2009/10/08

رغى من غير كلام


معرفش ليه وحشتنى الكتابه اوى ... حسيت فجأه ان المدونه وحشتنى وانى عاوز اكتب .. بس اول ما مسكت الكيبورد ضاع كل احساسى انى عاوز اكتب
حسيت انى كل اللى هكتبه هيبقى فى الهسس على رأى سووو
اصل هكتب ايه؟
هكتب مثلا

انى عاوز من زمان اشكر سميره وحسام وسمر ووليد ونوران ودكتور محمد على حاجات كتير اتعلمتها منهم يمكن هفضل طول العمر مدين ليهم بيها ... حاجات اتعلمتها فى الشغل وحاجات اتعلمتها فى الحياه
اكتب مثلا ازاى ارتبطت بالناس ودى وازاى هم ارتبطوا بيا ... ويوم ما سبت الشغل كانوا يوم حزين؟.
اكتب عن الكلام اللى بيطلع من القلب فى اللحظه دى؟

ولا اكتب عن ازاى ممكن ترتبط باشخاص فى وقت قصير اوى كده
اكتب عن انى شفت اجمل ناس فى الدنيا ... ناس بتعلمك بجد ... وبتخاف عليك بجد ... كأنك حد من اهلهم 
اكتب عن النصيحه اللى بتتقال عشان ربنا بس .. مش عشان منتظر منى حاجه ..



طب ودا يهم اللى بيقرا مدونتى فى ايه؟ يمكن ما يهمهش .. بس يهمنى انى اكتب عنه وانى اشكرهم ... يهمنى انى اترخ الشهر اللى فات دا فى تاريخى واكتب عليه شكرا لكل واحد اتعاملت معاه فى الشهر


ولا اكتب عن المواقف اللى بتحصل فى الشغل كل يوم ؟ .. عن المشاكل اللى بتتحل .. عن المواقف اللى بتضحك ....بس حاسس انى عاوز اكتب حاجه عن الشغل.
اكتب عن لحظات الاحباط والنكد والامل والتفائل  اللى مرت عليها على طول الاربع شهور اللى فاتوا  وازاى ان الشهور اللى فاتت بتجسد رحله عمرى كله بشكل سريع


وحتى دا هيهم اللى بيقرالى فى ايه؟

ولا اكتب عن القطه اللى خدتها هديه من دكتور منوسى ... القطه اللى هتجيبلى صرع قريب غالبا ... لما ببقى قاعد فى امان الله والاقيها قامت نطت على رجلى ... ولا اجى امشى تقعد تتحرك ما بين رجلى ....ولا اكتب عن دماغها اللى مكبراها على الاخر
تصدقوا القطط دى عايشه فى نعيم والله... كل هدفها فى الحياه انها تلعب وتاكل ... ولو حد زعلها .. اول ما يجى يلعب معاها خلاص تصالحه ولا كأن فى حاجه




مش عارف ليه حاسس انى عاوز ارغى من غير ما اقول كلام ... عاوز احكى من غير ما اكتب ولا كلمه

يمكن عشان الناس اتعودت انهم يدخلوا مدونتى عشان يضحكوا ... بس المره دى مش عارف اضحكهم ...عشان كده مش عارف اكتب ....  مش عشان انا حزين .. انما مش عارف ليه حاسس انى مش عارف اضحك حد وان دمى تقيل


مش هعتذر انى مش بعلق على مدونات حد-شكلى بقى ووحش اوى - ... كل ما الظروف بتتحسن واقول خلاص هقدر اعلق على كل مدونات اصحابى ... بتتكعبل .. بس كفايه انى اقولكم انى بقرا المدونات كلها اول باول من الموبايل ومش هقدر اعلق لحد امتى الله اعلم



هناك 18 تعليقًا:

Sarah Sobhi يقول...

الموضوع ده معدى على فكره.... هعلق ازاى من غير كلام دلوقتى؟؟

احساس طفلة محبة للرومانسية بس واقعية يقول...

ايوة هنعلق ازاى دلوقتى من غير كلام :)
يا بطوط اكيد المدونة وحشتك ما انت مش بتدخل الا كل فين وفين بس اللى عايزة اقوله انها مدونتك اكتب فيها اللى انت عايزوافضفض او احكى مش لازم تضحك او اللى داخل يضحك احنا زى ما انت قلت فى كل الاوقات جنب بعض مش عشان حاجة عشان ربنا

تقبل مرورى

مي يقول...

ياااه على كل ده غياب
معلش هى فترة وهتعدى المهم انك بخير الحمد لله ومدونتك بتستناك واكيد انت بتوحشها
تحياتى ليك

آه وكفى يقول...

اخيرا يابطوط دانا كنت قربت ايأس ياشيييييييخ
حمدالله بسه
وقول بحبك قول كرهتك قول شفيتم نعيماً اي حاجة بس قول ووحشنا قوالك ياخي
لأ يابطوط مش معنى اناا بندخل عندك عشان نضحك يبئى منستحملكش وانته دمك تقيل انته اخونا كلنا قول اي حاجة زي ماقولتلك

ومرحبا بوجودك ويارب الغيبة ماتطول

نهر الحب يقول...

حمدلله على السلامة
شكلنا رجعنا سوا

إنسانة مسلمة يقول...

حاقولك ماينفعش!
من غير ما تعلق عند
الأخرين ما ينفعش انك
تستمر.ايوة العداد بيعد اننا جينا
بس هى الحكاية عداد!الحكاية تواصل
وطول ما انت ما بتعلقش عند غيرك مهما
كانت الاسباب مش حيحصل التواص دهـ.
وعلى العموم بركة اننا اطمنا انك
بخير وكويس يلا سامووووووووووووووووز

مها يقول...

