2008/03/19

اهم حاجه العملى!!!!!!



لو ليك ابن او اخ او قريب حتى لو من بعيد وبعيد جداااااااا فى طب اسنان..وعرفت انه بيشرب سجاير , حشيش , بانجو , او حتى بيشم صوابعه رجله... ولا يهمك كل ده ممكن يتعالج وممكن يتصلح ... انما لو سمعته - حتى لو فلته لسان- بيقولك الجمله السحريه دى " اهم حاجه العملى" هنا تحدث الطامه الكبرى...هنا لابد من وقفه - ايوه الى هى دى- هنا لابد ان نتأخذ اجراءات وقائيه - والوقايه خير من العلاج- لتفادى الفضيحه ام جلاجل والجرسه ام حناجل - معرفش مين حناجل وجلاجل دول ويستحسن متحاولش تعرف -




.اذا عرفت ان ابنك - او اى حد من مكتوبين فوق بالاحمر -له اصحاب كتير بيتكلم معاهم بالساعات فى التليفون




فاعلم ان هذا المدعو -ايوه المكتوب بالاحمر- يكرر هذه الجمله معهم طواااال المكالمه -اهم حاجه العملى- اذا لابد من قطع خط الهاتف وعدم شحن الموبايل ويفضل انك تشترى جهاز يشتت الشبكه كلها او تعمل له عمليه جراحيه يفقد بعدها النطق




اما لو كان - عم الاحمر ده - بيروح الكليه كل يوم بدرى... فده لان السكاشن بتكون بدرى والمحروس اهم حاجه عنده العملى...

لو بيروح يجيب سنان مخلوعه من دكاتره السنان يبقى المحروس ال ايه مهتم بالعملى




هنا لابد من وقفه - ايوه زى الى فاتت بالظبط- لان الواد بيضيع منك لتلحقه لا متلحقوش ...





وحكايه اهم حاجه العملى دى حكايه مهمه لازم وحتما ولابد تتناقش فى مجلس الشعب - طلبه اسنان هيضيعوا - فمن مكانى هذا اوجه عنايه المسئولين - والغير مسئولين -عن هذه الجريمه التى تحدث لطلبه اسنان مصر بلا رقيب ولا حسيب




الموضوع ببساطه انك تلاقى كل الكليه - طبعا انا اقصد الناس الحلوه بس - تقعد تقول اهم حاجه العملى و تييييييييييييت فى النظرى - الرقابه هى الى حذفت - وفى الاخر انت هتشتغل بايدك , .. والى فى الكتاب هيتلم فى اخر ليله.. كل ده مش مشكله المشكله ان اخر ليله بتجى واليكم ما يحدث فيها...




تجد نفسك من الاخر مش عارف حاجه خالص تنفع تتكتب بكره..




تقعد تندب وتروح للاصحابك




هاااااا يا عيال هنعمل ايه؟؟؟




والله يا بطوط احنا بنقول نأجل الامتحان




يا نهار نأجل لا يا عيال احنا ندخل نكتب اى حاجه




اى حاجه ايه يامان انت عارف حاجه؟؟؟




مش النظرى قريب من العملى




هههههههههههههههههههههه انت شفت الكتاب فيه ايه؟؟؟




لأ ..( يدونى الكتاب )




يا نهااااااااااااااااااااااااار وبعدين يا عيال




ليكرروا يا عم خلاص مش انت ايدك حلوه - ومحدش يفهم غلط بايدك حلوه دى - فى الشغل خلاص بقى طنش اهم حاجه العملى





احيانا تسمع كلامهم وتأجل.. وده اما انه ربنا سترها معاه ويعدى بيها - او يمتحنها فى الصيف هو ونصيبه بقى -..... واما يقع فى شر اعماله ويشيل غيرها وغيرها فيقعد بيهم ..





واحيانا تقول لأ... انا هسهر اذاكر واروح امتحن اكيد هكتب اى كلام حتى مهو النظرى ايه غير الى بنعمله فى العملى!!!!!!!




....تروح الامتحان تلاقى الكلام غريب لا هو عربى ولا هو انجليزى ...... الظاهر والله اعلم انه لغه لسه مكتشوفهاش....

لتجد نفسك ماسك نفسك بالعافيه انك تضحك - والله بالعافيه فعلا - وتظل تدعى ان ينتهى نص الوقت عشان تخلص من ام الورقه الى ملهاش لزمه الى ادهوالك ال ايه ورقه اجابه طب هة فين الاجابه؟؟؟!!!!!!

