه هي اجنده انا عرضتها عليك عشان تقراها . فيبقا ايه الموقف كده ؟

ـ-ـ- أحمد عبد العدل-ـ-ـ يقول...

هآخد الأجندة يازيكا بس لو اللى فيها مش مناسبنى أكيد هكون مش مبسوط ،،، وانتَ بالفعل بوضعك لمدونتك على بلوجر مثلاً بتناول الأجندة لكل الزوار و المفروض لما حد فينا يعرض حاجة على حد يحاول تكون مناسبة ليه قدر الإمكان
على فكرة بلوجر عامل حاجة زى كده بس فى الحاجات اللى فيها انحرافات كبيرة بس ،، بيتيح تنبيه الزائر لكده قبل عرض الصفحة


تقديرى :)

و عشانا عليك يارب :):)

فاتيما يقول...

حلوة قوى التجميعة دى يا بطوط

والبوست اصلا فكرة و تناول و تبادل أراء قيم جداااا و يستحق أن يقرأ من الغالبية اللى عاوزين يراجعوا روحهم فيما يكتبوه


تسلم الايدى و القلوب اللى بتجمعها حواليك بهذا الحب و الإخلاص

z!zOoOo يقول...

السلام عليكم

ازيك يا عم بطوط

يارب تكون بخير

علي فكره انا مش اول مره ادخل مدونتك

دخلتها قبل كده في الموضوع بتاع أنتي بورن

D:

شوفت الفضايح بقي

D:

قبل كل شيء احب اقولك برافو إنك كتبت في موضوع زي ده لأنه من اهم الموضوعات الي بتمس اي مدون خاصه واي كاتب عامه

وبجد بجد مبسوط من نقاشكم

وخصاه نقاش اتنين من اكتر الناس الي بحبها وهما زيكا ودكتور احمد بعد العدل

وأرائهم جميله جدا

ودلوقتي جه دور برنس الليالي يرد علي البوست

الي هو بلا فخر وبفخر

احم احم

انا

D:


بص يا عم بطوط

اولا هي مش فكره إيه الي يتكتب صح او غلط

اولا انا شايف إن فيه حاجات طبيعيه وعامه كل الناس بتعملها بتفاوت

زي ما إنت ذكرت زي الشتيمه وإنك تكون مستفز تقول الفاظ قبيحه وإنك تحتلم وإن يكون في حاتك حاجات غلط

لكن المهم إنك لازم تفكر الي هتقوله ده هيفيد الناس بإيه

هترجع وتقولي ماهو التدوين مش مهم وبلا هدف

هقولك بختلف معاك

التدوين لو من غير هدف نبطله احسن

لأن احسن ما نعمل حاجه هايفه نروح نقرا شويه قرأن او كتاب مفيد او نتفرج علي برنامج مفيد ا نلعب رياضه او نشتركم ف جمعيه خيريه تدينا ثواب بدل العبث وتضييع الوقت كله علي الفاضي

اولا واخيرا إنت بتقدم معلومات او خبرات او إجتهادات بيستفيد منها المتلقي

وأكبر دليل علي كده إني انا بدخل مدونات ناس كتير بعرف معلومات ماكنتش اعرفها يبقي ادي اول هدف كسبت معرفه

اول كلمه بتطلع علي لساني ربنا يكرمك وجزاك الله خير يبقي إنت إدتني حاجه مفيده وانا دعيتلك ده هدف تاني
الي هو هدف عدم كتم العلم

ثالثا المعرفه نفسها والحب في الله والود والتراحم ده هدف تالت

بتطور من اسلوبك

بتكتشف مواهب فطريه فيك

بتغير إنطباعات وقناعات ناس

بتصحح معلومات ناس

بتدل علي الخير

بتجمع ناس كتير علي حب الله وحب المعرفه

بتكون وسيله إعلاميه شريفه وغير ربحيه هدفها نشر الحقيقه والوعي بدون خوف

شوفت بقي كام هدف

انا مش بنحرف عن الموضوع بس حبيت اوضحلك بعض اهداف التدوين

بص يا بطوط فيه تفكير مسيطر عليا ليه كتير قوي

وهو إني سواء كتبت في المدونه او إتكلمت مع حد او نزلت كتاب او مجموعه كتب او عملت برنامج تلفزيوني او اي شيء يوصل للناس

يا تري إيه الي ممكن بعد ما أموت الناس تستفاد منه ويبقي صدقه جاريه تنفعني في قبري وتنفع حد من بعدي

