2009/12/22

زعبله للجميع






ما فاتكم من الاحداث
بعد ما اختى اتجوزت بكام شهر راحت عند الدكتور وعرفت انها حامل .. بعدها بكام اسبوع جه ازوجها سفر - رزق البيبى وسافر .. وبعدها عادت لنا سيناء قصدى دعاء.
وحيث انه جد فى الامور امور فكان يجب ان يحدث الاتى.
أنا بالون دا(-) .. ودعاء بدا(/) .. ومحمد بدا(=) عشان محدش يتوه
واليكم الحوار

- محمد .. دعاء .. فى اجتماع مغلق بعد عشر دقايق للمناقشه فى امور مصيريه.
وبعد عشر دقايق
- اكتب فى محضر الجلسه .. هذا وانه فى تمام الحاديه عشر انعقدت الجلسه بحضور كل من دعاء ام زعبله ... محمد المش مهندس .. ومحمود الكومندا المهم
/ اللهم طولك ياروح
- اسمعى وانتى ساكته ..ولا معترضه يعنى ولا حاجه؟ .. المهم عشان ندخل فى الموضوع .. وانت يا مش مهندس سجل كل حرف
= تمام يا كومندا المهم
- محمد لما جاب لنا جاتوه بمناسبه البيبى عمل ايه؟
/ عمل ايه
- حطه فى التلاجه واى حد كان عاوز ياكل منه كل صح ولا غلط؟ ..(ناظرا اللى محمد) سجل انت ملكش دعوه
/ اه حصل 
- يعنى مقالش انا اللى جايبه يبقى ليا امتيازات
/ لأ مقالش .. لاننا اتربينا على التعاون ..التعاون..فاهمنى؟

-/=  فى نفس واحد سجل 
- اشطه عليكى
= لما محمود جاب الروتر .. الكمبيوتر والنت اتقسموا ازاى؟ بما يرضى الله ولا لأ؟
/ طبعا بما يرضى الله

-/= فى نفس واحد برضه سجل
- سجل يا ابنى .. وحيث انها اقرت بكل ما سبق .. قررنا اعطائها نسخه من مطالبنا وعليها التوقيع
/ وانتوا برضه تاخدو نسخه من مطالبى
وحيث اننا واثقين ان مطالبنا شرعيه فوافقنا طبعا ناخد مطالبها

وتبادلنا النسخ ودى كانت نسختنا


  1. ينص هذا الاتفاق على ان زعبله – ايا كان ذكر او انثى – ملكيه عامه وللجميع حق الانتفاع به.
  2. وعليه فلا يجوز لك الامتناع عن اعطائه لاى فرد من افراد البيت الا فى حالات الضرورى القصوى على ان يكون القرار بالاغلبيه.
  3. على زعبله ان يلتزم بانه ميعلمهاش على اى شخص فى البيت وان عملها فهو حر برضه ولا يهمه بس دا بينى وبينكم بس.
  4. يحق لاى شخص اللعب فى راس زعبله – عشان انا بتغاظ من اللى بيقولى حاسب على راسه دا لسه صغير – ما انا عارف هو انا عبيط يعنى.
  5. يحق لاى شخص انه ياخد زعبله سواء للعياده او للكليه او يفسحه بمنتهى الحريه ولا يحق لاى شخص الاعتراض لكن يتوجب التنسيق.
  6. على زعبله ان يسمع كلام خالو وميسمعش كلام تيته .. لان خاله نفسه مبيمعش كلام تيته.
  7. على زعبله ان ينطق ب خالو قبل ماما وبابا لأن عنده اتنين خالو انما بابا واحد ماما واحده.
  8. على زعبله انه يضحك طول مهو مع خالو .. وهو حر وهو معاه امه او مع تيته ملناش دعوه.
    واذا بالمفاجأه عندما شفنا نسختها

