2009/03/26

ابرز هديتك .. اعتز بصحبتك


السنه الى فاتت زى اليومين دول كده بالظبط قعدت اشرح لكم اد ايه ان اباهتكم وماماهتكم كانوا محظوظين لانهم شافوا اليوم دا من اتنين وعشرين سنه - كان ساعتها واحد وعشرين بس
وكل الى خته منكم رغم انى وضحت حقائق تاريخيه وبينت بالادله التى لا تقبل الشك انكم ولاد محظوظين وان مولد بطوط كان خير للبشريه -شويه كلام 

اكيد محدش عارف لو مكنتش جيت كان ايه اللى حصل - مش كان احتمال أبويا مثلا يطلق امى؟؟او يتجوز عليها .. او هى تطلب الطلاق 
واحتمال ماما حد فيكم تعرف كده فتقوم تقول الرجاله ملهمش امان وتطلب الطلاق برضه 
وطبعا لو مكنتش جيت اكيد اللى كنت هتجوزها كانت هتعنس .. واحتمال باباها برضه يطلق مامتها عشان خاطر البت اللى عنست دى
وكانت ماماتها هتعتبر دا اهانه كبيره .. هى مالها اساسا دا كله نصيب ... وبعدين تخده وتقطعه  وتحطه ف اكياس وترميه ف البحر .. وتنتحر  .. والبنت تتيتم وتعنس يبقى كتير اوى بجد
وطبعا مكنتش مدونتى هتبقى موجوده.. ومرات صاحب  البلوجر لما تدخل تشوف المدونات هتحس ان اكيد ف حاجه ناقصه فـ تطلب طبعا الطلاق من جوزها اللى مقدرش رغم انه صاحب شركه مدونات كبيره .. وجوجل بقى وبتاع .. ومقدرش يسد النقص الفظيع اللى هيسببه غياب بطوط عن التدوين......
ولما تتطلق بقى تاخد منه اللى وراه واللى ودامه فيبقى على الحديده ويقفل الشركه ... ويروح يبيع بطاطا على كوبرى القصر العينى
ويتخانق مع الراجل اللى هناك ... ولانه اجنبى الحكومه هتقف فـ صفه .. فمرات صاحب البطاطا اللى واقف دلوقتى طبعا هتطلب الطلاق لانه مش عارف يأكلها
ومحدش عارف الراجل الاجنبى - اللى كان صاحب البلوجر - هيبعلنا ايه .. ممكن تبقى مسممه وناس كتير تموت .. وناس كتير تترمل .. وناس تتيتم ... وحقوق الاطفال والحوارات دى
دا غير انى لو مكنتش جيت ..صاحبى اللى قاعد معايا ف الشقه مكنش هيقدر يدفع الايجار كله .. فيتخانق مع اهله .. وصاحب العماره ... ابوه يطرده ... وصاحب العماره يسجنه ... تقوم بقى البنت اللى المفروض يتجوزها مترضاش به لانه بقى سوابق
فابوها بقى ممكن يطلق امها .. وامها ممكن تقطعه وتحطه ف اكياس ...والخ
وكمان مصر كانت هتخسر رجل من اهم رجالاتها .. -دا اللى هو انا - والطب كان هيخسر دكتور من اهم رجالته .. وناس سنانها كانت هتبوظ .. وجوزها يطلقها برضه ... وناس اللثه بتاعتها كانت هتدمر .. ومراتتاها تطلب الطلاق .. وناس كانت هتعنس عشان شكل سنانها وحش ... والله بجد الحمد لله انى جيت
 

دا غير حاجات كتير لو قعدت فكرت ممكن اقولهاكم بس المشكله انى بجد مستعجل وبكتب البوست بسرعه رهيبه ومرتجل والله حتى من غير تحضير
المهم حد بقى فيكم يعمل زى المره اللى فاتت - بعد ما وضحت اهو ليكم اد ايه كان مولدى سعاده للبشريه - 
ويجى يقولى كل سنه وانت طيب يا دوك .. سنه سعيده يا بطوط .. هابى برث داى يا ابو البطابيط ... يارب تحقق كل احلامك السنه دى يا دكتره ... والخ الخ من الكلام دا ... احب اقولكم ان دا مش هينفع السنه دى
انا بقى مادى جداااااا ..جداااااا واحمدوا ربنا انى جيت اساسا
اللى هيدخل المدونه وايده فاضيه مش عارف هعمل فيه ايه ..
وعشان مغلبكمش ف التفكير ف الهديه اختاورا واحده من تلاته اظن كده عدانى العيب
  • لاب توب أبل ما كنتوش
  • كاميرا ديجيتل 10 ميجا بكسل و 12 اكس على الاقل 
  • اى فون
تجيب هديه تبقى شاطر ...امور  .. احبك .. احترمك .. اعتز بكوننا اصدقاء
متجبش يبقى سنتك معايا بيضا بإذن الله .. وكل كومنتاتى عندك يجولى وصورى وجواباتى .......وملكش حاجه عندى
عيدا ميلادى لسه يوم 31 الشهر دا يعنى تلحقوا تعملوا جمعيه وتقبضوا الاول ... محدش له حجه بقى ..وربنا يخلينى ليكم ياااااااااارب
انا جبت قطعه جاتوه واحده لحد ما استلم الهدايا وابقى اجيب تورته بقى :P