هنا تبدأ تنتقم من دكتور الماده - وهو بصراحه يستاهل - فتظل تكتب له وتكتب له وتكتب له ما قد يسبب له جلطه او شلل رعاش.....

يسول لك خيالك المريض انك انتقمت منه ... ليبدأ هو فى الانتقام منك - اثناء تصيح الورقه بتاعتك -ويضع لك الصفر الكبير الامور العسول - ده الصفر مش الدكتور.




يا ريت ع اد كده دا بعد كده هتروح لتواجه الدكتور فى عقر داره - مكتبه - ليبدا معك الشفوى اجمد حاجه بقى انهم دلوقتى بيعملوا حركه جامده موووووت - بس محلصلتش معايا الحمد لله- انه يجيب لك ورقه اجابتك فى الشفوى.




عشان يفضل جريمتك تطاردك لاخر لحظه

وفى الشفوى مش هقدر اوصف الى بيحصل بس لو قلت بيتمسح بيك البلاط وبعدين يتزعف بيك السقف وبعدين يتكنس بيك المدخل واحيانا السلالم - هبقى اكتب بوست منفصل عنه - وانت تفضل مصمم ان اهم حاجه العملى
كل الى عملوه فيك ده وانت برضه مصر على ان اهم حاجه العملى




عزيزى ابو -او قريب الاحمر الى فوق - اذا كنت عايز ابنك او - الاحمر الى فوق - ميخدش دبلوم اسنان وياخد بكاليريوس اسنان قله سيبك من التأجيل والعملى زى النظرى - زى ماقالت سعاد حسنى - العملى زى النظرى مهش كماله درجات
ومن مكانى هذا انصح كل شاب - ومش كل فتاه على اساس انهم مش محتاجين - الاهتمام بالعملى لوحده لا يفيد والتأجيل بيودى فى ستين داهيه - واسأل مجرب- وقوم ذاكر بدل ما انت قاعد ع النت



اللعب لا يفيد لا يفيد لايفيد - واسال مجرب - كفايه انك لو سقطت هتأجل جوازك سنه فاهم يعنى ايه تاجل جوازك سنه كان الله فى عونك ياعنى
ملى!

هناك 47 تعليقًا:

aya يقول...

÷هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


بجد انا بقالى كتير مضحكتش كده يابوحنفى

بجد انت مالكش حل
وحاضر هاقوله ان العملى لا يفيد

وهابعتله لينك كمان بالمدونة عشان يعرف ان العملى لا يفيد بدل ما هو فاضل يلف علينا يقولينا ورينا اسنانكم كده

هههههههههههههههههههههههههههههههههههههههههههههه
بجد بوست زى العسل يا محمود
الله ينور

دكتور حر يقول...

انا في الكليه كنت فاهم الفولة من اولها

لأن ببساطه
بلدنا بلد ورق وشهادات
والعوض على الله يا ابوسنه
:)

ربنا يوفقك واوعاك تأجل
احنا مصلبينك
عشان العروسه
:)

د/اجدع بنوته يقول...

اهم بوينتت انك هتأجل جوازك سنه

ودى ف حد ذاتها كارثه

بس جامده بزياده يجبولك بيبر الاجابه ف الشفوى ده

يالهوى ع كددددددددددددددده

دى تبقى فضايح

ده الواحد بيليس فيها تلييس

ههههههههههههههههه

استرها يارب وميوصلش الاختراع بتاعكم ده لينا

التأجيل الحمدلله مجربتوش ولا سنه

لاا انحنا كده كده بنخلص اصلا ف 1/8

فنأجل ونمتحن ف 9 وندخل الدرسه بعدها بيومين

حاجه تفقع نو واااى

شد حيلك وبالنجاح الباهر

nigro يقول...

على فكرة يا محمود عايز أقولك ان فهمت غلط بكلمة ايدك حلوة
و ماتحاولش أنا دماغي جزمة و بصدق من أول مرة
بس إيه ده يا محمود
جواز ايه يا بني
مش عارف يا خويا كل بتوع طب متسربعين ع الجواز كده ليه؟...إيه متسربهين دي؟
دول بيقعدوا يدعكوا فيكم سبع سنين في الكلية لغاية ما بيخرجوا جيل مشوه عقلياً
آآآه يمكن علشان كده متسربعين.... تااااني
ربنا يعينك يا حوده و تخلص من المعتقل ده على خير
بس هو عندكم الشفوي بعد التحريري
ربنا يشفي
و مبروك النيولوك الجااامد ده يا دكتره

HeBa يقول...

