2010/01/17

رحله البحث عن كومنت




فاضل شويه صغرين اوى وابقى بقالى تلات سنين حامل لقب (مدون) على سن ورمح .. والفتره دى عمال افتكر اول يوم تدوين ليا هنا فى البلوج سبوت .. وافتكرت شويه حاجات وارتسمت على وشى ابتسامه كبيره وقولت اشرككم فيها.
اول يوم عملت فيه مدونه فى البلوج سبوت .. ونزلت اول بوست .. وطبعا محدش يعنى هيشم على ضهر ايده ويعرف انى عملت مدونه ويجى يسيب عندى كومنت.
ففضلت يجى اسبوع او اكتر مفيش ولا كومنت ... وانا بقى مش عارف اعمل ايه عشان احتفل بعيد ميلاد اول كومنت؟؟... اللى يضحك انى كنت ناقل البوست دا من مدونتى التانيه ( مكنتش فى بلوج سبوت اكيد) والبوست كنت شايفه حلو وجالى عليه هناك كومنتات كتير  .. انما لما حطيته هنا وعشان محدش لسه كان يعرفنى فات اسبوع ولا حس ولا خبر
وانا قاعد كده بقى فى يوم اقول كومنت من عندك ياااااااارب .... كومنت للغلبان اللى جاله احباط ياااارب ... وفعلا وفى لحظه حاسمه فى تاريخ التدوين المصرى  لقيت واحد جاى يحط كومنت...ومكنش عندى صبر بقى عشان اروح اقرا الكومنت .. والنت بيحمل ببطئ وانا هموت بقى واشوف الكومنت.

ومن جوايا عمال اقول... حمد لله على السلامه يا عم .. انا عارف ان الموصلات صعبه بس انت فدائى وخاطرت بالاهوال وجيت.
واذا بالمفاجأه .. الكومنت كان عباره عن كومنت دعائى من عينه..( نريد مشاركتكم معنا فى اى بتنجان وشكرا لكم)
محبتش بقى اضيع على نفسى الفرحه بالكومنت .. انا قلت طلما بتوع الدعايه وصلولى يبقى خلاص هيجى الناس واحده واحده .. ودخلت علقت على الكومنت دا ..( ان شاء الله اشارك واكون عضو فعال فنحن فى امس الحاجه لمثل هذه البتنجان .. شكرا لزياتك)
وررجعت تانى احط ايدى على خدى فى انتظار اول كومنت
واخيرا بقى الايميل قالى جالك كومنت .. وانا بقى جرى على المدونه اشوفه بعيني والمسه بايدى وابوسه بشفايفى هذا الشخص المثابر اللى جالى وعلق ...
شفت الكومنت لقيته واحد كان فاكرنى خطيبته ... والظاهر انها قالت له انها هتعمل مدونه اسمها ( بطوط) فهو جاى يهنيها او حاجه زى كده.
انا قلت خطيبته خطيبته ... ودخلت عملت ايدت للبروفيل شلت منه كلمه (male) وشلت السن وخليت البروفيل فله .. لو مين ميقدرش يكتشف انى مش خطيبته.
ورديت على كومنته كأنى خطيبته الى بتموت فيه .. خطيبته خطيبته المهم الاقى كومنت. بس لأن الحلو ميكملش ساعات واكتشف انى مش خطيبته ودخل اعتذر عن سوء التفاهم.
وانا بقى أعدت زى اللى اتخطف منها حبيبها .. خطفته الحربايه .. فضلت وراه لحد ما سابنى ..وانا اللى كنت بشتاق لكومنته كاشتياق العليل للدواء .. والخروف للماء ماء.
المهم اعلنت الحداد الرسمى على زائرى الوحيد اللى اتخطف .. وقفلت المدونه لفتره
اللهم اخزيك يا شيطان وقمت فتحت المدونه تانى وغيرت اسمها من ( بطوط) اللى ممكن توحى انها ولد او بنت وخلتها (بطوط حبوب) وكتبت ان اسمى محمود فى البروفيل .. وكتبت ( Male) بإم كابتل كمان ..وقلت دعونا نبدأ من جديد.
وفعلا كتبت بوست تانى.
وجالى فعلا تعليق بس المره دى من ( د اشرف حمدى) صاحب مدونه كاريكا طظ ورسام الكاريكاتير الاروع ( طبعا غنى عن التعريف ) وعجبه اول بوستين قراهم وعجبه اكتر انى دكتور اسنان زميل مهنه ومشيت بقى اهيص واقول جالى كومنت من اشرف حمدى يا بشريه وامى افتكرت انى اتهبلت والحمد لله.

