2011/01/13

سامح لكن لا تنسى


مأساه الكدب الكبيره مش فى انه بيضيع الحق .. الى بيكدب عليك بتخيل انه  واحد مطلع لسانه وبيقولك انت عبيط .. انا اقدر اقولك كلام مش حقيقى وانت تصدقه .. انا خليتك تثق فيا وانا مش أهل لدا .. واظن سبب اننا كلنا بنكره الكدب لاننا بنحب منظهرش بمظهر الغبى اللى صدق كلام مش حقيقى.
الكداب بيوصلك وبيوصل لنفسه رساله انه اذكى منك .. وانك غبى .. واظن ان دا هو الشعور المؤذى فى الكدب اكتر بكتير من كون الحق ضاع.
بس مين فينا مبيكدبش؟ .. انا نفسى بكدب على ماما فى اسعار الهدوم .. لانها  دايما بتقولى ان البياع ضحك عليا .. وحتى لما اشترى حاجه ماركه يعنى مفيش بياع يضحك ولا يحزنون.. برضه بتحسيسنى انى عبيط وبيضحك عليا .. عشان كده بكدب فى كل اسعار اى حاجه اشتريتها على ماما... بكدب عشان اقول لنفسى انك يا ماما مبتعرفش فى الاسعار .. والحاجه اللى فكراها ب 100 هى تمنها 500 دى الحقيقه .. بس بكتفى بالحقيقه دى لنفسى وبكدب اريح... لان الحقيقه هتزعلها.. بكدب لانى عملت اللى انا عاوزه فبلاش ازعلها طالما كده كده هعمل.

وبكدب لو اديتك معاد وبعدين اتاخرت .. لو قلتلى ادامك اد ايه هقولك سبع دقايق بالظبط ان شاء الله .. واكيد ساعتها هكون بكدب... بكدب ساعتها عشان اطمنك حتى لو بالكدب
بكدب فى حاجات كتير وبكدب كل يوم .. وكل شويه فى شخص بقوله انا اعرف اكتر منك .. او انا اذكى منك لانى قدرت اقنعك انى مش بكدب وقت ما كنت بكدب.
لكن لما هى كدبت عليا انزعجت ...السؤال الوحيد اللى نط ادامى ساعتها انا غبى فى ايه كمان؟ .. الكدب هنا مكنش مجرد احساس انى غبى .. الكدب هنا كان مؤشر بيقولك متثقش جدا فى الشخص اللى لازم تثق فيه جدا جدا جدا.
ممكن تكون الكدبه بيضا , وممكن تكون صغيره ..وممن يكون غرضها الوحيد انى مزعلش .. لكنها فى الاخر كدبه .. كدبه بتقول انى مش فاهم حاجات كتير .. وكدبه بتخلينى اسأل فى ايه تانى كدب شبه دى؟

كدبه تخليك تسال نفسك لاى مدى المفروض الثقه تكون موجوده .. وامتى لازم متعتدمش عليها ... لما اتفقت معها على كام موضوع .. وكنت متأكد انها بتنفذ الاتفاق بالحرف .. بس عشان هى قالت انها بتنفذه بالحرف ..وبعدين اكتشف انها حطت استثناءات للاتفاقات دى من غير ما ترجعلك .. استثناء يخلى الاتفاق كأنه مش موجود ساعتها السؤال الوحيد اللى بيجى فى دماغك فى ايه كمان؟ ايه اللى ممكن اكتشفه بعد كده .. ولاى مدى هى شيفانى غبى ..وهل انا عارف عنها فعلا كل حاجه ولا انا اغبى من كده.
لما قالت انها فعلا بتقلل صلتها بالناس اللى فى الشغل وبعدين تكتشف انهم بيشتغلوا مع بعض وبيقعدوا وقت الراحه ياكلوا مع بعض ويتكلموا فى كل حاجه بره الشغل ..وتكون الاجابه يعنى اكل لوحدى ؟ ساعتها بتسأل لما قالت لك انا بقلل علاقتى بالناس فى الشغل كان قصدها ايه؟
والعلاقه كان حجمها ايه لما تقل توصل لكده؟
الكدب بيولد الشك .. لانه بيقلل ثقه الواحد فى ذكائه وفى الطرف الاخر
عشان كده لو حد كدب عليك مره .. ولو مره واحده .. صدقنى هتكتشف بسهوله انها مش مره واحده وانها سلسله متعرفش انت فين اولها .. وهتفضل تايه لفتره طويله ومتشكك فى حاجات كتير.
بس حتى لو قبلت الاعتذار .. نصيحه منى ليك سامح .. بس اياك تنسى
سامح لان مفيش حد مبيغلطش .. وكمان الكدب كان بحسن نيه عشان انت لو عرفت الحقيقه كنت هتزعل اوى 
واياك تنسى ..لان مينفعش يتكرر الموقف دا تانى .. لو اتكرر يبقى اما توافق تعيش طول عمرك غبى .. واما تنسى انك شفتها احسن
وانصحك تكتب الكدبه الى حصلت فى مكان تشوفه كتير .. عشان تفضل فاكر انه مينفعش تنسى .. حتى لو سامحت

هناك 16 تعليقًا:

Ramy يقول...

حاضر

هسامح لأنى برضه بأكدب

(:

FAW يقول...

عندك حق والله . .
وكما قال الشاعر الكبير . .
كداب يا خيشه كداب قوي
وأنا اللي فاكرك فهلوي

صيدلانيه طالعه نازله يقول...

متفقه معاك ان محدش فينا مش بيكذب
انا بكذب و كلنا كده
بس يا بطوط الكدب فى اوقات كتير بيترتب عليه نتايج مش حلوه
ممكن يضر ناس و ممكن يتسبب فى خراب بيوت
يبقى ازى الحال ساعتها
فيه كدب مينفعش التسامح فيه نهائى و بالتالى يبقى مش حنسى
و زى ما انت قلت مش بتبقى اول كدجبه
بتبقى سلسله متتاليه من الكدب المتوالى

شمس النهار يقول...

الكدب كدب

والثقة هي قوام اي علاقة في الدنيا

لو فقدنا الثقة في بعض
يبقا فين الامان في العلاقة

هيفضل الاتنين شاكين في بعض طول العمر
ودي تبقا عيشه دي

ميشوو يقول...

اممم الكذب موضوع بيسبب لي الغثيان

ومن زمااااان من كنت بأول شانوي قررت إني ما اكذب

لاني صج راح اتعب ومثل ما قلت الكذب سلسله متواصله

حلوو انك تعدي للإنسان الكذب بس انا ما اقدر احط عيني بعين الكذاب مع اني انا الطرف الاحسن

بس تعرف اول مره تسمح لأنسان يكذب وانت تعمل مصدق بتحس انك انسان راااائع هع

mrmr يقول...

التسامح دليل المحبه
وعلى قد ما بنحب ح تلاقى نفسك سامحت
لكن ليس كل شئ نتساهل فيها ونسامح
كل شئ يغتفر ما عدا جرح الكرامه والخيانه غير كده سامح على قد ما تقدر لان الكل معرض انه يكدب فى اشياء صغيره ذى دى

تحياتى

غير معرف يقول...

اتفق مع رأى مرمر جداااا

r يقول...

فى حاجات ممكن نسامح وننساها كمان
لاننا كلنا بنضر ليها احيانا كتيره
بس فى حاجات مصيريه مش ينفع تتسامح او تنساها

يعنى الوعود خاصه (خد عندك من صديقك لمديرك لرئيسك 00مش كل الكلام أو المشروعات او الخدمات مش كلها كدب
ماينفع تنسى اللى ضيع بلدك وهزأك فى كل حته(دا الحكومه ورئيسهاأو صاحبك اللى خسرك وظيفه مثلا او شخص اخر وهكذا

احنا فى الاخر بشر من كلنا عندنا نفس المقدره للتسامح او النسيان

sony2000 يقول...

عارف ياعم بطوط
مافيش حد مش بيكدب
كلنا كدا
بس اهم حاجه
انك تسامح ونتسي
بس تنسي الكدب الصغير
مش الكبير
وبما اني شخص غير مرغوب فوجوده
فللسلام ختام
ربنا معاك

غير معرف يقول...

انا اول مرة اعلق هنا بالرغم من انى قاريت المدونة كلها بوست بوست !

بطوط : مش كل الناس بتكذب طول الوقت
و مش معنى ان الناس بتكذب انى كمان اكذب بحجة "يعنى جات عليا ما كلهم كدا" في الصحيح عن النبي صلى الله عليه وسلم قال "إن الصدق يهدي إلى البر وإن البر يهدي إلى الجنة وإن الرجل ليصدق حتى يكون صديقا وإن الكذب يهدي إلى الفجور وإن الفجور يهدي إلى النار وإن الرجل ليكذب حتى يكتب عند الله كذابا


متسامحهاش عشان انتا كمان بتكذب ...لا سامحها عشان التسامح خلق رائع ..خلق المسلم الملتزم ..خلق بطوط "و انا احسبك على خير :)"

غير معرف يقول...

تصور ياواد يابطوط انت عندك حق فعلا فى الفكره دى...بيحصلى الموضوع ده وبعد اقول لنفسى كده((انا مش هصدق وهفضل اشك عشان اللى بيكذب عليا ميفتكرش انه ازكى منى...حتى لو كان بيقوللى الحقيقه))وبصراحه الشعور ده بيرضينى
بس البوست ده فى الجوووووون يادكتور
rose

غير معرف يقول...

نسيت اقولك حاجه...فاكر فيلم احمد زكى (انا لا اكذب ولكنى اتجمل)...حلو ابقى اتفرج عليه

غير معرف يقول...

مشكلة الكاب انه بيخليك فعلا زي ما انت بتقول تفقد الثقه في اللي كدب عليك مره او اكتر
لانه بعد كدا بتلاقي نفسك تلقائي بتفكر في اي حاجه هو بيقولها علي انها ممكن تكون كدبه الا ان يثبت العكس ودا شيء في حد ذاته كارثه وخصوصا لو انك عايز تكمل مع الشخص دا .
بس سؤال انت كتبت الكلام دا هنا علشان تفضل فاكره دايماً؟
للاسف معتقدش انك هتقدر تنسي لانه هيبقي نمط في تفكيرك في كل افعال الشخص دا.........

ana يقول...

حلو اوي الموضوع وطريقه كلامك حلوة
انا عندي مشكله انى لما بحب حد اوي بثق فيه اوي وبتصدم اوي لما اكتشف انه بيكدب عشان بحس ازاي انا بحبه اوي كدا وهوا يوجعني كدا ازاي اديله دهري يحميه وهوا مش امان ليا اصلا
بس كان ليا كلمه ليك بالنسبه للبنت يعني لو قعدت تقولها حدود كتير هتخنقها هيا بتبقا عامله زي الفرسه اللى من غير لجام مينفعش تلجمها انتا خليها هيا تحب اللجام وتتمناه ....

Unknown يقول...

تيب هسامح :)

Unknown يقول...

تيب هسامح عندك حق :)