بجد أنت مشكلة

كنت هتموتني من الضحك

أنا الحمد لله خلصت تعليم وخدت إفراج وأصلا دراستي كانت نظري

دش من غير عملي وكنت أجي على الأخر أعدي على المناهج وأدخل اكتب الكلمتين زي ما ربنا يقسم وبعد كده بح

بس كويس أنك عارف طبيعة الدراسة عندك ومتكيف معاها

ربنا يوفقك وتخلص
بسرعة علشان العروسة

امواج يقول...

اسلوبك بجد جميل يامحمود
بيفكرنى بيوسف معاطى

بس مقدرتش اعيش الموضوع بتعك لانى معرفش العملى
لانى حقوق
اعرف بس القضايا

yas يقول...

هههههههههههههههه
معلش يابنى
بس انا هفضل ادعيلك تنجح اهوه علشان اضمن دكتور اسنان يعالجلى اسنانى من غير مايزعقلى ويتحملنى اماافضحه فى العيادة اما اعقد اصوت واعيط
انا برضه بعقد اقول لنفسي انتى اللى عملتى كده فى نفسك علشان مش بتذاكرى
ذاكر يابنى علشان تتجوز
قال يعنى اما تخلص الاكلية هتلاقي العروسة بفستان الفرح قدام الكلية

الـسـيـدة نـون يقول...

هههههههههههههههههههههههه
ههههههههههههههههههههههه
ويجيبلك ورقة اجابتك فى الشفوى علشان تفضل جريمتك قدام عنيك تطاردك
هههههههههههههههههههههههههههههه
هههههههههههههههههههههههههههه
والله انت مسخرة يا حودة
ربنا يوفقك يارب
وكل حاجة تتأجل الا الجواز ماينفعش يتأجل
وخد بالك اهم حاجة فى الجواز العملى
ههههههههههههههه
تحياتى ليك
اختك خيخة

المتمردة يقول...

اهم حاجة العملى ..فكرتنى ف الكلية عندنا واحنا ف سكشن وحدة صحبتى جاية تقولى الغياب ف السكشن عليه 75 درجة قولتلها نعم امال المادة كلها عليها كام ع كدة انا احضر السكاشن ومروحش الامتحان بقة دى عوزة تضيعنى ..بجد المفروض الواحد ميسمعش كلام حد والله الكلام دة اللى بيضيعنا وبيخلينا نندم لو هنهتم يبقى نهتم بالحاجة كلها مش نهتم بحتة ونسيب حتة وجزاك الله خير يابطوط ضحكتنى وانا نفسى قافلة:D

غير معرف يقول...

انا لسه كاتبه موضوع عن الشفوى... بس طبعا ياعم انا هروح فين من الاسلوب ده... بس بجد موضوع ورقه الاجابه ده تحفه... ده بجد ده ولا بتهزر؟

روز

فرنسا هانم يقول...

اه جينا للتاجيل
طيب انا اجلت جوازى 39 سنه
مش سنه
عموما
تدوينه جميله

حاسوباتيه يقول...

انا في كليه حاسبات صحيح بس نفس النظام بالظبط بس انا فعلا بطلت عملي خااااااااااالص لغيته من حياتي وكمان بطلت نظري ههههههههههه
ربنا يستر انا في بكالريوس لا عملي ولا نظري
واحلى احستس لما ادخل الامتحان وماعرفش حاجه فعلا احساس رااااااائع بكون فعلا هموت من الضحك
ربنا يستر

عصفور المدينة يقول...

قوم ذاكر وسيب النت
:)
وبعدين أعتقد الراجل الأحمر العملي ده مش بياخد دبلوم أسنان ده بيطلع صنايعي أسنان

Wael يقول...

ههههههههههههه
ههههههههههه
ههههههه
هههه
هه
ه

فعلا صدق اللى قال انها بلد بتاعة شهادات صحيح , واهم حاجه فيها النظرى مش العملى

يااااارب تنجح يبنى عشان انا عندى درسى عايز اخلعه D:

صحفية روشة يقول...

انا فعلا بسمع الجمله السحرية دى كتير
بس مش فى طب اسنان وبس
فى علوم وصيدلة وكل الكليات دى
لكن تذكر لا يسلم الممتحن الرفيع من الاذى حتى يتمرمط فى العملى ويسال على جوانبه الدم
(لا يسلم الشرف الرفيع من الاذى حتى يسال على جوانبه الدم)
سي يو ليتر يا مان

مواطن مصرى نايم يقول...

