2010/05/18

انا مش هفرح فيك

كنت قاعد معاه فى كافيه ,, سرحان وتايه وكل تلات دقايق يبص على موبايله ,, كل اربع ثوانى يلعب فى الكونتكت ليست ,, كل خمس ثوانى يدخل على الصور ويتنح شويه . لحد ما حسيت انى قاعد ادامه زى ما أكون هوا.

**احم احم؟ معاليك يعنى مش جايبنى وعاوز اخرج يا محمود عاوز اخرج يا محمود عشان اشوف شكلك وانت بتتفرج على ام الموبايل.

(اتنحنح كده نحنحه متعجبكش يا مولانا وفضل يتكلم)

اتفقت انا وهى منتصلش ببعض فى الفتره دى ومن ساعتها وانا مش عارف ايه اللى بيحصلى.

عارف يا محمود؟! انا كتير بسأل نفسى انا بحبها ولا لأ؟ وعارف كل مره بوصل لأيه .. بوصل انى بس عاوز ابقى جنبها طول الوقت ,,انى اسيبها تنام فى حضنى ,, مش بفكر فى اللى فى دماغك والله ,, كل اللى بفكر فيه انى عاوز اقعد ألعب فى شعرها وهى فى حضنى ,, ببقى حاسس بسعاده وهى ادامى مش عارف ليها تفسير ,, وبحس ساعتها انى نفسى اخدها فى حضنى اوى ,, نفسى اضمها بين دراعى اوى.

عارف؟ انا مش عارف انا هتجوزها ولأ ؟ معرفش الظروف هتسمح ولا لأ ؟ بس انا متأكد انه لو لاقدر الله متجوزتهاش انى كل ما فتكرها هبتسم اوى ,, زى الابتسامه اللى بتشوفها على وشى لما بشوف صوره ليها ,,هبتسم يمكن لانها مرتبطه فى دماغى بحاجات كتير اوى كلها بتخلينى ابتسم,, وهبتسم لانى هفتكر شكل ابتسامتها لما بقعد ادامها ونسكت دقيقه وسط الكلام.

عارف ايه اكتر حاجه بحبها فيها؟ انى مش عارف ايه اكتر حاجه بحبها فيها ,, اه والله مش عارف ايه هى اكتر حاجه تتحب فيها ,, هدوءها , دماغها وطريقه تصرفاتها , بساطتها , ولا جمالها اللى حكايه لوحده , ولا بيعجبنى فيها انى بشوف فى عنيها انها بتحبنى اوى , ياااااااااه ايه اللى فكرنى دلوقتى بعنيها.
بحب فيها انى ببقى معاها براحتى؟ ولا بحب فيها انى بحس انها سايبه ايدها لفوق وهى بتكلمنى ,اجمل شعور فى الدنيا لما تحس ان ادامك بيتكلم وهو سايب ايده لفوق , بحب فيها دماغها اللى مختلفه عن اى دماغ شفتها اختلاف حلو مش اختلاف غبى ,, بحب فيها انى بشوفها ضعيفه اوى اوى ,وساعتها بحس انى نفسى اخدها فى حضنى اوى ,, وبحب فيها انى بحس احيانا انها مؤمنه بيا اوى  , مصدقانى انى هبقى حاجه ,,ومصدقه انى استحق دا.

يااااااااااااااااااااااااااه عارف من ساعه ما اتفقت معايا اننا منتصلش ببعض الايام دى وانا زى ما اكون مدمن مخدش الجرعه بتاعته ,, كام مره العب فى الموبايل ,, اتصل بناس عشان اتأكد ان فيه شبكه ,, بكنسل على اى رقم تانى يرن عليا احسن تتصل وتلاقى مشغول فتغير رأيها ,, اطلب رقمها وفى اخر لحظه اقفل عشان خايف متردش وازعل ,, اصلى مش عاوز اعمل حاجه ممكن تخلينى ازعل منها ,, اتقفت معاها انى متصلش بيها على الاقل الفتره دى ,, وكل يوم بحبها فيه اكتر ,, كل يوم بتوحشنى اكتر ,, وبتعلق بيها اكتر ,, وبخاف اكتر.

ياااااااااااه النهارده تالت يوم ,, ولسه مش عارف الاتفاق دا هيفضل مستمر لامتى ,, بس عارف انا مستمتع باحساسى دا , احساس انها وحشانى ومتأكد انى واحشها برضه , عارف انت الألم اللى بيبقى ليه لذه اهو دا اللى انا حاسس بيه دلوقتى.
محمود هو انا بحبها؟ طب يعنى ايه بحبها؟ وليه احيانا بحس ان كل اللى عاوزه منها تكون جنبى ..  ولما تكون جنبى بحس انى مش عاوز حاجه تانى هو دا هو الحب؟,, ليه لما اشوفها بحس فى الاول انى بحبها اوى وبعد شويه بحس ان دا مش باين فى عنيا ؟ بزعل اوى لما بحس انى مش عارف اعبر لها عن حبى دا .. وبزعل اكتر لما بحس ان حبى ليها قل او بقى بصوره تانيه .

