2008/02/22

لا تستحلفى لى دا انا عملت الى على



من زمان من اول ما بدأت تدوين  وانا بشوف مدونات كتير بستحلف فيها البنات للولاد او بالاخص - عريس المستقبل - ويقعدوا يقولوا لما يجى هنعمل فيه وهنسوى فيه فعشان كده كتبت رساله لزوجتى فى المستقبل



اقولها ان لو اتاخرت مش انا السبب ......والله السبب اما امى واما عمى- اخو ابويه مش جوز امى ههههههههههههههه- احسن عمى جنب امى كده ممكن تفهموا غلط المهم انا عمال اتحايل عليهم- كل واحد لوحده ما انا فهمتكم بقى - يجوزونى ويصرفوا على وعليها وهم الى مش راضيين معرفش ليه
اما غريب تصرفهم بصحيح!!!!!!!! ملهومش حق؟!!!!!

المهم انا قلت اكتب لها انى مسكتش وانى حاولت وهحكى قصه واحده بس وفيها كفايه

لما كنت فى سنه اولى فى الكليه رحت قلت لامى عايز اخطب - ......... طبعا هى خدت الموضوع تهريج واقعدت تهرج
سبتها واتصلت بعمى يا عمى انا جايلك

اوك تنور يا محمود جاى امتى ؟ اقولك اتغدى معايا بكره بعد الكليه وبات هنا وابقى روح الكليه من عندنا علطول

اوك

المهم خلصت كليه ورحت له

بقوله عمى عايز اقولك موضوع بس متقولش لامى

ضحك وقالى ايه عايز تخطب؟؟؟!!!

قلتله اكيد امى قالتلك

قالى لا والله بس عمك دكتور فى الكليه - كليه هندسه- بقاله يجى عشرين سنه فبيشوف زيك كتير

المهم ايه رايك
اقولك على حاجه انا موافق روح قابل اهلها وانا اجى بعدك

انا قلت انت فاكر انك بتعجزنى طب والله لروح لاهلها

وفعلا رحت لامها - ابوها متوفى- وكان يووووووووووووم

امها كانت عامله حادثه الصبح وعنيها مربوطه يعنى شيفانى بعين واحده ............جابت لى إ زازه بيبسى صاااااااااروخ

الاول انا رحت قابلتها فى المستشفى ومن غير معاد

وهى دكتوره اسنان ومكنش فى غيرها فى الاوضه ست - وباقى الاوضه رجاله -وكانت بتخلع ضرس بس كانت مش عايز اقولكم بتعمل ايه تقريبا بتخلع بق العيان مش سنانه بس ..............انا قلت يا نهار اسود شكلها شريره يا عم الحج وكمان رابطه عينها يوم مش فايت شكله

بس والله كانت ست لطيفه خالص وقعدت تقولى يا دكتور - وانا فرحان اصلى كنت فى اولى ومكنش كتير بيقولوا لى يا دكتور - المهم قالتى من الاخر متكلمش بنتى وانت شكلك محترم وان شاء الله لو ليكم نصيب تتجوزوا

طبعا انا قلت يا شماته عمى فى

المهم هو اتصل بي قالى ها رحت قلت اه

قالى وقالوا لك ايه ................انا قلت مينفعش اقوله ان قفايا بيأمر عيش فقلت اشوف كده هيعمل ايه لو قلته اه

قلته قالوا لى تعالى انت واهلك

الراجل اتخض قالى لا دول عبط بقى يا بنى انا بعتك هناك عشان يرفضوك وتعرف انه مينفعش عايزها تيجوا منهم مش منى

طبعا انا زعقت واعدت اقول بصوت عالى انت كده بتحرجنى مع الناس وقلتى ليه اروح ومش شغل عيال ولن انسى لك هذا الموقف واقفل بقى

بس انا بعد ما رجعت من عند عمى رحت قلت لماما مش عايز تيجى ياااااااااختى انتى فكرانى من غيرك هحتاس لا والف لا
انا قلت لعمى وهو جاى معايا

طبعا اتصلت بيه وقالتله ازاى يا كتور تقول لمحمود كده

وهو يقولها يا ستى مقولتوش حاجه

وانا اقول قالى وبيضحك عليكى

تقوم تتصل تانى واتخانقوا جامد وانا مالى انا عايز اجوز وخلاص ان شاء الله يضربوا بعض مش يتخانقوا بس