عشان كده بشوف إيه الحاجه الي ممكن اكتب عنها في أجندتي

إيه الموضوع الي يستحق الطرح

إيه مغزي الي عايز اوصله

هل لو انا شخصيا قريته تاني هستفاد منه زي ما غيري ممكن يكون إستفاد

وبعمل طريقه حلوه قوي

بعد ما بكتب الموضوع

بحاول اتجرد من إني انا الي كاتبه

وكإني قاريء عادي

واشوف إيه القصور الي في الموضوع يا تري إستفدت إيه من الي مكتوب

وساعتها بيوصلني شويه من إنطباع الناس

هكمل في التعليق الي بعده

z!zOoOo يقول...

وكمان لازم افكر

إلي انا بكتبه ده هل ممكن يأثر بالسلب او بالايجاب في الناس

ماهو مثلا زيكا قال إن فيه متلقياو قاريء واعي وقاري مش علي نفس القدر من الوعي

طيب يعني لو الي عنده وعي وفهم قصدي يبقي كده شيء كويس

والي وعيه اقل ومافهمنيش يبقي هو حر حتي لو ضر نفسه او إقتنع بكلامي ولو غلط

طيب ده حتي الحديث بيقول الدال علي الخير كفاعله

يبقي الدال علي الشر إيه ؟؟؟

وبعدين مثلا ماهو فيه واحد الناس متعده عليه وهو بيتكلم في موضوعاته بشتايم والفاظ

فيه ناس بتقبلها عادي عشان عارفه الشخص ده

فيه ناس لا وتقول ده عيل ... وسافل


طيب انا ليه ادخل نفسي في نفس الشبهه

طيب ما انا اعمل حساب للإتنين للي هيفهم وللي مش هيفهم

والاهم مش معني إني بكتب حاجه صح او كويسه إني برسم صوره غلط عن نفسي

يعني مثلا اخ عزيز ليا في التدوين وبعشق مدونته وبستفاد منها جدا

بيبقي كاتب موضوع وفيه إجتهاد منه
وفكر وبيطلع بنتايج حلوه قوي

لما بييجي حد يشكر فيه

المدون ده بيقوله مش كل الي بقوله موجود فيا

يارب اعرف ابقي نفس كلامي الي بكتبه

يعني معني كده إنه إعترف ببعض القصور في نفسه

بس مش معني كده إنه يكتب عن تفاصيله

علي فكره اسخف مدونات بكره ادخلها

هي المدونات الي كل فحواها عن صاحب المدونه

الي شويه كمان لامؤاخذه يعني هيقولك بيعمل إيه في الحمام

D:

اصل ماتزعلش مني مانكدبش علي بعض

إيه درجه اهميتك عشان تكتب عن نفسك بالغزاره ديه

وإيه الي ف حياتك مهم عشان يكون محور الكلام كله عليك .. إيه إنجازاتك .. إيه ف الي بتحيه ممكن يكون مفيد لحد

عايز تخلي مدونتك مفكره شخصيه

يبقي يا تكتب علي ورق يا إما تقفلها وتخليها لنفسك

الناس مش مجبره تقرا كلامك الي ممكن يكون مسيء وزباله كمان وانت شايفه حريه

ولا انا غلطان

وبعدين لما بتذكر غلط بتعمله ويكون ذكرك للغلطات ديه بصوره متكرره

ديه فعلا مجاهره بالذنب وديه ذنبها اكبر

وممكن حد ضعيف القناعات وسهل التأثر ياخد تجاربك وكلامك نبراص

وتاخد ذنبه

هتقولي وانا مالي

هقولك إنت الي عرضت المحتوي ده عليه

وإنت المسئول الاول عن إنقياده لكلامك

ماهو إنت لازم تعمل حساب كل العقليات الي بتقرالك وكل الاعمار وكل أيديولوجيات العقول

لو كنت مخصص كلامك لفئه معينه يبقي تقفلها وتعملها بدعوات

زي الي بيعمل حفله خيريه ويعزم رجال اعمال وسيدات مجتمع

بيبعت دعوات لفئه معينه مش بيكتب الدعوه عامه

:)

هكمل في الي بعده

z!zOoOo يقول...

