مدونه بطوط الاباحيه

من زمان كده عرفت موقع بيعرفك اللى دخل مدونتك عن طريق مواقع البحث .. كتب ايه عشان يدخل مدونتك.

وطبعا بلاقى كلمات كتير منطقيه زى " بطوط " او اى كلمه ليها علاقه ببوست انا كتبته. لحد كده تمام جدااا .

اكتر حاجه بقى  بتغظينى لدرجه مبالغ فيها ان حد يكون بيدور على موقع اباحى ويقوم جوجل - اسم النبى حارسه وصاينه - جايبه زى الشاطر على مدونتى على اساس انه هيلاقى فيها كل ما لذ وطاب .

مفيش مشكله برضه بس انا نفسى  اقول لجوجل يا سيدى انا معنديش مانع تجيبلى الناس دى ... بس بصراحه يا جوجل -  لو تسمحلى اشيل الالقاب - انت بتجيب لى ناس زباله.

اه والله يا جدع .. انت لو جايبلى ناس بتدور على اوضاع عاديه فى قله الادب .. انا مكنتش هعترض ابدا .. بالعكس انا كنت هفرح .. ان فى شباب لسه مستقيم وبيدور على الحاجات دى عندك مش عند الغريب يعنى.

انما اللى بيغظنى منك انك بتجيب لى ناس بتدور على قله ادب وبقله ادب كمان ... كده والله كتير

يعنى مره لقيتك - الكلام لجوجل - باعتلى واحد بيدور على "جنس للمنتقبات" .. طب دا بزمتك يا جوجل- دا لو عندك زمه -  مش يستاهل تتف عليه وعلى اهله .. تقوم- انت اللى تجيبه مدونتى. سبت ايه للغريب .. طب ليه؟؟ قولى ليه وانا ارتاح؟

ولعلمك انا متغاظ منك مش لأنك جبته مدونتى .. انا متغاظ لانك مقولتليش الواد ده لقى اللى بيدور عليه ولا لأ؟ ولو لقاه يبقى ازاى يعنى ؟ ..ربنا يهديه ياااااارب .. بس شكله واد محترم حتى لما بيدور على قله الادب بيدور عليها بادب ربنا يقلل من امثاله يااااااارب.

وانت يعنى يا جوجل - لا مؤاخده يعنى - زى العبيط اى حد يبحث عن اى حاجه تروح تدورله .. وتدورله فى مدونتى كمان .. الله يسامحك يا شيخ روح.

وناس تانيه بتدور على حاجات اغبى بس مش هينفع اكتبها - الله يكسفك ياجوجل فضحتنى- المهم ان كلها اوضاع بتعبر عن انهم ناس مش طبيعيه.

ناس هتقولى طب ما دا حلو .... أكون سبب فى ان واحد عاوز يشوف حاجات - قله ادب - يقوم يدخل المدونه يمكن يضحك على بوست كتبته  او على الاقل يتلهى فى حاجه تانيه وينسى.

اوك دى وجهة نظر ... لو كان الناس اللى بتدور على المواقع دى ناس طبيبعه .. بقولك بيدور على "جنس للمنتقبات" .. دا اعمله ايه دا؟ وكمان انا مبقدرش امنع نفسى انى اتغاظ .. انك يا جوجل الوغد - بلا القاب بلا نيله - بتعتبر مدونتى مدونه اباحيه.

المهم انا مسكتش بقى .. كل ما الاقى كلمه زى دى واحد دخل بيها على مدونتى .. اروح للبوست واحاول اشيل الكلمه لو ينفع.

لدرجه انى شلت رباعيات صلاح جاهين - اللى فى السيدربار بتاعى على اليمين تحت خالص - .. بدل ما كنت كاتبها .. عملتها صوره .. لان كان فيها كلمه - دوروا عليها بنفسكم مش هينفع اقولها - العيال الواطيه - ربنا يهديهم - كانوا بيبحثوا عنها .. وجوجل - مشكورا يبعتهم على  مدونتى على اساس ان انا بتاع قله الادب كلها - شمت فيا الاعادى الله يسامحك.( للناس الفضوليه الرباعيه الللى بتبدأ بـ ياطير ياعالى فى السما )

واللى غايظنى اكتر انى والله لو فى صوره ممكن تعبر عن البوست وفيها واحده مش محجبه .. او حتى محجبه ولابسه لبس لا يليق بالحجاب .. مبحطهاش فى مدونتى ... هو الواحد ناقص ذنوب .

وجوجل بيعتبرنى مدونه اباحيه ..

لحد كده وكنت ساكت وراضى ومستحمل انما بقى اسمعوا الصدمه الكبيره اللى حصلتلى من يومين .

بطوط انا مش عارف ادخل مدونتك

 ليه ان شاء الله

 اخويا مسطب برنامج على الجهاز معرفش بيعمل ايه بس لما بتيجى مدونتك بيقفلها اوتوماتيك

طب اسم البرنامج ايه؟

انتى بورن

يانهار ملوش الوان .. انتى بورن مش راضى يدخلك مدونتى .. ليه ان شاء الله ... دا انا ابويا- الله يرحمه- لو عرف .. ممكن يموت فيها .. وامى لو عرفت هتطردنى بره البيت دا اكيد

( بمنتهى البراءه )هو ايه الانتى بورن دا يا بطوط

انا هترجملك وانت هتعرف يعنى ايه .. انتى يعنى ضد .. وبورن يعنى اباحيه او عاهره .. دا برنامج عشان اى حد يدخل موقع اباحى يقفله فى وشه

طب ودا مانعنى  من الدخول لمدونتك  ليه

انا بقى كنت فعلا فى قمه الكسوف والاحراج .. يعنى جوجل وكانت فى الخباثه .. انا الوحيد اللى بعرف اللى دخل مدونتى دخل ازاى .. انما توصل لانه يسوأ سمعتى ويحط اسمى فى برامج الانتى بورن .. لأ كده كتير بجد

المهم قعدت افكر هو ليه - الله يحرقه بجاز -قافل مدونتى

وبجد استغربت .. وبعدين عرفت ليه ويارتنى ما عرفت

 الفكره ان فكره برامج الانتى بورن كلها انها بتدور فى اسم لنك الموقع على كلمه من الكلمات المتخزنه عندها .. وهى معظم الكلمات اللى بتستخدم فى المواقع اياها ... حتى فى برامج منها مش بتفتح الهوت ميل عشان كلمه هوت متسجله عندها

وانا لنك مدونتى اسمه ايه batoot-haboob ..هو شاف boob  قال والله ما انت داخل .

boob دى يعنى ثدى بس باللغه الدارجه .. وبكده انا مدونتى بقت اباحيه رسمى

وعليه فأنا مضطر انى اقولكم انه ممنوع الدخول للى اقل من 18 سنه

انا قلت اكتبها بنفسى بدل ما الاقى جوجل كاتبها .. ومسيحلى كمان عند بتوع البلوجر وبالذات انهم اصلا اصحابه.. اذا كان سيحلى عند بتوع الانتى بورن - صوتى يا ما - يبقى هيقول ايه عليا لبتوع البلوجر.

لنا الله

بالمناسبه انا عملت جروب للمدونه على الفيس بوك
للاشتراك اضغط هنا

زعبله للجميع

ما فاتكم من الاحداث

بعد ما اختى اتجوزت بكام شهر راحت عند الدكتور وعرفت انها حامل .. بعدها بكام اسبوع جه ازوجها سفر - رزق البيبى وسافر .. وبعدها عادت لنا سيناء قصدى دعاء.