هناك 28 تعليقًا:

bentulmuslimeen يقول...

بسييييييييييييييطة
قول ليييييييييييه؟
لان الشرط الجزائى اللى سعادتك حاطه هو الطبيعى اللى بتعمله معايا اصلا
بالتالى انا مش خسراااااااااااااااااااااااااااااااااااااااااااااااااااانة


"قبل ما تحط شرط جزائى لازم تفكر فى فعاليته الاول"


شفت الدرس ده؟
ده هديتك بقى ايه رايك؟؟ :D


طيب اممممممم يعنى بما ان الواحد المفروض يهادى باللى يحب الناس تهاديه بيه
و بناء على انه اكثر هدية تسعدك

فان شاء الله نبعتلك ال ابل ماكنتوش ( رغم انى مش عارفة هم مين اللى ماكانوش و ابل ايه بالظبط :P)

ان شاء الله فى اليوم المحدد تلاقيه سابقك ع البيت بس لازم تدور كويييييس لان اتمال يكون مستخبى عاملك مفاجاة

تمام كده؟

و رغم هذا الجهد الجبار الذى نبذله
ف بردو ربنا يجعل ما هو قام افضل مما مضى يا رب و يبارك فى عمرك و يجعلك خاللص لوجهه ان شاء الله

ربنا يسعدك يا بطوط

Princesa ... WHiSPeR يقول...

طيب بالنسبة لموضوع العنوسة اللى ذكرته ده

ليك عليا يا بطوط لو اثبت وجودك ف الحياة وجبتلي عريس
هجبلك الاى فون واللاب توب والكاميرا الديجيتال

غير كده ماشفتش منك حاجه علشان اجبلك هدية


بس بما اني طيبه وملاك
هكتفي باني اقولك كل سنه وانت طيب

mohamed ghalia يقول...

هههههههههههههه
إنت ياعم خليت البشرية كلها تطلق عشان خاطرك
وبعدين
تجيب هديه تبقى شاطر ...امور .. احبك .. احترمك .. اعتز بكوننا اصدقاء
ايه شغل المصالح ده

هو كفاية عليك أوى كل سنة ونص وانت طيب
هههههههههههههههههه

dr tweety يقول...

اولا ازن بتكتب كده (اظن) وثانيا انا اول حد هيجيبلك هديه بكره وهي من نوع خاص وانت الي طلبتها وذنبك بقي علي جنبك وممكن تكون اخر هديه تاخدهاD:

A.SAMIR يقول...

عيد ميلاد سعيد يا محمود
وعقبال ال 100 سنة
وتبقى اسنانك محتفظة بقوتها ومتانتها

Appy يقول...

كل ينه وانت بطوط وحبوب وسطنا وادي فرشه سنان هديه ولا يهمك يا عم

maha zein يقول...

يا ربي
بعد ما كتبت التعليق راح

بني الكلام معجبش مدونتك
كنت بقولك
مفيش حاجة اسمها عيد ميلادك يا عم انت
انت مش عارف انه بدعة ولا ايه
مفيش اعياد غير اللى احنا عارفينها
ايه بقه عاوز تغلوش علي الحقيقة دي وتخدع الناس وتخومهم
و بالمناسبة دي وهو اني ذي الشطورة قدرت الحقك قبل الوقوع في المعصية
فانت المفروض تجيبلي بقه لاب توب توشيبا من الغالى اوي ده
وتجيبلي طقم توزيع وطقم فناجيل من المدهب
وشنطة معالق وتكون شنطة خشب مش قطيفة ولا سومسومايت

يلا بقه
خش جوة دلوقت

ربنا يبارك في عمرك ويزيدك ايمان

صبرني يارب يقول...