اهم حاجه العملى
شايف المكتوب بالاحمر فى اول التدويته
مفيش حد خالص عندى ينتمى لهذا اللون الدموى
و الحمد لله
بس خلى بالك
لا تحـــــــــــــضر
مش لازم تشرب بتاعت محمد هنيدى
و اللى ملهش خير فى العملى ملهش خير فى النظرى
دا من وجهت نظرى
وانا نظرى على قدى

مواطن مصرى نايم يقول...

تعديل فى التعليق السابق
=======================
مش لا تحــــــــضر
لا هى
لازم تحـــــــــضر

مش بقولك عملى على قدى
قصدى نظرى على قدى

helium atom يقول...

اممممم... مفهوم مفهوم... الهدف من البوست دا بان اوى فى الجملة اللى بالمووف فى آخر البوست

بطوط حبوب يقول...

ايه

كويس انى ضحكت بجد دا فرحنى اوى
سيبك بقى من الضحك وروحى الحقى الواد او هاتيه هنا وانا اقوله
قومى ياله جرىىىىىىىىىىىىىى
*********************************

دكتور حر

كويس انك فهمت الزتونه وحلوه اوى مصلبينك دى هههههههههههههههههه

********************************

د/ اجدع بنوته

قولى بس اسم جامعتك اوحنا ننقل لهم الاختراع ده
على فكره بجد انا مش متخيل لو وقفت ودام ورقتى فى الشفوى ممكن اعمل ايه
موقف جامد جداااااااااا يارب ابعدنا عنه وكملها بالستر هههههههههههههههههههه

********************************

نيجرو

اولا انا فى اسنان بيدعكوا فينا 5 سنين بس
ثانيا منطقى جدا اهم يمتحنوك شفوى بعد ماتذاكر يعنى بعد النظرى انتوا الى غلط

وايدى حلوه يا سيدى وافهمها زى ما انت عايز هههههههههههههههههههه

عندك عروسه عايزه واحد ايده حلوه؟؟؟؟؟؟
*****************************

هبه

بجد انا ببقى سعيد لما بيعجبك البوست وبتضحكى من قلبك

وبعدين انا عارف الليله اه متكيف لا

وده واضح فى البوست هههههههههههههه
ولسه لما اكتبلك الشفوى بيحصل فيها ايه؟؟
******************************

امواج

يوسف معاطى حته واحده
لا مش للدرجه دى انا ايه وهو ايه ثم انا بهتم بالعمل هو بيهتم بالعملى هههههههههههههه

واهتمى بالقضايا محدش عارف يمكن يجيبو لك متهم فى الامتحان تدافعى عنه لو طلع براءه تنجحى لو خد اعدام معرفش يعملوا فيك ايه ههههههههههههههه

*******************************

بنت خيخه

نوران انا هموت من الضحك من تعليقك
بجد انتى مشكله ههههههههههههههههههه

لا متخافيش انا مهتم بالعملى سواء فى العكليه او فى غيرها هههههههههه ربنا يستر

والله حكايه الجريمه الى بتطاردك دى بجد عيال قالوا حصلت معاهم - بس محصلتش معاياالحمد لله ربنا يكملها بالستر

بطوط حبوب يقول...

يا سمين

ادعى جامد ومتخافيش فى الخلع هنخلع مش الخلع ده عملى هههههههههه
وبعدين انا قلت العروسه هتبقى ودام الكليه؟؟
انا ناوى اجيبها من جوه الكليه ههههههههههههه

********************************

المتمرده

كويس انى قدرت اضحكك رغم ان نفسك قافله
والعيال بتضيع فعلا- واسألى مجرب - المفروض الواحد يصاحب رجاله بلاش عيال ههههههههههههه

*****************************

روز

شفتينى قبل كده بهزر ههههههههههههه
طبعا موضوع بجد

وانا الى اجى جنبك فين انتى بس الى مش بتشوفى انى بتكتبى ايه فعلا كتاباتك روعه نوتينى فى عقرى الجديد

*****************************
فرنسا هانم

حد يأجل 39 سنه لا انا بتكلم ياجل ماده وخلاص
***************************

حاسوباتيه

ربك بيقطع هنا ويوصل هنا

العيال الى تذاكر تضحك يوم النتيجه والى يلعب يضحك يوم الامتحان هههههههههههههه

بطوط حبوب يقول...