نسيت اقولكم تفاصيل الحوار الى دار بينى وبين عمى

قالى بص يا محمود يا حبيبى بالعقل كده انت هتتجوزها ازاى دلوقتى هتصرف عليها ازاى

قلت له انت فاكر انى مفكرتش فى ده قبل ما اجيلك لا فكرت فيه كويس

بص يا سيدى انا مش لى ورث ابويه

قالى يابنى الفلوس ده هتحتاجها بعدين فى بدايتك حياتك انت عارف ان عياده اسنان بتكلف كتير

قلتله اصبر بس انا مش هاخد منهم كتير انا حسبتها الجوازه كلها مش هتكلف غير 25 الف - طبعا ده قبل الدهب ما يغلى الله يسامحهم ضيعوا على الفرصه اهو حتى لو كلنا فشكلنا الخطوبه كنت هكسب من فرق سعر الدهب - ومش هاخدهم على بعض

بص قول خطوبه هجيب دبله ومحبس وانسيال دول هيكلفوا قول 2.500جنيه شغال

قالى ماشى

قلتله طيب وسنيتن خطوبه كل مناسبه هشترى هديه متقلش عن 600 جنيه - شفتوا الكرم - فى عشر هدايا فى السنه يبقوا 6000 جنيه كمان شغال

وهو مش قادر يمسك نفسه من الضحك قالى شغال

قلتله طيب بعد السنيتن نتجوز ونجيب العفش والذى منه والشبكه قول يا سيدى كل ده هيكلف 20 الف مهو اهلها هيراعوا انى لسه فى الكليه

وبعدين اخد كمان 7 الف احطهم فى البنك كل شهر اسحب منهم بتاع 300 جنيه مش من فوايدهم عشان حرام - دا جنب مصروفى طبعا- فى 12 شهر فى سنتين برضه اهو دول بتاع 7 الف وبعدين اتخرج واشتغل

قالى بس دول اكتر من5 2 الف دول اكتر من 40 الف

قلتله يعنى مش مشكله كبيره واهو كده كده كانوا هيتصرفوا فى الجواز دا حتى الجواز بيغلى كل يوم

المهم هو مسك نفسه من الضحك بالعافيه وقالى الكلام الى فوق بقى

وخلص الموضوع سبحان الله

والله الواحد كان جامد بجد

اظن انا كده عدانى العيب وعملت الى على وكنت عايز اتجوز ومش قصدى اتاخر على الى هتبقى مراتى فلو سمحتى بلاش تستحلفى لى ولو عايزه رقم تليفون عمى وامى عشان تستحلفى لهم هبقى ادهملك لما اعرف انتى مين... كده عدانى العيب ولا ايه رايكم؟؟؟؟

هناك 49 تعليقًا:

shirry يقول...

هيه هيه
انا اول زيارة واول تعليق
علي فكرة البوست حلو
تحس كدة ان الحاجة ام الاختراع فعلا
دا ايه الافكار العبقرية دي

لاء علي فكرة عندك حق انت كدة عملت الللي عليك وزيادة

فعلا عداك العيب خد العيب اللي بعده وخلاص
اتمني اننا نبقي اصحاب وتنورني
وانا طبعا ليا الشرف

مها يقول...

أخييييييييييييييرا عرفت أدخل على التعليقات... بقى لى ساعة باحاول قلت المرة دى يا قاتل يا مقتول .. أتارى الحكاية كلها إنى لازم أدوس على زرار التاب فى الكيبورد عشان أدخل على مربع التعليقات!!!!!!!! العلم نورون!!!! المهم أنا قريت مواضيع كتيرة هنا عايزة أعلق عليها .. خصوصاً البوست بتاع الجارية.. بجد فطسنى م الضحك .. عندك كاريزما رهييييييييبة يا محمود .. بجد .. مالكش حل .. أكيد البنات بتجرى وراك وإنت اللى مش سائل "فيهن" وكل كلام البوست الأخير ده أونطة بس عشان تخلى مسئولية!!! ههههه
المهم يا ريت تكتب بوست بقى تتخيل فيه إنك فعلا فعلا اتجوزت ب25 ألف جنيه!!!!! يا ترى حالك هيبقى ايه؟؟؟؟

HeBa يقول...

