2009/06/15

الى صديق مدونتى سنه 2020



أول حاجه أمانه عليك يا شيخ تقرا لنا الفاتحة وتدعيلنا قبل ما تقرى البوست
بص أنا عارف طالما إن أنت وصلت لهنا يبقى عملت سيرش عشان تعرف اللي حصل سنه 2009 لشعب مصر خصوصا وللعالم كله.
وغالبا أنت زهقت من بوستات اتكلمت عن نفس الفترة دي أو قعدت توعظ الناس عشان يموتوا ويدخلوا الجنة.
أنا بقى عايز احكيلك عن الجزء اللي ورا الكواليس... كنا بنفكر فى ايه قبل ما نموت؟ ليه ماخدناش احطياطاتنا زى باقي دول العالم ؟ إيه اللي كان مكتوب في الجرايد واللي شفناه فى التليفزيون؟ والحوارات اللي كانت بنا وبين بعض قبل ما نموت كلنا ؟
مهو شعب يموت كله كده حاجه أكيد خلتك تستغرب بس أنا هبسطهالك بعون الله
صلى على النبي عليه الصلاة والسلام
إحنا ليه مخدناش احيطاطاتنا؟ دا اسمحلى يعنى سؤال ساذج اوى
يعنى الشعب اللي نصه عنده فشل كلوي .. وكبد سي .. والسرطانات بقت عادى وبيس .. عايز تقنعه انه ممكن شويه برد يموتوه. يا آخى اوبجيكشن
الشعب اللي شرب مايه المجارى .. وأكل لحم الحمير والقطط والكلاب .. عايز تقنعه انه لو ملبسش قناع واقي ال إيه هيموت لامؤاخذه يعنى **** روح العب بعيد
ثم كمامة إيه ياد يا ابن التييييييييييييت .. لا مؤاخذه برضه ..بس أصلك بتقول حاجات تنرفز ... الشعب دا لو اشترى كمامات بدل ما هيموت من الانفلوانزا هيموت من الجوع
اصل الحكومة - يسترها دنيا ويفضحها أخره - خلت الأسعار كلها في متناول الجميع الجميع وفقط
ملحوظة : الجميع دا محدش عارف اسمه إيه بالتحديد بس بيقولوا انه الجميع إبراهيم الجميع والله اعلم
هتقولى أمال ادارتوا الازمه ازاى؟؟
هقولك يا بنى إحنا المصريين يعنى فنانين أدراه الأزمات .. اى ازمه إحنا ناكلها أكل مش نديرها بس
بص يا سيدي ..الحكومة في الأول قالت هنقتل كل الخنازير .. مش هم اللي جابولنا المرض .. طب والمصحف لنحرقهم مش بس هنقتلهم .. إن مكنش للوقاية .. يبقى انتقام هه بقى... وهوب قامت قتلت منهم كتيييييييييير بس برضه المرض لسه بينتشر
قامت عامله إيه .. جهزت مقابر جماعية ..
أه والله مش بهرج .. وههرج معاك ليه أساسا إذا كنت أنت داخل مدونتي بعد ما كلنا موتنا ب 20 سنه

بس يااااااااارب يكون الموقع لسه شغال
اصل حكومتنا - ربنا يديها الصحة - قالت الشعب دا ابن موت .. وريحته هتبقى وحشه أوى .. وحرام يعنى.. وإكرام الميت دفنه .. وكلنا من تراب
قامت عملت لنا مقابر جماعية - يسترها ربنا - واختارتها تكون هناك فى الفيوم ...سبع سواقى والنيل حاجه كده ترد الروح
يا عم أنت فهمت غلط .. لا دي مش حكومة الاحتلال والله..
دي حكومة الوطني .. شكلك غبي وهتقول حكومة الاحتلال الوطني بص مش هرد عليك وافهم زى ما أنت عاوز
عاوز تعرف بقى الحوارات اللي دارت بنا - نحن الشعب - ؟؟
بص يا سيدي .. الشيوخ فى الفضائيات قعدت تتكلم إن ربنا ابتلانا عشان إحنا ناس زباله من الأخر .. وكلامهم صح طبعا بس مين يسمع ومين يتعظ
والجرايد القومية شغالة .. نحن نحذر الأنفلونزا إحنا مش عايزين نحطك في دماغنا .. ولعلمك محدش هيموت وغورى في داهية بالذوق احسلك
وتصريحات بقى إننا ضد الموت من الأنفلونزا عشان الفراعنة رموا تعويذه عليها من زمان وحاجات كده
من الأخر أحب أقولك إحنا أدرنا الازمه بمنتهى الكفاءة .. زى ما أنت شفت .. بس قضاء ربنا نافذ على الكل
وأنت عامل إيه دلوقتى؟؟؟

هناك 15 تعليقًا:

pinky يقول...

هههههههههه
هم يضحك
بص يا أخ بطوط
مصر مفهاش غير حاجتين
الاهرامات و قناة السويس
الاهرامات اتبنت بالكرباج و قناه السويس اتحفرت بالسخرة
يابنى فراااااااااعنة
لا الحكومة هتتغير و لا الناس هتتغير
احنا كدة
ما قولنا فراعنة :))

ميرا ( وومن ) يقول...

اييييييييييييه وحدوه دنييييييييييييييا

ههههههههههههههههه يا اخي حرام عليك علشان تفهم الصديق بتاع 2020 تموتنا كلنا كدة

طب هو الصديق دة مصري مستنسخ ولا كان من المهاجرين ورجع بعد ما منظمة الصحة العالمية اعلنت ان مصر اصبحت تصلح لإعادة الإعمار ولا استعملوا طريقة امريكا في الهجرة لمصر

مش تقولنا جاي منين بعد ما كلنا موتنا يالا الحمد لله محدش مخلد فيها

Noha El-arabi يقول...

البوست ده حلو جداااااااااااااااااااااااا
كنت عاوزاك تطوله شوية
بس فكرته ايه
دماااااااااااغ يا عمنا
صباح الفل

Noha El-arabi يقول...

بس صحيح مقلتش مين اللي حيعد بعد ما الناس كلها تموت بعشرين سنة؟؟؟
اوعي يكون ابنك و تلاقيه ساعتها قاعد بيقرا البوست مع صديقه الانتيخ شادي جمال مبارك :)

didi يقول...

انت عندك امل ان المدونه بتاعة جنابك تعيش لسنة 2020

لا وايه .. كمان بتتكلم مصري ؟؟
مش تعمل حساب الجيل الفرانكو اللى قاعد وسطنا في الليله

يعنى احنا وسطنا ناس بتتكلم بالفرانكو دلوقتى
ما بالك بقى سنه 2020

هيتكلمو ازاااىى؟؟

وبعدين
مالك كدا متفائل .. عايزين شوية تشاؤم من اللى هوا
احكى عن معاناة الخنزير اللى كان بيتاكل في على انه فراخ بيضا قبل الانفلو


وبما انك واصل كدا يا بطوط لسنة 2020
شوفلنا الاخبار بتقول ايه .. وياريت تقوللى حظك اليوم
ايه؟؟

:D

صيدلانيه طالعه نازله يقول...

يا بطبط انت متشائم ليه هيا فين الازمه اللى عايزين نديرها دى دايما بتطلع اشاعات
الكمامه دى الحكومه عاملاها و حاطه الفيرس جواها عشان اللى يلبسها يروح على سكه اللى يروح ما يرجعش عدل
و تقولى ازمه
احنا اللى عملناها عشان الحسد عشان نولول فيها شويه و ندارى العين

maha zein يقول...

هههههههههههههههههههههههههههههههه
ده ايه ده
انت عامل ايه بقه
دي رخامة بقه
لا يا عم انا ممتش
ولو كان الجدع ده جاني في بيتنا كان لقاني مستخبية تحت في البدروم

ايوون
انت مالك انت هتتدخل في موتي كمان

الا مين اللى نجا الجدع ده من الانفلونزا
اشمعنه هو يعني

Unknown يقول...

ههههههههههههههههههه
حلوة حلوة حلوة لا ملعوبة بجد يعنى انا موت من الضحك من التحليل المنطقى المنهجى دة

Lobna Ahmed Nour يقول...

حل الازمة واحد من اتنين
اما وطن بديل للشعب او شعب بديل للوطن

بوست عالي جدا

ست البيت يقول...

ما دمت حقول اللي في نفسي
حقولك نهاية المقال مش مناسبة البوست كلن لازم يكمل
بتكروتنا ليه يا عم بطوط افندي
غوزين تصورغ صحيح وشامل ومتوسع
وازيك كده في الامتحانات ؟

Helium Atom يقول...

hehehehehehehe

btoot, su2al mu7rag :-S
hwa kullena 7anmoot wel7kooma la2!?1

i like the post awiiiiii.... begad gamed edan
(:

Unknown يقول...

موضوعك حلو
بس برده مهما كان لوقاية خيرٌ من العلاج و ساعات الموت بيجى على أهون الأسباب

و الكمامة انا أشتريتها من الصيدلية بخمسين قرش

Me7'o يقول...

هههههههههه
لذيذة قوى الفكرة

بس والنبى أسألهولنا كده

هى مصر وصلت كاس العالم ولا هايلعبوا على كاس جهنم

تحت رعاية السيد الرئيس

تحياتى

Tadwina يقول...

مرحبا/ محمود
بعد عمل تقييم من قبل تدوينة دوت كوم لجميع المدونات المصرية نبلغك بأن بعد اضافة مدونتك إلى تدوينة دوت كوم قام العديد من القراء بالاطلاع على مدونتك الشيقة والجميله المليئة بالخواطر لذا ترجو منك اسرة تدوينة دوت كوم بمراسلتنا للأهمية على
Tadwina@gmail.com
حتي نتمكن من ارسال البانر الخاص بنا لوضعه على الصفحة الرئيسية حتى يتمكن العديد من القراء في مصر والدول العربية بالاطلاع على مدوناتك المستحدثة
يمكنك متابعة مدونتك على الرابط التالى:
http://www.tadwina.com/feed/1119

مع خالص الشكر
فريق عمل تدوينة دوت كوم
www.tadwina.com

خواطر شابة يقول...

رمضان كريم
صدق المثل اللي بيقول هم يضحك وهم يبكي
لكن صراحة انا محتارة في المرض اللعين ده اوقات ناس تقول ده اشتغالة الشركات العالمية عشان تحرك الاقتصاد وأول منصدقهم هوب نسمع وفيات بالهبل في كل دولة واخرة المتمة لرؤساء دول بيصابو بيه
وعلى رأي عادل امام جاتنا نيلة في حظنا الهباب