2010/03/29

مين عليه المشايه؟؟



قررت انى احتفل بعيد ميلادى السنه دى بطريقه مختلفه .. قلت الواحد يختم ال 23 سنه اللى فاتوا عليه بإنه يعمل خير .. واكتشفت ان الواحد لما بيعمل خير بيستفاد بحاجات كتيره للمستقبل ...وانا استفدت وعشان كده جاى انقل لكم الاستفاده اللى استفدتها دى.

بما ان ام زعبله فى شهرها التاسع .. والدكتور قال لازم تمشوها .. وعمتى قالت لها امشى كل يوم على الاقل ساعه ربنا يرزقك " بساعه سهله " ( عجبانى الدعوه دى اوى معرفش ليه) .. ولأنى انا اللى قررت اعمل خير قبل ما اكمل ال 23 لذا تطوعت انى انا اقوم بهذا الواجب القومى وامشى معاها .

طبعا التطوع دا انا استفدت منه استفاده بالغه .. حد يقولى ازاى؟
اقوله انا ازاى بقى.
دلوقتى انا لما اروح اتقدم لواحده .. ووالدها يقولى انت عليك الشقه , والعربيه , والشبكه بتسعين الف جنيه , وتجهز 130 اوضه ,
والفرح لازم يكون فى البرازيل وشهر العسل فى كوالالمبور .
ساعتها انا بقى ابص له كده بمنتهى الثقه واقوله سيبك من كل دا .. الحاجات دى امرها سهل .. المهم من عليه المشايه؟
طبعا متخيل انه هيستعبط ويعمل نفسه مش فاهم .. وانا برضه هعمل عبيط واستمر فى الكلام ..ايوه مين اللى هيجيب المشايه ؟ ولا انت هتمضى اقرار على انها هتصاحب واحده تخينه عاوزه تخس لما تبقى فى الشهر التاسع ولا ايه بالظبط فى الجوازه اللى ملهاش ملامح دى يا عم الحج.
طبعا انا متخيل انه برضه والدها هيستهبل ويقولى يا بنى انا مش فاهم منك حاجه
وانا هستمر فى كلامى زى الصاروخ
مهو حضرتك دا عشان تريح بنتك .. وانا بصراحه مش ناوى امشى معاها وهى فى الشهر التاسع .. اصلك مش فاهم .. اصلى وانا قبل ما اكمل 23 سنه كانت اختى حامل وفى الشهر التاسع ماشى
اكيد هو هيقول ماشى
المهم بقى يا سيدى انا تطوعت انى امشى معاها بقى عشان ربنا يرزقها " بساعه سهله " ( وكانت عجبانى الدعوه دى ايامها  بالمناسبه ) 
شغال؟
هيقولى شغال
المهم بقى انا استفدت انى مكررش التجربه دى .. هتقولى ليه هقولك انا بقى ليه
اصل الموضوع بيبدأ بساعه قبل ما نخرج .. 
ماما انا تخنت اوى .. وباطنى باينه؟؟!!
يا بنتى انتى فى التاسع لازم باطنك تبقى باينه
يعنى انا شكلى وحش اوى .. طب مش خارجه :((
يا بنتى اخلصى عشان ولادتك تبقى سهله
طب البس العبايه السمرا ولا العبايه البنى .. مين اللى بتدارى اكتر
وطبعا هنقعد ساعه فى النقاش دا لحد ما ازهق على بنتك وارميها من الشباك.
يرضيك ارميها من الشباك
.......................
اديك سكت ..أمال ليه مش عاوز تجيبلها المشايه.. ام انت غريب صحيح
المهم يا سيدى خرجنا ... ومن اول ما خرجنا بدأ الزن
انا رجلى وجعتنى 
يا بنتى احنا لسه مشينا حاجه .. ماما قالت نمشى ساعه على الاقل
طب انا ركبتى وجعانى 
معلش استحملى
طب انا عاوزه ادخل الحمام
هو انا ماشى مع عيله صغيره .. مدخلتيش ليه قبل ما تخرجى .. ولا نقعد فى اى جنب وادارى عليكى 
انت بتتريق؟؟!! طب اعزمنى على عصير قصب
اللهم طولك يا روح .. يا بت انتى امشى من غير كلام استمتعى بالجو والخضره.
طيب ما تيجى نركب توك توك ونروح بقى
ماما قالت على الاقل ساعه 
طب هات ايدك امسكها انكجيه
(وطبعا اكتشفت انها بتستهبل وبتسند على كتفى لحد ما خلعته)
مش همشى انا مع حد انكجيه
انت تطول اساسا تمشى مع واحده زى القمر زيي انكجيه
يعنى انا يوم ما مشى مع واحد انكجيه تكون اختى وكمان حامل فى الشهر التاسع .. ايه الحظ دا يا ربى