شوف انا كنت مسمحاك فى كل الدوشه الى انت عملتها

وناويه اديلك خمسه سته من لقمة القاضي ا لى انا عاملاها

وهووووووب صدمتنى انك دكتور اسنان

ولا اعرفك
ولا هداياولا اي حاجه

اه يا سناااااااني

اه يا جيب جوزي الذي يأن الما من الدفع لدكتور الاسنان







زي بعضه كل سنه وانت طيب وبخير وسعاده

حاسوباتيه يقول...

هههههههههههههههه سلم واستلم ماشي وكل سنه وانت طيب وعقبال 95 سنه كفايه عليك ههههههههه

ňįĝŗő يقول...

طبعاً من الواضح يا ابو حنف إن مجيئك أثر بالسلب تماما على النشاط المآذيني اللي كان هينتعش و المتمثل في حالات الطلاق اللي بالهبل اللي كانت هتحصل لولا إن سيادتك شرّفت
أهلا بيك
و خلينا متفقين إنك راجل خبور .. و ياريت ماتفهمنيش غلط
و هارش الحوار و فاهم التيتة و دايس الحالة و عارف الفولة
و ده طبعاً لأن زي ماتفقنا إنك راجل خبور
فأكيد يابني متوقع إن اللي زي حالاتي كبيرهم يجيبولك عود سواك سعودي تمنتاشر سنتيمتر تسلك بيه سنانك

قال لاب توب آي فون قال
ده انت طيب قوي



يلا سلام

صاحب المضيفة يقول...

واللاب ده بقى ان شاء الله هتعمل بيه ايه ولا الكاميرا ؟؟

هتصور بيها سنان العيانين بتوعك ولو مش في حد جابلك حاجه من دول يبقى ربنا يستر عليه لمراته تطلب الطلاق لانه مش جاب لك الهدية او يمكن هو يتخلع منها ولو كانت رحيمة بيه يبقى ممكن تلخلخه بس

سنتك مسوسة يا دوك ونهارك ابيض يا عم الفنان

:):):):):):)

حواء يقول...

ايه يابطوط
لاب توب واي فون
اي الهدايا السكه ديه
طب اطلب شقه اتجوز فيها
اطلب عربيه
اطلب ولا يهمك
وشوف ميييييييييييين هيجبلك حاجه اساسا
ههههههههههههههههههههههههههههه
كفايه عليك كل سنه وانت طيب وديه هديتي
بس لازم تقبلها
الرسول قبل الهديه

مسلمة مؤمنة وموحدة يقول...

بصراحة Dentist بطوط تهديدك مش حيأثر
وزى ما bentulmuslimeen قالت لانك اساسا
فعلا لا بترد على الكومنتات ولا بترد الزيارات
وحتى البوست اللى عملته فى نظرات ما رديت على التعليقات وخليت الامير (محمد غاليل)يعتذر بدالك.
فأحنا ما بنخفش وخليك عندك مستنى وابقى قول لنا
جالك كام هدية ومش تقول بس لألألأيادينتست تتصور جنبهم كمان وياريت تكون فية نسخة من الاهرام باليوم جنبك أصل انا شكاكة وبشك .
دانتست محمود انا اسفة انى بقولك الكلام ده لانى فعلا كان نفسى تتواصل بالرد والتعليق على اللى بيكتبوا لك .
على العموم كل سنة وانت طيب .
من غير هدايا اه من غير هدايا.

احساس طفلة محبة للرومانسية بس واقعية يقول...

كل دا كان هيحصل يا بطوط
دا كدا الواحد يحمد ربنا انة جابك للبشرية
:)
الاول لازم نقول
كل سنة وانت طيب
عقبال 100 سنة وانت بخير بصحة وسعادة
:)
وبعدين نجيب الهدايا

ادى ال iphone

http://www.mp4converter.net/images/upload/iphone_home.gif

ادى ال laptop

http://www.finalsense.com/news/image/laptop/asus-lamborghini-vx1-laptop.jpg

وادى ال camera

http://www.digitalcameratracker.com/images/Casio-Exilim-EX-Z1000-large.jpg

وكدا نبقى عملنا اللى علينا
:)

تقبل مرورى

أخـــ مسلمة ـــت يقول...

مممممممممممممم
طيب اتفضل حضرتك

http://www.liewcf.com/blog/wp-content/uploads/apple-pc-laptop.jpg

كل سنة وانت مهم جدااااااااااااا لبقاء الجنس البشري علي ارض البسيطة
:)

انا حره يقول...

انا جبتلك اتنين كيلو ابل ماكنتوش بس ملقتش عند الفكهانى لاب توب بصراحه قاللى الموسم بتاعه خلص

كل سنه وانت طيب يابطابيطو

فاتيما يقول...

