2008/08/03

وصله النت


دخلت مدونتى النهارده وانا فى نيتى حاجه من اتنين


إما هقولكم انى هقفل المدونه لفتره لانى حاسس بجفاف فى قناه الافكار


وإما انى اكتب


بس من مكانى هذا بشكر الراجل صاحب محل النت كافيه الى احنا موصلين من عنده وصله النت


لانه لازم وحتما ولابد اى حد موصل من عند الراجل ده ... يلاقى افكار وافكار وافكار


بصوا انا هكلمكم عنه .... وهوه متجوز على فكره احسن حد يطمع فيه ويلطشه ... واحنا الصراحه منقدرش نستغنى عنه


امال ايه؟؟ ... دا احنا بنحبه حب وبندعي عليه دعا .. قصدى بندعيله... بلاش توقعونا فى الغلط


الراجل ده انا بقيت بحقد عليه بجد


لان بيكسب مكاسب هائله مبالغ فيها جداااااااا


مشروع كسبان مليون فى الميه


واحسبوا معايا من باب الحسد يعنى


بصوا هو موصل لـيجى بتاع 20 بيت ماشى؟؟


اضربوهم فى متوسط عدد كل بيت 4 ماشى؟؟


متوسط كل واحد مخصص له - الراجل -نص ساعه


دا بالميت


بيقى النتيجه 20 فى 4 فى نص ساعه فى 30 يوم فى الشهر


يطلع المجموع 1200ساعه


ما بين شتيمه .. ودعا .. وسب .. وقذف


حولوا دول بالحسنات له .. يطلع مشروع مربح مليون فى الميه


سامع حد لئيم هنا.... بيقول زى محمد اخويا


يعنى هو يغلس ويرخم على مخاليق ربنا ولما نقول غلس ورخم ياخد حسناتنا


يعم مش هياخد حاجه دا راجل ابن ستين تييييييييييييييييييت


دا ناقص بقى بعد كل الى بعمله ده انه ياخد من حسناتنا كمان


*****************************************

الحكايه بكل بساطه ان الراجل من اهم شعار عنده ان ( اخر حاجه راحه الزبون ) ولا يكتفى بهذا بل ويزيد ( زبون ايه الى هنقرف نفسنا بيه ) ما الزباين على قفا من يشيل


اولا ودى شهاده حق .... الراجل وهو بيكلمك فعلا ذوق ويفضل يتكلم معايا بكل ادب .... لدرجه انى بحس انى فعلا غلطان ....و ان راجل بالادب ده عمره ما يعمل الى انا جاى اتخانق بسببه


بصوا هحكيلم من الاول


انا رحت قلت للراجل ده انا عايز اوصل وصله من عندك ... اوك؟؟


قالى والله يا دكتور صعب ... وانا مش بوصل لحد ... بس هوصلك انت خدمه كدا.. بس متقولش لحد ..( على اعتبار ان امه لا اله الا الله كلها مش هتشوف السلك خارج من المحل )


المهم قلتله اوك


قالى وكمان متعملش دون لود طول ما انا فاتح ... اعمل بليل انت حر لحد الصبح


قلتله اوك

قالى كمان متعملش دون لود لاكتر من 5 جيجا فى الشهر.. والنت اصلا سريع الخط بتاعى واحد ميجا ( خلو بالكم من دى)


قلتله كويسين شغال


قالى خلاص هات سلكك وحواراتك ووصل


لحد كده تومام


المهم شهر ... شهرين... تلاته وبقينا يجى 20واحد دا فى اقل تقدير


والخط نزل ل512 ... المهم هو مصمم لحد دلوقتى انه لسه ميجا


وبدأت الحرب والمكيده ... كل الناس بتستخدم النت كت ... وبرامج تانيه . .. وبما ان الدون لود بليل بس ... فالحرب تبدأ كل يوم الساعه12


ونفضل نقطع على بعض .. والى يكسب بقى


الصبح لو اى حد فى 20 سولت له نفسه انه يدون لود ايه الى بيحصل بقى؟؟


الراجل بمنتهى الهدوء ينزل يشيل كل السلوك... لحد ما السلك والله باظ وبقى يعلق لوحده