وبعدها مباشره جالى تعليق من (مروه جمعه) وانا كنت شفت اسمها فى مقال فى الدستور قبل كده .. وكنت فاكر ان مروه هى (ابراهيم نافع) بس النسخه الجميله .. يمكن لانه عجبنى اسلوبها فى الكتابه فحسيت انها كاتبه كبيره فوق الاربعين ومحترفه بمعنى انها بتكتب فى الصحف بقالها ما لا يقل عن 20 سنه.
لما جالى بقى الكومنت دا قمت من على الكمبيوتر وان بهتف الله اكبر .. مروه بجلاله قدرها علقت عندى ...كان تعليقها صغير ( مدونتك واسلوبك تحفه بجد .. لازم تعلق عند الناس عشان يعرفوا مدونتك .. انا كنت محظوظه ووصلت لهنا بس الناس مش كلها محظوظه كده .. علق عند الناس عشان يعرفوك)
بالمناسبه انا اكتشفت بعد كده ان مروه من دورى ..وان تجربتها الصحفيه فى الوقت دا مكنتش تتعدى سنتين تلاته فقط... بس موهبتها واسلوب كتبابتها الفوق الروعه بجد هو اللى اوهمنى ساعتها انها بتكتب بقالها 20 سنه على الاقل.
بعد تعليق مروه فهمت بقى ال ايه انى المفروض اعلق عند الناس ( وحسيت انى صعيدى اوى فعلا) .. وهنا انتقلت لمرحله الانتشار.
مفيش مدونه فيك يا بلوج اسبوت بتكتب بالعربى او بالانجليزى الا فيها كومنتى ... احنا مش هنهرج طالما قلت انتشار يبقى انتشار. لحد ما كنت بشوف تعليقات بتسأل هو فين بطوط احنا اتعودنا اننا نشوفه فى اى بوست .

مدونه سياسيه , ساخره , مواضيع متفرقه , شعر , قصص مليش فيه انا راشق فى اى بوست هيتكتب . وجالى فعلا على البوست فوق من 40 كومنت مع كل كومنت اهتف والف الشقه واعمل فرح ... وتانى يوم اقول لاصحابى فى الكليه واعمل فضيحه على الكومنت دا...كان ساعتها بتفرق معايا اوى اوى الكومنتات - دلوقتى طبعا اقل بكتير-


وبالمناسبه دا اكبر عيب فى التدوين عموما ( عدد التعليقات دليل على انتشارك مش دليل على ابداعك غالبا). بس انا كنت فرحان ان البدايه كانت تعليقات من ناس قويه وموهبه فعلا ( سواء د اشرف او مروه) رغم انهم مبقوش بيعلقوا عندى دلوقتى خالص مش عارف انا مستوى كتباتى قل ولا هم انشغلوا .
الفتره الجايه دى احتمال اكتب كام بوست استعيد فيهم ذكرياتى الاولى فى التدوين ايام ما كنا بنكتب اللى يضحكنا ونضحك على اللى بنكتبه وذكرياتى عن اول لقاء مدونين .
فى السيدبار فى الجنب   "نصيحه متقراش غير دولفيهم المواضيع اللى كتبتها وعجبتنى ممكن تقروهم وتستعيدوا معايا ذكريات التلات سنين تدوين دول

هناك 44 تعليقًا:

مي يقول...

يارب تنجح ياتتح واكون اول تعليق

غير معرف يقول...

:) حلو جدا موضوع استعادة الذكريات و خصوصا منخلال اللي كتبته واللى اتكتب لك ..
مرة قعدت اقرا كل اللى فات و حسيت انى فى رحلة احيانا معرفتش نفسى و احيانا لقيتنى اقل من المتوقع
احيانا ضحكت و احيانا سكتت .. بس في لأغلب و اللى دام.. إني بجد حبيت اللي كان .. مهما كان
اتشرفت جدا باللى عرفتهم و اتعلمت اكيد كتيييييييييييييييير
الحاجة اللى نفسي فيها جداااا إن يكون في صورة تجمع كلللل اللي فات .. لكن ربما تجمعنا الكلمات..

كل سنة و مدونتك مثمرة يا بطوط
أنا أكتر حاجة مستحيل ان شاء الله انساها ابدااااااااااااااااااااااا ليك هي جملة تتردد بلا توقف "الحكاية عاوزة قلب موصول بربنا"ربنا يجزيك كللللللل خير

طولت انا معلشش :D

مي يقول...