وحيث انه جد فى الامور امور فكان يجب ان يحدث الاتى.

أنا بالون دا(-) .. ودعاء بدا(/) .. ومحمد بدا(=) عشان محدش يتوه
واليكم الحوار

- محمد .. دعاء .. فى اجتماع مغلق بعد عشر دقايق للمناقشه فى امور مصيريه.

وبعد عشر دقايق

- اكتب فى محضر الجلسه .. هذا وانه فى تمام الحاديه عشر انعقدت الجلسه بحضور كل من دعاء ام زعبله ... محمد المش مهندس .. ومحمود الكومندا المهم

/ اللهم طولك ياروح

- اسمعى وانتى ساكته ..ولا معترضه يعنى ولا حاجه؟ .. المهم عشان ندخل فى الموضوع .. وانت يا مش مهندس سجل كل حرف

= تمام يا كومندا المهم

- محمد لما جاب لنا جاتوه بمناسبه البيبى عمل ايه؟

/ عمل ايه

- حطه فى التلاجه واى حد كان عاوز ياكل منه كل صح ولا غلط؟ ..(ناظرا اللى محمد) سجل انت ملكش دعوه

/ اه حصل 

- يعنى مقالش انا اللى جايبه يبقى ليا امتيازات

/ لأ مقالش .. لاننا اتربينا على التعاون ..التعاون..فاهمنى؟

-/=  فى نفس واحد سجل 

- اشطه عليكى

= لما محمود جاب الروتر .. الكمبيوتر والنت اتقسموا ازاى؟ بما يرضى الله ولا لأ؟

/ طبعا بما يرضى الله

-/= فى نفس واحد برضه سجل

- سجل يا ابنى .. وحيث انها اقرت بكل ما سبق .. قررنا اعطائها نسخه من مطالبنا وعليها التوقيع

/ وانتوا برضه تاخدو نسخه من مطالبى

وحيث اننا واثقين ان مطالبنا شرعيه فوافقنا طبعا ناخد مطالبها

وتبادلنا النسخ ودى كانت نسختنا

1. ينص هذا الاتفاق على ان زعبله – ايا كان ذكر او انثى – ملكيه عامه وللجميع حق الانتفاع به.
2. وعليه فلا يجوز لك الامتناع عن اعطائه لاى فرد من افراد البيت الا فى حالات الضرورى القصوى على ان يكون القرار بالاغلبيه.
3. على زعبله ان يلتزم بانه ميعلمهاش على اى شخص فى البيت وان عملها فهو حر برضه ولا يهمه بس دا بينى وبينكم بس.
4. يحق لاى شخص اللعب فى راس زعبله – عشان انا بتغاظ من اللى بيقولى حاسب على راسه دا لسه صغير – ما انا عارف هو انا عبيط يعنى.
5. يحق لاى شخص انه ياخد زعبله سواء للعياده او للكليه او يفسحه بمنتهى الحريه ولا يحق لاى شخص الاعتراض لكن يتوجب التنسيق.
6. على زعبله ان يسمع كلام خالو وميسمعش كلام تيته .. لان خاله نفسه مبيمعش كلام تيته.
7. على زعبله ان ينطق ب خالو قبل ماما وبابا لأن عنده اتنين خالو انما بابا واحد ماما واحده.
8. على زعبله انه يضحك طول مهو مع خالو .. وهو حر وهو معاه امه او مع تيته ملناش دعوه.

واذا بالمفاجأه عندما شفنا نسختها

1. اولا انا اللى تعبت وشلت مش حد تانى وعليه فالنونو-واللى هيقول عليه زعبله هو حر- ابنى مش ملكيه عامه.
2. وعليه اخركم معاه تلاعبوه.
3. على النونو انه يعملها على الكبير والصغير .. دا عيل يعنى وان مكنش هيعملها عليكم هيعملها على مين .. عاوزين تعقدولى الواد.
4. اللى هيلمس راس النونو مش هيلاقى ايده .. راسه بتبقى طريه وانتوا بصراحه عبط.
5. محدش يقولى هاتى الواد العب بيه دا مش لعبه.
6. النونو مش هيسمع غير كلام ابوه وامه ولو طولتوا فى الكلام هخليه يقولكم باسمكم .. وحوار ان اخواله مش بيسمعوا كلام تيته .. فدا عشان ... ولا بلاش.
7. ينظر رقم 1 واتنين.
8. للنونو حقه فى فسحتين فى السنه او ما يعادل قيمتهم الماديه .. على ان تكون الفسحه شامله وجبه ولو مكنتوش لسه جبتوا عربيه يبقى وشامله المواصلات.
9. للنونو حق العيديه من اول عيد يجى عليه ان شاء الله .. ومفيش حوار دا لسه صغير .. انا لسه مقبضتش .. استلف اتصرف .. دا الخال والد.

وهنا انقلب الامر

- محمد اقفل الباب .. الظاهر ان المماراسات الديمقراطيه مش هتنفع .. كتفها يا بنى وخليها تمضى .

= علم يا فندم وينفذ .. بس ايدك معانا يعنى متعمليش فيها الكومندا اوى يعنى .. دى بتقولك عيديه من يوم ولادته.

وبهذا اعزائى المدونين .. عزيزاتى المدونات .. استعطنا كعائله كبيره وسعيده (بج هابى فاميلى) ان نحتوى الحركات الهدامه التى تزعمتها ام زعبله . ومضت بالقوه الجبريه - اقصد بمنتهى الديمقراطيه.

ونتعلم من دا ان - ام زعبله شريره - واننا طيبين وشكرا لكم.

بالمناسبه عاوزين منكم اسماء لزعبله - سواء كان ولد او بنت - وهو فى الغالب بنت . لان كل الستات الاروبات -نسبه لأروبه مش اوربا - قالولها بنت . المهم اقترحوا اسماء.

وفى الاخر تهنئه للاخ والصديق الأستاذ يوسف المصرى على افتتاح دار المصرى للنشر والتوزيع  وربنا يوفقه يارب وتكون قدم السعد :D

وشكر خاص ل مى .. لاختيارها الثيم دا .. بجد مش عارف اشكرك ازاى

وشكر خاص جدا لـ منونا๓คภ๏ภค.. لتصميها الهيدر بتاع الثيم الجديد بجد شكرا يا منونا على تعبتك ونردهالك فى الافراح

الثيم الجديد لو عمل مشكله لاى حد .. اى حد عنده اقتراح .. اللى مش عارف يعلق فى الثيم دا .. يراسلنى على batoot_dnt@hotmail.com 

اللى مش عارف يعلق باسمه او مش عارف يعلق خالص يدوس هنا

 

وعلى فكره انا غيرت البروفيل ايمدج بتاعتى من الصوره دى

لـ دى قولوا بقى رأيكم فى كل دا

 

لو عاوز تشتمنى

بقالى كام يوم من ساعه ما رجعت من اسكندريه وانا مش لاقى حاجه مفيده اعملها 

 وزهقت من الفيس بوك ومن رش المايه ادام المازنجر ( سواء كان ياهو او هوت ميل )  وزهقت من نفس الكلام المكرر مع نفس الاشخاص المكررين.