عصفور المدينه

ايه ياعم انت قفشت كده ليه هون عليك متخافش مش بيعدى حد غير لما يعرف النظرى والعملى النظرى عليه 60% والنجاح من 60% مش من 50

********************************

د /وائل

الفسلامه يا دكتره ياعم ضرس واحد دا انت تأمر
وعشان انت غالى انحنا نخلع كله ونشتغل على نضيف
ههههههههههههههههه
*******************************

صحفيه روشه

الجمله دى بتاعتنا واتسرقت
اوعى تصدقى المغرضين هههههههههههههههه
والشرف هيسلم بس ربك يسترها على الولايه ههههههههههههه

******************************
مواطن مصرى نايم

نظرك على ادك امممممممممممممم
يبقى اهم حاجه العملى

jessy88 يقول...

عملى ايه يا راجل وكلام فاضى ايه حد قالك انك داخل الكلية دى عشان تفهم ..هو انتوا مكروهين من شوية ؟؟انا عن نفسي بكره دكاترة الاسنان ومش لوحدى ليه بقىىى؟؟ اقولك لأنك عشان تتخرج وتبقى دكتور لازم تصممم وطز فى العملى زى مانت بتقول وبالتالى تنفع تشتغل فى مصمت مش عيادة وعشان كدة معظم الدكاترة ايديهم ثقيلة وبيبقوا هيخلعوا بقك مش درس!!! ليه لأنهم عشان يتخرجوا سالمين غانمين ممسكوش بؤ قبل كدة بيدربوا بس على الجثث اللى هى اصلا مش بتحس وبالتالى تأتى المصيبة وبيطبقوا علينا احنااااااا نفس التطبيق على الجثث

همسات دافئه يقول...

ههههههههه
لاء بجد تحفففه البوست
الحمد لله انا أدبيه من يومى
بس حلو الحافز بتاعك ده هو تأجيل الجواز الى تعبك دا لسه بااااااااااادرى ولا انت لسه عايش فى دور الخمسه عين الى بعد طب دول دا انت لو سوبر مان هتعمل كل عين فى خمس سنين

على فكره انا من الناس المتفائله جداا ربنا معانا يارب ونخلص من هم الإمتحانات ده
والله ضحكتنى وانا مش فى المود خالص
تحياتى ليك
شيماء:)

بطوط حبوب يقول...

جيسى

الناس بتكره دكاتره الاسنان - انا نفسى كنت بكرهم- ده لانهم بيتخايلو ان كل شئ حشو وخلع وكل شئ بيسبب الم

ان مكنش فى البوء يبقى فى الجيب
مسأله الجيب دى مقدرش اجاوبك عليها انما فعلا العلاج بلا الم دلوقتى هو شعار كل دكاتره السنان بس لازم العيان يدفع
هههههههههههههههههه

وعلى فكره العملى عندنا مهم جدااااااااا عليه 40% ومش هتعرف تحل كويس فى النظرى الا لما تعرف العملى كويس وكمان فى الشفوى الله لا يوريكى بيعملوا الواجب وزياده

*****************************

همسات دافئه

لسه بيقولوا - نقابه اطباء الاسنان -عايزين يعملوا اعتصام عشان المترتبات مش بتاكل عيش ربنا يستر
بس كله الا العروسه

أم أحمد يقول...