    1. اولا انا اللى تعبت وشلت مش حد تانى وعليه فالنونو-واللى هيقول عليه زعبله هو حر- ابنى مش ملكيه عامه.
    2. وعليه اخركم معاه تلاعبوه.
    3. على النونو انه يعملها على الكبير والصغير .. دا عيل يعنى وان مكنش هيعملها عليكم هيعملها على مين .. عاوزين تعقدولى الواد.
    4. اللى هيلمس راس النونو مش هيلاقى ايده .. راسه بتبقى طريه وانتوا بصراحه عبط.
    5. محدش يقولى هاتى الواد العب بيه دا مش لعبه.
    6. النونو مش هيسمع غير كلام ابوه وامه ولو طولتوا فى الكلام هخليه يقولكم باسمكم .. وحوار ان اخواله مش بيسمعوا كلام تيته .. فدا عشان ... ولا بلاش.
    7. ينظر رقم 1 واتنين.
    8. للنونو حقه فى فسحتين فى السنه او ما يعادل قيمتهم الماديه .. على ان تكون الفسحه شامله وجبه ولو مكنتوش لسه جبتوا عربيه يبقى وشامله المواصلات.
    9. للنونو حق العيديه من اول عيد يجى عليه ان شاء الله .. ومفيش حوار دا لسه صغير .. انا لسه مقبضتش .. استلف اتصرف .. دا الخال والد.

      وهنا انقلب الامر

      - محمد اقفل الباب .. الظاهر ان المماراسات الديمقراطيه مش هتنفع .. كتفها يا بنى وخليها تمضى .
      = علم يا فندم وينفذ .. بس ايدك معانا يعنى متعمليش فيها الكومندا اوى يعنى .. دى بتقولك عيديه من يوم ولادته.


      وبهذا اعزائى المدونين .. عزيزاتى المدونات .. استعطنا كعائله كبيره وسعيده (بج هابى فاميلى) ان نحتوى الحركات الهدامه التى تزعمتها ام زعبله . ومضت بالقوه الجبريه - اقصد بمنتهى الديمقراطيه.
      ونتعلم من دا ان - ام زعبله شريره - واننا طيبين وشكرا لكم.


      بالمناسبه عاوزين منكم اسماء لزعبله - سواء كان ولد او بنت - وهو فى الغالب بنت . لان كل الستات الاروبات -نسبه لأروبه مش اوربا - قالولها بنت . المهم اقترحوا اسماء.


      وفى الاخر تهنئه للاخ والصديق الأستاذ يوسف المصرى على افتتاح دار المصرى للنشر والتوزيع  وربنا يوفقه يارب وتكون قدم السعد :D


      وشكر خاص ل مى .. لاختيارها الثيم دا .. بجد مش عارف اشكرك ازاى



      وشكر خاص جدا لـ منونا๓คภ๏ภค.. لتصميها الهيدر بتاع الثيم الجديد بجد شكرا يا منونا على تعبتك ونردهالك فى الافراح

      الثيم الجديد لو عمل مشكله لاى حد .. اى حد عنده اقتراح .. اللى مش عارف يعلق فى الثيم دا .. يراسلنى على batoot_dnt@hotmail.com 
      اللى مش عارف يعلق باسمه او مش عارف يعلق خالص يدوس هنا

       
      وعلى فكره انا غيرت البروفيل ايمدج بتاعتى من الصوره دى


      لـ دى قولوا بقى رأيكم فى كل دا
       





      هناك 36 تعليقًا:

      عاوز اصحي يقول...

      هههههههههههههههههههههه
      جميل اوي الحوار دا
      ربنا يكون في عون الام قسمتوا الواد خلاص وهي طلعت من المولد بلا حمص
      ييجي بالسلامه ان شاء الله وتبقي خال ياعم ويقولك ياعمو هههههههههههه

      الاخ الصديق الاستاذ يوسف :) يقول...

      بقى انا عزمك على حمص شام علشان تكتب سطر بس عن الدار
      تصدق كده عيب وانا الى قولت هتكتب بوست كبير عريض هههههههههههههههههه
      ............
      بجد بقى
      تسلم يا حبيبى ودعواتك معانا وان شاء الله اشوفك أكبر داااكتور اسنان فى البلد
      شكرا للأخ الصديق اللواء العقيد الدكتور بطبوط :P

      نعكشة يقول...