لذا قررت اعمل زى اى شخص مهم 

واكتب بوست لو نفسك تسألنى اى سؤال؟

لو فى حاجه نفسك تعرفها عنى ؟

  لو زعلان من موقف حصل منى ؟ ونفسك تسألنى عن وجه نظرى؟

لو نفسك تقولى رساله ؟

لو عاوز منى خدمه ؟

لو بتدخل مدونتى ومش بتعلق ( او بتعلق بغير معروف ) فرصه تكتبلى اسمك من باب انى احس انى شخص مهم ؟

وفرصه نبقى اصدقاء سواء فى المازنجر او فى الفيس بؤ

لو نفسك تشتمنى برضه شغال ؟ 

نفسك تقول انى احسن واحد فى الدنيا اوك ؟

عاوزنى  احكيلك سيرتى الذاتيه ماشى برضه؟

المهم اى حاجه تتجدد يعنى بدل الملل دا ولا انتوا شايفين ايه؟

وانا هقعد زى اللى شايفنها فى الصوره كده واجاوب على كل الاسئله ... 

او امسحها :P

وشكرا لجميع مقدما :D

وقام زعلان :(

اكتر حاجه بكرهها فى حياتى ان حد يزعل منى .. حتى لو الحد دا اول مره اشوفه او حتى لو كان اخر مره هشوفه  .. مبحبش حد يزعل منى .. دا مش معناه انى انسان حساس وبخاف على مشاعر الاخرين - رغم انى بحاول - بس دا معناه انى مبحبش الناس اللى بتزعل على اقل حاجه.

من الصعب جدا انى اتعمد ازعل حد منى .. ومن النادر يصل للمستحيل انى اقول لحد من اصحابى انك فيك العيب الفلانى بطريقه مباشره. يمكن اصلا لانى بحب اصدقائى بعيوبهم - بل بعتبر ان عيوبهم هى اللى مديالهم طعم . ومبعرفش افصل الشخص عن عيوبه ببقى مش متخيله من غير العيوب دى .

ثم انا من الناس اللى بتقدر تقبل اصحابها زى ما هم .. وصديقى ممكن اعتبره صديق ناجح لو كان - فقط - حد ما بتخنقش من وجوده . واقصى طلب ممكن اطلبه من اعز اصدقائى غالبا هيكون هات لى كذا وانت هناك ,بس لو مش هتروح هناك خلاص متجبش ..او اقضيلى المصلحه الفلانيه وانت هناك .. مستحيل استلف منه فلوس ومستحيل اطلب منه يعملى حاجه مخصوص وهو مش هناك .

اه طبعا احيانا بنقد بس بطريقه غير مباشره .. وعندى طرقتين بقول بيهم لاى حد ان فيه حاجه انا بضايق منها.

الطريقه الاولى : ودى اكثرهم نجاحا ودى كنت قرتها فى كتاب (لنيل كارنيجى) انى امدح الصفه العكسيه فيه .. يعنى مثلا هو بيكدب  وانا عارف انه كداب .. اتعمد كل ما يقول كلمه صدق ادامى ..انى اقوله انا اكتر حاجه بحبها فيك انك بتقول الصدق دايما .. انت اه ساعات بتكدب ( واضحك ) بس فعلا انا بثق فى كلامك جدا ومبتخيليش انك ممكن تكدب عليا انا بالتحديد.

الطريقه دى كان ابويا -  الله يرحمه - بيعملها معايا يمدح فيا ادام اصحابه وانا - فاكر - انه ميعرفش انى سامع. الطريقه دى بتفرق كتير وفعلا بتنجح .

الطريقه التانيه بقى : انى اقوله انت على فكره بتكدب احيانا بس بيكون ليك مبرر كذا وكذا وكذا ... بس فى ناس مبتقبلش الحوارات  دى (واعدل راسى وابص له)  واقوله : رغم انى عارف انه بيبقى ليها مبررها .. بس المبررات دى بينى وبينك اصلا مش مقنعه لكل الناس .بس اهى الحياه كده ..وامدح فيه فى صفه تانيه - موجوده فيه فعلا- ويبقى كلامى بيدور حوالين مدحى له فى الصفه التانيه وايجاد مبررات تافهه لصفته السيئه اللى انا قلت له عليها ونقدى المتغطى للصفه دى.

من يومين بقى معرفش ايه جرالى حسيت انى كنت غريب عن تصرفاتى . فى يوم واحد عملت تاتش مع تلاته اربعه من اصحابى .

واحد رديت فيه حركه قارعه عملها فيا كذا مره .. وقلت بعدها عشان تعرف ان الحركه دى بتزعل .. ويمكن دا اسلوب كويس - بس مش اسلوبى - انا مبعملش كده المهم هو طبعا زعل.

واحد تانى بقى كنت بقوله رأيي فى موضوع خاص بيه ولقتنى بستخدم الألفاظ الحاده فى التعبير عن وجه نظرى وكأنى بشتمه هو .. او كأنى واخد موقف مسبق من اللى بيحكيه .. وطبعا هو زعل. وانا غلطان انى بحكى معاك

واحده بقى - ع النت - وبتاخد رأيي فى قصه حد كانت بتحبه ولقتنى بقولها يا بنتى كل البنات واطيين هتنسيه اسرع مما تتخيلى. وطبعا زعلت .. وانا غلطانه انى بحكى معاك

اولا انا اضايقت من نفسى بعد التلات قصص دول وخصوصا ان الفرق ما بنهم مش اكتر من اربع خمس ساعات. وفعلا انا كنت فى مود غبى - رغم ان دا طبعا مش مبرر.

بس لما هديت رجعت اضايقت تانى .. طب ما هم المفروض عارفين ان دا مش اسلوبى وايه يعنى لما اتغابى مره؟ . واول واحد دا بالتحديد مهو انا قلت له قبل ما اعمل فيه نفس الحركه ان حركته دى غبيه جدا وبتضايقنى ثم هو اضايق ليه ما انا بعمل فيه نفس حركته - اللى هو فاكر انها عادى -.

والتانى انا قلت له وجهة نظرى .. لو حذف الالفاظ الحاده تطلع وجه نظرى اللى عاوز يسمعها.

والتالت : اه انا مُصِر ان البنات واطيين .. ويمكن الظروف هى اللى بتخليهم كده .. لو فضلت زعلانه سنتين تلاته على اللى كانت بتحبه هتعنس وطبعا ضغط البيت عليها .. واحساسها ان كل اللى فى سنها ارتبطوا وهى لأ كل دا بيخليهم واطيين.