كل سنة وانت طيب يابطوط ومدونتك معانا حاجة جميلة فى حياتنا
بس ايه ده هههههههههههههه حلو بلف الشقة جالى كومنت يا جماعة
كلنا مرينا بالمرحلة دى بس انا شايفة اننا بعد مابنوصل للنجاح فى عدد الكومنتات بتيجى مرحلة الابداع انت ذات نفسك مش بتروح تعلق الا على الموضوع اللى يستحق وبتخلص فترة المجاملات وهما كمان مش مستنين ترد الزيارة لانهم عايزين يقرولك ويناقشوك
انت بجد شخص جميل جداااا ولنا الحق اننا نتشرف بيك وبقلمك الذى يستحق كل الاحترا

كل سنة واحنا كلنا طيبين معاك(:
سلالالاموز يا بطوطى

Che يقول...

اول زياره ليا و مش هتكون الاخيره ان شاء الله
عجبنى البوست أوى و فكرتنى بأيام التدوين الاولى ... مع انى مش فاكر انا اول تعليق جالى ازاى
ملحوظه على جنب .. تخيل انى شفت ليك تعليقات كتير عند ناس كتير بزورهم بس النصيب وحده خلانى شفت تعليقك عند حد انا مش فاكر هو مين قلت لازم ازورك لأنى مأجل الزياره دى من زمان

sarah sobhi يقول...

happy blogging day :) keep going

sasatifa يقول...

الف مبروك انت قربت على ال3 سنين ؟؟ازاى؟انا قعدت سنة ويبت التدوين كله ......المهم انك فكرتنى بنفسى والله ولما اكتشفت انى لازم اعلق للناس التانية بقيت كاتب تعليق واحد اخد كوبى وبست فى كل المدونات هههههههههههه

ـ-ـ- أحمد عبد العدل-ـ-ـ يقول...

ياراجل بقى على الفيس بوك على شفا مش عارف ايه كده و هنا بتحتفل بمرور 3 سنوات ،،، ايه اللخبطة دى بقى
حبيبى عقبال 300 سنة تدوين :)) و يكونوا كلهم خير و إبداع و نشاط فى طاعة الله
كمان 3 سنين إن شاء الله تكون حققت نجاح أكبر فى التدوين و كمان حققت اللى اتكلمت عنه فى البوست ( قضية بجد مش كدهو ) فى شغلك و نسمع عن دكتور بطوط حبوب و نجاحاته إن شاء الله

افتكرت النهاردة( شفا ) اللى فى الاستيتس و ربطها بشغلك الحقيقة ،،، دايماً بتكون على (شفا) بنى آدم ههههه

ملاحظة فى محلها تمام موضوع الانتشار و علاقته بالكومنتات ،،، ربنا يكتب لك كل الخير

و كل 3 سنوات و بطوط حبوب بكل خير و سعادة

بطوط حبوب يقول...

مي
مبروك يافندم الاول ... هاتى بقى خمسه جنيه وانا اخليكى كل مره الاول بيس؟

كل سنه وانتى طيبه يا مى رغم انه لسه فاضل كام يوم على عيد المدونه
وكويس انى عرفت افكركم بالايام دى
انا دلوقتى مش بعلق عند كتير بس دا مش معناه ان التدوينه معجبتنيش دا ممكن يكون عشان مش هعرف اعلق على الموضوع بس

كل سنه وانتى طيبه وجميله يا مى هانم

****************************************************************
بنت المسلمين

انا برضه بلف اليومين دول فى الرحله دى
تعليقك فيها كل كلمه انا عاوز اقولها
ومش فاكر الجمله دى قلتلهاك فين
بس الحكايه طبعا عاوزه قلب موصول بربنا
نورتينى يا فندم
****************************************************************
Che
انا اللى اتشرفت بمعرفتك والله يا عموررررررر
ويارب متكنش اخر مره

****************************************************************
sarah sobhi
happy blogging day :)
يا فندم :D
****************************************************************
sasatifa
ههههههههههههههههههه
نفسى ادون بانتظام بس مبعرفش
الظروف بتكون اقوى والوقت مش ملكنا

كل سنه وانتى طيبه ومنورانى دايما

****************************************************************
ـ-ـ- أحمد عبد العدل-ـ-ـ
يا دكتور بحمد الله انا كائن صعب يكتئب اكتر من 24 ساعه
ربنا يكرمك يارب وبج شرفتنى بالزياره
وكل سنه وانت طيب

pinky يقول...

:) nice ya batoot
waiting ur next blog

عصفور طل من الشباك يقول...

رأيي إن إنت لازم تشوف حل وتكتب أدب ساخر لأنك مشكلة

عصفور طل من الشباك يقول...

ولأني قارئة قديمة وزميلة من أيام البلوج القديم فبأقول لسيادتك

كل سنة وسعادتك مدون متميز

واحدة مفروسة يقول...