تفتكر هتتصل ؟ ولا هتفضل مصممه اننا مينفعش نتصل ببعض الفتره دى.
المشكله انى مقتنع اننا مينفعش نتصل ببعض .. بس مش مقتنع اننا مينفعش نتصل بعض مش عارف ازاى بس انا كده.
محمود انا بجد تعبان بس مبسوط مش عارف بقى.

تنحت شويه وهو بيحكى وبعدين عدلت مكانى على الكرسى وتقمصت دور الحكيم اللى هيجيب الحل النهائى وقلت له.
بص يامان انا مش لاقى حاجه اكتبها فى المدونه فاانا هاخد كلامك دا كوبى واحطه فى المدونه  وربنا يوفق المنتخب وخلاص واكيد يعنى معنديش حل :D
وابقى جرب كده تبعتلها عبد الحليم وهو بيقول انا مش هفرح فيك .. لما الشوق يناديك حاسب على المشاريب بقى يا دنجوان حق الاستشاره دى :D

هناك 29 تعليقًا:

Sarah Sobhi يقول...

احم ..هو يعنى اية تكلمنى و هى سايبة ايدها لفوق ؟؟!!

معنديش حل بردو ع الاقل دلوقتى

آيوشة يقول...

طيب اما وهو بيحبها بالشكل دا وبيموت فيها يبقى مش يضيعها من ايديه ياخد خطوات ايجابية بجد علشان يبقوا مع بعض على طول
متقوليش ظروفه متسمحش ومعرفش ايه
لا طبعا لو كان عارف انه ظروفه متسمحش انه يترتبط باى واحدة مكنش علق بيه انسانة وخلها تحبه
لو حط فى دماغه انه عايزاها بجد هيعمل المستحيل ويرتبط بيها
اعرف ناس كتير حب واول ما حب مفضلش يفكر كدا هتبعد عنى ولا هقدر اعيش ازاى من غيرها
راح كلم اهلها وقالهم على ظروفه لكها بصراحة واهلها وافقوا انهم يستنوه
افتكر هو نفسه مش عارف يقرر صح
لو كان بيحبها بجد مش هيقدر يبعد عنها

Mahmoud البطراوى يقول...

آيوشه انتى فهمتى ايه
هو مش سايبها تضيع منه ولا علقها بيه وهيخلع ولا خايف تسيبه

هم بس اتفقوا ميتصلوش ببعض الفتره دى لاسباب مش مسموحلى اقولها بس

حنين القلب يقول...

قوله يتصل بيها لانه بيحبهااااااااا

وبلاش مكابرة
اكيد هى كمان مستنيه اتصاله

وربنا يصلح احوالهم

غير معرف يقول...

الــلـــه على روعه الاحساس
هو بعينه الحب
انا حسيت بالكلام قووووى
لدرجه انى اتمنيت اكون مكان حبيبته ويكون الكلام ده على لسان حبيبى

معقول كل الاحساس ده جواه وهو مش عارف بيحبها ولا لأ؟؟؟؟!!!
امال لما يتأكد هيقول اييييييييييه

مي يقول...

ايه يابطوط صاحبك ده
ده رائع انا من كلامه كنت بدمع والله
ده مش بيحب لالا ده وصل لمرحلة اكتر ده عشق روح
ده تلاقى التلات ايام دول مروا كانهم سنين
لالالالالا يروح يتصل بيها فورا ويقولها كل الكلام ده ويستنى يسمع منها لان اللى هيتقال منها احلى واحلى صدقنى
ربنا يوفقه ويجمع بينهم على الخير

Helium Atom يقول...

momkin a3raf el asbab di (bta3et 3dam el ettisal) ya btoot ?! :D

إيثار يقول...

عندك حق في إني مفيش حل
أو للدقة مفيش حل مضمون

بس عاجبني الوست اوي

...........

ومن باب المعرفة برده

يعنى اية تكلمنى و هى سايبة ايدها لفوق

R-H-S يقول...

ايه دا ياعم محمود انا حسيت اني عاوز احب من الكلام اللي سمعته دا
ربنا يصبره قادر ياكريم

Zika يقول...