بقولك أيه عملي مش عملي
انا عاوزة دكتور اسنان شاطر عشان سناني بايظة عليالآخر

دكتورة سنان يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
بص بص بص ههههههههههههههههههههههههههههههههههههههههههههههههههههههههه
دى كانت كلمتى المفضله والى الان يااخى بقول اهم حاجه العملى ههههههههههههههههههههههههههههههههههههههههههههههه
المشكله ان فعلا اهم حاجه العملى :))
يعنى بص فى امتحان الاوبرتيف لازم تشغل ايدك قبلها لانك هتمتحن على بنى ادم مش اى كلام يعنى
وفى امتحان البروسيزس بردو نفس الحكايه _صحيح متعرفش بيشنت كومبليت الله يكرمك اصل مش لاقيه لحد دلوقتى :(؟؟
وفى امتحان الارثو بيجيبولك رسمه غريبه كده تنفذها يعنى لاهيا ادم كلاسب ولا هيا شورت لابيل مثلا .. بيبقى حاجه موديفايد عبقريه زيهم كده فلازم بردو تشغل ايدك وبعدين ياابنى ماهو العملى عليه 60 فى الميه والنظرى 40 فى الميه
والا مأساة الشفوى دى يالهووووى متفكرنيششششش بس مش بيجيبوا ورقة النظرى فى الشفوى بس المتبع عندنا ان الشفوى بيبقى ع الترم الاول والتانى واحنا الترم الاول بيبقى ضاع فى الكازوزه اساسا يعنى فبنقعد متنحين
ههههههههههههههههههههههه طب استنى هضحكك
الدكتور بيسألنى مره عن مرض معين يعنى .. الماده كانت دياجنوزس ماشى
فالمهم قال اسم غريب اوى لحد دلوقتى مش قادره انطقه اصلا ولا عارفه بيتكتب ازاى المهم انا تنحت كده وفتحت بوقى وبصيتله
قالى هاااااا ؟؟قولتله هو ملوش اسم تانى؟
لقيته انفجر فى الضحك كنت خايفه يموت فيها اساسا هههههههههههههههههههههههههههههههه وبعدين قالى بكل هدوء لا والله يادكتوره ملوش غير الاسم ده بس والدكتوره اللى جنبه تبصلى ومبتسمه ابتسامه صفراء برتقاليه كده ..كان منظرى سوووو باااد
وعلى فكره مش انت لوحدك ياعم اللى ايدك حلوه
مااحنا كمان يعنى ههههههههههههههههههههههههههههههههههههههههههههههههههههه تخيل انى ممكن اعمل كلاس 2 امالجم من غير ماادى بنج للبيشنت ؟ :)متحسدنيش بقى
ربنا معانا يااااااااااااااااارب

بطوط حبوب يقول...

ام احمد

متقلقيش عندك دكتوره نوسه اهى هههههههههههههههههه

***********************************

نوسه

ههههههههههههههههه

بتشتغلى للعيان من غير بنج هههههههههههههههههههه
متخافيش مش هحسدك انا هحسد العيان انه استحمل
احنا مدرسه ادى العيان بنج وريح مخك سواء محتاج او لأ دا الكربوله بجنيه هههههههههههههههه

عايزه عيان بروسيزس ؟؟
نصيحه ابعدى عن العيانين ام فلوس هيطلعوا عينك وعين الى جنبك والى جنبهم لحد اخر الزماان
وهبقى احيكى عن الشفوى فى بوست تانى ترقبيه

veticohaya يقول...

Salam alikom..

ههههههههه
لاء كوول اووي
وواقع مؤلم اووي
الحمد لله ان عندنا كريديت اور...مفيش سقوط...في تاجيل
الكل بقى يعتمد على كده ويكبر دمااغه
بس هم والله ...وتعذيب
ال بنادي بالرفق بالحيوان...فين الرأفة بالطالب...:(

الفارس الملثم يقول...

ههههههههههههههههه

ايه ياراجل البوست ده , دانت عملت رعب لاي حد بيشاور عقله حتي انه يخلغ سنانه قصدي يطلع دكتور سنان ,,

لا كل كوم لو الواحد لقي ورقة الاجابة بتاعته طلعتله علي حين غرة كده , اكيدالواحد ايجيله جلطة او تقلبله بعقده نفسية ويشرف في الاخر في العباسية , صدمة زي دي مش سهلة ..

وايه حكاية الجواز دي انت لسه مصمم علي النهاية دي , لا يا محمود كنت متصورك اعقل من كده ..

عموما بالشكل اللي انت وصفته ده مفروض يعملوا عيادة نفسية في الكلية عندكم لمعالجة مرض عملي فوبيا اللي وضح انه بقي وبائي عندكم

سلام يا محمود وكل امتحان وانت طيب

Empress appy يقول...

ههههههههههههههههههه
بجد هلكتنى من الضحك يا محمود طيب اقولك ايه ربنا يهديكم
يا ابنى امال بوست المذاكرة والسرير والحركات وايد المقشه اللى ماما بتمسكها وانت برضه مش مركز يا لهوى عليك شد حيلك بقى علشان اعالج أسنانى عندك

Mafrousa يقول...

د/بطوط اسلوبك فعلا جميل و بيضحك .. ماهو انا قلت ده فيه شباب زى الورد و اسلوبهم جميل .. يا عم ايه لازمة المرمطه و قلة القيمه.. اقولك احسن حاجة تحول على كلية نظرية و سيبك من ده كله... و على فكره الدكاتره بتوعكو اتعمل فيهم اكتر من كده و همه بس بيفكوا عقدهم فيكم (ربنا ينجحك)
(واحد راح لدكتور السنان و قاله
:من فضلك يا دكتور قبل ما تبدأ ممكن اعرف التسعيرة
د/: تنظيف 300
خلع200
حشو 150
حقنة بنج 50
:و القعاد على الكرسى؟
د: لا ده ببلاش
: طيب ممكن تسيبنى قاعد على الكرسى اتفرج عليك

ح

خمسة فضفضة يقول...