      كنت لسة هقول لحضرتك شكلو كوكو السنة العجوزة دية
      .....

      هع هع هع
      انا كمان عندي زعبلة بتاع اختي
      وهوه فعلاً للجميع
      وانا متعاقدة مع اختي - ي رب متكثش بالعقد- انه لما يكبر هاخده و اصيعه
      ويبقى المحرم بتاعي و نسافر مع بعطينا

      من جهة يعمل عليا فمعملهاش قبل كدة
      بس مظبطني قشط و سرسرة
      يعععععع
      كل اما امسكة تقريبا لازم اغير هدومي

      ربنا يا رب يا رب ياااااااااااا رب
      يرزق اخت حضرتك بالولد الصالح و الذرية الصالحة
      آمين

      اسماء بقة
      فانا عندي شوية اسماء بحبها
      وبما اني بحبها فانا مش هقولها لحضرتك عشان الناس متسميش اسماء زي ولادي
      ال يعني اتجوزت اصلا

      خلاص خلاص

      الذكور ممكن معاذ
      عبد الرحمن
      يحيى
      حمزة
      عليّ بتشديد الياء مش علي
      وبعدين على حسب اسم الاب

      عشان يبقى لااسم فوتوجينيك

      لو بنانيت
      ممكن سارة
      لجين
      ملكة مش ملكة بتاعت العرض لأ ملكة بفتح الميم و اللام و الكاف
      ممكن حنان
      حياة

      و لو عاوز اسامي تاني
      ممكن حضرتك تستعين بقاموس الاسامي
      هتلاقي عالنت كتير

      بث
      فيه اسم بنت دة سايباه لنفسي
      معلش بقة
      ولا اقولك
      هقوله و اصلا مش هتسموه انا عارفة
      مارية
      بث
      والى هنا تنتهى نشرتنا الاخبارية
      و ربنا ييسر الحمل و الولادة على اخت حضرتك
      آآآآآآمين

      سلامٌ عليك

      اة صحيح الأبلكاش اللي ورا دة لظيظ :D 

      غير معرف يقول...

      سلام عليييكم
      اولا الثيم الجديد تحفة
      بس الصورة الاولى افضل فى نظرى

      البوست ده متميز رجعنا لايام زماااان

      ربنا يبارك فيكم يا رب

      و فعلا الاثبات انها شريرة واااااضح

      بس على فكرة البيبي زمانه سمعكم و ربنا يستر و لما ربنا يكرم و ييجي ان شاء الله هتشوفو نظراته ليكم ازاى

      ساعتها الحق هيبااااااااااان
      :D بوست تحفة ما شاء الله
      ربنا يبارك فيكم


      بنت المسلمين

      مي يقول...

      مبروووووووووووووووك اخش برجلى اليمين وبزحف كمان يا دكتور
      ونرش ماية ادام العتبة واد يا دقدق فين الشربات

      ممكن اطلب طلب عايزة العب بزعبله شوية والنبىىىىىى مالييييييييييييييييس دعوة عسان خطرى ياعمو سجل ده عندك هااااااااا

      مبروك لاختك وارحموها يا مفترريين انتوا يارجالة كده ال ملكية ال فى عينكوا

      ربنا يخليكوا لبعض وتفرحوا بزعبلة ونفرح بيك وتجيب لنا زعبول يتربى فى المدونة

      الايمدج حلوة بس انت مش عجوز اوى يا بطوط

      وسلاموووووووووووووز يا بطوط الحبوب

      ňįĝŗő يقول...