أيوه كده

كده تمام ياريس

ولو أني مكنتش أعرف موضوع التاب ده بس كويس أهو أكيد هينفعنا بعد

مدونتك حلوة جدا .. موتني من الضحك

أسلوبك الساخر جميل

بس عايز تتجوز وأنت في سنة أولى كلية يا مفتري

ولو أنه حل حلو لمشكلة العنوسة لو كل الشباب عملوا زيك كده

تقبل مروري

وأكيد هزورك كتير

Empress appy يقول...

طيب والله افتكاسه فى الجون يا دكتور برافو عليك بس فعلا انت كدا عداك العيب واتزحلق
ربنا يكون فى عون ماما بتاعتك بجد هههههههههه

simple girl.. ..simple dream يقول...

البوست جامد ودمه خفيف
ربنا يكون فى عون مامتك وعمك على فكرة
خلاص يا سيدى خلص انت بس كلية وانا هساعدك فى موضوع العروسة دة
ماهو برضه الدكاترة لبعضيهم

Marwa Friday يقول...

يااااااه يا محمود
والله انت جميل..

انا فعلا بيصعب عليّ ان واحد ما يتجوزش عشان شكليات!.. طيب هقول لك على حاجة.. حتى لو اتخرجت هيبقوا عايزين كيت وكيت وكيت!.. والله هتفرج.. وما تستعجلش.. وهي كمان ما تستعجلش- هي صغيرة طبعا- وطالما متمسكين ببعض يبقى ربنا هيكرمكم ويجمعكم سوا إن شاء الله.. الصبر مفتاح الفرج
انت فكرتني بموضوع كتبته في بص وطل متعلق باللي بتقوله
http://www.boswtol.com/5gadd/nsahsah_184_06.html

ربنا يوفقك يا بطوط ويهديك للأصوب

بطوط حبوب يقول...

شيرى نوتينى
ومدونتك زى العثل المعثول
واكيد احنا من دلوقتى اصحاب دا شئ يشرفنى اكتر

بطوط حبوب يقول...

مها اخيرا
انا صلحت المشكله وومنتظر تعليقاتك عن القديم والجديد
والفكره الى بتقوليها تحفه بس مش هتطلع حلوه زى بوستاتك بس نحاول وربنا معنا

بطوط حبوب يقول...

هوبه نورتنينى
شوفى انى كنت خايف على مستقبل مصر وولادها انما محدش قدر جهودى بالذمه مش المفروض يعملوا لى تمثال فى اكبر ميدان فى مصر ويعملوا يوم بطوط زى يوم فالنتين

بطوط حبوب يقول...

يكون فى عون ماما؟
ليه ؟
دا هى الى مش موافقه انى اتجوز مش العكس ههههههههههههههه

بطوط حبوب يقول...

سيبل جيرل سيبل دريم
نوتينى بجد
ولى عندك طلب العروسه الى هتجيبها لى لما اخلص لو ممكن تطمنيها وتخليها تقرا البوست ده

دكتورة سنان يقول...

ونعم الرجال والله ياابنى
عامة انا قبل مااتخطب كنت اقعد مع صحباتى ونفضل نتفنن فى طرق تعذيب خطابنا لما يجوا ونكزززززز على سنانا ونعمل فيها ابو الغضب ولكن بعد الخطوبه لقيتنى حتى لو هو اللى زعلنى بروح اصالحه وصحابى يقولوا لى فين الانتقام ؟؟ اقولهم استنواااا بس لما نكتب الكتاب واضمن الجوازه وهتشوفووووووا
احم بس طبعا مش هعمل حاجه يعنى خالص ده هو الحب الحب يااخواتششى (عشان لو دخل وقرا ولاحاجه )

بطوط حبوب يقول...

مروه جمعه
على فكره مدونتى الى على ال 360 فيها حد بحبه اوى اوى اوى عشان اول واحد علق عندى
وانتى هنا بجد لما بشوف تعليقك ببقى فرحان جدااااااا
وبص وطل كتير بيقولوى ادخله بس عمرى ما جربت دخلت وشوفت موضوعك كانت عسول بجد
وعلى فكره الموضوع فكرش

بطوط حبوب يقول...

وانا اضمن من يا د نوسه
افرضى كانت شريره انا قلت اكتب ده عشان ابقى عملت الى على وربنا يوفقك ويسعدك مع الحب الحب هههههههههههه
اوعى يكون فى سنه تالته هوه كمان تبقى واقعه ههههههههههههههه

راحــله يقول...

ما شاء الله المدونه جميله وفكرتها حلوة قووى والاسم والشكل ...