طب تعالى نقعد شويه على الرصيف نستريح
اخر الزمن هنقعد فى الشارع على الرصيف ؟؟!! .. وبعدين هنتعب اكتر لو قعدنا .. ممكن بقى تمشى وانتى ساكته شويه.
شويه وقعدت ترن على جوزها فى السعوديه كتير
الراجل قلق قام اتصل
قالت له بغلس عليك بس مفيش حاجه .
وبعد ساعه من المشى الشاق بسرعه السلحفاء .. اغتبنا فيها كل اللى نعرفهم ( يعنى ادخل النار انا وبنتك عشان تستريح .. يا عم ما تجيبلها المشايه وتريحنا يا باااااااى عليك ) .. واتكلمنا فيهم على ازمه الزمالك .. ومشكله رغيف العيش .. وترشيح البرادعى ( يعنى ممكن نلبس قضيه امن دوله.... وبنتك تولد فى السجن عاجبك كده) .. وكل القضايا الحيويه. 
وما بين كل موضوع وموضوع .. السؤال المعتاد .. هو فاضل اد ايه؟!!
والاجابه المعتاده خلاص اهو
والتعليق المعتاد على الاجابه المعتاده .. انت كل شويه تقولى خلاص اهو.

وعشان كل دا واكتر .. فانا من الاخر لازم اتفق معاك  (كابو للبنت اللى هتجوزها) على انك هتجيب المشايه .. واهى المشايه تبقى فى البيت .. بنتك عاوزه تدخل الحمام ماشى.. عاوزه تشرب عصير اى حاجه تروح تجيبه من التلاجه .. عاوزه تتكلم تتصل باى حد من صحباتها وهى ماشيه عادى ... وبكده الجميع يستريح ونبقى بج هابى فاميلى 
اظن عدانى العيب يا عمى ؟ ولا انت شايف ايه؟
طبعا انا هسيبكم تتخيلوا رد فعله .. انا شخصيا مش عاوز احرق لنفسى الاحداث واعرف رد فعله لما فعلا اروح اتقدم عشان اتجوز
اه يا اخوانا لازم نقول تنبيه مهم جدا .. بعض الاصدقاء بيعتبر انه لما يقولى فى عيد ميلادى كل سنه وانا طيب انه عمل اللى عليه
احب اقوله لأ .. بالعكس .. ابسوليلتى .. انت مش هتعمل اللى عليك الا لما تجيب هديه محترمه .. اقل اقل حاجه تحولى 5 جنيه رصيد انا بس حبيت انبه عليكم عشان محدش يبقى له حجه
شكرا لكم :D

هناك 25 تعليقًا:

Sarah Sobhi يقول...

كل سنة و انت طيب يا بطوووووووووط
والسنة الجاية تكون بتمشى زعبلة شخصيا

adel يقول...

مش لو كنت قدمت السبت كنت لقيت باقي الاسبوع ؟
عيد ميلادي قبليك باسبوعين و برضه بقيت 24 سنة
ومجبتش حاجة

تصدق كنت هاجيبلك المشاية ؟

Maha Shahen يقول...

كل سنه وانت ومدونتك طيبيين

وبعدين فين البيت اللي فيه الكم الهايل دا من الغرف ايه هيطلب تسكنها فى البيت الابيض ههههههههه

وعود احمد ومحمود ليك من جديد

мαησηα يقول...

ههههههههههههههه

ال وانا تحمست وقلت ربنا يبارك فيك وخلتنى اتكسفت من نفسى شوية ههههههههه

الاقيك مشيت ام زعبلة ههههههه

هو ده العمل الخيرى يا راجل

ك سنة وانت طيب يا بطوط بجد ربنا

يسعدك يارب ويهنيك ويرزقك بعروسة

لقطة بالمشاية يارب اللهم اميييييين



الخمسة جنية وصلت ؟؟ صح فرتكها بقه

ماهى جايلاك من السما بقه

هههههه

mohamed ghalia يقول...

