2011/05/31

مش قادر اصبر لبكره


انا جاتلى دعوه على الفيس بوك لشهر كامل تدوين .. شهر كامل تكتب فيه كل يوم .. مش عارف ليه المره دى غير كل مره حاسس انى متحمس جدا للموضوع دا .. متحمس لدرجه انى مقدرتش انتظر للصبح لحد ما يبدأ المعاد الرسمى لانطلاق حمله تدوينه كل يوم .. رغم ان المره دى مفيش حاجات كتير ممكن يتكتب عنها.
الدراسه اللى كانت بتعمل اكشن وبتخرج مشاعر مختلفه ... الحمد لله خلصت على خير
البنت اللى كنت عاوز اتجوزها .. رحت لباباها وقالى خلينا نأجل الموضوع شويه لحد ما الظروف تكون واضحه 
عمى واحب شخص ليا فى الدنيا واللى كنت قلقان عليه عشان مرضه الاخير .. ربنا توفاه من ايام ومن ساعتها وانا حاسس زى ما اكون عيل صغير تاه من امه فى السوق .. عمال يدور فى كل الوشوش عن امه ويعيط ... بس برضه مشاعر القلق والاضطراب وعدم الاسقرار بقت مشاعر حزن عميق ومستمر... ربنا يرحمه يارب.
حتى الشغل مفيش فيه جو اكشن .. ربنا يسرلى بعياده صاحبها مسافر من سنه تقريبا وقالى اخد عيادته وادفع فلوسها من دخلها .. اه هى لسه فى البدايه ولسه بدفع فيها اكتر ما ما باخد منها .. بس هى حاجه مستقره انك فى بدايه حياتك تكون عندك عياتك الخاصه... بدل التنطيط فى المستوصفات الى اغلب الدكاتره بتعلمه بعد التخرج.
مفيش حاجه ممكن تكون مثيره للكتابه بالنسبالى فى الوقت دا ... حتى الكلام عن وضع البلد ملوش طعم دلوقتى .. كل الناس عماله تحلل وتنتقد ومحدش بيسمع حد .. مش ناقصانى انا كمان اقعد اكتب يعنى عن حال البلد.
ممكن الواحد يكتب مذكراته يوم 25 يناير او يوم 28 يناير جمعه الغضب وباقى ايام الثوره .. الحديث فى المواضيع دى هتبقى كأنى بقول انا بطل وشاركت فى الثوره وكل الاحداث اللى هتتحكى مش هيبقى ليها معنى غير كده .. رغم اننا كلنا عارفين ان مكنش فى الايام دى بطل .. البطل الوحيد كان كلنا مع بعض.
رغم كل اللى فوق دا انا متحمس جدا للكتابه .. اصل كل سطر من اللى فوق عشان يوصل للحاله دى مر بحاجات كتير واكشن كتير .. وكان نفسى اوى احكى عن كل حاجه فيها . كان نفسى اتكلم مع نفسى زى ما بعمل هنا .. اتكلم بصوت عالى وابقى عارف ان فى قلوب زى المرمر بتسمع.
عموما سيبكم من كل اللى فوق دا ونبدأ من بكره ان شاء الله :)

هناك 6 تعليقات:

قلب ينبض لله يقول...

بص هو انا ماينفعش اشارك في الحملة دي علشان يادوب اتفرغ اقرا للناس اللي بتكتب حلو زيك

يلا مستنيين البوستات بفارغ الصبر
:)

ربنا معاك

فاتيما يقول...

واحنا ف انتظارك
:)

sony2000 يقول...

ماشي ياعن

لما نشووووووووووووف

رندة أبو رمضان يقول...

حالة القلق والتوهان دي طبيعية متخافش
انا عشتها ثانية بثانية من شهر ونص
وانا دلوقتي فى نصها تقريبا، بس تعرف الفرق بيني وبينك ان انت موضوعك مع البنت اللى بتحبها متاجل شوية
انا بقى انتهى ومافيش بيدي حيلة، بس الحمدلله انت توكل على الله وقول يارب وبعد كل غم فرج وكل ليل ليه صباح جميل
وانا كمان متحمسة للتدوين فى الحملة مع اخواتي المصريين
تحية من غزة

رحلتنا في الحياة يقول...

من ناحية المواضيع اللى تكتب عنها هتلاقى كتير باذن الله
اصل اللى جوانا مش بيخلص
فى انتظار تدويناتك باذن الله طوال الشهر

r يقول...

مش مهم ان كل شئ مترتبله وبنحلمه يتحقق بنفس الترتيب والتخطيط
فى حاجات قدريه بتكون هى افضل ترتيب
ابدأ وتوكل على الله وكله خير ان شاء الله