احييك على تفاؤلك وعلى ايجابيتك هو ده الكلام ..

khobayb يقول...

هههههههههههههههههههه

عداك العيب ، ونط وفط وبط

يا رب نفرح بيك قريب إن شاء الله

قبلة الحياة يقول...

8
8
8
8
اديني هقول يا بطوط من غير زق اصبر عليا
-*-*-*-*-*-

كل مناسبه هشترى هديه متقلش عن 300 جنيه - شفتوا الكرم - فى عشر هدايا فى السنه يبقوا 6000 جنيه كمان شغال

كل مناسبه هدية وكل هدية 300 جنية ليلته مش فايته خطيبي فكرني اتصل بيه بعد ما اخلص كتابه التعليق

هطلع عنيه

يعني يا خويا وقعت العيله في بعض مامتك وعمك ولا اتجوزت ولا شفنا في ايديك ال 25000 جنية

لااااااااا اطمن مجرد ما زوجتك المستقبليه تقرا البوست ده هتعيش بعدها ايام مش عايزة ااقولك بئه خليها مفاجئة من مراتك ان شاء الله

وعن اذنك بئه الحق اتصل بالواد خطيبي قبل ما ينام

عشان يظبط نفسه على كوابيس سعيدة بدل احلام سعيدة يا خطيبي يا حبيبي

بجد بوست روعه واسلوب عسل اوي

تسلم ايديك يا بطبوط على الضحكة

تقبل مروري

وفتكم بعافيه

kareem azmy يقول...

ههههههههههههه

اسلوبك حلو قوي
و ساخر جدا

عموما يا سيدي ربنا يوفقك
بس فعلا بلاس تستعجل ع الجواز
انا شايف انك تتخرج و تشتغل الاول

تحياتي
كريم عزمي

Desert cat يقول...

ياباشا ده انت كدا عداك العيب وأزح كمان
الله يسامحه بقى عمك
كان زمانك مخلف عيلين دلوقتى

بطوط حبوب يقول...

راحله

نورتى مدونتى وشكرا على كومنتك الرائع


خبيب
يعنى كده قشطه ؟ طيب ماشى الله يريح قلبك

بطوط حبوب يقول...

قبله الحياه

سيبى خطيبك ينام ده وراه ميت حاجه اكيد
عمال يقول ال هدايا ال مش نتجوز الاول
دا انا بقول كده عشان عشان انا ع البر
حرام عليكى سبيه فى حاله

بطوط حبوب يقول...

كريم عزمى

نورتنى يا ملعم
وشكرا على الكومت وشكرا على النصيحه



قطه

يعنى كده مش هتستحلف لى وعلى ضمنتك

أبو عمر - الصارم الحاسم يقول...

وان شاء الله ربمنا يرزقك بالزواج
:)

اسعى فقط اول ما تتخرج..على الكسب وربنا هيرزقك بالكسب وبالزواج

علوة يقول...

دلوقتي بس عرفت
انت لما جيت عندي مفهمتش ليه
يا راجل ده الموضوع كله تخبيط في كلاكسات
..
رغم إن الموضوع مهم بس تناوله أي كلام
بس انت دمك خفيف
الصبر والصلاة يا ولدي
صباح الفل

المـــفـــــــقــــــــوعـــــة مــرارتـهــا يقول...

اول مرة الاقي شاب عاوز يتجوز لأ عداك العيب ومش من حق عروسة المستقبل تزعل منك
بس اذاي حسبتها كدة جوازة ب25 الف بس يابلاش انت بتحلم؟

shahy يقول...

هو كل اللي اسمهم محمود غلباويين كدة والا اية؟

الله يسامحك يعني الواد شينيور ابني هايعمل فيا كدة
طيب ربنا يستر

هاروح اخد لفة في المدونة عن اذنك

تحياتي

علوة يقول...

بطوط
ايه يا عم انت واخد الموضوع على أعصابك كده ليه ؟
أنا كده .. بقول رأيي بمنتهى الصراحة وإسأل اي حد من إصحابي هنا يقول لك انا بعمل ده طبيعي
هههههههههه
أمال الناس بتكرهني ليه يا عم ؟
عموما هي أراء يا معلم انت قلت رأييك وانا مزعلتش
مش هقول لك حقك عليّ طبعا لإني مش غلطان في حاجة
وانت كمان مش غلطان في حاجة غير القمصة دي
بخصوص غبائك وتفاهتك انا متكلمتش عنهم معرفش انت فتحت سيرتهم ليه
البلوج مفتوح يا معلم
صباحك فل
الرد نسختين واحدة عندي وواحدة عندك
بالمناسبة :
أنا ممش هضايقك بصراحتي تاني
بس لو احتجت حد بيقول رأييه بصراحة فل
خليك أكبر من كده

Unknown يقول...