عموما محدش يزعل .. بس انا زعلان :D

معلش عدل رجلك تانى

مبدئيا ..اللى مش فاهم العنوان يقرا البوست اللى فات. رغم انه ميتوقفش على فهم العنوان كتير بس دا ما يمنعش انك تقرا البوست اللى فات برضه 
ما علينا
على الفيس بوك كان فى واحد قريب بيسأل ايه اكتر حاجه ممتعه فى الدنيا .. والناس جاوبت اجابات مختلفه .. ناس قالت النوم .. الجنس ... الهدوء .. الخضره .. البحر .. وواحد بقى جاوب اجابه حسيت ان دى اصح اجابه ... انك تكسب فلوس
الفكره فى الاجابه بالنسبالى مش فى انك يكون معاك فلوس .. لأ الفكره فى انك تكسب الفلوس دى .. دى اكبر متعه فى الدنيا .. ومش شرط تكون كسبتها فى عمل متعب او مرهق عشان تحس بحلاوتها ولا شرط ان الفلوس دى تكون كتير.. الاحساس دا لا يقدر باى شئ فى الدنيا.
كمان فى احساس تانى انك تس انك ناجح فى شغلك ... مقياس النجاح دا مختلف .. انك بتاخد اعلى مرتب فى الشغل .. او ان صاحب الشغل راضى عنك وبيقول فى حقك كلام كويس ... او فى حالتى انا انه يجى لك عيان ويقولك شكرا.
مره وانا بشتغل فى الكليه .. اشتغلت لواحده ست وعملت لها تركيبه ... وحيث ان انا مكنتش سلمت ولا تركيبه قبل دى فكان همى اوى انها تطلع كويسه وكويسه جدا .. والحمد لله طلعت مقبوله جدا . بس الست حست بوجع بعدها على طول ... اتصلت بيا وقلت لها دا بيكون طبيعى فى التركيبه دى احيان بيحصل وجع اول 48 ساعه وبعدين كل حاجه هتبقى زى الفل .. طبعا انا قلت لها كده ودا صح - نسبيا - يعنى مش بيحصل لكل الناس بس بصراحه انا ثقتى اتهزت فى التركيبه دى جدااااااا.
بعدها باسبوع الست اتصلت بيا وفضلت تدعيلى وربنا يكرمك ويعلى مراتبك يا دكتور وكل اللى يشوفها يقول دى ممتازه وربنا يخليك ومش تعبانه منها خالص وشكلى بقى احسن بكتير بعدها ... وفضلت تدعيلى يجى نص ساعه.
مش عارف يومها حسيت انى طاير من الفرح .. احساس النجاح فى الشغل احساس ملوش وصف .
واحساس الفشل مفيش ابشع منه ... ودا الاحساس اللى حسيت بيه بعد 15 يوم من التدريب فى الصيدليه اللى رحت اشتغل فيها.
بعد 15 يوم كان فيه مباحثات على انه ينفع اشتغل ... وبما انى اصلا مش خريج صيدله وكمان الصيدليه اللى كنت فيها مش شغاله تماما ... فانا تقريبا متعلمتش حاجه - رغم انى كنت فاهم ساعتها انى بقيت كويس وناقصنى حاجات بسيطه اوى -  .. يعنى اى انترفيو مع اى صاحب صيدليه مستحيل هقول كلمتين على بعض وقد كان. واساسا صاحب الصيدليه اللى كنت بتدرب فيها كان فاهم انى هدربلى اسبوعين تلاته وهفك ...وكان عامل حسابه انى هقبض اى مرتب يعنى وخلاص.

رحت لصاحب الصيدليه قولته يا دكتور انا عاوز اشتغل لو عندك مكان .. قالى انت بتتكلم بجد انا فاكرك جاى تدرب وخلاص ... قلت له لأ انا جاى اشتغل .. قالى يا بنى والاسنان .. قلت له سيبك منها دلوقتى انا دلوقتى عاوز اشتغل فى الصيدليه هستفاد منها حاجات هتنفعنى فى السنان وهخسر كتير لو استغلت فى السنان على طول قبل الصيدليه.
الراجل قالى طب خلاص انقلك صيدليتى التانيه - فى منطقه شعبيه اخر حاجه - هتتعلم فيها اكتر وبعدين نشوف هتاخد مرتب كام.
الصيدليه التانيه كل حاجه فيها روعه ..

اعدل لى رِجْلك

اخر بوست كتته جالى عليه تعليق من نعكشه .. التعليق بتاعها كنت عاوز انشره فى بوست لوحده .. عارف انت لما تشوف كلمه تعجبك اوى وتعرف انك مش هتعرف تجيب كلمه بنفس الروعه دى .. كل اللى بيخطر فى دماغك انك تسرقها وكويس انها جت فى التعليقات يعنى محدش هيعرف
اهو دا اللى خطر فى دماغى بالظبط ...فالكلام اللى جاى دا كلامى ونعكشه ملهاش فيه اى حاجه وانتوا شاهدين
البوست اللى فات بتاعى كنت بحكى عن حاله ان عاوز ارغى من غير كلام .. عاوز اقعد اتكلم مع حد وفى نفس الوقت مقولش ولا كلمه. قامت بقى نعكوشه دخلت وكتبتلى تعليق بتقول فيه قولك

حضرتك محتاج رجل 
 أيوة رجل بكسر الراء و تسكين الجيم
مش رَجُل إنما رِجْل 
رجل حد صاحبك بيحبك او لو والدتك بتحبك تنفع برضو
تنام على رجلها
من غير ما تتكلم 
و كل لحظة وا لتانية تقول
عارف كذا كذا كذا 
اسكت مش كذا كذا كذا

طبعا انا اللى مغششها المعنى دا .. انا فعلا  محتاج رٍجل اعمل فيها زى ما نعكشه بتقول بالظبط وانا هعتبركم فى البوست دا رٍجل .. واللى يزعل يزعل بقى من نعكشه المهم

نزلت اسكندريه بعد النتيجه ما طلعت بكام يوم على اساس انى منها استجم ومنها اتدرب ومنها اشتغل .. كل الناس عماله تقولى يا بنى ايه اللى جاب اسكندريه فى دماغك ااساسا .. يعنى انت طول عمرك فى القاهره .. واكيد هناك الشغل احسن مليون مره وحتى مرتب اعلى ومصاريفك اقل واهو تبقى جنب اصحابك اقل حاجه

وانا معرفش ايه اللى كان فى دماغى غير انى ابعد عن كل حاجه ... عاوز اعمل فى حياتى ريستارت.

بالصدفه البحته اعرف حد فى اسكندريه وهى كمان صيدلانيه - لو عرفتوا اساس معرفتى بيها هتقولى سبحان الله - المهم اتصلت بيها ازيك واخبارك ... بصى انا عاوز انزل اسكندريه عندك شغل.

قالتلى  اتصل بفلانه - اعرفها برضه بنفس الصدفه البحته-

المهم اتصلت بيها وقالتلى ... تعالى انا هسيب الصيدليه اللى انا فيها كمان شهر.. تعالى ادربك وبعدين تشتغل فى المكان اللى انا فيه بجد هيعجبك اوى اوى

حلو اوى الشغل اتحل ناقص المكان ... عملت اتصالاتى انى الاقى مكان مش عارف...بس سبحان الله لقيت عمتى بتقولى فيه فلان هناك بيشتغل ومأجر شقه عشان بيشتغل هناك اتصل بيه وشوف لو عنده مكان.

وسبحان الله اتصل بيه ويطلع عنده مكان وهوووووووووب ارحل لاسكندريه.

اسكندريه بالنسبالى فسحه جميله .. بلد بحبها.. ويمكن بيزود حبى ليها ان كل اللى اعرفهم هناك ناس تتحب .. دا بجانب كل الاسباب اللى الناس بتحب عشانها اسكندريه

اوصل واروح على الشقه والاقى ساكن معاه اتنين ... اول ما يعرفوا اسمى .. ياخدونى بالحضن وازيك وعامل ايه رغم انى اول مره اشوفهم.
دا والدك الله يرحمه كان وكان .. وفضلنا طول اليوم نحكى على مواقف وجمايل ابويا الله يرحمه معاهم ... انا بستغرب من الراجل دا والله .. سبحان الله توفى بقاله كام سنه فوق من 12 سنه اهو ولسه الناس فاكرينه ... ومبيصدقوا يعرفوا انى ابنه عشان يقعدوا يحكوا عن هو عمل ايه معاهم ...ياااااااااه يا ابويا كل ما حد يحكيلى عنك افتكر كلمتك لما كنت بقولك هو الناس كلها تعرفك يابابا ... وانت بتقولى يا ابو حنفى  فاحفظ لنفسك  بعد موتك ذكرها فالذكر بعد الموت عمر ثاني... هو انت كنت عارف انك هتموت قريب ؟ والله بستعجب كل مره ..