وبعدين مثلا سو قالك ما تكتبش الي ممكن يتمسك عليك بعد كده

هو كلامه صح بس مش بنفس المفهوم

مش مهم الناس تشوف إيه او إنهم يقولوا عليا إيه

المهم يوم القيامه لو إتسئلت عن الي كتبته بإيدي

ونفعت كمان واحد وضرت كام واحد

كام واحد إتأثر وكمان واحد إقتنع

كام واحد خدني قدوه

وطبعا العكس


وبعدين انا ليه اصلا اكتب عن شيء فيا مش ضروري اصلا

يعني مثلا استاذ فاضل قبل كده قالي

ليه مش كتب تفاصيل عنك في المدونه

يعني اسمك او سنك او دراستك او ديانتك
او اي شيء تاني يدل عليك

قولتله انا بقدم محتوي معين رسالتي بتبتدي وانا بقدم المحتوي ده

او ما بتوصل الرساله والمغزي للمتلقي بتكون رسالتي خلصت لحد هنا

اما الي عايز يعرفني بعيد عن المدونه انا مش هخبي نفسي

رغم إني مش خايف إن حد يعرف عن حاجه
لأني واحد في كل مكان

ورغم إن ده بعيد عن موضوعنا

بس عشان انا واحد ف كل مكان

نفس الشيء الي خلاني عرفت بتاه 3000 واحد ويمكن اكتر او اقل

ومابقاش منهم معايا غير 3 افراد

شوف الفرق في الوضوح 3 اشخاص من 3000
؟؟؟؟


وبعدين إنت نفسك مش كتير بتكتب حاجات كتير هل كل الي بتكتبه صالح للنشر

فيه حاجه بتبقي فضفه فعلا منك لنفسك مش لحد تاني

وفيه حاجه عامه

وفيه حاجه مقصوره علي إصحابك

وهكذا

يعني إنت مثلا قولت انك ما كتبتش عن سقوطك وعن صداقاتك وعن خناقاتك وهكذا

رغم إن ده شيء برضه يعتبر طبيعي بالنسبه لناس كتير ومش عيب

لكن بصلها كده إيه الي هيهم الي بيقرا
إنه يعرف شيء زي كده

وبعدين إنت ليه تتجمل اصلا خليك علي طبيعتك

مش لازم تظهر إنك شيطان ومقطع السمكه وديلها

ومش لازم تظهر ملاك ومثالي

لأنك لو الاولاني تبقي ابليس

ولو التاني هتبقي ملاك

والتاني هما الي في الوسط

بني أدمين = بني الانسان

:)

وماتكتبش بنيك نيم

اكتب بأي اسم مستعار لو إنك خايف من حقيقتك

لو إنك مهزوز وخايف حد يعرف عنك حاجه

لو إنت منافق خايف تبص ف عيون الناس

ولو الظاهر بتاعك غير الباطن

علي فكره علي حكايه السلسله او غيره

الفكره إن الشخص الي جابك الهديه مايعرفكش كويس

لأنه لو يعرفك كان هيقدر إيه الشيء المناسب الي يهديك بيه

علي فكره انا مش بدقق علي الامثله

بس اثارتني نقط فيها

وفي الاول في الاخر رغم إن ربنا بيحاسبك علي النيه

لو كانت نيتك كويسه

بس هل ترضي حد يتضر من كلامك او من تجاربك المنشوره

حتي لمجرد الضرر النفسي

لو ضميرك هيبحيلك كده وماأنبكش

يبقي إكتب الي انت عايزه

بس خد بالك

قبل ما البني ادم يشوف او يقرا ربنا شايفك

وقال في كتابه العزيز

" وما يلفظ من قول إلا لديه رقيب عتيد "

صدق الله العظيم

مبسوط جدا إني جيتلك

ومبسوط اكتر بمناقشك ومناقشه الناس الجميله قوي ديه

ربنا يديم التواصل

مستني ردك عليا

وعذرا لإطاله

:)

تحياتي

The illusionist يقول...

سؤال واحد

انا عاوز اعرف رايك

Zika يقول...

معلش يا بطوط
انا ودكتور احمد خلصنا
بس طلعلنا زيزو فلا مؤاخذه اتاخر كده شويه

زيزو
انت بتقول انك بتحبني وارائي جميله
وبتحب وتحب نقاشي وكل الحاجات الحلوه دي اللي ربنا يخليك عليها وشكرا وكل الكلام ده بس انا عايز اسالك سؤال من خلال تعليقاتك وياريت تجاوبني عليه

انا ع المدونه باشتم
وباسب وبالعن
وتلت تربع البوستات عني بشكل او باخر .. وبادافع عن الرقص
وبحب المزيكا
ومابقراش قرآن غير وانا باصلي
والتدوين بالنسبالي مالوش هدف
و و و و و

بتحبني على ايه بقا ؟... وليه بتدخل مدونتي ؟

رد يا زوز هاستنا سيكا كده لو ماردتش هاروح اجيبك من مدونتك :D
تحياتي واحترامي للجميع ما عدا بطوط عشان ماجابش السندوشتات :P لحد دلوقت

sony2000 يقول...