خلاص هية عرفت سبب تاخيرك
ربنا يكرمك

بطوط حبوب يقول...

طب بص يا عم عيلوه


حط نفسك مكانى اول مره اعلق عندك ولالاقى تعلثيقك على تعليقى يفيد بطريقه مباشره - مش غير مباشره خالص- انى غبى

وبعدين بعدها بتلات دقايق وبس بالعكس بقى انت الى اول مره تدخل مدونتى وتقولى
رغم إن الموضوع مهم بس تناوله أي كلام

حط نفسك مكانى بالله عليك مع العلم ان المدونه لسه جديده اصلا


سمى كل دووووووول واحد
اتنين بقى انا مش انيس منصور ولا كاتب صفحى ولا بعتبر نفسى بعرف اكتب اصلا- والله مش بقول كده- انا بعرف اهيس لو شايف تهيسى اى كلام وملوش لزمه
فده طبيعى جدا لانه تهييس مش مقال صفحى ولا اى حاجه



ويا عمونا انت تنور المدونه ورايك على عينى وراسى بس هو جه المره دى مع حيثيات تانيه فقلت ده ناويلى بقى وهيستلمنى

وحصل خير

من سختين برضه

Gihad N. Sohsah يقول...

المهم متستعجلش ...عارف عمالة زي ايه كلنا واحنا صغيرين كان نفسنا ندخل المدرسة صح؟
في اول يوم لينا عيطنا وقلنا عايزين ماما

Noha El-arabi يقول...

اخيرا المدونة كده شكلها احلي كتير كتير
انا المرة اللي فاتت عشان احط تعليق كنت محتاجة بيل جيتس شخصيا يساعدني
الا هو صحيح ليه كل طلبة طب دول بتجيلهم فرة انهم عاوزين يخطبوا اول ما يدخلوا كلية؟؟ عشان انا عاصرت الموقف ده بنفسي
بس لو الحكاية علي اربعين الف جنيه كانت تفرج ده كان ايام الرخص يا راجل
دلوقتي انت محتاج تبأ اقطاعي عشان تجوز

غير معرف يقول...

عملت اللى عليك ايه بس... هو انت فاضح الدنيا فى كل حته كده... هنا وعلى ال360... يابنى ربنا يهديك لعيلتك... مش بقولك عيله زى السكر وكوميديه جداااااا.... على فكره حزر فزر ايه خلانى افتح المدونه انهارده؟؟؟... كنت داخله على مدونه بتاعت واحده صحبتى فى الصيدليه لسه اخده اللينك بتاعها من يومين... ولقيت تعليق بتاعك هناك... حقيقى الدنيا صغيره... بس واضح انك اخدت وضعك اهوه هنا والناس بدأت تعلقلك... فين ايام زمان لما كنت حاسس انك بتتكلم وترد على نفسك (;... اظن عرفت انا مييييييييين... لو معرفتش قول هناك على 360 وانا هرد عليك... متكتبليش رد هنا لانى مضمنش ادخل هنا تانى... سلام

علوة يقول...

بطوط
"
ورايك على عينى وراسى بس هو جه المره دى مع -حيثيات تانيه- فقلت ده ناويلى بقى وهيستلمنى

وحصل خير
"
كده يبقى حصل خير بجد يا حج
صباحك فل

غير معرف يقول...

انا اول واحده علقت هنا... كده نسيت ... مااااااااشى... عموما مش جديد عليك :(

ابو صهيب ( الجمعاوي الاصيل)سابقاً يقول...

هههههههههههههههههه

جامده بصراحة

انطلاقة قوية وننتظر المزيد

Rosa يقول...

ههههههههههههههههههههههههه
لا ده عداك العيب و عدى الي وراك كمان
هههههههههههه
دمك خفيف موووت
يعني بصراحه بصراحه هيا متقدرش تفتح بقها
وبعدين دي لازم تحس معاك بمنتهى الأمان كنت عامل تخطيطات جهنميه
يعني مش هتقلق ابدا
وانا من هنا احب اوجه نداء لكل الاعمام و الامهات ماتعملوش في ولادكوا زي ماعملتوا في محمود احسن عرايسهم يستحلفلكوا
هههههههههه

shahy يقول...