عارف انا لما بروح اى حته وبمجرد بس انى اقول اسمك .. يتحول الكلام كله عنك .. يااااااااااه بس انت فيك شبه كبير اوى من ابوك يا محمود وسبحان الله طبعه بالظبط وواخد خفه دمه - طبعا دى حاجه تفخر بيها شيل الجمايل دى بس - طب والله يا ابويا انت بتحرجنى كتير اوى .. بعد ما بقول اسمى بالكامل ..بحس بمسؤليه تجاه اسمى دا .. ومواضيع كتيير بتتحل بعدها سبحان الله

المهم جيت ادفع الايجار حلفوا بالايمان الغلاظ انهم مش واخدين ايجار غير لما اشتغل ... يا شباب عيب .. اصلك متعرفش ابوك عملنا ايه وايه الله يرحمه وفضلوا يحكوا تانى عنك
 وسبحان الله انزل الشغل بقى -التدريب - مع الصيدلانيه اللى كنت بقولكم عليها .. اساسا هى شخصيه تتاكل اكل .. حد كده لما تشوفه لازم تحبه .. وتجربه الصيدليه دى  كانت تجربه تحفه.
اتعلمت منها كتير جدا .. كل شخص اتعاملت معاه هناك دماغ لوحده .. هى حد بيتوتر جدا وبيخاف على الشغل كأنه شغلها .. واللى بتاخد الشفت اللى بعدها شعارها فى الحياه اخربى يا دنيا اعمرى يا دماغى .. حاولوا بقى تتخيلوا كم المواقف اللى تموت  من الضحك اللى بتحصل كل يوم.
ولا عامل الديلفرى.
مره كان واقف والعيان جه وناقصه دوا هنجيبه من صيدليتنا التانيه .. وقلت له بص هنبعت لحضرتك الدوا على البيت ... يا احمد - بتاع الدليفرى- عارف العنوان .. رد وقالى اه دا الاستاذ بيجى كتير وانا عارفه
المهم جه الدوا .. روح بقى يا عم احمد .. خد الدوا فعلا وراح وقف بمنتهى البراءه ادام باب الصيدليه
لقيتها بتسألنى عم احمد وصل الدوا .. قلتلها اه خده بقاله كتير اكيد وصله .. المهم بسأل عم احمد انا مشفتكش اتحركت انت وصلت الدوا امتى ... بكل روح رياضيه عاليه .. ما انت مدتنيش العنوان يا دكتور .. يا بنى انا مش سألك انت عارفه ولا لأ قلت اه
قالى طيب خلاص بقى يا دكتور انا هفضل واقف ادام باب الصيدليه لحد ما ينزل وابقى ادهوله...
انا شخصيا فطست من الضحك على الموقف .. وصاحبتنا بقى بحكم توترها من الهوا فضلت تهرى وتنكت فى نفسها وكل تلات دقايق تنادى عليه كان يوم مسخره
واهو اول 15 يوم مشيوا زى الفل بس الدنيا اتكركبت شويه بعدها

اكمل ولا حستيوا بالملل ... اقولكم انا هكمل بعدين فى بوست تانى
سلاااااااااام

رغى من غير كلام

معرفش ليه وحشتنى الكتابه اوى ... حسيت فجأه ان المدونه وحشتنى وانى عاوز اكتب .. بس اول ما مسكت الكيبورد ضاع كل احساسى انى عاوز اكتب
حسيت انى كل اللى هكتبه هيبقى فى الهسس على رأى سووو
اصل هكتب ايه؟
هكتب مثلا

انى عاوز من زمان اشكر سميره وحسام وسمر ووليد ونوران ودكتور محمد على حاجات كتير اتعلمتها منهم يمكن هفضل طول العمر مدين ليهم بيها ... حاجات اتعلمتها فى الشغل وحاجات اتعلمتها فى الحياه

اكتب مثلا ازاى ارتبطت بالناس ودى وازاى هم ارتبطوا بيا ... ويوم ما سبت الشغل كانوا يوم حزين؟.

اكتب عن الكلام اللى بيطلع من القلب فى اللحظه دى؟

ولا اكتب عن ازاى ممكن ترتبط باشخاص فى وقت قصير اوى كده

اكتب عن انى شفت اجمل ناس فى الدنيا ... ناس بتعلمك بجد ... وبتخاف عليك بجد ... كأنك حد من اهلهم 

اكتب عن النصيحه اللى بتتقال عشان ربنا بس .. مش عشان منتظر منى حاجه ..

طب ودا يهم اللى بيقرا مدونتى فى ايه؟ يمكن ما يهمهش .. بس يهمنى انى اكتب عنه وانى اشكرهم ... يهمنى انى اترخ الشهر اللى فات دا فى تاريخى واكتب عليه شكرا لكل واحد اتعاملت معاه فى الشهر

ولا اكتب عن المواقف اللى بتحصل فى الشغل كل يوم ؟ .. عن المشاكل اللى بتتحل .. عن المواقف اللى بتضحك ....بس حاسس انى عاوز اكتب حاجه عن الشغل.

اكتب عن لحظات الاحباط والنكد والامل والتفائل  اللى مرت عليها على طول الاربع شهور اللى فاتوا  وازاى ان الشهور اللى فاتت بتجسد رحله عمرى كله بشكل سريع

وحتى دا هيهم اللى بيقرالى فى ايه؟

ولا اكتب عن القطه اللى خدتها هديه من دكتور منوسى ... القطه اللى هتجيبلى صرع قريب غالبا ... لما ببقى قاعد فى امان الله والاقيها قامت نطت على رجلى ... ولا اجى امشى تقعد تتحرك ما بين رجلى ....ولا اكتب عن دماغها اللى مكبراها على الاخر

تصدقوا القطط دى عايشه فى نعيم والله... كل هدفها فى الحياه انها تلعب وتاكل ... ولو حد زعلها .. اول ما يجى يلعب معاها خلاص تصالحه ولا كأن فى حاجه

مش عارف ليه حاسس انى عاوز ارغى من غير ما اقول كلام ... عاوز احكى من غير ما اكتب ولا كلمه

يمكن عشان الناس اتعودت انهم يدخلوا مدونتى عشان يضحكوا ... بس المره دى مش عارف اضحكهم ...عشان كده مش عارف اكتب ....  مش عشان انا حزين .. انما مش عارف ليه حاسس انى مش عارف اضحك حد وان دمى تقيل


مش هعتذر انى مش بعلق على مدونات حد-شكلى بقى ووحش اوى - ... كل ما الظروف بتتحسن واقول خلاص هقدر اعلق على كل مدونات اصحابى ... بتتكعبل .. بس كفايه انى اقولكم انى بقرا المدونات كلها اول باول من الموبايل ومش هقدر اعلق لحد امتى الله اعلم

مين هيعملنا البانيه

الوقت : بعد المغرب

المكان :  المسجد .