      بص يا ابني
      انا مش هاقولك غير 100 كلمة و رد غطاهم
      اختك دي هتبقى مثال للأم المثالية بعون الله
      و هتعرف تجيب حق ابنها تالت و متلت
      و بلاش شغل العوء بتاعك انت و اخوك ده
      علشان واضح انها عندنا بوادر استقتال على ضناها
      و اذا كنتم استقويتم عليها و مضّيتوها على طلباتكم الجائرة الفاقدة أدنى الصلاحيات الدستورية فده علشان انتم مش مقدرين النعمة اللي انتم فيها
      انكم ليكم اخت بنت يا محظوظين يا ولاد المحظوظة
      ربنا يقوّمها بالسلامة و ييسر حملها و يرزقها بالذرية الصالحة ياااااااااا رب و يهدّك انت و أخوك ع اللي بتعملوه فيها ده
      بالنسبة لصورة البروفايل
      مش عايزة نقاش الصورة الأصلية أفضل و أحسن و بلاش تخونك العِشرة و تعمل حركة فيها قلة اصل بمجرد ما ربنا فتحها عليك و اتشبرقت و اشتريت لبس جديد للمدونة تقوم ترمي كمان صورة البروفايل
      دي علامة مسجلة يا بني
      و كل عام و انتم بخير
      يا جناب الكومندا المهم



      يلا سلام

      مي يقول...

      اه معلش نسيت اسامى البنات ليليان
      ريتاج
      ايفلين
      جوانا ده اسم يونانى عطش الجيم

      الولاد وليد شادى اى دلع بقى عشان بتكسف نيهاااااااااا

      عصفور طل من الشباك يقول...

      بجد أنت مشكلة

      بقالي كتير مقرتش حاجة ليك، بس الموضوع جميل

      ربنا يخليكوا لبعض وتفضلوا دايمًا

      Big Happy Family

      هبة المنصورى يقول...

      مبروك لدعاء.. يارب تقوم بالسلامة
      وبالنسبة للأسماء
      لو بنت عاجبني اسم"كرمة".. شجرة عنب :) ورقها يطرح كده على سور المدونة الخشب ده ونسمع حواديت كتير عنها
      ولو ولد ممكن "كرم".. بس لازم يبقى الأب فعلاً كريم عشان لما الإسم يتقال يبقى اسم على مسمى :)

      Sarah Sobhi يقول...

      مبروووووووووك يا خالو ;)
      على فكرة كل اللى دعاء شرطاه ده هيفضل اول 3 اسابيع بالكتيير اوى شهر بعد كده هتتحايل عليكوا تشيلوه عشان تعرف هى تنام 10 دقايق كامله من غير وأوأه
      بس متبقوش تعملوا نايمييين

      بالنسبة لموضوع العيدية فده اساااااااااااااسى وللا انت عايز تاخد اللقب ببلاش كده و متنساش اللعب والشوكلاته مش عايزيين خال نص كم P:

      وربنا يقومها بالسلامة ويرزقها الذرية الصالحه ان شاء الله :)

      Sarah Sobhi يقول...

      نسيت اقول الثيم جامده جدااااااا والصوره الجديدة لايقة على لون الخلفية بس برضو القديمة احلى

      الاسامى بقى استنى ادعبسلوكوا شويه

      وومن يقول...

      هههههههههههه تصدق انت وأخوك غلبانين قوي بقي عاوز تخلي زعبلة للجميع

      مش بالكلام يا بطوط طب استني كدة لما تسمع جعورة زعبلة ولا لما يعملها عليك زعبلة وانت هاتقول حقي برقبتي

      وعلي فكرة العيدية من حق زعبلة أختك مغلطتش

      الثيم جامد ألف ألف مبروووك عليه

      أنا شايفة ان صورة البروفايل الأولانية أحلي

      صيدلانيه طالعه نازله يقول...

      مبروووووووووووووك يا عمو حتبقى خالو

      نصيحتك ليك بقى انك تعمل جمعيه من دلوقتى و اما تقبضها ابقى ادفع منها

      العيديه يا عم الناصح اختك شكلها ناويالكم نيه زرقه و حتخلص حقها القديم

      تالت و متلت

      الاسامى بقى لو ولد سيف او يوسف او عمرو

      لو بنت رؤى شادن مريم رنيم رهف

      اظن عملنا معاك احلى واجب متنساش بقى اكياس السبوع

      فكرة من الزمن ده يقول...