اقوم انزله يا عم فصلت النت ليه


يقولى حد بيعمل دون لود


اقوله طب بتفصل ع الكل ليه؟؟


يقولى وانا اعمل ايه ؟؟


طب شغله ... يقوم مشغله ... عشر دقايق ويفصله


يا عم انت والله ما بعمل دون لود


يقولى عارف يا دكتور بس لازم عشان محدش يقول حاجه


يقول ايه يا عم وصل النت مش فاضيلك


مره نزلت لقيت ابنه ... بقوله فاصل النت ليه ؟؟


قالى اصل بلعب لعبه اون لاين عايزه سرعه


كنت هولع فيه يومها بجد


يوم نتيجه الثانويه ... مش معترض انه يفصل النت .. انما معترض انه فصله من الساعه 7


دلوقتى بقى لسته الشروط بتاعته


ممنوع دون لود الصبح


الروتر يستريح ليله كامله كل اسببوع


مواعيد فتح المحل من 8 الصبح ( والله بجد) لحد 12بليل


الى هيدون لود فيهم هيقطع رقبته


النت سرعته 512وهفضل اقول انه ميجا وان كان عاجبكم


دلوقتى كمان بقى يستخدم النت كت


شفت محل فى الدنيا يفصل بنت كت عن زباينه؟؟


نزلت قلتله انت فاصل النت بنت كات ( انا عندى برامج تعرف الكفت) قالى اه


قلتله ما انا هفصل عنك انا راخر


قالى هقوم شايل السلك بتاعك


تنحت له وقلتله طب شغل النت ربنا يهديك


فى الاخر انا وصلت لشعار الراجل ده ممكن يحطه على باب المحل


هنا محل ****** لتوصيل النت شرك للبيوت


والمثل بيقول يغور الشرك ولو فى العشا



هناك 36 تعليقًا:

مواطن مصرى نايم يقول...

محمود انت مؤدب و الله
مش حقول اكتر من انى ممكن اساس اخلية يدخل بيتة بعد كده بإذن و كمان يدفع لى فلوس عشان انا موصل عنده

و الله العظيم لو الراجل البطيخة بتاع النت ده هو اللى انا موصل من عنده

كانت ليلة ام ام بت خالت ام اللى جابت بت عمتة اساس ليلة من غير داونلود

اجى اظبط لك الراجل ده و الا ايه
شوف كام واحد جنبك اربعة مثلا و اشتركوا فى واحده 256 حتبقى جميلة جدا و سريعة و ارخص من بتاعتة

تحياتى يا باشا
اسلام

فاتيما يقول...

يا محمود يا ضنايا دنت صعبت عليا قوى
بقى كل العذاب دا و لا إحنا حاسين
بص أنا هحسبنلك على الراجل دا
لأن الواحد بياخد فلوس نظير أداء خدمة
ييعملها بذمة
ييقولك أسف مقدرش روح لحد غيرى
طب مفيش حد غيره يا محمود ؟؟
عشان ترتاح من وجع القلب دا
معلشى ربنا يهديه بقى
و روق كدا إحنا يهمنا صحتك
و بعدين مجتش ليه يا بطوط التبرع ؟؟
يا واد يا بطوط كان نفسى أشوفك
معلشى المرة الجاية بقى
تحياتى يا حبوب

سمر الشافعى يقول...

ايه دا يعنى مش انا لوحدى اللى عايشه فالعذاب دا طب خد عندك الراجل اللى احنا موصلين من عنده كل اول شهر يروح فاصله اد خمس او ست ايام كدا عشان يلم الفلوس ولما تقوله يرد بكل بجاحه يقول من الشركه غير بقى النت كت والحركات اللى انت عارفها ولما ربنا بينفخ فى صورته ويوصل بيعد واحده ويأوت عشره بيمشى ولا السلحفه المفستكه ولازم نستحمل ونسكت لانه جارنا بس بياخد شتييييمه تودى فداهيه بصراحه

الله يكون فى عونك وعونى وبلاش حكايه جفاف الافكار دى هوا الجفاف ورايا وراياولا ايه

رئـــــيسـة حزب الأحلام يقول...

ياة دانت شايل وساكت يابنى
بجد دة اللى بيحصل عندنا بردة شرك
ربنا يكفينا شر الحاجة الشرك
تحياتى لك

RASHA يقول...