يا تنح يا فصيل
فصلتني
يا راجل ده انا كنت قربت احبها
:D:D:D

واحشني ياد جدااا يخرب بيت اللي يزعلك يا جرع

dr_tweety يقول...

تعرف
انا فكرت في الاول البوست ده عليا,بجدقلت من كتر ما بشكيلك كتبت الكلام ده بس اول لما لقيت فيه قله ادب قلت اكيد لا...انا حسه بالكلام ده اوي لانه بيحصل معايا انا طول ما انا قعده ابص ف الموبيل وفي الاخر بعدته بعيد عني وبرضو اقوم ابص فيه واشوف الشبكه بجد دخت من الي بعمله وبرضو مش راضي يتصل بيا, يامحمود قوله يتصل بيا بقي بجد بوست تحفه وهو ده الحب بس ليه يبقي فيه عذاب وفراق؟؟؟عذابه ده صعب اوي كده بقاله 5 ايام مش بيكلمني وانا هموت بجد...وللعلم ياجماعه ده خطيبي

Mahmoud البطراوى يقول...

Sarah Sobhi
اديكى ايميله تسأليه؟ :P
بس اظن المعنى جه فى دماغك ولاايه؟
============================
حنين القلب
اكيد هو هيقرا الكومنتات ولو حصل حاجه منه ليكى بقى انا اندل صديق فى الحاجات دى :D
============================
غير معرف
عشان تعرفوا بس انا مش بصاحب ناس اى كلام :P
نورت المدونه يا فندم
==============================
مي
هيقرا الكومنت بتاعك اكيد يا مى وهو حر بقى
============================
Helium Atom
ما تيجى تقعدى معانا احسن وتحاسبى على المشاريب
قلنا اسرار نقول تانى ؟ :D
===========================
عاشقة الحب
تكلمكنى وهى سايبه ايديها مش عارف يعنى ايه بس اظن المعنى بتاعها وصل
حاسس انكم اخدتوا فكره انى بصاحب ناس عجيبه صح :D
===========================
عاوز اصحي
منور يا كبير وربنا يكرم الجميع
اصحاب هم بجد :(
=============================
Zika
زيكا اوعى تحبها ابوس ايدك احسن تسيبها منه وتحبك

واحشنى بغباء يخرب بيت كده :D
============================
dr_tweety
انا علقت على الكومنت دا قبل كده مش هعلق تانى :P :P

أع ـقل مـ ج ـنـونــة يقول...

تيرا تيرا تيرا رااااا

نفسي اعرف يعني ايه تكلمني وهي سايبة ايديها لفوق

بس الراجل دا رومانسي اخر حاجة ^_^

خليه يشوف الدنيا ماشية ازاى ويتجوزها بسرعه بئة :D

ويكا يقول...

بص

انصحه ، يشرب مخدرات
هههههههههه

nigro يقول...

ماقدرتش أمشي من غير ما أشكرك على البوست ده
و أقولك بجد تسلم إيدك يا محمود
انت عملت فيا جميلة بالبوست بتاعك ده مش هانسهالك
الجو النهاردة كان حر جدا و الكهربا كانت قاطعة و فضلت خمس ساعات ما بين سلق و شوي في حر الخليج الزمهرير
و نفسي اتسدت عن الأكل
بس و أنا بأقرأ الكلام ده ضربتلي أربع أكياس شيبسي و إزازة مية جوفية و تفاحة و موزتين
يا راجل ده فيلم كده رضا ما عملش فيا اللي عمله البوست ده
ولا أي فيلم هندي كان ممكن ياكل معايا كده

تسلم إيدك يا بطراوي


سلامـُـه عليكم

P A S H A يقول...

دكتور
صباح الفل
وممكن تقول له يسمع أغنية تلات سلامات با واحشني تلات أيام D:

جميــــــــل جـــــداً تصويرك للإحساس بالشكل الهايل ده.. خليت الواحد يتنهد ويسرح ويقول هااااه

خالص تحياتي وعميق تقديري واحترامي

غير معرف يقول...

هو شكلو مفيش حل مضمون :)
يصبر شوية و يبقا يشوف هيحصل ايه :)
بس فعلا ايده سايبة ايديها لفوق :)
بس لو ينفع ياخد خطوة ايجابية..
لان الضوع كدة بيبقا متعب جدا جدا :9

ألوناتك :)

عندما تكون ميمى وحاجات كتير مع بعضها كده يقول...

اصلا التوبك ده اثرررر فيااا جدا جدا حسييت ان نفسى حد يتكم عليااا كده اوى انا قريبت المدونه كلها وبجد فيها حاحات حلوه اوى اوى تحس انها يتعمل حاجة جوه كده بجد حلوه اوى

الجواز و سنينه يقول...