كل سنة و انت طيب يا بطبط و عقبال 100 سنة
كل سنى و انت فى وسطينا مبطبط
هههههههههههههه
انا بقا اول بوست ليا فضلت عاملة زيك كده
و بعدين اول لما جالى كومنت جريت و رديت عليه
هههههههه كأنى كنت واقفة على باب المدونة مستنية زائر

لاقيت واحدةة صحبتى شارت عليا
قالتلى يا مفروسة اتقلى ما ترديش على التعليق على طول لا يقولوا عليكي مش لاقييه تعليق لا سمح الله و انك ما صدقتي

قلت اعمل بنصيحتها
و جالى تعليق و انا حاطاه قدامي و حموت و ارد عليه بس ماسكة نفسي بالعافيه
و رابطة ايديا الاتنين خوفا من انى اضعف و ارد بسرعة
و بعيد عنك فضلت على الحال ده يومين عنيا مبحلقة فى الشاشة و بدعي يارب التاني بقا و اصلى و ادعي
هههههههههههههههه
الى ان جاء التعليق التاني
ههههههههههههههه
و اتفكت زنقتي و رديت
و من يومها قلت ابدا لن اعملها مرة اخري
اللى حيعلق حرد عليه
و مرت الاياااااام و كبرت و أنتخت و اتغريت
ههههههههههههههههه
و بقيت دلوقتي مش برد على تعليقات اصلا خااالص
ما تفهمنيش غلط
مش غرور لأ
بس كسل بعيد عنك
هههههههههههههههه
و الله فكرتني با بطوط كانت ايام جميلة

لولا وزهراء يقول...

كل لحظه وانت والمدونه بخير يا دكتور
عجبتنى اوى جملة ان عدد التعليقات دليل على الانتشار مش دليبل ان البوست متميز
على فكره يا بطوط ان الناس اللى بتدخل تعلق لو البوس مش عجبها هترجع تانى لحال سبيلها يعنى ممكن برضه عدد الكومنتات يكون دليل على الموهبه

ان شاء الله متابعه لك باستمرار
ربنا يوفقك فى كل خطوه من خطوات حياتك العلميه والشخصيه والعلميه

زهراء

صيدلانيه طالعه نازله يقول...

نهاااااااااااااارك ازرق و مالوش ملامح بقى اكتشفت انك صعييدى قوى
و مالهم الصعايده بقى على الصبح
انا بقى من هذه المنصه ادعو كل المدونين و المدونات الصعيدين منهم و الصعيديات الى ثوره بالحجاره عليك و على المدونه و اشوف انا بقى مين فينا اللى صعيدى
هههههههههههههههه
اه بالحق كل سنه و انت طيب
و ابقى ورينى حتخرج ازاى من باب المدونه بقى

ست البيت يقول...

كل عام ومدونتك بخير يا بطوط
بجد مدونة حلوة

Wael يقول...

D:

عقبال 100 سنة ان شاء الله

مش مجاملة ولا اثبات حضور , بس بجد تدوينة خفيفة وصريحة وجميلة جدا

( ايموشن بيمصمص على سنانه ) فكرتنى بالذى مضى , مع انى فقدت الاستمتاع بالتدوين الشخصى من فترة كبيرة , الا ان ذكريات اول كومنت دى لها متعة خاصة ومش هاتتنسى ابدا

افتكر انى فى اول رحلتى كنت باغوص فى القاع وابحث من موقع البلوجر نفسه فقط عن المدونات المبتدئة ذات البوست الواحد واعلق عندهم , على سبيل التشجيع يعنى ولانى كمان مبتدأ ومحتاج حد يقيمنى يكون من نفس مستوايا , ولانى فعلا كنت عارف ان فيه ملايين المدونات المحترمة جدا بس مغمورة جدا ببساطة لان صاحبها مش متفاعل او مش عنده وقت فاضى . بس طبعا كانوا بينقرضوا مع الوقت وانا كنت بانسى اروح تانى اعلق من كتر عددهم .

بس بجد انت واحد من اشد المدونين صراحة وشجاعه تدوينية انا احسدك عليها , ومسيرى يوم اخلع ضرسى عندك , ببلاش طبعا

A.SAMIR يقول...

بجد كلام جميييييييييييل
اولا الف مبروك ع التدوين
ثانية:
انت مسيت وتر مهم جدا و هو وتر التعليقات اللي قلتها فعلا بتؤثر في البني ادم و تشككه في جدوى وجود المدونة
الا انها فعلا تعكس الانتسار و لا تعكس الابداع
و تعكس ايضا كسل القراء اللي ممكن تلاقيهم اكثر من 150 مثلا في يوم و تلاقي تعليق واحد او اتنين
حاجة ساعتها بتفرس فعلا
ربنا يوفقك و كل سنة و انت طيب
تحياتي

BISHR2038 يقول...