قول ورايا " زوجتك موكلتي .. زوجتك موكلتي .. الانسه دعاء .. الانسه دعاء .. على كتاب الله ..على كتاب الله .. وسنه رسول الله ... وسنه رسول الله .. وعلى مذهب الإمام الأعظم أبو حنفية النعمان .. وعلى مذهب الإمام الأعظم أبو حنفية النعمان .. وعلى الصداق المسمى بيننا .. وعلى الصداق المسمى بيننا .. عاجله واجله .. عاجله واجله

" وأنا قبلت زواج الانسه دعاء .. وأنا قبلت زواج الانسه دعاء .. بنفسي لنفسي .. بنفسي لنفسي .. على كتاب الله .. على كتاب الله ... وسنه رسول الله .. وسنه رسول الله .. وعلى الصداق المسمى بيننا .. وعلى الصداق المسمى بيننا .. وعلى مذهب الإمام الأعظم أبو حنيفة النعمان .. وعلى مذهب الإمام الأعظم أبو حنيفة النعمان.

ألف مبروك ألف ألف ألف مبروك ... للولوولولوولولولوولولولوولولوولولولوولولولوولوى

الوقت : بعد العشاء

المكان : قاعه الفرح

ألف مبروك .. عقبال فرحك يا دكتور ..  وناس كتير بيباركوا لامي .. وعقبال محمود ومحمد ياااااااارب

" وأنا عمال أقول امين "

الوقت : الساعة اتنين

المكان : البيت

أنا صاحي من النوم ورايح اصحي ماما من النوم

ماما فين دعاء؟؟

في بيت جوزها .. وسيبنى أنام أنا تعبانه ومش قادرة

يعنى إيه في بيت جوزها ... دعاء مش هنا فى البيت ؟؟!! انتوا بتهرجوا

يا بنى أنت مش كان فرحها امبارح وأنت اللي كاتب الكتاب

وده يبقى معناه انها تبات فى بيت جوزها .. مش لاعب .. محدش قالي كده

محدش قالك ايه؟؟ هو أنت لما تبقى تتجوز ان شاء الله .. هتسيب مراتك فى بيت اهلها

محدش له دعوه بمراتى .. ثم مين هيحب اخته اد ما انا بحبها

طب اخررررررررج بقى عاوزه انام

المكان : اوضه ماما

2:05

ماما اصحى ياله

عاوز اييييييييييييييييه؟

ياله نروح نجيب دعاء كفايه كده

نجيبها منين؟

انتى مش قلتى انها فى بيت جوزها .. نروح نجيبها من هناك

طب اصبر للصبح

يا حاجه انتى .. نسيبها للصبح ازاى؟ .. مش نافع احنا نروح دلوقتى

ابوس ايدك سيبنى اناااااااااااااااااااام انا قرفت منك

2:10

ماما دعاء وحشتنى ... ياله نروح نزورها ومش هناخدها

نزورها الساعه اتنين ؟؟!! احنا اتهبلنا .. روح نااااااااااام والصبح هنروح وريحنىىىىىىى

طب تعالى نروح نوديلها الاكل .. هتلاقيها جعانه

لا ملكش دعوه

هو ايه اللى مليش دعوه .. قومى بقى كفايه نووووووووم

الله يخرب بيت اللى يزعلك سيبنى انااااااااااااااام

2:30

ماما انا عاوز اكل كفته

حاضر لما يجى الصبح

لا انا عاوز دلوقتى .. وكمان انتى مبتعرفيش تعليمها .. دعاء اللى كانت بتعرف تعملها

حاضر بكره ..هبقى اقولها تعملنى ازاى بتتعمل

طب والبانيه؟؟!!

حاااااااااااااااضر لما يجى الصبح هعملك كل حاجه

طب واحنا ايه اللى يخلينا نعمل فى نفسنا كده .. ما كانت دعاء هنا

بكره انت راخر  تتجوز .. وتاخد مراتك من اهلها .. ولا هتسيبها فى بيت اهلها؟؟

قلت لك ملكيش دعوه بمراتى .. اخوها مش هيبقى بيحبها اد ما انا بحب اختى

طب يا اخويا ربنا يخليكم لبعض وابوووووووووس ايد اللى مخلفينك سيبنى انام

3:00

ماما انا مش عارف اتفرج على التلفزيون .. دعاء اللى كانت عارفه ترتيب القنوات .. والحاجات الحلوه بتيجى فين .. وكانت حافظه المواعيد

يا بنى انت اساسا مش بتحب التلفزيون ..

لأ بقى بحبه ومش عارف اتفرج على حاجه

طب بكره ابقى خد منها المواعيد

يوووووووووووووووووووه

3:10

ماما قومى نتكلم شويه

لااااااااا انا تعبانه يااااااااارب ارحمنى

دعاء كانت بتسهر تتكلم معايا

حاضر هنبقى نتصرف

3:20

ماما خلاص انا جاتلى فكره هتريح جميع الاطراف

قووووووووووول وخلصنى

هى تقعد عندنا اسبوع وترجع تقعد عنده اسبوع

لأ مينفعش

يووووووووووووووووووووه انتى عماله تعقديها ليه

ابوووووووووووس ايدك سيبنى انااااااااام والصبح نشوف حلولك العبقريه دى

المكان : أوضه محمد

الوقت 4:00

محمد مين هيعملنا البانيه .. مين هيعمل الكفته .. هنكلم بين لما نسهر .. مين اللى هيغير التلفزيون ويحفظ المواعيد

يا بنى انت بص للجزء المشرق .. , الدولاب هيتقسم على اتنين .. مواعيد الكمبيوتر هتتقسم على اتنين  .. هنتفرج بمزاجنا على التلفزيون بدل الاحتلال اللى اختك عملاه , بقى عندنا سرير فاضى لما نزهق من سريرنا ننام عليه , النفس قل فى البيت , المكتب بقى فاضى , يا بنى دا احنا ممكن نطالب بعلاوه فى المصروف ونقسم مصروف دعاء

امممممممممممممم تصدق فعلا عندك حق .. احنا ليه مجوزنهاش من زمان ؟؟.. بس الكفته والبانيه امك مش اد كده فى عمايلهم

اممممممممم فعلا مشكله .. بس اطمن ان شاء الله هنحلها .. وسيبنا موضوع جواز البونيه .. وقعدنا ندور لحل لموضوع الكفته البانيه .. ولحد دلوقتى مش لاقيين حل

مااماااااااا خلاص انا داخل انااااااااااااام

***************************

انتهى البوست ونيجى دلوقتى لـ

شويه فلسفه بقى

طبعا البوست دا محصلش بالشكل دا .. ببساطه لان امى اساسا منامتش فى اليوم دا .. رغم انها كانت تعبانه بدرجه لا توصف.