القديم احلى وروح شوف بنفسك

عندك الف حق

عجبني جدا موضوع عصاة ابي

شاطر يامحمود ويارب اشوف محمود ابني زيك كدة


تحياتي

الفارس الملثم يقول...

بداية اسعدني جدا اول مرور ليا بطوط حبوب في مدونتك المتميزة ومدونة تتميز بخفة الدم الشديدة

طبعا واضح انك كنت متفائل جدا تجاه الحياة بدرجة انك عاوز تتجاوز وانت لسه في اولي كلية , عموما برده متفقدش الامل في الجواز ولا يسقط حق وراه مطالب ...

ولو ان سعد زغلول جاب الخلاصة من زمان وقال مفيش فائدة

yas يقول...

البوست دمه خفيف اوى بس انت مستعجل اوى كده ليه على الجواز
مدونة جميلة مبسوطة انى اتعرفت عليها
سلام

(احمد سكر ) يقول...

دمك زى العسل يا بطوط

حتى ردودك زى الشربات

ههههههههههه

ال هديه ب 300 جنيه ال

ربنا يوفقك

تقبل مرورى

اخيك احمد سكر

Mona Shereif يقول...

هههههههههههههههههههههههههههههه

بجد بجد بجد
زى العسل

بس صحيح هما ليه بتوع طب عايزين يتجوزا بدرى
فى ايه؟؟؟؟

عجبنى اوى المترو رار
علشان انا بعانى من نفس المشكله بس مش مترو بقى ولكن القطااااااااااااااار

ماشاء الله على المدونه جميله

أم أحمد يقول...

برافو عليك وعداك العيب وقزح

Moustafa` يقول...

رجعتنى لأيام الشقاوه
بقى انت منوفى وقيسناوى كمان
على كده احنا جران يا دكتور
انت عملت اللىىعليك وبزياده
اخلع بقه ياعم قبل ما تدبس ف مصاريف
نصيحه اكتب كتاب علطول
والدخله تبقى متأخره
استمتعت بذكرياتك اللى بتنساق بسلاسه
تحياتى كتير

maha zein يقول...

يوه يا جدع اول يا عم مرة ادخلك فيها علي المدونة الاقيك دكتور سنان وانا لسة حاشية ضرسي امبارح وعصب كمان وكرهت دكاترة الاسنان و...ولا بلاش.
حلو اوي البوست لانه واقعي وحقيقي وشكلك كده معندكش صبر ...اصبر كده لما تتخرج وتبقه دكتور اد الدنيا وبعدين تستني كده قيمة خماشر سنة عقبال ما تفتح العيادة وتربي زبون بعدين بقه تدور علي الحلوة ام سنان لولى بعيدن...لا انت هتضحك علي وتسيبني احكيلك قصة حياتك...ربنا يرزقك ببنت الحلال بسرعة عشان ترتاح بقه

غير معرف يقول...

هههههههههههههههههه
طيب ياسيدى هقول ال قول ياسيدى قول ال
اللى عايزة اقلهولك بقي يكون في عون الماما والعمو بتاع انت هههههههههه
بس كويس انه سمع كلامك للاخر

بس اهو انت عملت اللى عليك وعداك العيب واتزحلق ههههههههه

المتمردة يقول...

ومستعجل ليه..البنى ادم دايما بيضحك على اللى عمله قبل كدة بس بعد فوان الاوان

..بس اسلوبك جميل بجد وكمان تحس انه بيحكى كلام ناس كتير مش كلامك لوحدك

helium atom يقول...

i liked the title"لما الوله يجى"more

بطوط حبوب يقول...

انا بعلق عشان ابقى الاخير
مش فاكر ليه معلقتش ساعه لما جت الكومنتات دى الظاهر كان فى سبب

هيليوم انا فاشل فى اختيار العناوين

Nairy يقول...

مش عارفة ليه الناس بتعامل الشخص على انه صغير بسنه فقط...مع ان الدماغ هيا المهمة والعلم كمان

ايام الرسول كان اللي قدك بيقود جيش بحاله والرسول والاف مؤلفة تئتمنه على ارواحهم ورسالة دين جديد...مش مجرد شابة بريئة عندها حماتك هاتكلك بعد الجواز لو دوستلها على طرف

بوست يفطس من الضحك