مبروك يا سيدي
بس أنا رأيي إن اللي بيقرأوا المدونات في مصر قليلين وإن المدونين أكتر منهم أصلا...كمان مش أي قارئ بيقرأ لأي مدونة وخلاص,لأ ده بيختار المدونة اللي عاملها واحدة بنت في المقام الأول وبعد كده اللي عاملها ولد,,,بيختار المدونة الساخرة وأحيانا الساخرة ببذاءة في المقام الأول وبعد كده مدونات الأفلام والداونلود وبعد كده الاجتماعية والشخصية,,,وهكذا
وكمان المدون اللي له أصحاب كتير مدونين يعرفوه شخصيا علي الحقيقة بيبقي موضوع الكومنتات مافيهوش مشكلة عنده,,,بالعكس ده بيلاقي آراء كتيرة من كذا شخص وكذا طريقة في التفكير بكل سهولة...الفايس بوك ونشر المدونات في المجتمعات علي الانترنت ومحركات البحث بيسرع بولادة أول كومنت برده...لكن الأهم هو استمرارية الإبداع وتقدمه سواء جه الكومنت أو ماجاش.
Muhammad Mag-D Bishr

saragebaly يقول...

جميلة مدونتك جدا واسلوبك الكتابي

حلوة حكاية البحث عن كومنت

بتفكرني بنفسي اول ماعملت المدونة

جاتلي حالة احباط حااااد

لحد برضو ما ربنا كرمني بواحدة وعرفتني اني لازم اعلق عند الناس علشان يعرفوني

بس بصراحة مكنتش حابة كدة

لاني مش بعلق الا على الموضوع الي يعجبني ويشدني جدا


معلش طولت عليك

كل عام وانت بخير

سارة

الجواز و سنينه يقول...

يااااااااااااه الف مبروك
انا ببارك لروحى علشان عرفت اوصل لمكان التعليقات
مش عايزه اقولك لفيت اد ايه علشان اوصل
و لا فرحه وصول اول تعليق ليك
بطوط انت اسلوبك تحفه و بجد مش من الناس اللى يتزهق من كلامها
يعنى فيه ناس من اول سطرين كده تلاقى الواحد زهق بس انت ماشاء الله عليك
على فكره انا كنت داخله اقولك يارب تنجح يا تتح
غريبه انى لقيت مى سرقها منى بس رد بيها قبلى
تفتكر الموضوع بتاعك بيجيب الكلمه دى فى الدماغ و لا ايه ؟
انا كمان كنت صعيديه بس ده بجد
و قعدت مستنيه و يااه على فرحه اول تعليق
ما اقولكش
يلا كل سنه و انت مدون كبير و عقبال مليون سنه تدوين

بطوط حبوب يقول...

pinky
دعواتك يا بنكش هانم :D
****************************************************************
عصفور طل من الشباك
روبى :) اهلا بيكى ومنورانى دايما يارب
وكل سنه وانتى طيبه ومشرقه يارب

موضوع انى اكتب بقه ادب ساخر بجد دى عاوزه قراء فدائيين زيك يستحملوا رغيي
تفتكرى هم كتير :D
****************************************************************
واحدة مفروسة
وانتى طيبه وبالخير يااااااارب
ههههههههههههههههههههههه
انا مكنتش بقدر امسك نفسى
اللى بيعلق بيلاقينى فى قفاه
هو احنا كل يوم هيجلنا من دا :D
بس دلوقتى فعلا الواحد بيكسل اوى
خلاص بقى الواحد بقى عضمه كبيره :))
منورانى دايما يارب
****************************************************************
لولا وزهراء
كل سنه وانتوا طيبين يارب واصحاب اكتر واكتر

هو كلامك فيه كتير من المنطقيه بس دا لو شلنا عامل ان فى ناس بتعلق عندك فقط لمجرد انك تعلقى عندهم .. ودول مش بيهمهم جوده البوست ولا ابداع صاحبه
ربنا يوفقكم يارب
****************************************************************
صيدلانيه طالعه نازله
يا فندم مش مقصوده والله
ثم انا بتكلم عن الصعايده مش الصعيديات :)

طب اجى شايل كفنى ولا اعمل ايه عاوز اخرج من المدونه شويه وارجع
:-S
العفو والسماح يا اهل السماح
****************************************************************
ست البيت
وانتى طيبه يا منوسى هانم
****************************************************************
Wael

كل سنه وانت طيب يا وائل يارب
وبجد والله انت واحد من اكتر الناس اللى انا مدين ليهم هنا بكتير اوى
لو للبوست جزء تانى لازم طبعا سيرتك هتيجى :D

ويا فندم ليك عندى خلع الفك كله ببلاش مش ضرس بس :))