السلام عليكم روحمة الله وبكاته

ههههههههه
حلوه اوي

اياك تهمل النظري ، وركز في العملي ، وخليك صاحي في الشفوي ....عشان ربنا يسترها معاك وتخلص بدري بدري وتتجوز بدري بدري ...بس ماتنساش تعزمنا في الفرح
:-)

MarwaAshraf يقول...

هههههههههههههه

ماشي يا سيدي ربنا معاك عملي ونظري

Desert cat يقول...

طيب طمنتنى يا بطوط انا الحمد لله مش عندى حد فى العيلة طب اسنان بس ابن خالى جراح قلب .... هى الناس دى يتخاف منها برضه ولا ايه طمنى الهى يطمنك
المهم انت ركز ياباشا واهم حاجه العملى
ربنا يوفقك

عبده الرايق يقول...

الحمد لله ضمنا دكتور اسنان ببلاش
انا كنت عايز اعرف
لو ركبت طقم اسنان دهب خالص كامل
هيكلفنى كتير ؟؟؟

ka2en Makboot يقول...

السلام عليكم

:D
بوست دمه خفيف جدا زي صاحبه

بس انا مابحبش دكاترة الشنااااااان

بكرهههم منها لله شوشن اللي بهدلتلى شنانى

وماادراك ما شوشن , تقعد تحت ايدها تحس انك قاعد تحت ايد عشماوى

وتقعد تقور وتكور في الضرس زي ما تكون بتقور في بتنجان ثم تحشيه بالبلاتين زي ما بتحشى المحشى ابو رز بالظبط
انا مش شايفة اي فرق بين حشو البتنجان وحشو الضرس الصراحة


اللهم اجعل كلامنا خفيف عليكم
ولا نترمى على كرسي تحت ايديكم

موناليزا يقول...

تخيل دماغى راحت لحتة تانية خالص فكرتك هتتكلم عن التلوث والامراض اللى ممكن تنتشر اثناء العملى وعدم تعيقم الادوات وكده يعنى بس الحمد لله كده الموضوع مش كبير ولا حاجة انت ذاكر كويس امال يعنى انت داخل تلعب

راحــله يقول...

مــا شاء الله .. تحفففه هههههه
جميل جدا
اسلويك رااائع .. ربنا يبارك فيك
اسعدتنى زيارك جدا :)

بطوط حبوب يقول...

veticohaya

وعليكم السلام

احسن حاجه دماااااااااغ انا اعرف واحد صاحبى فى اسنان مصر للعلوم فى رابعه السنه دى بيقولى معاه مش عارف كام وعشرين ماده معاه من زمااااااااااان
ههههههههههههههههه

*********************************

الفارس الملثم

فكره جامده فكره عملى فوبيا ههههههههههههه
يا بنى احنا بيطلع عنينا على منلاقى عيان ربنا يكون فى عونا
*********************************

ابى

الف سلامه على سنانك
مهو المقشه وكل الحوار ده عشان يقنعونى ان النظرى مهم وانا راسى والف دزمه ان اهم حاجه العملى

**********************************


واحده مفروسه

ههههههههههههههههههه
النكته دى قديمه اكيد لاننا بناخد دلوقتى على القعاد على الكرسى
مبنرحمش من الاخر هههههههههههههههههه
مش ده عملى برضه

*********************************

خمسه فضفضه
وعليكم السلام ورحمه الله وبركاته

يا فندم انتى تأمرى

بس انا لو سمعت الكلام مش عارف هعرف اقول اهم حاجه العملى ولا هبقى مارق عن السرب
هههههههههههههههههههههههههه
**********************************

راما

اللهم امين ولك مثل

********************************

ديسرت كاااااااات

مش عارف جراح القلب بيقول كده ولا لأ بس ابقى اتأكدى مش هتخسرى حاجه
هههههههههههههههه
نورتى البوست

******************************


عبد الرايق

طقم دهب خالص امممممممممممممم
لا مش كتير خد بس انت الكادر ونبقى نشوووووووووووف

*********************************


كائن مائى

دى شوشن مخلتش حد ينفع يدافع عننا خالص
بصى هى كانت تقريبا والله اعلم عايزه تشيل كل سنانك وتشتغل ع نضيف انتى فهمتى غلط هههههههههههههههه

*********************************

مونايزا

لا الادوات معقهمه بس النفس

********************************
راحله

كويس ان بوستى المتواضع عجيك ونورتينى

Bongo يقول...