      جميل بوست الترابيزة المستطيلة ده
      وجميل ان كل شيء اسري ينعقد له اجتماع والاجمل انه في النهاية بيكون الاجتماع مجرد صورة وتضيع وقت والامور بتمشي لوحدها
      اما بالنوسبة للاسماء ففي اسماء كتير
      حور اسم البنات في الجنة
      ولينا اسم النخلة في القرآن
      وسافانا اسم حبيته جدا اسم صديقة ليا
      وفي اسم محتفظة بيه لنفسي
      مش هاقولو علشان محدش يلطشه
      مني بعد عمر طويل يعني
      وفي اسماء اولاد تيام
      مروان
      سيف حسام ندي بالياء مش ندا
      وفي النهاية الاسماء اذواق زيها زي اي شي
      لكن اللي ممكن يفيدك المعجم ده لو حد اقترح عليك اسم ممكن قبل الموافقة عليه تعرفو معناه
      من هنا وموجود لينكه عنده لو اللينك هنا ما اشتغل
      http://www.arablocale.net/name/index.php

      جميل الشكل الجديد للمدونة اوي
      والتجديد جميل
      تحياتي

      بطوط حبوب يقول...

      وعليكم السلام ورحمه الله وبركاته جمعيا
      **************************
      عاوز اصحي
      انا تهت منك بجد
      زعبله هيقولى خالو ولا عمو :D

      نورت مدونتى يا بوب واهلا بك صديق جديد للبرنامج
      **************************
      الاخ الصديق الاستاذ يوسف :)

      يا استاذنا لو عاوز بواحد حمص شام تاخد بوست
      كتيييييير كده يامان
      اعزمنى على كباب وشرفى اكتب عنك بوستين :D

      نورتنى والله يا جووووو

      **************************
      نعكشة

      هو انتى وصلتى للتعاقد دا بطريقه ديمقراطيه زى بتاعتى ولا وصلتى ازاى؟

      ربنا يخلهولكم يارب .. وتعرفى تستغليه وتلفوا العالم كله :D

      وميرسى جدا على الاسماء دا انتى حتى اديتنا الاسم المحتفظه بيه لنفسك فعلا الصديك لصديكه

      ***************************
      بنت المسلمين
      زعلبله سمعنا :-S
      يعنى سمعها وهى بتقول علينا عبط .. لأااااااااااااا انا لا اسمح دى هزلت
      نورتينا بقالك كتير مش بتيجى ومتعلم جنب اسمك كذا مره
      :D

      ***************************
      مى
      اولا يا مى مش عشان اخترتى ثيم المدونه معايا يبقى تلعبى بزعبله
      لأااااااااااااااا كله الا دا وكمان زعبله بيتكسف من البنات ووشه بيحمر

      ومن هنا لحد ما زعبله يجى عادى تدخل المدونه براحتك
      بس اول ما يجى تخبطى قبل ما تدخلى انا قلت اهو

      **************************
      ňįĝŗő
      نجرو هو 100 كلمه دول غطاهم يبقى اد ايه؟
      وكمان يا عم انت داخل تنق ولا ايه يعنى دى حته اخت وحيده وكمان مرضتش تمضى لا بطلوع الروح

      الصوره الاصليه بقى مشكلتها بالنسابلى ان معظم اصحابى الاسنانجيه حاطنها
      يو جت ات؟

      ***************************
      عصفور طل من الشباك

      روبى الجميله
      وحشاااااانى والله من هنا لعندك ( اوعى تكونى قاعده فى الشارع اللى ورانا)
      ربنا يكرمك ياااااارب

      ***************************
      هبة المنصورى

      حلو الاسمين يا هوبه
      ومحمد زوج دعاء ما شاء الله عليه كريم
      ربنا يسعدهم يااااااارب
      ويسعدك ويوفقك
      وانا كمان
      قولوا امين

      Zika يقول...