****************************************************************
A.SAMIR
وانت طيب يا دكتور
هو الحل اللى انا وصلت له انى افرح لما يجيلى كومنت كويس ولو مجاش احاول مزعلش لانها فعلا بتعكس انى مش منتشر اوى فى الفتره اللى فاتت مش اكتر

تحياى لك وبالتوفيق يارب
وكل سنه وانت طيب وسعيد دايما

****************************************************************
BISHR2038
متفق معاك فى جزء
بس حكايه ان الاصدقاء بيعلقوا عند بعض برضه بشرط انك تعلق عندهم
لانهم بينشغلوا بانهم يردوا على اللى بيعلقوا عندهم ودا بيخليهم يأجلوك شويه اوينسوك
تحياتى لك وكل سنه وانت طيب

هو سؤال هو ليه صوره البروفيل بتاعك بنت؟

****************************************************************
saragebaly

نورتينى ياساره
كلنا بنمر بالمرحله دى وعشان كده انا قلت اكتب عنها :D
انا شخصيا كنت بعلق على كل المدونات فى الاول ان شالل يكتبوا ريان يا فجل مكنش عندى مبدأ زيك
D:
كل سنه وانتى طيبه
****************************************************************
الجواز و سنينه

الله يبارك فيكى وكل سنه وانتى طيبه

وربنا يخليكى يارب على كلامتك ومجاملاتك الرقيقه
بجد اخجلتم تواضعنا

واهلا بيكى فى ناس لقد كنت صعيديا :D
تحياتى لك

Ma 3lina يقول...

تعيش و تفتكر :))
فكرتنى بايام زمان لما كان الواحد بيقعد يعد الردود و يشوف انهى بوست جاب اكتر ههههههه

كل 3 سنين و انت طيب و عقبال ال 10 سنين اللى جايين ان شاء الله

marwa mahdy يقول...

ra3m en mo3zam 2w ta2reban kol ele 3amleen comments modwneen ya3ne 3asho tagrobtk we 2na da5la fe el nos keda bs 2ked gmhork el 2sase hwa 3amet el sha3b we 3lshaan keda 2olt 25osh 2a2olk rabena yekrmk we tefdl temt3na begaad ,we 3omre ma hansa post (2rgok la tash3or bel 5agl),kont 2wel mara 2d5ol modwana we kont ba2rah we ba3yet begad dmo3 we keda we enta bet2ol لكن هذه المره صمتك يشعرنى بخجل اكبر ,

Helium Atom يقول...

3aref ya btoot?... men kotr ma bastamta3 bi el blogs bta3tak wi bakkon mabsoota wana bakra2aha, 5soosa el marra di, fakkart enni atgawez wa7ed yesale7ni bi blog

:)

kol sana wenta mn agmal el bloggers

bass ana z3elt ennak mosh 7akeet ad eh as7abak el fi el 360 kan z3laneen ennak 3azelt hena wi sebt hnak :(

wi kman enta leh mosh etkalemt 3la el bloggers elli kanu fi el 360, wi el comments bta3thum!?

Best of luck

Helium

ستيته حسب الله الحمش يقول...

هي التعليقات لما ما تفتحش فاكره انها تزلني؟
فشرت وخسئت ها اعلق يعني ها اعلق
وانت بتتكلم عن الإنتشار فكرتني بالفنانات اللوزعيات بقى
ولازم انتشر الأول يا كماحة وبعدين اختار
بس بوست تحفة وما شاء الله عليك دمك شربات ربنا يبارك فيك

dodoo يقول...

بجد ما شاء الله دمك خفيف جدااااااااا
و بعدين انت بجد كنت محظوظ فعلا ان ناس كبار زي دول يعلقوا عندك اكيد تعليقهم بكتير من تعليقات غيرهم
و فكرتنى انى كمان محظوظه اولا لانى اول ما بدات تدوين لقيت اللي يعملي دعاية علشان الكومنتات ( لانها برده كانت بتفرق معايا ) و هما طبعا اخواتى نهى و محاسن صابر
ثانيا محظوظه لانى عرفت مدونتك و بقرالك بوستات في قمة الجمال زي دي

مع تحياتي و تمنياتى بالتوفيق و النجاح دائما

BISHR2038 يقول...

دي مغنية,,,من سني وانا من سنها وبحبها بس حب من طرف واحد :D
أنا حاطط صورتها عشان بحبها وعشان هي الوحيدة اللي دايما مبتسمة في وشي دونا عن أي واحد أو واحدة عرفتهم في البلد دي...طولت في كلامي كالعادة معلش :D

karim elaraby يقول...

كل سنه وانت طيب يا بطووووووووووط
وانت عارف ان طريقتك بتعجبني يا برنس
وكفايه اوي ان انا اقولك طريقتك بتعجبني سيبك بقي من مروه والناس دي

enjy يقول...