مش عارفة ااقولك ايه بس اللى بيحصل ده صعب اوى ربنا معاك

nigro يقول...

انت بموضوعك ده يا محمود اثرت مشكلة تؤرق الشباب من الجنسين
عارف يا محمود الراجل اللي عندنا بقى حاجة تانية خالص
يعني انا مثلاً حاسس بأدب شديد في أسلوب الحوار معاك
اللي عندنا بقى يا دكترة مقضّي بتاع 15 سنة في السجن
بلطجي يعني
المنطقة كلها ممنوع فيها أي حد يجيب خط خاص بيه من الشركة
يا إما توصل من عنده هو يا إما السيوف و السكاكين النص تطلع
النت يومياً لازم يفصله من ساعتين لتلاتة علشان يريّح الشبكة
شهر يغلّي الإشتراك و شهر يرخّصه و هو و مزاجه بقى و اللي يعترض سنته سودة
و تقريباً مشكلة الداونلود مشكلة مشتركة برده
يعني انا لو حاولت أعمل داونلود في وقت غير مسموحلي بيه فيه تلاقي النت كت اشتغل
و طبعاً الإحتيال بتغيير الـIP بيبقى هو الحل
مش بقولك مشكلة تؤرق الشباب من الجنسين


يلا سلام

غير معرف يقول...

يااااه احمدك يارب اخيرا لقيت حد زيى والله ننفس غلاسة صاحب النت عندنا بس هو بصراحة ما بيفصل السلك والنت كت بس المشتركين هم اللى بيعملوا نت كت
دكتور انت كدا طمنتنى على نفسى ههههههههه ولقيتحد مبسوط زى من النت والمشكلة انه ديما فاصل فى الاوقات الهامو نتيجةمثلا امتحان ع النت للكلية وبرضووو احنا بندعى عليه يوووووه قصدى بندعيله اوووووووى
هو ليه بجد معدش عنده اخلاص لعمله يعنى يشتغل مقابل اجره
عالعموم يا دكتور كل ظالم يوم
تمنياتى بالتوفيق

Mahmoud البطراوى يقول...

مواطن مصرى نايم

مشكلتى انى مؤدب
:)
انا بجد مبعرفش اتخانق ... اخرى انزل وازعق ( بصوت واطى)
وحكايه الاشتراك دى عمال ادور على ناس ولما يجى وقت الدفع لشرا روتر والحوارات دى كله بيخلع
مش عارف بقى ايه الحل

متعزل وتيجى تسكن جنبنا وتشوف الموضوع ده بنفسك؟؟

-----------------------------------

فاتيما
عارفه يا ام يوسف بجد الراجل ده انضف واحد فى الموجودين
الباقى اجارك الله كله بيشكى منهم بس اكتر منى بكتييييييييير
لنا الله

------------------------------------

سمر الشافعى

ربنا يكون فى عون مصر كلها
ههههههههههه
بس حوار الفصل بالخمس ست ايام ده الحمد لله مش عندنا

------------------------------

رئيسه حزب الاحلام

ههههههههههههه
شكلك دايقه من نفس الكاس
الحمد لله

------------------------------

shasha
صعب موووووووت
شكرا ليكى

-----------------------------
نيجرو

دا كده اراجل الى عندنا ملاك بجد
الحمد لله
وكان الله فى عونكم

Mahmoud البطراوى يقول...

نبع صافى

هو انتى ملكيش مدونه؟؟ عايز اعرفها اوى

وشكرا على كومتتك الى شد من ازرى
بس عايز اعرفك اكتر من خلال صفحتك

oRiGiNaL HeArT يقول...

لا ربنا معاكو بجد
بس انتو ممكن تقتلوه وترتاحو
ههههههههه
ايه الذل دة بجد !!
اشترك لوحدك من الشركة واعمل انت وجرانك القريبين جروب ومش هتكلفك كتير
احنا عاملين كدة عشان محدش يتحكم فينا

غير معرف يقول...

هههههههه

والله يا بطوط مأساة موضوع النت دا .. بس انا مش بعانى منها اوى لانى بطبيعتى مش بعمل download كتير

هههههه .. ربنا يكرمك

AHMED SAMIR يقول...