      اولا البلكاش اللي ورا الكلام ده حلو بس بيلخبط
      ثانيا
      ايه زعبوله دي
      والله من حقها تطردكوا بره البيت ال زعبوله للجميع ال
      عموما
      انا باقترح
      الولد لو ولد تسموه زيكا او ممدوح او دوحه .. او ديحه
      لو الولد بقا طلع بنت اقترح تسموه
      مديحه . مدايح .. دوحه .. دودح .. ممدوحه
      كده يعني
      حيث ان هو سواء طلع ولد او بنت ي
      يطلع حاجه محترمه يعني :P

      بطوط حبوب يقول...

      Sarah Sobhi

      يا امى ما خلاص مضت واللى كان كان وبنا المحاكم بقى بعد كده

      لعيديه دى اسااااااااسى ؟
      انا عرفت ليه انا قلبى شايل من ناحيتك من زماااااان :P
      ربنا يوفقك يارب وعقبالك :D

      **************************
      وومن
      اه اصدق :D
      خلينا نحلم انه هيبقى ابن ناس كويسه :D
      نورتينى يا ميرا

      **************************
      صيدلانيه طالعه نازله
      كويس والله انك اتكلمتى فى موضوه الجميعيه يا دكتوره

      هااااااااا هتبرعوا ليا بكام انا خلاص هبقى خال وورايا مصاريف والصديك لصديكه :D
      وجارى البحث فى الاسماء
      تشكرات يا فندم
      :D

      ****************************
      فكرة من الزمن ده

      لأ ما انا قلت احنا ( بج هابى فاميلى ) الحمد لله
      واحنا اول ناس ندخل المائده فى المباحاثات الاسريه :D

      نورتينى بجد وشكرا للزياره

      بطوط حبوب يقول...

      زيكااااا

      ما تاخد الواد وتخلصنا محسسنى انك شريك فيه
      العب بعيد يا بنى ومش هنسميه حاجه فيها حرف الحاء خالص بيس يا مان

      marwa mahdy يقول...

      على زعبله ان يسمع كلام خالو وميسمعش كلام تيته .. لان خاله نفسه مبيمعش كلام تيته
      عجبني البند ده,خايفه النونو تأثر عليه او عليها ويكون بطوط او بطوطه صغيره..........البوست لذيذ كنا مفتقدين بوستاتك يافندم...........

      لماضة يقول...

      هههههههههه
      انت مشكله يا بطوط
      قرار الاخير
      ان زعبله خطيبي من الان
      ربنا يكرم زعبله ويجيبه بالسلامه
      حلوة قوي صورة البروفايل والثيم كمان

      صاحب المضيفة يقول...

      لكن لازم يبقى في مرجعية في الناحية القانونية للنزاعات بين الطرفين وعليه فأنا أقترح أن تكون تيتة هي الحكم وساعتها هيكون كل واحد فيكم بيلزم حدوده حسب القرارات الدولية المعتمدة

      نعكشة يقول...

      لأ طبعاً قرار ديكتاتوري
      يا اختي انا هاخد ابنك محرم
      كدة
      لازم عزم و شاكيرة
      قصدي شكيلة
      شكيمة يا بنتي
      ...
      منا لما فكرت قولت مش هتستخدموه بقة فبلاش امنع عنكوا حاجة
      واهو يبقى تنويع
      :D

      سلامٌ عليك

      IBN BAHYA يقول...

      من غير مجامله
      كلامك حلو .. بس مدونتك تدوخ .. إيه يا عم اللفة الطويلة دي عشان نبارك بزعبلة؟؟ ولا عشان زعبلة يعني يبقى لازم يدوخنا؟؟؟
      تحياتي يا عم ..

      بطابيطو تري يقول...