إيه يعنى
بتهوشنا و تخوفنا مثلاً ؟!!
كرت الأرهاب دا هيمنعنى أقولك كل سنة و إنت طيب و ربنا يحققلك كل امنياتك و تكون بالفعل احسن دكتور سنان فى مصر ؟؟
لأ ... هقول برضو
و بعدين تعالى هنا ...
إيه كل الطلاقات دى اللى وقعت عشان سيادتك إحتمال متجيش يعنى ؟؟
هوه صحيح أبغض الحلال بس مفيش حلول تانية غيره لتفادى المعضلة دى ...
طب الحمدلله إن عمو و طنط اخدوا القرار الصح دا
و جابولنا احلى بطوط حبوب فى البلوجر و الفضاء التخيلى اجمع و إلا مكنش حد يشتغل فى البلد دى غير المأذين
مليش فى حتة الجاتوه عشان أصلاً مش هتكفى كل حبايبك و دول كتييييييييير قوى و انا متاكدة
كل سنة و إنت بخير
و خفيف الدم و طيب
و حبوب كما إنت

همس الاحباب يقول...

هههههههه
يا نهارك ابيض
البلد بقت كلها مطلقة والنصف الاخر ارمل وعانس
على البركة وارجع كما كنت يا جدع
ولا هقولك خد طقم اسنان اهو ينفع فى المذاكرة
كل سنة وانت طيب وعقبال مليون سنة
وعندك واحد ابل من غير ماكنتوش

kochia يقول...

اللي اقدر اقولهولك بعد البوست ده
كل سنة واحنا طيبين بوجودك بيننا

تمام كدة ولا ايه ؟؟

بطوط حبوب يقول...

بنت المسلمين

ربنا يسعدك ياااااااااارب يا ايمان واشوفك وزيره التعليم العالى والواطى وكله

وزيارتك للمدونه بميت ابل

///////////////////////////

ايه

هههههههههههههههههههههههه
طب اجيب منين حد يرضى بيكى؟؟
هشوف حد بكرهه بقى وربنا يسامحنى :p

لو كنتى جبتى هديه كنت قلت عليكى انك فرجينا وقلبك اكبر قلب بس مشفتش منك حاجه عشان اقول كده
:p



///////////////////////////

محمد غاليا

ههههههههههههههههههههههههههه

صورى وجوابتى يجوا يا مان

مش هقولك اكتر من كده
وبعدين انت بتاع الاقتصاد كله وعارف ان الحاجه هى المحرك الاساسى لاى نشاط



///////////////////////////

د تويتى

وصلت يا فاندم ولسه بتعالج منها
:p
///////////////////////////

A.SAMIR

حاسس انه كومنت من سجنال تو :p

///////////////////////////

آبى
وانتى طيبه بس هاه؟؟
حاف كده مفيش هديه مخبياها وعاملهالى مفاجأه؟؟

قولى اقولى متتكسفيش انا عارف ان عمرك ما يفوتك حاجه زى دى
:p
///////////////////////////

مها زين

انا احتفات بعيد ميلادى
؟؟ شفتى حد دخل عليا بهديه ولا حتى بباكو بسكوت؟

:(( طب لما تيجى هديه ابقى قولى

ربنا يوفقك يااااااااارب

///////////////////////////

صبرنى يارب
دا دكاتره السنان دول عسل انتى ليه بتاخدى الجزء المظلم
ما انتى بتبقى سنانك وجعاكى وغالبا بترجع اقل وجع
:p

مش اقل اوى بس اقل
ثم الكشف رخيص جدا مقارنه بانك مش جايه تانى بعد اللى عمله ف سنانك
:p

كل سنه انتى بخير يااااااارب
///////////////////////////

حاسوباتيه

اسلم ايه يا بنتى
هو عيد ميلاد مين فينا
:((

///////////////////////////

نجرو

شفنا منك حاجه؟
ولا حتى تلاته سانتى
عالم بق يا سيدى

عشان كده انا دخلت سنان :p

///////////////////////////

صاحب المضيفه

نهارك قشطه يا خالوووووووووووو
:)

كل سنه وانت طيب

///////////////////////////

حواء

لو مكنتيش ضغطتى عليا :)

:p

///////////////////////////

مسلمه مؤمنه وموحدة

والله لو تعرفى اد ايه انا مشغول كنتى عزتينى
بس كفايه ان اقولك ان السنه دى ف البكالريوس
وما ادراكى ما البكالريوس ف طب الاسنان
ومفيش نت ف البيت
والكليه من 8 ل 2.5
ف مش عارف بجد انا اسف