عارفين لما الأب بيتوفى والأولاد فى سن صغير .. أمهم دايما بتحطهم تحت جناحها .. بضمهم أوى .. بيبقوا قريبين من بعض بدرجه لا توصف .. وأظن انهم بيحبوا بعض اكتر من لو كان باباهم معاهم .. يمكن الاحساس بالضعف بعد وفاه الوالد بيخليهم يحسوا انهم ملهمش غير بعض .. ويمكن التربيه بحنان الام من غير شده الاب هى اللى بتزرع دا جواهم ..  لو حد منهم ساب العش .. العش مبيبقاش له طعم .. ويمكن عشان كده انا حاسس ان البيت مبقاش له طعم

ربنا يوفقك يااااااارب يادعاء ويسعدك وسعد ايامك كلها واشوفك دايما فى احسن حال .. الواحد معرفش فعلا اد ايه بيحبك الا اليومين دول

 بس السؤال دلوقتى اللى شاغل دماغى انا ومحمد اخوايا .. يا ترى مين هيعملنا البانيه؟

الى صديق مدونتى سنه 2020

أول حاجه أمانه عليك يا شيخ تقرا لنا الفاتحة وتدعيلنا قبل ما تقرى البوست

بص أنا عارف طالما إن أنت وصلت لهنا يبقى عملت سيرش عشان تعرف اللي حصل سنه 2009 لشعب مصر خصوصا وللعالم كله.

وغالبا أنت زهقت من بوستات اتكلمت عن نفس الفترة دي أو قعدت توعظ الناس عشان يموتوا ويدخلوا الجنة.

أنا بقى عايز احكيلك عن الجزء اللي ورا الكواليس... كنا بنفكر فى ايه قبل ما نموت؟ ليه ماخدناش احطياطاتنا زى باقي دول العالم ؟ إيه اللي كان مكتوب في الجرايد واللي شفناه فى التليفزيون؟ والحوارات اللي كانت بنا وبين بعض قبل ما نموت كلنا ؟

مهو شعب يموت كله كده حاجه أكيد خلتك تستغرب بس أنا هبسطهالك بعون الله

صلى على النبي عليه الصلاة والسلام

إحنا ليه مخدناش احيطاطاتنا؟ دا اسمحلى يعنى سؤال ساذج اوى

يعنى الشعب اللي نصه عنده فشل كلوي .. وكبد سي .. والسرطانات بقت عادى وبيس .. عايز تقنعه انه ممكن شويه برد يموتوه. يا آخى اوبجيكشن

الشعب اللي شرب مايه المجارى .. وأكل لحم الحمير والقطط والكلاب .. عايز تقنعه انه لو ملبسش قناع واقي ال إيه هيموت لامؤاخذه يعنى **** روح العب بعيد

ثم كمامة إيه ياد يا ابن التييييييييييييت .. لا مؤاخذه برضه ..بس أصلك بتقول حاجات تنرفز ... الشعب دا لو اشترى كمامات بدل ما هيموت من الانفلوانزا هيموت من الجوع

اصل الحكومة - يسترها دنيا ويفضحها أخره - خلت الأسعار كلها في متناول الجميع الجميع وفقط

ملحوظة : الجميع دا محدش عارف اسمه إيه بالتحديد بس بيقولوا انه الجميع إبراهيم الجميع والله اعلم

هتقولى أمال ادارتوا الازمه ازاى؟؟

هقولك يا بنى إحنا المصريين يعنى فنانين أدراه الأزمات .. اى ازمه إحنا ناكلها أكل مش نديرها بس

بص يا سيدي ..الحكومة في الأول قالت هنقتل كل الخنازير .. مش هم اللي جابولنا المرض .. طب والمصحف لنحرقهم مش بس هنقتلهم .. إن مكنش للوقاية .. يبقى انتقام هه بقى... وهوب قامت قتلت منهم كتيييييييييير بس برضه المرض لسه بينتشر

قامت عامله إيه .. جهزت مقابر جماعية ..

أه والله مش بهرج .. وههرج معاك ليه أساسا إذا كنت أنت داخل مدونتي بعد ما كلنا موتنا ب 20 سنه

كلك هنا يا عم وأنت تشوف

بس يااااااااارب يكون الموقع لسه شغال

اصل حكومتنا - ربنا يديها الصحة - قالت الشعب دا ابن موت .. وريحته هتبقى وحشه أوى .. وحرام يعنى.. وإكرام الميت دفنه .. وكلنا من تراب

قامت عملت لنا مقابر جماعية - يسترها ربنا - واختارتها تكون هناك فى الفيوم ...سبع سواقى والنيل حاجه كده ترد الروح

يا عم أنت فهمت غلط .. لا دي مش حكومة الاحتلال والله..

دي حكومة الوطني .. شكلك غبي وهتقول حكومة الاحتلال الوطني بص مش هرد عليك وافهم زى ما أنت عاوز

عاوز تعرف بقى الحوارات اللي دارت بنا - نحن الشعب - ؟؟

بص يا سيدي .. الشيوخ فى الفضائيات قعدت تتكلم إن ربنا ابتلانا عشان إحنا ناس زباله من الأخر .. وكلامهم صح طبعا بس مين يسمع ومين يتعظ

والجرايد القومية شغالة .. نحن نحذر الأنفلونزا إحنا مش عايزين نحطك في دماغنا .. ولعلمك محدش هيموت وغورى في داهية بالذوق احسلك

وتصريحات بقى إننا ضد الموت من الأنفلونزا عشان الفراعنة رموا تعويذه عليها من زمان وحاجات كده

من الأخر أحب أقولك إحنا أدرنا الازمه بمنتهى الكفاءة .. زى ما أنت شفت .. بس قضاء ربنا نافذ على الكل

وأنت عامل إيه دلوقتى؟؟؟

الظاهر ان انا شخصيه كرتونيه

د/محمود بحس انك شخصيه كرتونية".

يمكن يكون دا من اكتر التعليقات اللي ضحكتني لما  سمعت حد بيوصفنى بيها
والغريب كمان إن الحد دا بيمثل شريحة كبيرة نسبيا من الناس اللي اعرفهم وف نفس الوقت معرفهاش. وده اللي مخليني مستغرب وبفكر هو دا شكلي فعلا أدام الشريحة دي؟
نظريا ميفرأش كتير إن كان وصفها صح أو غلط... وعمليا خلاني أفكر شويه يمكن عمل لى حاله من التفلسف اللي ممكن ميكونش ورآها حاجه إلا مجرد التفكير
هي حد متابع مدونتي – على الأقل زمان- ويمكن هي اكتر حد شاهد -لانها شافت اول بوست كتبته تقريبا والبوستات اللى بعد كده لحد وقت قريب - شاهد تطور واختلاف وتردد واضطراب أفكاري وبالتالي تعرف اسلوبى في التعبير عن الأفكار دي وشاهد دفاعى عن شئ وهجومه بعدها بفتره زي اى حد طبيعي.
حد شافني لايف مره أو أتنين في لقاء مدونين ... طبعا مكنش فيه وقت ساعتها للكلام المثمر - حلوه المثمر دى ؟ ... كان مجرد كلام في مواضيع عامه أو حتى كلام من عينه وأنت عامل إيه فى الدراسة؟؟ وإيه مشاريعك للتخرج؟؟ وربنا يوفقك ومخطط ازاى لمستقبلك؟؟ ..."مخطط دى مش نسبه للحمار المخطط خالص على فكره " والحياة عامله ازاى؟؟ .....الخ الحوارت دي.
حد عملت معاه شات يمكن مش كتير أوى ويمكن كلامنا كان مقتصر أوى أوى على ازيك وعامل إيه ... او لو سمحت عندى مشكله فى الجهاز ... او انا عايز صوره احطها للبوست لو ممكن تدوريلى
الكلام معاها هى بالتحديد – رغم تقارب السن جدا – دائما بالالقاب او على الاقل بالنك نيم ... وان كنت انا شخصيا مبحبش لا دا ولا دا فى الشات او فى اللقاءات الفيس تو فيس الا انى دايما بسيب الطرف التانى هو اللى يحط حدود واطار طريقه التعامل..... مبحبش اوش نفسى بالنقاش فيها وخصوصا انى كائن قادر على التكيف لأبعد مستوى.
التليفون يمكن مرتنين تلاته منهم مره كنت بسأل عن مضاد حيوي بديل عشان كان العيان غلبان والمضاد الحيوي اللى كنت هكتبه كان غالى وكنت عايز بديل له نفس الماده الفعاله.
دى خلفيه الشخصيه اللى قالتلى د محمود " مؤكده على استخدام اللقب" انا بحس انك شخصيه كرتونية أوى.
السؤال :الذى يطرح ويضرب نفسه ويقطع نفسه هو دا حلو ولا وحش؟
والسؤال التانى : هو انا شكلى على المدونه بيبان كده بجد؟
المشكله ان اللى يعرفونى بيقولوا ان اه فيه فرق بينى وبين المدونه .... بس انا اشبهنى فيها بنسبه 90% على الاقل ... ثم هى شافتنى لايف وكلمتنى شات ... انا بظهر كـ شخصيه كرتونيه فعلا.
حد تانى قالى فى مره انه متوقع انى قصير جداااااااااا ولى منقار او وشى يدى شكل منقار.... وكتير استغربوا أنى في أخر سنه طب أسنان وكان فاكرين انى فى ابتدائي.. بالكتير اعدادى