انا هطوع واجى امشى معاك فى الساعة السهلة دى
يمكن تتسهل ياعمنا بس أوعى تفتح فى الإسهال

sony2000 يقول...

ايييييييييييييييييون كدا يابطووووووووط
عرفهم من اولها مين بطوط ده
(انا جيه بس اهدي النفوس)
كل سنه وانت طيب ياعم ومبروك العوده للكتابه فالمدونه تاني
بس بذمتك بذمتك
موش وحشتك ياشييييييييخ؟؟؟؟؟
يلا عقبال العيد الميلاد المليون الا45634 يوم بس
علشان القر والحسد
هههههههههه
تقبل مروري وتحياتي

مي يقول...

كل سنة وانت طيب يا بطوطنا وايامك كلها فرح وسعادة وتمشية وعقبال مليووووووووووون سنة
واستحمل ام زعبلة بلاش تندل دى خلاص ربنا يجعلها ساعة ماركة محترمة وسهلة(؛

بطوط من حق انا عايزة اتمشى فاضى امتى؟؟؟
وحشتنا بجد

آيوشة يقول...

كل سنة وانت طيب يادكتور
وبصراحدة انت اثرت موضوع مهم محدش كان واخد باله منه
حلوة فكرة المشاية بس معلش بقى دى تبقى على العريس مش على العروسة ولا على باباها
هو عايز يريح نفسه يبقى يدفع بقى p:

nigro يقول...

طب لو طلبت معاها - و هي بتمشي على المشاية في البيت - عصير قصب زي الموقّرة أم زعبلة
هتبقى إيه ظروفك وقتها يا معلم

غير معرف يقول...

هههههههههههههههههههههه

ياسلاااااااااااااام هى دى الاخوات ولا بلاش فعلا الاخوات وقت المشاية :D

فكرتنى كان نفسى يكون عندى اخ كبير عشان امشى معاه واقول البوى فريند بتاعى هع هع هع هع هع هع

يلا ربنا يكرمها بساعة سهلة ويجى زعبلة بالسلااااامة

Unknown يقول...

ايه ده
علي كده بقي المشاية دي مهمة
تصدق افادتني افادة عظيمة
مش عارف من غيرك كنا عملنا ايه
انا اول حاجة هفكر فيها في الجواز ده المشاية
ههههههههههه

كل سنة وانت طيب
وعقبال ميتين سنة

فراشة يقول...

كل سنة وانت طيب
وربنا يرضى عنك طووووول لعمرك

ولو ع الهدية بس كدا اجيبلك انا المشايه

وربنا يقوم ام زعبله بالسلامة

لاسع افندى يقول...

كل سنه وانت طيب وعقبال 100 سنه

جميله فكرة المشايه بس كانت فين من زمان


تحياتى

Unknown يقول...

اولا كل سنة وانت طيب يا بطوط وعقبال 320 سنة
ثانيا :يا باشا انت عريس لقطة هما اللى يجيبولك كل حاجة العفش والشقة والمهر والمشاية
ثالثا :بالنسبة للهدية واضح ان حضرتك طالبها من اصدقائك وانا لسه متابعك من بعد ما طلت تدوين خالص يعنى ان شاء الله كمان 10 سنين لما نوطد علاقتنا ونبقى أصدقاء أبقى أجيبلك هدية ((:
أخوك أمل مشرق (الفيس بوك )

سَارةٌ يقول...

ههههههههه ..

بجد المدوونه دي ملهاش حل

وكل مشايه وانت طيـب ..

و ربنا يكتر من امثالك كده .. وتفتح جمعيه قوميه للساعه السهله دي .. ^_^

اه صح .. ادام انت كملت 23 سنه يبقى المفروض فيه جاتو وحلويات وإلخ إلخ إلخ

وبعدين يبقى فيه هديه ^_^

أسماء حسين يقول...

هههههههههههههههه
أولا بقى
كل سنة وانت طيب بس أنا نفسى عاوزة اللى يحوللى الخمسة جنيه دول صدقنى فمتنتظرش منى حاجة
الا اذا كنت ناوى تحوللى عشرة وابعتلك نصها :)
بس بتمنالك بجد تقضيه وانت مبسووووط يا بطوووط

ثانيا تخيل انك بالبوست العسل دة أوحتلى بفكرة عظيييمة جداااااااااااااا لكيفية استفزاز جوزى واخويا سوا أيام حملى اذا عشت وكان لى عمر لحينه ان شاء الله
شفت بقى
بجد هجربها أهو أطلع فيهم جزء من اللى بيطلع طول العمر عليا
وخليك دايما فاكر ان انت السبب لما أجى هنا وأفكرك بعد كام سنة

saragebaly يقول...