      اولا جميل جدا فكرتني بايام ال360 والله
      ثانيالو محتاج زعبله تعالي خدلك شوال زعبلات من اللي انا بديهم خلاص حياتي كلهامزعبله وعجلنب البند8 في قررلاك جدا خاصى الراس لنا بردةبتفقع من الموضوع دة
      ثالثا صورتك القدييمه جميله بس الجديدةبتنم عن كبر العمروالمفروض رجاحة العقل مع بعض الالام في المفاصل
      وبلنسبه لاسامي لولد زعتر لبنت حبهانه عشان يبقي اسم مفهوم وليه ريحه بدل نانا وتاتا اللي طالعينلنا فيه ولو مش عجبك عندك قوائم الفصل 100 اسم اختار منه اللي يعتجبك

      بطوط حبوب يقول...

      marwa mahdy
      زعبله لازم يتأثر بيا طبعا مش الواد لخاله والبت لخالها ولا ايه
      :D
      ادينى بكتب كل ما بتوحشونى
      :D
      منورانى دايما يا دكتره يارب


      ********************************

      لماضة
      مقدرش اوعدك بزعبله خصوصا انى مش عارف هو ولد ولا بنت
      فاحنا نعمل اتفاق لو ولد خديه ولو بنت يبقى عريسها تتصرفى وتجبيه
      بيس؟
      :P

      *******************************
      صاحب المضيفة
      المشكله يا خالو لو زعبله طلع شكل خالو مبيسمعش كلام تيته :(
      ساعتها لازم نلجأ لسلطات اعلى والموضوع هيكبر
      انا قلت نلمه دلوقتى ونخليها تمضى وخلاص
      منورنى دايما يا انووووووس

      ******************************
      نعكشة

      انا منفعش ابقى اختى ولا يا بنتى خالص
      انا محمود :(
      بس ومش هقولك حاجه تانى :(
      وعليكم السلام
      ********************************
      IBN BAHYA
      اهلا بحضرتك والله نورتنى بجد
      رغم انى مفهمتش يعنى ايه المدونه بتدوخ ؟
      بس شكلها حاجه حلوه صح ؟ :D
      عموما حضرتك شرفتنى بالزياره ويارب تتكرر

      *************************************

      بطابيطو تري

      انتى جايه عشان تساوى زعبلاتك بزعبلتنا؟
      هزلت
      ادب يا بنت
      وهاتى قايمه الفصل معاكى المره الجايه عشان ننقى اسماء
      ال زعبلنا يقارن بزعبلاتها ال

      ๓คภ๏ภค يقول...

      لوووووولووووووووووووووولوى انا جييييت مدام ف زغاريط يبقى انا جيت

      يا عثل يا بطوط هتبقى خالو الله ربنا يراب يقوم دودى بالسلامة ان شاء الله

      ويوصل استاذ زعبلة بالف سلامة

      وبجد الثيم حلو اختياراتك يا مى هههههههههههههه

      يعنى مى اختارت ومنونا عملت هيدر انت عملت ايه بقه ؟؟

      بكرة يجيلك زعبلة يطلعه عليك ههههههههههه

      انا بجد اللى مش عارفة اقولك ايه وبجد كان نفسى اوى اعملك حاجة احلى من كده

      يلا متعوضة ان شاء الله ف المرات الجاية

      وعقبال يارب ما اجى ازغرطلك يوم فرحك يارب اللهم اميييييين

      بطوط حبوب يقول...

      ๓คภ๏ภค
      يا بنتى مى اختارت الثيم وانتى عملتى الهيدر وانا اللى ظبطت بقى المسائل
      حد عاملكم الكومنتات زى ما انا عاملها

      كومنتى منور واسمكم كبير فى اكتر من كده?
      الناس مبتقلش الحمد لله ابدا وكتر خير

      هسامحك بس عشان قلتيلى عقبالك وانا هردد وراكى واقول امين امييين

      ويارب وانتى كمااان وكل شاب وكل فتاه مسلم ياارب

      ايوشة يقول...

      الف مبروووووك عقبال ما يوصل بالسلامة وانت بنفسك هتقطع العقد الاول اللى كاتب فيه بنودكم هههههه انا عيال اخواتى هيجننونى

      سمو الأميرة سارة يقول...

      هههههههههههههههههههه لو مزنوق في زعبلاية يا بطوط انا عندي زعبلة ع الفيس بوك
      مفجوووووووع وما بيتمرش فيه أأكله واصرف عليه دم قلبي وف الآخر يقول دااادي
      يعني مش بيقول خالو حتى :D

      ربنا يتم لها ع خير يارب ويفرحكم بذريتها ويبارك فيها

      وانا مع وومن ع فكرة مع اول جاعور من جعاجير ( هو جمع جاعورة ايه ؟؟ ) زعبلة باشا هتتبرى منه اساساً

      ستيته حسب الله الحمش يقول...