ههههههههههه

ربنا يكون في عونك و عون كل دكاترة السنان
ما هو ربنا بيخلص منهم في الدراسة علشان اللي بيعملوه في اسناننا لما بيتخرجوا :D

لا بجد بوست لذيذ

Moustafa` يقول...

رائع
خلتنى وأنا اللى مشهود ليا بالرغى
أبقى منوفى فى تعليقى للنخاع
بجد سنس الفكاهه عندك عالى
ومقضيها بهدله
الاحمر اللى فوق ده عامل قلق معاك للآخر
والمحلوظه الأخيره بتاعته الجواز ده أساسى
والبق بتاع النظرى واللغه الغريبه دى مشاعر حقيقيه
وحتى العملى مش مهم
اهم حاجه تفهم الليه ماشيه ازاى
قضيها مقبلو وفحت ولخص يا صاحبى
لا للتأجيل .خش وشيل
ربنا معانا
بس بجد اتبسطت من قرايه سطورك
سلام يا صاحبى

Unknown يقول...

طيب لو سمحت قوم ذاكر يلا قوم انت لسة قاعد
قوم

بطوط حبوب يقول...

بونجوووووو

هههههههههههههه لينا حق اظن دا احنا هنعمل عمايل
********************************

د مصطفى
نورتنى يا دكتره
وفعلا اهم حاجه تفهم الليله ربنا يستر

********************************

ايويه
انتى تامرى
ايويه

أشرف حمدي يقول...

عملي ايه بس ؟ :) طبعا العملي ده كلام فارغ ومالهوش علاقة بالنجاح ولا بالسقوط .
انا أقولك ، أنا كنت مريح دماغي في العملي لسبب وحيد واني الحمد لله شاطر جدا عمليا ، يعني مش حتصدق لما اقولك أني أول سنة أعمل لها
REduction
كانت هي السنة اللي في بق الراجل اللي امتحنت عليه ، وبالرغم من كده واخد أعلى درجة في عملي الـ
Crown
وأعلى من اللي ياعيني طول السنة قاعدين يشتغلوا علي عيانين ، انا عمري ما دخلت سكشن
Crown
غير عشان امتحن ، وماسلمتش حالات
Operative
خاااالص ، اينعم سقطت بس مش مشكلة ، ماهو فيه دور تاني ، ودخلت كتبت كلمتين ونجحت وبرضه بدون ما أسلم حالة واحدة .
أهم حاجة النظري ، لازم تتدح لحد ما يطلع عينك ، العملي المهم فيه بس الحضور وأديك حتاخد أي نمرة وخلاص ، ماحدش بياخد صفر في العملي يعني .
اما الشفوي بقى فده حظووووظ
أنا مرة دخلت امتحان شفوي وجاتلي كريزة ضحك انا وبنت معايا ، الراجل يسئل واحنا نضحك ، الراجل قعد يضحك معانا وانا وهي اخدنا الصفر المتين ، إدانا الصفر وهو لسة بيضحك والله
مش حينفع الكلام هنا ، إحنا لينة قعدة. لو بتقعد على قهوة الباب العالي ابقى قوللي .
تحياتي يا دكتور

قريب قوي ححكيلك حكايتي مع الباثولوجي اللي شيلته 4 سنين ورا بعض !! مش مصدق ؟؟ حقولك السر قريب جدا وحتعرف ليه هو 4 سنين
تحياتي

بطوط حبوب يقول...

د اشرف
اهو انت كده كنت فاهم الليه بس احنا بنقول اهم حاجه العملى عشان منذاكرش مش فكره انه مهم بالفعل
ومعرفش فين الباب العالى دى واكي يسعدنى اشوفك عشان افهم الليه كده

Asmaa mahaba يقول...

هههههههههههههههه ايوه فعلا العملى اهم ن النظرى....احنا كليتنا كلها عملى يعنى العملى عندنا عليه 1200درجه والنظرى كله 200درجه يبقى مين الاهم العملى ولا النظرى
تصدق بالله انا كنت متعقده من دكاتره السنان وكانوا جايبينلى شلل بس اتفكيت العقده اما دخلت هنا
تحياتى ليك سومه_87

حمامة يقول...

ههههههههههههه

يخرب عقلك

بجد انت دمك خفيف جداً

انا ليا واحده صحبتى ف اسنان

وعلى طول يا عينى امتحانات وقرف

بس معرفش حكاية العملى دى هابقى

اسألها إن شاء الله D: