2010/04/19

مجرد ميعاد



قررت اروح متأخر للميعاد .. رغم انى عارف انه معاد مهم و التاخير ممكن يعنى ضياعه للابد .. بس شئ جوايا بيقولى ان اللى بيتأخروا دايما بيوصلوا بدرى .. الوحيدين اللى بيوصلوا متأخر هم اللى بيقعدوا يظبطوا الوقت عشان ميتأخروش... ثم انا عاوز اتخلص من احاسيس القلق اللى بتبقى عندى لما بيبقى عندى معاد وبتخلينى اخرج قبله على الاقل بنص ساعه.
صحيت بدرى , فطرت , فتحت الكمبيوتر مفيش حد اون لاين , مفيش مواضيع جديده على البلوجر ولا على الفيس بوك , بس برضه هروح متأخر .. مش معنى ان الملل هيقتلنى انى اخرج بدرى عشان ألحق المعاد المهم.
انا عارف الطريق دا بياخد اد ايه بالظبط .. عارف
حتى الظروف الاستثنائيه اللى ممكن تحصل هتاخد وقت اد ايه .. عارف الفرق بين انى اروح يوم السبت الساعه 8 وبين مرواحى يوم الاحد الساعه 10 ..بين انى اروح بالقطار وبين انى اركب ميكروباصات.
قررت انى هركب القطار وهخرج من البيت بدرجه تخلينى اوصل -لمعادى المهم - متأخر فى حدود 10 دقايق.. رغم انى متأكد ان الـ10 دقايق دى ممكن تعمل مشكله بس يا اهلا بالجو الاكشن.
رحت لمحطه القطار وسألت الراجل فى حجز فى قطر إلا ربع ؟؟ الراجل قالى للاسف لأ ..قلت لنفسى كده حلو اوى .. ركوبى ميكروباصات معناه انى هتأخر حوالى نص ساعه مش عشر دقايق.
بينى وبين نفسى لومت نفسى .. انا كنت فاضى وكده انا غالبا ضيعت الميعاد المهم .. ابتسمت فى نفسى ..قلت لنفسى : عارف الموضوع الكبير اللى كان قلقك بقاله كام يوم ؟؟ أهو انت دلوقتى مش قلقان منه .. عشان انت قلقان على موضوع المعاد بتاع النهارده ...والمعاد دى مهما كان مهم فهو اقل اهميه بكتير من الموضوع اللى انت قلقان عليه قالك كام يوم.
حلو اوى الاسلوب دا لما يبقى فى موضوع كبير مسببلك حزن , قلق , اى مشاعر سلبيه .. ممكن تغطيها بانك تعمل مشاعر زيها فى موضوع صغير. الفكره دى فكره كتير من المسكنات اصلا .. ألم فظيع فى اى عضو .. ندور على العصب اللى مسبب الالم دا ونعمل ألم صغير فى عضو تانى بيغذيه العصب دا .. يقوم تحس بالالم الصغير بس ومتحسش بالكبير.
قررت اهدى نفسى من غير ما اهدى تماما .. خفت اهدى تماما يرجع الموضوع الكبير يقلقنى .. قعدت فى العربيه فتحت الشنطه بتاعتى خرجت ديوان امل دنقل .. أمل بيقولى فى قصيده بطاقه كانت هنا  "لا ترتبك , فقد يضيع العمر فى لحظه ارتباك" .. حسيت براحه كبيره اوى وانا بقرأ الجمله دى.
بنت وولد شكلهم زمايل فى الكليه قاعدين فى الكرسى اللى ورايا فى الميكروباص .. من صوت البنت خمنت شكلها .. مش جميله , حاطه ميكب مزود شكلها وحاشه , لبسها ضيق ولابسه حجاب قصير .. كل دا خمنته من صوتها ومن المواضيع اللى بتتكلم فيها .. كانت بتحاول تخلى صوتها رقيق " مفيش بنت جميله بتعمل كده " التخمين اللى خمنته مش محتاج فراسه .. بيقولوا الفراسه محتاجه تبقى قريب اوى من ربنا .. بس فى حالتى دى مش فراسه .
دى مجرد شئ اكتسبته بحكم المهنه - اخد بالى من التفاصيل - كل شئ صغير فى ملامح اى حد فينا بيقول كتير فى شخصيته ،،، طب الاسنان بيعلمك تبص اوى فى التفاصيل مجرد ما اقعد ادام التلفزيون باخد بالى ان سمير غانم شفته اللى فوق طويله شويه هو وسمير صبرى وحد كمان اخاف الرقابه تحذف اسمه كان بيعمل عمليه المراره فى المانيا واول حرف من اسمه حسنى مبارك ,, فلانه اللى كانت شغاله معايا كانت مركبه سنتين جمال اوى ادام بس فيهم غلطه واضحه .. البنت اللى امى كانت عاوزانى اخطبها بيبان  تلاته اربعه ملى من اللثه بتاعتها وهى بتضحك ودا عيب كبير ,, خطيب اختى الاولانى كان مركب اول 4 سنان ,, كل اصحابى عارفين ان سنتى اللى ادام اكبر من اللى جنبها باتنين ملى " انا ظبطتها دلوقتى طبعا" .. محدش فى كل البشر اللى شفتهم اخد باله الا دكاتره الاسنان. بالمناسبه لو قابلتك اوعى تحاول تخفى عنى اى تفاصيل .. لانك قبل ما تفتكر انك عاوز تخبى عنى بعض التفاصيل ..هكون خلاص عرفتها .. وهضحك عليك وانت بتحاول تخبيها .
نزلت البنت من كرسيها عشان تنزل واحد راكب وراها .. تخمينى طلع مظبوط بالملى .. ابتسمت بس محستش انى ذكى .. 

الموضوع انى لما سمعت صوتها خمنت طريقه الكلام دى شبه مين اعرفه؟؟!! تخيل معايا بنت بصت الصبح للمرايه لقت شكلها وحش , البنت دى نزلت تجيب ميكب هتجيبه شكله ازاى؟ .. البنت دى لما تنزل تشترى لبس هتشتريه ازاى؟ .. ولما تيجى فى الاخر تبص فى المرايه وتلبس وتمد ايديها وتاخد المكيب هتحطه ازاى؟؟ فى الاخر هتبص لنفسها وهتحدد لنفسها فى اللاوعى طبقه الصوت المناسبه للبس والشكل دى  صدقنى الناس كلها صور طبق الاصل من بعض .. انت نفسك صوتك وانت لابس بنطلون قماش وقميص مقلم .. مش زى صوتك وانت لابس جلابيه ماركه عاليه .. مش زى ما انت لابس بدله .. ولا جينس وتيشيرت .. صوتك وانت خارج من عربيه فيات مش زى صوتك وانت خارج من بى ام ..ركز بس والحكايه هتبقى سهله.
الولد زميلها برضه خمنت شكله .. بس نزلت قبله فمعرفتش اتأكد انى كنت صح .. رغم انى اصلا كنت متأكد.
اتصلت بواحد صاحبى كخطه بديله لو المعاد فعلا ملحقتوش ,,, قلتله انى ادامى نص ساعه واكون عنده ,, رغم انى متأكد انى مستحيل هوصله قبل ساعه ونص .. ابتسمت وقلت اشمعنى هو ما اروح له متأخر هو كمان .
قررت اروح للمعاد الاول حتى لو متأخر نص ساعه .. يمكن ميحصلش حاجه .. بصيت للساعه اتأكدت انها 8:30 ..
دخلت على السكرتيره قلت لها: ** انا عندى معاد الساعه 8 بس انا اسف جيت متأخر 
-- اسم حضرتك ايه؟
** محمود البطراوى
-- ايوه يا دكتور معاد حضرتك الساعه 9 مش 8 ادام حضرتك نص ساعه . تحب تشرب حاجه حضرتك على ما المعياد يبدأ
"ابتسمت ابتسامه كبيره اوى .. وحسيت ان كل همومى راحت مره واحده ... وحسيت انى اتعلمت حاجه من اليوم دا. هى ايه معرفش"
** اه لو ممكن نسكافيه.
" اسف ان البوست طويل وممكن يكون مش مفيد ,,, بس هى حاله كنت عاوز اكتب عنها"

هناك 21 تعليقًا:

غير معرف يقول...

انا عن نفسى بحب الاسلوب ده
العند مع الظروف ...لانها هى اللى بتبدأ
مره رحت محطه القطر وكان نفسى اشرب شاى
بس قلت لا القطر ممكن يفوتنى
فضلت مستى كتير,....بس قررت اعند ..اروح اشرب الشاى واللى يحصل يحصل.....
من الغلاسه بقى انى اول ما جيه الشاى ...القطر قعد يزعق
قلت والله ما هركب الا لما اخلص الشاى
والعجيب ان العند جيه بفايده..ولحقت القطر...
اخوك الامى البطئ

Saturn يقول...

like

صيدلانيه طالعه نازله يقول...

ههههههههههههههههههههههههههههههههههههههههههههههههههههههههههههههههههههههههههههه

سبحان الله و انت عمال تتكتك و تعاند فى الدنيا
بس ربنا ميتعاندش و اللى مكتوب بنشوفه مهما عاندنا

بس عجبنى قوى تححليلك لشخصيه البنت و تحليلك لملامح الناس

بس دى فعلا فراسه
و بعدين انا كده فى اى تجمعات حاخاف اجى جنبك يا عم

صاحب المضيفة يقول...

ده بوست فلسفي يا سيد محمود

لكن بكلامك ده انتي بتحسسني انك بتتكلم عني بالظبط
نفس طريقة التفكير والنظر فيما حولي


تسلم الايادي

إنـســـانـة يقول...

يالهوي هو بالملي؟ .. الحمد لله ان جوزي مش دكتور سنان لحسن دروسي بايظة خالص ومرعوبة أروح للدكتور عشان بخاف منهم

بس انا مختلفة معاك فى حاجة .. مافيش بنت وحشة إطلاقاً .. ولو اللى حضرتك شوفته او حسيت بيه كان وحاشة فعلا فهي اللى عملت فى نفسها كدة .. لكن ربنا مش بيلخق واحدة ست وحشة أبداً

:)

بطوط حبوب يقول...

غير معروف
العند مع الظروف .. لانها هى اللى بتبدأ
عجبتنى اوى الجمله دى
دمت بود
==================================
Saturn
ME TOO :D
==================================
صيدلانيه طالعه نازله

يا دكتوره انتى متوقعه انك لو مجتيش جنبى انا مش هاجى جنبك فى اى تجمع؟؟
دا انتى حماتى ولازم اجى جنبك :D
==================================
صاحب المضيفة
افهم من كده اننا قرايب ؟ :D
==================================
إنـســـانـة
انا بتكلم عن وحاشه الشكل .. ربنا مبيخلقش حاجه وحشه من كل الجهات لكن انا بتكلم عن الشكل بس
ربنا خلق الضفدعه والصرصار والقرد

ولعلمك الستات الوحشه اكتر بكتير جدا جدا جدا جدا من الحلوه على الاقل فى مصر.. وفى منهم اللى بيزود الطين بله وفى منهم بالميكب الغبى

شرفتينى بالزياره مدونتى نورت :)

sony2000 يقول...

لا ترتبك , فقد يضيع العمر فى لحظه ارتباك"
بجد دي اهم حاجه اتقالت فالبوست
واهم حاجه انك كتبت حاجه انت عاوذ تكتب عنها وبس:)

دنيا....او حياة يقول...

هههههه بجد راااااااائع ..رغم اني كنت هتوه في الكلام في الاول بس النهاية افحمتني انا شخصيا .:))

3alahameshmofakeraty يقول...

جميلة جداً :)
أنا طول عمري لما بستعد لأي حاجة لازم أبقى جاهزة قبلها بنص ساعة على الأقل.. و قبل 5 دقائق أكتشف أني كنت ناسية حاجة مهمة فأتأخر, و بالتالي تقبلت أن ده قدر و مكتوب و بقيت بتلكع في كل مواعيدي..
وصف حلو أوي للبنت, النوعية دي بالذات عددها في الليمون..
أنا بالشكل ده عمري ما ح أفتح بقي قدام دكتور أسنان D:, و على فكرة سمير صبري و سمير غانم و المجهول اللياسمه بيبتدي بحرف حسني مبارك.. يعني هم كانوا ميس ايجيب عشان تفرق أوي في طول الشفايف ؟ D:

dr_tweety يقول...

محموووووووود حلو اوي اوي البوست ده رغم انه زي ماانت قلت مستفدتش حاجه بس بصراحه عجبني وخصوصا اني بقرا ومستنيه اعرف الي حصل في الميعاد ده ومتوقعه جو اكشن بس طلع عادي بس بصراحه استمتعت وعجبني اوي تحليلك لشخصيه البنت وفعلا مشكلتنا اننا بنلاحظ تفاصيل الشخص من اول مقابله ودي حاجه بتحرجني كتير خصوصا لما بكون بتكلم مع ميلز وهي اني ببص ع اسنانه بس بيبقي غصب عني وبلاحظ اي دفكت وبعدها بحس اني مبسوطه اوي علشان عرفت ايه الي عنده بس غالبا بتبقي اول مره بس بعدها حتي لو شفته بيبقي اتسجل في الميموري الدفكتس الي عنده .....وطبعا كل ما يهمني في هذا البوست هو كان ميعاد ايه؟؟؟؟؟ لازم تعرفني وتقولي ايه الي حصل بالظبط ...لاني في الاول كنت مفكراه ميعاد مقابله حد وقلت في نفسي يبقي عبيط لو راح متاخر :))))

SHAPE YOUR LIFE (ABOALI) يقول...

امممممممم
وحسيت انى اتعلمت حاجه من اليوم دا. هى ايه معرفش"**

لا اعتقد يا دكتور انك اتعلمت مثلا عدم الالتزام بالمواعيد او ان التاخير افضل دائما او انك تتخذ هذه الطريقه فى حياتك فى كل الاوقات ...كل ما يمكن استنتاجه فقط ان من المحتمل يكون كل ما حدث هذا كان ترتيب قدرى فاراد الله ان يسرى عنك ما كان يشغلك ويدخل البسمه الى نفسك وتكون ذكرى لموقف جميل ولكنه حتما لا يمكن ان تتخذه اساس لان من الواضح ان اليوم كله كان مفصلا من اجلك من بدايه قرارك بانك تتاخر وتفكيرك بجديه فى هذا الموضوع ..لتخمينك لملامح البنت التى كانت تركب خلفك لتراها كما توقعت تماما وقبل كل هذا قراءتك لعباره لا ترتبك ثم اتصالك بصديقك لتقول هتاخر نصف ساعه وفى النهايه تذهب لترى ايضا انك جئت مبكرا وقبل الموعد ههههههههههههههه.

يوم لذيذ فعلا يا دكتور لكنى ايضا اعتقد انه لن يضيف لك سوى البسمه .

غير معرف يقول...

بالنسبه للاهتمام بالوقت والالتزام بالمواعيد فطبعا مش متفقه معاك فى الموقف ده يمكن فى حياة التلمذه الامور والنتايج كلها بتشبه بعضها لكن بعد كده وخصوصا فى شغلنا ده بنلاقى ان الالتزم بالمواعيد ليه عوائد اخرى مهمه

بالنسبه لمسالة الفراسه بقى
فانا متفقه معاك ايوه الوحشين كتير بس من الجنسين والوحاشه اللى اقصدها هى وحاشة النفس واللى بتبان على الشكل فى صورة ميكب غبى او قصة شعر متخلفه او لبس مش مناسب اطلاقا للمكان او طريقة كلام ابعد ما تكون عن التلقائيه او مبتبانش ع الشكل خالص بس بنحسها من اى موقف صغير

نسبة العيوب والامراض الشخصيه فى مجتمعنا زادت بشكل رهيب لدرجة انى اوقات بحس ان العالم كله مجانين -يمكن يكونوا عاقلين واكون انا اللى .........- ما علينا خلينا نغير الموضوع
البوست ممتع بجد وازاى مانت مش عارف ايه المفيد فى اليوم انا كمان مش عارفه ايه الممتع فى البوست

مع اصرارى يقول...

كان نفسى ربنا يوفقك وتتأخر
لكن معلش تتعوض وخيرها فى غيرها

تقبل تحياتى

Eng. Nasr يقول...

تصدق بالله

انت فاضي و مش لاقي حاجة تشغلك

ولولا كده ماكانش يبقالك دماغ تفكر في حاجة تانية

أكيييييييييييييييييييييييييد

و قال جبت التايهة عرفت ان البت وحشة وحاطة ميك اب من صوتها المدلع
يعني قاعد وراك بنت عمالة تتدلع في صوتها لا و مش عرفت من كده ، لأ انت قعدت تسمع هي بتقول ايه عشان تعرف انها مش محترمة
ماهو طبيعي يا عم الظريف ماهي لو محترمة أو جميلة ماكانتش قعدت مع الواد اللي جنبها و رفّعِت صوتها

عموما لما تشوف الدنيا أكتر مش هتفضى حتى تحلق شنبك -- زيي كده

ههههههههه D:

بطوط حبوب يقول...

sony2000
ميرسى لمرورك يا سونى :)
تحياتى لك
==========================
دنيا....او حياة
الحمد لله ان النهايه جت حلوه :)
تحياتى لك

==========================
3alahameshmofakeraty

ميرسى ليكى
اللى عاوزك تعرفيه بقى ان
سمير غانم وصبرى والمجهول مش ميس ايجيبت عشان شفايفهم طوليه :D

==========================
dr_tweety
على فكره الميعاد مش زى ما انتى فاكره خالص
اكيد لو معاد كده وكده هقولك قبلها :D


==========================
Blogger SHAPE YOUR LIFE (ABOALI)

هو مش محتمل انه ترتيب قدرى .. هو اكيد ترتيب قدرى ودا يمكن اللى اتعلمته
تحياتى لتحليلك الرائع لليوم :)

==========================
غير معرف
الأول انا مش بقلل من قيمه الالتزام بالمواعيد .. الالتزام فى المواعيد دليل على انك شخص بيحترم نفسه وبيحترم الناس ومظنش ان دا اللى استفدته من اليوم

بالنسبه للوحاشه انا كنت بتكلم عن وحاشه الشكل بس وحيث ان انا ولد فمش هيفرق معايا لو كل الولاد وحشين ومش بيلفت نظرى دا ولد حلو ولا وحش , لكن ممكن تلفت نظرى لو بنت وحشه او حلوه.
موضوع وحاشه النفس دا موضوع تانى متفقين عليه طبعا.
بالمناسبه انا شايف ان الاتنين مهمين ان شكلك يبقى حلو ونفسك تبقى حلوه ومش بحب اللى بيقلل من قميه الشكل على حساب الجوهر والعكس انا شايفهم مهمين بدرجه قريبه من بعض.
تحياتى لك

==========================
مع اصرارى
:)) الحمد لله حصل خير

==========================
Eng. Nasr

تعرف يا نصر اكتر حاجه بتعجبنى فيك ذكائك .. انا بحسد نفسى اننا اصحاب فعلا
عرفت لوحدك انى لما ببقى فى المواصلات ببقى فاضى؟؟!!

ثم انت ليه بتربط بين محترمه وجميله؟
مهى ممكن تكون جميله ومش محترمه او وحشه ومحترمه ...الخ

واحدة مفروسة يقول...

عجبنى اوي البوست على فكرة
و فعلا تتعلم من اليوم ده حاجات كتيرة
اللى انت بتقوله على فكرة انا ممكن احطة تحت بند قوة الملاحظة، مش الفراسة اوي
تحياتى ليك با بطبط
البوست فيه حاجات مش حاجة
و فيه فلسلفة
سلام

واحد من البلد دى يقول...

السلام عليكم

إيه يا بطوط الفلسفة دى كلها

انا يا عم اخاف منك بعد كده

تحياتى ليك يا دكترة..بوست مميز كالعادة

دمت فى حفظ الله

marwa mahdy يقول...

السلام عليكم

بجد وحشتني المدونه جداااا .

البوست لذيذ جدا كالعاده يابطوط خصوصا واحنا اسنانجيه زي بعض وانت في البوست ده دكتور دكتور يامشاء الله,

عندك حق صوت واحد نازل من فيات مش هايكون نفس الصوت لو ركب بي ام بس في ناس بتفضل زي ماهي بكل تفاصيلها مهما حصل وفي ناس يمكن مش معاها كتيير وعلي قدها بس احساسهم بالرضا بجد عن حالهم بيخليهم يتكلمو بثقه زي اللي عندو بي ام والبنت اللي شكلها مش حلو ومقتنعه ان احسن شكل ليها هو ده وان ربنا هو اللي اختاره ليها هاتلاقي عندها (جمال الرضا)............
بس انا مش فضوليه بس كان نفسي اعرف هو كان ميعاد مع ميين؟؟؟

mohamed ghalia يقول...

كونك مهتم تتتأخر
ده أكبر دليل انك شاغل بالك
متشغلش بالك يامان

moustafa fawzy يقول...

بالنسبه لموضوع المواعيد , بجد لو امي أو رئيسي فالشغل شافوا البوست ده هيقولوا إني أنا اللي كاتبه ,
و نظرية (تغيير موضع الألم) نظريه أنا مؤمن بيها جدا و ياما جربتها علي أختي الصغيره , أضربها ضربه جامده توجعها , أقوم ضاربها ضربه أجمد في حته تانيه , تنسي الأولي علي طول D:

غير معرف يقول...

السلام عليكم
المدونة جامدة اوي ودمها خفيف..بالنسبة لموضوع المواعيد ده ساعات كتير بتحصل ان الواحد يحس نفسه متاخر اوي يصحى متاخر وبعدين المترو يتاخر او يقف ف السكة ويعطل وننزل نغير والواحد يفقد الامل ويقول هيروح بعد الميعاد بساعتين بس بروح -لو محاضرة مثلا-الاقي الدكتور لسه مجاش او لغاها..
ومع ذلك برضو مفيش حاجة احسن من احترام المواعيد يعني مثلا الشخص اللي على طول بتاخر ف مواعيده باخد عنه فكره انه شخص غير ملتزم ف شغله ومش منضبط ودايما بيثبتلي ده..
....امة الله