      طب كنت سألتني قبل ما تمضيها بالديموقراطية على القرار:)
      بص يا سيدي
      بعد بالضبط عشرة ايام فقط لا غير
      هي اللي ها تلزمكم جماااااااااااااااااااااء بالبنود كلها
      وخاصة انكم تاخدوا زعبولة بجعورته أو جعورتها بعيد عنها علشان تدوق طعم النوم
      ها تقول لها ها ألمس الراس
      إلمسها
      ها ألعب فيه البخت
      إلعب
      صدقني يا زكي رستم يا خويا
      أم زعبولة ها تندم علشان اضطرت توقع تحت ضغط "الديموقراطية" وها تحزن قوي على البنود اللي كانت حطاها لكم
      ربنا يرزقها صالحا معافا يارب

      واحد من الناس يقول...

      هههههههههههه

      أولا الثيم رائع جدا ومريح للعين وألوانه متناسقه وفكرته كمان هايله (أنا كنت حاطه لمدونتي فتره وشلته بسبب صحابي اللي بيعترضوا على كل حاجه)

      ثانيا أنا شايف إن أم زعبله معاها حق خالص مالص يعني مهو مش معقول هي تتعذب في حمل وولاده وخلافه ويكون زعبله في الآخر ملكيه عامه يبقى حرام يعني

      ثالثا بالنسبه للأسماء المقترحه

      لو ولد: يوسف - سيف - زياد - معاذ - عمر

      لو بنت: سلمى - شهد - ندى

      بس كده

      سلاموز

      mohamed ghalia يقول...

      يانهاركم الووووووووووان قاعدين تتفقوا من ورايا
      ياخسارة تعبى وشقايا معاكم طول السنين الى فاتت
      مع انى مش فاكر عملت ايه بس اكيد عملت ههههههه
      بقى الواد ولا البت ليها خالين بس وانا ايه كيس جوافة فى العيلة يا جرعااااااان ولا ايه
      إزاى مليش نص فى الإتفاقية
      روحوا يا أولاد خالتى قلبى غضبان عليكم والى قلبى يغضب عليه لهيكسب ولا هيربح هيخليه طول عمره فى الأوفسيد

      بطوط حبوب يقول...

      آيوشه هانم

      بدأت اخاف من التوقعات المرئيه دى :-S
      ربنا يستر
      نورتى المدونه يا فتدم
      **********************************
      سمو الأميرة سارة

      احنا مش مزنوقين فى زعبله احنا بنجهز نفسنا له :D

      ربنا يكرمك يا رب ونفرح بيكى قريب قولى امين
      وجمع جاعوره
      جعورز :D
      ************************************
      ستيته حسب الله الحمش

      بلاش تخوفونى بقى هى كده ولا كده هتقعد معانا كام شهر بس

      :)
      بس برضه احنا اقدها واأدود

      شكرا جدا لزياره حضرتك ليا اسعتدتنى بجد

      ************************************
      واحد من الناس

      انت من الاعداء يا ابنى خلاص
      داخل تدافع عن ام زعبله عندى
      دى اخرتها
      اذهب ...وتعالى بكره

      :)

      ميرسى على كلامك يا فندم وعلى كومنتك تحياتى لك

      ***********************************
      mohamed ghalia

      انا شفت الاسم دا فين قبل كده ؟
      فين؟
      الله اعلم كده تقريبا قريب ذكى جمعه؟
      :D

      امشى ياد من هنا ملكش عننا زعبلات
      لما تبقوا تجيبوا مش هنلعب فى بتاعكم
      دا عالم ايه دول يا ربى :D

      Sharm يقول...

      رحمة

      أم .. بوبه يقول...

      أسلوبك جميل جدااا فى سرد الحوار جو أون

      pinky يقول...

      samooha SAMAR
      :D