اولا بجد مبسوطه اني بعلق عندك ولأول مره وبجد بوست رتائع

z!zOoOo يقول...

السلام عليكم

ازيك يا بطوط

يارب تكون بخير

معلش علي إقتحامنا مدونتك كده

لكن إنت فتحت باب للنقاش

بصدر رحب

وبشكرك علي ده واسمحلي ارد علي زيكا

الاول ازيك يا زيكا

يارب دايما تكون بخير

علي فكره يا زيكا انا فعلا بحب نقاشي معاك

وكلام و نقاش دكتور احمد

ومش مجامله علي فكره

وبعدين إنت فاهم إنها مش مستاهله إني اجاملك او اجامل غيرك

وعارف كمان إني انا اول واحد بهاجمك لو مش متفق مع رأيك

زي ما حصل برضه وإختلفت معاك هنا


إنت بتقولي انك بتشتم وتسب في مدونتك

وتلت تربع بوستاتك عنك بشكل او بأخر

وبتدافع عن الرقص وبتحب المزيكا

ومابتقراش قرأن غير وإنت بتصلي

والتدوين عندك مالوش هدف

إلي أخره

وبتسأل بحبك علي إيه

وليه بدخل مدونتك

علي فكره ده مش رغي بس بعيد كلامك عشان ارد عليه مره واحده

وإسمحلي ارد عليك من الاول

فيه ناس يا زيكا بتعبر عن رأيها وكل واحد ليه طريقه مختلفه

فإنت واحد من الناس بتعبر بالطريقه ديه

ونقدك شكله كده ده شيء إنت حر فيه وراجع ليك

ومحدش يقدر يلومك علي إسلوبك

لكن الاهم في نقدك ده رغم الشتيمه الي فيه

إن فيه جزء من فهم وعقلانيه

وده الاهم

ومش فرضا عشان انا مش بحب الطريقه ديه

او إني مش بستخدمها إني مقرالكش

اما بالنسبه للبوستات الي كلها صاحبها بيتكلم فيها عن نفسه

انا اقصد بيها مقصد تاني

يعني انا شفت مدونات صاحبها بيتكلم فيها عن نفسه بشكل مبالغ فيه

يعني ادق تفاصيل يومه بيتكلم فيها

وده شيء مايهمش حد

وأظن إن اي كاتب مش بيكتب عن نفسه بالطريقه ديه

غير لو فيه مغزي عايز يوصله من تفاصيله ديه

وإلا يبقي كله هراء في هراء وكاتب ركيك مايستحقش القرايه

لكن انا برضه ليا نظره في موضوعاتك

وأظن كده علي قد فهمي الي علي قدي

وكمان بلاحظ رغم إن فيه بوستات بتبقي عن نفسك

إلا إن لازم يكون فيها فكره

وإلا ماكنتش كتبها

فيه بوستات عندك مش بعلق عليها

ومش مهم السبب إيه

لكن صدقني كتير بقرا بوست افكر من خلاله في حاجه

او توصلي فكره ممكن تكون بعيده عن الموضوع

وممكن قليل الي ياخدوا بالهم من حاجات معينه فيها

وممكن إنت نفسك ماتاخدش بالك منها

ده غير التنويع عندك يعني مش كله عن نفسك

وزي ما قولتلك فيه ناس بتكتب عن نفسها كما لو كانت من عظماء التاريخ

وكما لو كان العالم هيخسر لو مقراش يومياته وإتعلم منها

ناهيك عن إنه بيكتب عن نفسه بصوره مبالغ فيها

هكمل في الي بعده

z!zOoOo يقول...