مش هاعلق علشان اثبت الوجود
بس يمكن مش لاقيه كلام يتقال
يارت بجد كل الرجال تحب كده
قوله كمان ان الحب ده مش هايلاقيه كل يوم
قوله كمان ان الاحساس بأنه بس عايز ياخدها فى حضنه و يلعب فى شعرها دون اشياء اخرى هو اكتر ما تمناه المرأه
قوله كمان ان احساسه حلو اوى
و قوله كمان انه كويس انه فضفض معاك علشان نعرف احساسه الجميل ده
اخيرا بقولك شكرا على الكوبى و البيست الجميل ده

...... يقول...

So cool ya Man :P


طيب وانت ايه رأيك في الموضوع ده يا محمود ؟

عشان شخصياً لَستُ مقتنعة (*_*)!!

عصفور طل من الشباك يقول...

يعني إيه سايبة إيديها لفوق

عمومًا يتوكلوا على الله ويبطلوا كلام وربنا هيجمعهم إن شاء الله

عاشقه صمت الهدوء يقول...

اولا ً : نفس السؤال الى اتسأل قبل كدة يعنى اية بتكلمنى وهى سايبة ايدها لفوق ؟
ثانيا : انا حسيت من كلامه انه فعلا بيحبها وانا حطيت نفسى مكانها حسيت بجد بيه وبحبه وقوله ياريت لو شايف ان اظروف تسمح انه يرتبط بيها وميضيعهاش من ايدة يعمل كدة لان مبقاش فى حب مضمون وصدقنى مفيش واحده هتلاقى واحد يحبها الحب دة كله ومتحبوش وتموت فيه كمان .........
وربنا يخليهم لبعض

yaman يقول...

Ya ragel etaqee ellah,, danta shee5 7ataa,, enna lellah w enna elayhee raj3oon,, rabna yehdeek!!

Mahmoud البطراوى يقول...

yaman

جزاك الله خيرا خيرا على النصيحه
بس انا مش شايف مخالفه شرعيه فى الموضوع
وكمان انا مش شيخ وبين وبين انى اقول على نفسى ملتزم كتير
ربنا يهدينا جميعا

فاتيما يقول...

نظراً لأن المدونة بتاعتى بترخم
و البوستات الجديدة
مبتطلعش ف الريدر
فلو سمحت تقرى البوست دا
و لو تقدر تساعد متتاخرش
و شكرااااا مقدما
من قلبى

http://nonoymm.blogspot.com/2010/06/blog-post_16.html

yaman يقول...

يا أخى انا لا أقصد شيئا بكلامى غير النصيحة وكنت أعتقد أنك شيخا حيث أنك كنت ملتحيا أو ملتزما على ما أعتقد وربنا يهدينا جميعا وثانيا الشخص الذى يفعل المخالفات الشرعية لا يدرى أنه يفعلها تغافلا منه أو جهلا فأريد منك أن تسأل شيخا أو صاحب علم حول مسألتك أو موضوع مدونتك حيث أنى أرى أن الحب الحقيقى أن يكون لزوجتك لا الحب الذى انتشر بين الشباب الذى امتلأ بكثير من المخالفات الشرعية ,,, أردت النصيحة لنفسى أولا قبلك لا غير .. شكرا على حسن ردك .. وربنا يهدينا جميعا ويرزقنا الذرية الصالحة والزوجة الصالحة....

Mahmoud البطراوى يقول...

yaman

جزاك الله خيرا على حسن ظنك باخيك

مبدئيا انا مش بطل البوست
البوست صديق ليا بيحكى وانا بسمعه
" مش انا اللى بحب يعنى "

ثانيا حتى قصه صديقى ليها حيثيات ممكن متكنش واضحه فى البوست رغم اظن انه واضح انهم اتفقوا ميكلموش بعض الفتره دى.

فى النهايه الموضوع لا يتعدى كونه قصه شفتها وعجبنى فيها احساس معين حبيت اكتبه .. ومتعرضتش فيه لفتاصيل اكتر لانه مكنش الهدف انى اقول موقفى من قصه صاحبى انا شايفها حرام ولا حلال.

وجزاك الله خيرا على حسن النصيحه

غير معرف يقول...

انا مش عارفة اقوله ايه لان انا بمر بنفس الظروف يستنى ولو ليهم نصيب فى بعض حيرجعوا الموضوع بجد جميل

babosha يقول...

انا مش عارفة اقوله ايه لان انا بمر بنفس الظروف يستنى ولو ليهم نصيب فى بعض حيرجعوا الموضوع بجد جميل