///////////////////////////
احساس طفلة محبة للرومانسية بس واقعية

الاول وانتى طيبه

وبعدين اه انا عايز الانواع الموجوده ف الصور دى
توصل امتى بقى؟؟
:p
///////////////////////////
اخت مسلمه

الف شكر دا اللى انتى هتجبيه بقى ؟؟
:p
اوك انا موافق

///////////////////////////

انا حره
ههههههههههههههههههههههههههه

ماشى بس دورى عند فكهانى تانى لو ملقتيش يبقى عداكى العيب
كل سنه وانتى طيبه :p

///////////////////////////

فاتيما

بجد بجد بجد والله يا فاتيما كومنتك اجمل هديه جالتى ف عيد ميلادى
ربنا يخليكى ليا يااااااااارب ويخلى قلبك الكبييييييييييييير

///////////////////////////

همس الاحباب

يا عم انت انا عايز الابل بمكنتوشه اما انت غريب والله

هات الابل بمكنتوشه وبعدين تعالى نتفاوض

:)

///////////////////////////

كوشيا

انتى اللى صح في كل دول
:p

أمل الحياة يقول...

ههههههههههه بجد اسلوبك جميل جدااا
طلعنى بره مود المذاكرة خالص

و كمان اول حاجة ف البوست جاتوه و انا بموت فيه دى هديتك ليا طبعا - نظرا لان القانون الجديد اللى ماتعرفهوش ان صاحب عيد الميلاد هو اللى يجيب هدية-

كل سنة و انت طيب و يارب سنة سعيدة عليك

love for ever يقول...

انا لاقيت جاتوه قولت ادخل اكل
لاقيت هدايا بعد الشر عليه انا عندي حساسيه من الحاجات دي
ههههههههههههههههههه
كل سنه وانا طيبه عيد ميلادي
ههههههههههههههههه

صيدلانيه طالعه نازله يقول...

ايه ده معقول الهديه بتاعتى لسه موصلتش
اكيد موصلتش عشان لو كانت وصلت ماكنتش كتبت البوست ده خالص اصلى كنت بعتالك بطانيه عشان تتغطى كويس و انت نايم و تبطل احلام اليقظه الشريره دى اللى كلها طلاق و لثه و اسنان و حاجات مش عاطشفيه خااااااااااااالص يا بنى انت غلبت صدام و بوش فى الشر و الحمد لله التنيين خلصوا على بعض و فضلت انت
و فى الاخر اقولك كل سنه و انت معانا يا بطبط
اييييه اقول براحتى انا بعت الهديه بس يظهر اتحشرت فى البوسته

همسات دافئه يقول...

يانهار أبيض
كل البيوت ده كانت هتخرب من غيرك!!!!
ده انا كده هبلغ المحامين وكل الى شغالين فى محكمة الأسرة دول هيكسبه ملايين لو انت اختفيت من البلد وده تنبقى هديتي:)
كل سنة وانت طيب يارب السنة ده تكون أحلى وتتخرج على خير ان شاء الله
ربنا يوفقك:)
شيماء:)

دعاء مواجهات يقول...

هههههههههههههههههههههههههه
قولتلك مليون مرة انك مصيبة ومصدقتنيش بجد

لاب توب وقولنا ماشى كمان ماكنتوش
هو شحات وبي ... كمان ولا ايه

مش كفاية اننا معبرنك وبنيجى نعلق عندك

هو حد يعرفك غيرنا اصلا

بيس

سومه...مجنونه فى بلد عاقل يقول...

دا جاتوه دا يا مرسى:)
وكمان مصر كانت هتخسر رجل من اهم رجالاتها ..
ليه ادهم صبرى:)
عموما كل سنه وانت طيب مقدما وحيث كدا بقى انا عيد ميلادى قبل منك بعشر ايام:)))q
يعنى جهز انت الفلوس يا دك ومردودالك

سومه...مجنونه فى بلد عاقل يقول...

ايه دا انت 31 مارس سبحان الله وانا برضو بقول شهر اربعه من امى بقى31 يوم:))
حيث كدا انت عاوز الهديه
طيب نجيب ايه نجيب ايه حجيبلك معجون سنان:))
سيجنال توو يكافح التسوس

غير معرف يقول...

Hey there just wanted to give you a brief heads up and let you
know a few of the images aren't loading correctly. I'm not sure why but I think its a linking issue.
I've tried it in two different web browsers and both show the same results.

Check out my web-site; click here