بتدافع عن الرقص وبتحب المزيكا

إيه يعني إنت حر ومسئول عن أرائك

انا كمان بحب الفن الشعبي وكنت في يوم من الايام

بشترك في عروض مسرحيه فيها استعراض وفن شعبي

ومش مكسوف من كده ولازالت بحب الفن ده لحد دلوقتي

اما الرقص من نوع تاني فده إختيارك وقناعاتك عن الحاجه ديه

وماحدش يقدر يغير قناعاتك بيها غير نفسك

وعلي فكره بحب المزيكا جدا وبعزف كمان

وكنت برضه مشترك وانا اصغر من كده

في فرق كورال وعندي شغف بالموسيقي وحابب اتعلم

ألات كتير والموسيقي والغنا والفنون بيجروا ف دمي

لأني شايف الفن من منظور تاني

ومش شايف إن كل الفن حرام

لأن الي خلق الفن وأبدع الجمال

مستحيل يخلق الفن فينا وبعد كده يحرمه علينا

أما حكايه القرأن الي مش بتقراه غير وإنت بتصلي

ده شيء تاني خالص ماليش إني اتدخل فيه

لأنه علاقتك مع ربك

إنت الي هتقرا بحب ورغبه منك

وإنت الي مش هتقراه ومش هتاخد ثوابه

بس عايزك تفتكر أيه ربنا عز وجل قالها في كتابه العزيز
بسم الله الرحمن الرحيم

"وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى

قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى .. طه

صدق الله العظيم

واولا واخيرا ربنا الي هيحاسبك علي اعمالك مش انا

أما عن التدوين

شوف فيه ف مصر بكل محافظاتها كام مدون

وكام إتجاه فكري وألاف الافكار كل واحد متبنيها ومقتنع بيها

كل واحد وليه قناعاته الشخصيه

وأظن إني شرحت ف تعليقي فوق

عن رأيي في حكايه التدوين الهادف او الغير هادف


اما بحبك ليه

فده بقي شيء مختلف تماما

اولا : لأنك إنسان صريح بحس إنك شفاف ومش بتخاف تداري

علي الاقل من الي بتقدمه عن نفسك شيء

ثانيا : بتقول رأيك بكل صراحه بدون خوف من نقد او حتي شتيمه

ثالثا : مؤمن بالحريات حتي ولو مش متفق معاك فيها كلها

رابعا : بحس إنك بتعرف تتناقش وبتقول رأيك وبتحترم الرأي الاخر

حتي ولو هجوم لشخصك

خامسا : إنك بتكتب رأيك وعندك قابليه إنك تقتنع وتقبل الرأي الصح

وده شيء انا لاحظته في بوستاتك القديمه

سادسا : إني بحب كتاباتك لأنك بتبقي علي طبيعتك من غير تكلف ولا إبتزال

سابعا : لما ربنا بيحبب فيك حد .. بتسأله ليه يارب انا بتحب او ليه يارب البني ادم ده بيحبني

او ليه إنت نفسك بتحب الانسان ده

والله ربنا الي بيحط جوانا الحب ومش بنختار نحب مين

عندك مانع بقي

اما مدونتك فأنا زي ما قولت فوق

وعلي فكره انا مش بحب النفاق خالص

ولا المجامله ولا الكدب بكرهم عمي فعلا

يعني مش مجبر عليك ولا علي مجاملتك

لأن ببساطه فعلا بيجمعنا الحب في الله ومالناش مصالح عند بعض

عشان ننافق او نجامل او نتجمل

ودايما انا مقتنع بالمثل الي بيقول الطيور علي اشكالها تقع

ولو مافيناش حاجات متشابهه او العلاقه مابيني وبينك

او مابيني وبين حد تاني او مابينك ومابين حد تاني

لو مش متكافئه هيطول الوقت مهما يطول وهتتفرقوا

وعلي فكره كلمه اخيره هقولهالك

انا لسه كنت بقول لواحد من اصحابي

انا مش بحب إن اصحابي يكونوا موافقيني علطول او شبهي ف كل حاجه

لأن أي علاقه مهما كانت صورتها هتكون علي اتفاق علطول بدون اي نوع من الاختلاف

اعرف علطول إن فيها حد ماعندوش شخصيه او حد منافق او بوشين

ومش شرط نكون متفقين عشان نجتمع

يمكن يكون الاختلاف هو الي بيجمعنا

وكفايه كده عشان انا رغيت كتير قوي

ومعلش معلش معلش يا بطوط علي الرغي ده كله

وأتمني يا زيكا إنك تكون فهمتني كويس


وشكرا كمان مره يا بطوط

وأتمني تنورني يا حج بطوط

في إنتظارك إنت وزيكا وكل شخص محترم

تحياتي للجميع

Zika يقول...

زيزو
مسير الحي يتلاقى ونعيد الكلام ده في الموضوع بتعبيرات وش .. مش بس تعبيرات كيبورد ولحد ما ييجي اليوم ده
دمت صاحبي وفي رعاية الله يا زوز
واحبك الله الذي احببك فينا