يللا يا عم كل سنة وانت طيييييييييييييييييب

moro_wbs يقول...

اتفق معك جدا في نقطة ان عدد الردود لا يدل على الابداع ...

احيي تجربتك ...

ومبروك اول كومنت ..

ودا يدل انه مدونة من بدايتها تستحق القراءة والاحترام ..

مبروك ....

تحياتي .. وكل سنة وانت طيب :)

Lady E يقول...

يمكن اول مرة اكتب كومنت بس قرأت بوستات في المدونة قبل كده وفعلا كتاباتك جميلة

رحلة البحث عن كومنت دي مشكلة

كلنا في بداية التدوين بيفرق معانا اوي التعليقات ويا سلام كمان لما تلاقي حد ضاف مدونتك عنده في الفيفوريت

كل سنة وانت ومدونتك طيبين

Lady E يقول...

على فكرة انا كمان دورت كتير على صفحة التعليقات وأخيرا وجدتوها :)

نهــــــــــار يقول...

السلام عليكم..
مبارك الثلاث سنين يادكتور بطوط حبوب عشان اللخبطه ...
,....
بس ذكرياتك جميله ..
وأسلوبك اجمل .,,
...
...
في أمان الله

سفروته صغنتوته يقول...

يا راااااجل حراااااام عليك :(
انا توهت عقبال ما لقيت اكتب رد ازااااااااى... يقطع التكنولوجيا وسنينها :)
المهم بقى يا دكتره الف مبروووك على النيولوك الجديد للمدونه (مش عارفه بصراحه انت عاملو من امتى بس قولت ابارك وخلاص . اصل احنا الشعب المصرى كده نحب نبارك ونجامل )
ثانيا كل سنه وانت طيب ومدون وحبوووووووووب كمان وعقبال 300000سنه يكون احفاد احفادك بطابيط صغيرين بردو وبيكملو مشوار البطوط الكبيييير
وملكش دعوه بالعايده (عاوز تقول ان مخهم مجفل يعنى .... (انا بهدى النفوس بس :)
المهم طبعا مبسوطه انى عرفت حضرتك وعرفت المدونه دى اوووووووووووى وطبعا مش محتاج مدح فى اسلوبك سواء الساخر او العاطفى او الجاد او اى حاجه بقى كلو شغاااااااااااال فل
ويا رب كده فى تقدم دائما سواء بطوط او دكتور محمود :)

Sonnet يقول...

تدوينة لطيفة
و ذكريات تدوينية هامة
و هذا اقرار منا بذلك
دمت بخير

mohamed ghalia يقول...

وانا بقولك يابطوط بمناسبة ال3سنين انت تبطل تدوين وتريحنا ههههههههههههههههه
كل سنة ومدونتك طيبة

همسات دافئه يقول...

:)
طب ياسيدي كل سنه وانت طيب والثلاث سنين اللى جايين يكونوا أحلي من اللى فاتوا
العمر بيجري يابني
وعادي يعني كلنا عملنا كده مع أول تعليق
يارب يكتر تعليقاتك مع اني بقرأ على طول من غير ما أعلق

ميرام يقول...

كل سنة والمدونةطيبة وانت بطوط
(:
فكرتني باول تعليقات
(:
بس انا مخدتش وقت طويل في الاستيعاب
(:
تحيتي

بطوط حبوب يقول...

Ma 3lina

انتى طيبه يارب وعقبال السنه الجايه ونكون اصدقاء تدوين برضه
****************************************************************
marwa mahdy

يا فندم انا بنتظر تعليقك كل مره .. كل سنه وانتى طيبه .. والسنه الجايه تكونى حققتى احلامك يارب
****************************************************************
Helium Atom

اتجوزى انتى بس يا هيليوم وموضوع الصلح دا متخافيش عليه اكيد هيتصرف :D

كل سنه وانتى جميله زى ما انتى يا فندم
وانا مجبتش سيره ال 360 هنا بس لو كملت البوستات الجايه هجيب سيرته اكيد
لو مكسلتش
نورتينى يا فندم
****************************************************************
ستيته حسب الله الحمش

عاوز افهم ليه التعليقات مفتحتش معاكى يا دكتوره؟

اه اول فتره لازم اغراء بعد كده تيجى التمثيل الجاد
:P :P :P :P

نورتينى
****************************************************************
dodoo

اشكرك يا فندم على كلامك الرقيق دا
ويارب تكونى من اصدقاء المدونه على طول
تحياتى لك
****************************************************************
BISHR2038

مش عارف مش مقتنع ان ولد يحط صوره بنت فى البورفيل وخصوصا انها بتغلبط
على كل الاحوال كل واحد حر
:D
****************************************************************
karim elaraby