شكرا على الرغي الجميل يا بطوط
انت بس تعالى ارغي هنا كل يوم واحنا من غير كلام فاهمين وواصلنا احساسك .. والمعنى والمغزى .. والقطة اسمها ايه؟؟؟؟؟؟؟؟

فاتيما يقول...

مش مهم تعلق عند الناس يا دكتور
المهم إنك بتتابعهم و مش ناسيهم
هما كمان و اظن كلهم
مش ناسينك يا بطوط
انا منهم و متتصورش اد إيه ممتنة لتعليقك عند يوسف ..معناه كبير عندى لو تعلم
عاوزة اقولك إن القطط كلها كدا يا عزيزى
القط ميزو بتاعنا كمان نفس النظام
دايما اقول لاخويا المزغود ميزو دا أروق واحد فى البيت دا
و لا ف دماغه حاجة و لا شايل هم
ينام و يتمطع و ياكل و يدلع و يتشاقى
و دمتم
حمدلله على سلامتك و كويس انك طمنتنا عليك
احنا بكرة فى إسكندرية بإذن الله ف زيارة تدوينية
كل مرة اروح اسكندرية افتكر اول مرة و الناس الحلوة بالخير و كنت منهم إنت و مها زين و بابا ابوخالد و الباشمهندس إسكندرانى و ...و ....
و اتمنالكم جميعا الخير من قلبى
سلام بقى لحسن رغيت كتير

إسكندرانية يقول...

مش عارف ليه حاسس انى عاوز ارغى من غير ما اقول كلام ... عاوز احكى من غير ما اكتب ولا كلمه


عايز حد يسمعك من غير متكلم ويقول اللي في نفسك من غير متنطق

عايز تضحك بس مش عارف
عايز تكتب بس قلمك مش مطواعك

مجربة الاحساس دة قبل كدة

دمت سعيدااا ويارب تكون سعيد

pinky يقول...

ana talet esm:|

ست البيت يقول...

وتعليق من غير كلام

لما تحس ان الكلام اكبر من انه يتكتب والحواديت اكبر من الحكي
والاحداث متلاحقة بشكل يصعب معها المتابعة

حتحس انك عاوز ترغي فعلا من غير كلام

وتحس انك يمكن عاوز تبكي من غير دموع

وعاوز تقابل كل صحابك اللي تعرفهم

بس من بعيد لبيعيد
عاجبك كده الغم دا

عرفت توديها العيادة ولأ لأ

أبو كريم يقول...

يا دكتور

إرغى من غير كلام واحنا هنسمعك لانك بتوحشنا اتكلم عن شغلك وعن قططك وحتى لو ما ضحكتناش برده هنحبك

تقبل مرورى

غير معرف يقول...

حمدلله ع السلامه يادكتور اخيرا كتبت البلووج... بس لاااااااااا انا مينفعنيش الكلام ده ...الشهر ده كان مليان احدااث ممكن تكتب فيها 20 بلوج.. نفسى اشوف الشهر ده من وجهه نظرك... فاكر لما قلت مره بيبقى نفسى ادخل ع الماسنجر بتاعك مثلا عشان اشوف الوش التانى اللى مش بشوفه... اهوه انا دلوقتى عايزه اشوفك كنت شايف الشهر ده ازاى.. فهمت حاجه منى هههههههه...عايزه اعرف كمان كل التفاصيل بتاعت الشغل الجديد.. ولو غلبت اوى ومش عارف تكتب ممكن اديك رؤووس مواضيع نقط تساعدك ههههههههه... شوف الموضوع ده وانا فى الخدمه
سلالالالالالالام

روز

صيدلانيه طالعه نازله يقول...

مالك بس يا عم الحاله دى كانت عندى و خفت شويه بعد ما قابلت المدونين فى القاهره بس الحمد لله رجعت تانى و عن استحقاق و يظهر انها حاله عامه يا ضنايه تكونش فيروس فى الجو
ربنا يبعد عنك الحزن و الاكتئاب و يرزقك بموضوع تدوينى جبااااااااااار فى وصف الفشه و الممبااااااااار
و ابقى اعزمنى بقى

انت تسال والكمبيوتر يجيب يقول...

نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

نعكشة يقول...

اقولك

حضرتك محتاج رجل

أيوة رجل بكسر الراء و تسكين الجيم
مش رَجُل إنما رِجْل

رجل حد صاحبك بيحبك او لو والدتك بتحبك تنفع برضو
تنام على رجلها
من غير ما تتكلم

و كل لحظة وا لتانية تقول
عارف كذا كذا كذا

اسكت مش كذا كذا كذا

انا فعلا بحب الواد مش عارف مين

و بما إني معرفش إذا كان عند حضرتك رجل صاحبها بيحبك

فلماذا لا تجع من مدونتك رجل
ههههههههههه

والله حاسة بالبلاهة بس فعلاً لما حضرتك تتكلم عن الحاجات اللى بتمسك دية
هتلاقى ناس تانية حست بنفس الاحساس
هتشاركك فيه
سواء فرح او الم
المشاركة مش وحشة

يلا خير

سلامٌ عليك

Heba يقول...

قول كل اللي في نفسك

مش معقولة الواحد مش هيقدر كل اللي في نفسه هنا كمان

دي حتى دي أكبر ميزة هنا

راحــله يقول...

فعلا والله لما احب اضحك بدخل عندك بتخرج اى حد من المود بتاعه لمود جميل جدا وفجاة تلاقيه بيضحك ومن قلبه ,,

كمل رغى محدش واخد منها حاجه :)