يا سيدي الفاضل 95 جنيه واشتري دماغك يا ريس
بلا سيبر بلا نيلة
انت سيبر نفسك
اتكل على الله...لا سيبر يهمك ولا حد غلس يقرفك
تحيااااتي

princess يقول...

حسبى الله ايه السخافة دى
ده راجل فظيع بجد ربنا يعينك
ان شاء الله لما تتخرج وتشتغل كده يبقى هات نت ليك لوحدك ولا الحوجة للناس دى:)
تحياتى

صيدلانيه طالعه نازله يقول...

طبعا موضوع الوصله انا اللى اوحتلك بيه
اعترف احسن لك بدل ما تعترف فى القسم
موضوع وصله النت ده مأساه
عندى فى اسيوط السنترال اللى احنا تبعه
مليان و مش بيقبلوا اشتراكات جديده
اضطرينا للوصله الباشا بيقفلها من 1 ظهرا الى 6 مساء مع نفسه كده و ساعات ينسى يشغلها مع نفسه كده و طز فى اللى مشغلينه و ان كان عاجبهم
و تكلمه يقوللك شغاله يا دكتوره و الله
و فى القاهره طبعا انا حكيت المأساه دى فى البلوج
حقول ايه منهم لله اللى كانوا السبب
فى ادمانى للنت

ست البنات يقول...

مقالة قوية وواقعية
بس للحظ اني مشتركة مع شركة كبيرة وبندفع دم قلبنا بس النت تمام 24 ساعة ومش بيقطع وجامد جدا
تعالى داونلود عندنا :)

خمسة فضفضة يقول...

السلام عليكم ورحمة الله وبركاته

واللهي فكرتني بايام ما كنت موصله من واحد من عينة اخينا ده ونظامه برضو راحة الزبون آخر حاجه من الاهتمامات

بس انا ريحت دماغي ودخلت خط ADSL صحيح ان السرعه اقل "256 " بس مريحه دماغي اايده وقت ما عوز واطفيه براحتي لا نت كت ولا ناس متقلة الخط بالدونلوود وآخر روقان


ممكن تدخل واحد انت وجيرانك مثلا 3 مع بعض وهايبقي برضو 30 جنيه في الشهر بنفس تمن الوصله واريح

سلام

سارة علي يقول...

ازيك يا محمود
واللهى احنا مريحين دماغنا من كل دة هيما اخويا اول ما طلع فى دماغة يدخل النور ااقصد النت ههههههههه بيتنا راح عمل اشتراك دى اس ال لوحدنا من السنترال وكدة بقى تبقى حر وسلطان زمانك لا تبقى موصلة من سيبر ولا مشترك مع حد يخنقك وتعمل دون لوود على مزاجك مفيش احسن من الحرية هههههههههه
صحيح انت اية ناوى تعزل من مدونتك ؟؟؟؟؟؟؟ اوعى تكون ناوية تقفلها طب وتلاقى مين يجى يعلق ويرخم عليك ؟؟؟؟
تحياتى

yas يقول...

اه فعلا بتوع النت كلهم مقرفين
احنا عندنا برضه علطول فاصل اخويا بطل ينزله من زمان كبر دماغه من الاخر اختى الكبيرة ممكن تنزله فى اليوم عشر مرات ولاحياة فى من تنادى ممكن يرجعه فى اليوم الخامس مثلا اما تكون خلاص فقدت الامل

غير معرف يقول...

وايه يا بني اللي يخليك تستحمل الغلب ده كله والسرقه عيني عينك

يعني انت مش قادر تلاقي اتنين كمان وتشتركوا وتجيبوا راوتر وتقسموا
الاشتراك بينكم ؟؟؟؟؟؟؟؟؟؟؟؟؟

حال الشعب المصري ده عجيب

وفي كمان اسوأ منه !!!!!!!!!!!

HeBa يقول...

ياعم أنت حظك من السما

أنا الراجل اللي عاملة عنده الوصلة كان ماشي تمام وكان اللي بيعمل نت كت بيفصله من عنده وبيفصله بس لما ما تدفعش في معادك

المهم من حوالي شهرين تقريبا الراجل باع الوصلة لواحد تاني مش ساكن في المنطقة من أصله

وبقت الوصلة زفت ومبعرفش افتح أي حاجة

لأن فيه ناس بتعمل نت كت وتحسب السرعة كلها

والراجل كل ما أكلمه يقول معلش أصبروا عليا ومش عارف ايه

أنا ناوية أسيب الوصلة أصلا وأشترك في TE Data وأجيب روتر وأبقى لوحدى

أنا دلوقتي بدفع 30 ولو عملت كده هدفع 55

ربنا يسهل لو ما صلحوش هعمل كده

Empress appy يقول...

هههههههههههههه
بطوط يا عينى عليك عاوز مساعدات خارجيه
طيب لما يحصل حاجه قولى وانا اتصرف
والنبى بطوط عربيتى اجدع هههههههههههههههه

مجلة علّي صوتك يقول...

ماتزعلش نفسك احنا نلملك فلوس وتشتغل الشغلانة دي
ماهو الزمن ده عاوز كدة

Mahmoud البطراوى يقول...

oRiGiNaL HeArT
جارى دراسه الموضوع
هههههههههههههههه

مهو المشكله فى هتكلفك اكتر دى
:)
--------------------------------------
Helium Atom

والله ولا انا بس الناس بتدون لود على دماغى
السرعه بتقل جدا لما بيدونى لود
--------------------------------------
A.SAMIR
دا الى ب 95 جنيه ده خط كام؟؟
--------------------------------------
princess
ههههههههههههه
ربنا يسهل
لسه هصبر لحد ما اشتغل
مهو اكيد هبقى فى شقتى بقى سعتها فى فى بيت العيله
--------------------------------------
صيدلانيه طالعه نازله

هى بوستاتك موحيه
بس انا كتبت ده قبلها :)
ربنا يسامح الى كان السبب
--------------------------------------
ست البنات
مفيش شركه كبيره عندنا
:)
--------------------------------------
خمسه فضفضه

وعليكم السلام ورحمه الله وبركاته

الفكره دى حلوه اوى وان شاء الله ادرسها
--------------------------------------
ساره على

والله يا ساره حاسس بجفاف كبير اوى فى افاكار معرفش ليه
مش هقفل المدونه
بس ممكن اسيبها فتره
ربنا يسهل
--------------------------------------
yasmine

مهو انا برضه خلاص قربت اكبر دماغى
:)
--------------------------------------
الفارس الملثم

ربنا يسهل ياااااااااارب
دعواتك
--------------------------------------
Heba

ايه حوار ال 55 جنيه ده
حلو اوى بس ازاى؟؟
--------------------------------------
appy

عارفه يا ابى كنت هاجى يوم خيخه بس عشان اشوف بطوطك
بس مفيش نصيب

ههههههههههههههههههه
--------------------------------------
على صوتك

وانا موافق :)

Princesa ... WHiSPeR يقول...

الراجل اللى عندنا بيعمل فيا كده :(
وحاسه بجد اني هغتاله قريب
لانه مش بيفصله غير وانا فعلا محتاجاه

ماعندكش فكره اقضي بيه عليها
اكهربه مثلا ولا احطله سم فران في السلك

Noha El-arabi يقول...

ههههههههههههههههه
ايه يا عم ده وزير الاتصالات و لا صاحب محل ده؟؟
اقولك خد وصلة من عندي
اي خدمة
و بعد ما توصل و كله تمام
انزل اقطع كل سلوك الراجل ده و بلغ عنه الضرايب

oRiGiNaL HeArT يقول...

جارى دراسه الموضوع
هههههههههههههههه




انى موضوع ؟!
هتقتلوه :o

Unknown يقول...

بلاش حسد الناس تعبانة و طبيعي كل واحد يدورله علي مشروع يكسب من وراه و يعينه علي الحياة الصعبة دي

عيله مفتريه سابقا يقول...

يابنى يا محمود انا كنت فاكره انى علقت هنا
مش عارفه كنت بحلم ولا تخاريف دى الله اعلم
ام هند انا صراحه عانيت معاناه من الناس بتوع الوصلات دول ، فقومت اخدت خطوة جريئه وعملت ليا دى اس ال خاص لوحدىىىىىىىىىى ، وريحت دماغى من تعب الاعصاب
بس الله يكون فى عونك يا حوده ..بس تقريبا كل بتوع الوصلات كده

المهم كنت سألتنى يا سيدى عن صورة نيجرو
انا عماله ادور بس نيجرو له الصراحه عندى فيديوهات
فهقولك حاجه
روح على صورة إيناس نهر الحب هتلاقى واحد بيشرب عصير جمبها
هو ده نيجرو
نياهااااااااااااااااا
روح بقى كبرها وشوف بتمعن

سلامى

محمد فاروق الشاذلى يقول...

ده الراجل ده يستحق تعمل مدونة ليه لوحده وأكيد مش هتصاب بجفاف فى قناة الأفكار أبداً لأن أكيد فى كل يوم مغامرة جديدة تحكى عنها.
أنا لو منك أفضل مشترك معاه بس علشان خاطر مغامراتك معاه دى مادة جامدة جداً لبوستات كتير أوى.
وإدعى ربنا إنه يفضل كده علشان تلاقى حاجة تكتبها كل ما تتزنق
وممكن تجيب وصلة من حد تانى تشتغل عليها وتخلى وصلة الراجل ده علشان الأفكار ماتنقطعش عنك بس.
تقبل تحياتى

د/اجدع بنوته يقول...

هههههههههههههههههههه

هههههههههههههههههههههههه

ده بلطجه كده .. ده افترا بجد

افصل يابنى انت وخمسه ولا حاجه

طالما انتو كتير اهو ف حى واحد

وجيبوا خط وشبكوا سوا

بلا وجع دماغ

وابنه وارث البلطجه منه

وبلعب وعايز سرعه

عسل عسل هههههههههههههههه

maha zein يقول...

ههههههههههههههههههههههه
يخرب بيت ده نت
كل ده يحصلك وانا مش عرفة
والله حرام
علي فكرة دمك كان خفيف موت هنا
يعني طلعت فقري
دا انا معرفش كه
حلوة اوي التدوينة دي
يعني من الحجات الي اكون مستمتعة وانال بقراها ومش عوزاها تخلص
ولما تخلص ازعل اوي
بجد
عشرة من عشرة
وبعدين ما تطلع انت انصح منه
ما تعمل انت ممكمان اربعة ولا حاجة وصلة خاصة بيكم
يعني روح انت اشترك من الشركة مع نفسك
سيبك بقه منه
وقطع عليه كمان
معلش استحمل يا دكتور

Mahmoud البطراوى يقول...

la Princesa ... WHiSPeR

دى مشكله كل شاب وفتاه زى ما نيجرو قال بقى
:)
ربنا معاكى واوعى تكهربيه مش عايزين نشوفك فى خلف الاسوار
هندور على الجريمه الكامله ونقولك
:)
------------------------------------
Noha El-arabi
بجد؟؟
دا عرض حقيقى؟؟
طب هاتى وصله
------------------------------------

oRiGiNaL HeArT

هو انتى كنتى بتهرجى؟؟
فاكرك بتتكلمى جد
ههههههههههههههه
------------------------------------

عاليا حليم

لا انا بحسده لانه بياخد شتايم
ممكن تبقى حسنات له فى الاخره
------------------------------------

عيله مفتريه سابقا

صباح الناس الى ريحت نفسها
اوعى يكون الخط الى ريح دماغك ده هو الى سرق كومنتك؟؟
ههههههههههه

وشكرا على صوره نيجرو

------------------------------------

قلب مصرى
ههههههههههههههه
دا انت معرفتش حاجه لسه
هو بيقطع النت ويجيب افكار
ههههههه

تحيانى لك
------------------------------------

د/ اجدع بنوته

مهو لازم نعمل قعده عرب ونشوف الموضوع ده
ربنا يسهل
------------------------------------

مها زين

ربنا يخليكى يا مها
دا احنا هنعمل وهنسوى
بس اصبرى بس

NilE_QueeN يقول...

زي ما تكون بتتكلم عن الوصله بتاعتى

بس الفرق ان الراجل من النوع اللى بيطبطب على الواحد

يمكن عشان انا بنت وعارف ابويا

Mahmoud البطراوى يقول...

NilE_QueeN

كلهم هذا الرجل

غير معرف يقول...

هو راجل مش كويس وانتى حلو

غير معرف يقول...

After checking out a number of the articles on your website, I seriously like
your way of writing a blog. I book-marked it to my bookmark website list
and will be checking back soon. Take a look at my
web site as well and let me know how you feel.


Stop by my web page :: view more about