عامك سعيد ان شاء الله

ويرزقك فيه ربنا بالعروسة والمشاية

يعني شايل هم المشاية ومش شايل هم ال 130 اوضة ؟؟!

ولا دي بركات ام زعبلة ههههه

ربنا يرزقها بالخلف الصالح ان شاءالله

تحياتي لك

غير معرف يقول...

اضحك الله سنك
كل سنه وانت طيب يادكتور


روز

أع ـقل مـ ج ـنـونــة يقول...

هههههههههههه
بجد مدونة تحفة
اكتشفت اني عديت عليها قبل ما ابدأ ف التدوين :D
وسبحان الله لما بقي عندي مدونة اد الاوضة الصغيرة اللى عند البواب جيتلك تاني :D

بوست تحفة ..
افتكرتك عملت عمل خيري بقي وكفلت يتيم ف بيتك :D
اتصدمت لما عرفت انك مشيت ام زعبلة
وجاي ع نفسك كدا ليه :d

سيبك انت .. عجبني حوارك انت واختك واللى اكيد هايحصل مع زوجه المستقبل

ولازمن ولا بد ولا مفر ولا مكر ولا اي حاجة:D

تصمم ع المشـــــــــاية

كله الا المشــــــــــــــــاية

يا هـــــي يا المشــــــــــــــاية :D


وكل سنة وانت طيب يابطوط ..

معاك فكة 90 جنيه ورقتين عشان اديلك سبعتاشر جنيه وربع تمشي حالك بيهم ؟

:P ^_^

عاشقه الرومانسيه يقول...

كل سنه وانت طيب يادكتور
دى اختك عقدتك
ههههههههههه
ابقى طمنى عليها لما تقوم بالسلامه
وان شاء الله ربنا يكرمك بعروسه بمشايه
(:

واحد من الناس يقول...

كل سنه وانت طيب يا باشا

ويا ريت رقم الموبايل بسرعه عشان أحولك الرصيد :)

ويا سيدي لو جت ع المشايه سهله

يعني اللي يشتري جهاز بالشيء الفلاني هيقف ع المشايه

بس برضه هتبقى تاخدك تمشي في الشارع عشان الزهق وخنقة البيت

إنهن النساء يا صاحبي

لا مفر من تحاكيمهم وطلباتهم اللي مبتخلصش

كن مطمئنا

هتتباس هتتباس يا عباس

سلاموز

واحد من البلد دى يقول...

السلام عليكم

كل سنة وانت طيب

انا والله العظيم يا ابنى كنت بازورك على طول..لكن اوقات كانت المدونة بتاعتك غير متاحة...وفى الفترة الاخيرة كان العيب عندى انا لأن المواضيع الجديدة بتاعة المدونين اصدقائى ما بتظهرش عندى...عموما...عقبال مليون سنة ق.م لألألألأمش قبل الميلاد(قبل ما تتجوز)ههههههههه

دمت بكل خير

من مزكرات فتاة يقول...

اقسملك بالله انت بجد هايل وزى ماقلت انى مش مضطره اجاملك
ولا انا فارقه معايه اوى انى اظهر فى مدونتك عشان اعلن عن مدونتى
انا بس بجد محتاجه رأيك فى مدونتى وحبقى سعيده جدا لو شرفتنى بزيارتك
لانى بجد مهتمه اوى برأيك

Mahmoud البطراوى يقول...

كل سنه وانتوا طيبين يا احلى اصحاب فى الدنيا
ويارب السنه الجايه كل واحد يحقق كتير من اللى اتمناه

Unknown يقول...

يااااااااه كل ما الاقي كدة لسة فى الـ23 بحقد عليه جامد أوي جدا خالص .. ياسلااااام على جمال الـ23 ، تحس كدة انك لسة صغيور كدة .. حاجة كدة فيها روح معنوية ، إنما إيه 24؟ يعني ايه 24؟ ليه 24؟ .. ما تفهمش أهو رقم عجيب وخلاص .. إنبسط بالـ23 ياعم على قد ما تقدر بجد .. بكرة حيوحشك أوووووووووي

وكل سنة وانت طيب .. دي أول مرة أزور مدونتك وإن شاء الله ما تكونش آخر مرة

فوتك بعافية
:D