وانا بموت فيك يا كيمو :D
نورتنى يا مان
****************************************************************
enjy

وانتى طيبه وبالهنا
****************************************************************
moro_wbs

ميرسى على ذوقك وبجد نويتنى
كل سنه وانت طيب
****************************************************************
Lady E
انا محظوظ انك شرفتى مدونتى
هو صفحه التعليقات فيها مشكله ولا ايه؟

عموما كل سنه وانتى طيبه يارب

****************************************************************
نهــــــــــار
الله يبارك فيكى وكل سنه وانتى طيبه
وميرسى على كلامك الرقيق
****************************************************************
سفروته صغنتوته

حمد لله على السلامه الحمد لله وصلتى

كل سنه وانتى طيبه وتيجى تقرى كده انتى والسفاريت الصغنين لبطابيطى الصغيرين :P

وبجد شكرا على كلامك الجميل والرقيق دا
ربنا يخليكى ليا يا فندم يارب
****************************************************************
Sonnet


ميرسى جدا
****************************************************************

mohamed ghalia

انا فعلا بفكر فى كده دا بعيدا عن التهريج
****************************************************************
همسات دافئه

كل سنه وانتى طيبه يا فندم
انا بس قلت افتكر معاكم رحله اول كومنت مش اكتر
دمتى بود
****************************************************************
ميرام
كل سنه وانتى طيبه
بس شكلك شطوره وفهمتى بسرعه البلوج سبوت انا شخصيا اخد وقت
:D
تحياتى

لماضة يقول...

بصراحه ان كان على اشرف ولا مروة
فليك حق يا بطوط تفرح وتهيص
لانهم الاتنين من اجمل الناس الي اعرفهم
كل سنه وانت طيب يا بطبط

مهندس مصري يقول...

انا قاري البوست ده من زمان و كنت فاكر نفسي علقت
مش مشكلة نعلق تاني
فكرتني بالذي مضى و ذكريات اول بوست و اول تعليق
بس انا بقى كنت مختلف شوية
لإني كنت بأتابع المدونات قبل ما أعمل مدونتي بحوالي شهر و نص فكنت عارف أهمية التعليقات
و إن كنت ما علقتش غير على الموضوعات اللي عجبتني بس
بس فعلاً وقتها علقت عند ناس كتير قوي
لكن دلوقت الواحد إنشغل و مبقاش فاضي يعلق عند كل الناس لإنه بقى بيتابع مدونات كتير
فبأقرأ من سكات و مش بأعلق غير على الموضوع اللي يشدني زي موضوعك ده
:)

šσяšαяαα يقول...

دينتيست بطوط

اسعدنى مرورى لمدونتك المبطبطة واتمنى لك أعواما عديدة مديدة فى عالم التدوين

بس هو دا عين الشغل..امال تعلن ازاى عن مدونتك..هو دا بقى التسويق والدعاية والكلام اللى اتهرينا منه فى الكلية

وارمى كروت فى كل حتة..ماهو اللى بيرمى فيوم..بيجمع تانى يوم..وبيحصد تالت يوم:)

وبالتوفيق دائما..وعقبال ماتفتح العيادة البطوطية قريبا بإذن الله

šσяšαяαα يقول...

دينتيست بطوط

اسعدنى مرورى لمدونتك المبطبطة واتمنى لك أعواما عديدة مديدة فى عالم التدوين

بس هو دا عين الشغل..امال تعلن ازاى عن مدونتك..هو دا بقى التسويق والدعاية والكلام اللى اتهرينا منه فى الكلية

وارمى كروت فى كل حتة..ماهو اللى بيرمى فيوم..بيجمع تانى يوم..وبيحصد تالت يوم:)

وبالتوفيق دائما..وعقبال ماتفتح العيادة البطوطية قريبا بإذن الله

وصف الاحساس يقول...

والله انا كنت بدور علي حاجه في جوجل مش فاكره كانت ايه وطلعلي البوست ده
فكرتني باول ما بدات اكتب فضلت اكتب اكتر من شهر ومحدش عبرني وﻻ انا كنت بسال كان ال يهمني اني اكتب حتي لو محدش يقرا لحد ما يوم رديت في مدونه وجه حد من مدونه تانيه كتبلي تعليق فرحت اوي وكتبت اكتر وزرت كذا مدونه مره ارد ومره لا بس ما اهتمتش بالتعليقات ساعات اكتر من اني اكتب حتي لو محدش يقررا وكفايه اوي 3 تعليقات ارد عليهم ويا دار ما دخلك شر
هههههه البوست بتاعك داخل في سنه بس انا مش بتفرق حتي لو مش هتقرا كلامي او ترد عليه
تحياتي