هو اسم بطوط بيخيل اوى كده
هو أنا شكلي في المدونة إيه بالظبط منك له لها ... أنا كده مش هعرف اتجوز...

انا هشترك فى برنامج اريد حلا والا هنتحر

وحالتى ميؤس منها ولا ايه النظام

D
 لو مش هتاخد راحتك فى التعليق وانت مسجل سجل بغير معروف وامضى فاعل خير

سؤال البوست انا مين فى الصورتين اللى فوق

واحب اقول ان خلاص فاضل شهر وراجعلكم يا بشريه وراقد فى مدونتكم لحد ما يبالنى اصحاب 

طول الشهر دا انا فى قفا دعوه اللى مش هيدعى يا ويله وسواد ليله وقد اعذر من انذر

 

مها زين

انا بقالى تلات اربع تيام عايز اكتب بوست اقول فيه لمها زين انها الحياه مبروك على الخطوات الجديده اللى جت ورا بعضها  واللى اخرهم هنا

وكل ما اجى ابدأ كتابه ملقاش كلام معرفش ليه

اول مره بدأت اكتب كنت عايز اكتب عن ازاى الواحد ممكن يبقى راجل مع نفسه .. ويمشى كلامه عليها غصب عنها وغصب عن اى حد تانى .. وانه يقول هعمل يبقى هعمل

وكنت عايز اكتب عن .. الا ان سلعه الله غاليه ..الا ان سلعه الله هى الجنه 

وبعدين جهزت بوست اتكلم فيه مسك العصايه من النص وان دى اكتر حاجه ممكن تخلى الواحد يتخلى عن خطوات كتير قطعها ف طريق الالتزام .. ودى من اكتر المشكلات اللى الواحد ممكن يمر بيها

ازاى يجمع بين ان الناس متشفهوش جاى من كوكب تانى .. وبين ان يلتزم .. وبرضه معرفتش ارتب الكلام اللى ف دماغى.

فى الاخر تهت واحترت اكتب ايه ... ولقيت احسن حل ان اكتفى بمبروك من القلب لمها ودعوه صادقه ليها ان ربنا يثبتها .. وادعى لنفسى انى ارتب دماغى لانها بصراحه اثارت جوايا مواضيع كتير عايز اتكلم فيها ان شاء الله ف الايام الجايه بس غالبا ف مدونتى التانيه بطوط لما يقول 

والسلام ختام
اه كل واحد ياخد له شوكولاته واحده بس اللى هياخد اكتر مش هقطعه حتت حتت حتت

روحوا باركوا لمها من هنا  

ابرز هديتك .. اعتز بصحبتك

السنه الى فاتت زى اليومين دول كده بالظبط قعدت اشرح لكم اد ايه ان اباهتكم وماماهتكم كانوا محظوظين لانهم شافوا اليوم دا من اتنين وعشرين سنه - كان ساعتها واحد وعشرين بس

وكل الى خته منكم رغم انى وضحت حقائق تاريخيه وبينت بالادله التى لا تقبل الشك انكم ولاد محظوظين وان مولد بطوط كان خير للبشريه -شويه كلام 

اكيد محدش عارف لو مكنتش جيت كان ايه اللى حصل - مش كان احتمال أبويا مثلا يطلق امى؟؟او يتجوز عليها .. او هى تطلب الطلاق 

واحتمال ماما حد فيكم تعرف كده فتقوم تقول الرجاله ملهمش امان وتطلب الطلاق برضه 

وطبعا لو مكنتش جيت اكيد اللى كنت هتجوزها كانت هتعنس .. واحتمال باباها برضه يطلق مامتها عشان خاطر البت اللى عنست دى

وكانت ماماتها هتعتبر دا اهانه كبيره .. هى مالها اساسا دا كله نصيب ... وبعدين تخده وتقطعه  وتحطه ف اكياس وترميه ف البحر .. وتنتحر  .. والبنت تتيتم وتعنس يبقى كتير اوى بجد

وطبعا مكنتش مدونتى هتبقى موجوده.. ومرات صاحب  البلوجر لما تدخل تشوف المدونات هتحس ان اكيد ف حاجه ناقصه فـ تطلب طبعا الطلاق من جوزها اللى مقدرش رغم انه صاحب شركه مدونات كبيره .. وجوجل بقى وبتاع .. ومقدرش يسد النقص الفظيع اللى هيسببه غياب بطوط عن التدوين......
ولما تتطلق بقى تاخد منه اللى وراه واللى ودامه فيبقى على الحديده ويقفل الشركه ... ويروح يبيع بطاطا على كوبرى القصر العينى

ويتخانق مع الراجل اللى هناك ... ولانه اجنبى الحكومه هتقف فـ صفه .. فمرات صاحب البطاطا اللى واقف دلوقتى طبعا هتطلب الطلاق لانه مش عارف يأكلها

ومحدش عارف الراجل الاجنبى - اللى كان صاحب البلوجر - هيبعلنا ايه .. ممكن تبقى مسممه وناس كتير تموت .. وناس كتير تترمل .. وناس تتيتم ... وحقوق الاطفال والحوارات دى

دا غير انى لو مكنتش جيت ..صاحبى اللى قاعد معايا ف الشقه مكنش هيقدر يدفع الايجار كله .. فيتخانق مع اهله .. وصاحب العماره ... ابوه يطرده ... وصاحب العماره يسجنه ... تقوم بقى البنت اللى المفروض يتجوزها مترضاش به لانه بقى سوابق

فابوها بقى ممكن يطلق امها .. وامها ممكن تقطعه وتحطه ف اكياس ...والخ

وكمان مصر كانت هتخسر رجل من اهم رجالاتها .. -دا اللى هو انا - والطب كان هيخسر دكتور من اهم رجالته .. وناس سنانها كانت هتبوظ .. وجوزها يطلقها برضه ... وناس اللثه بتاعتها كانت هتدمر .. ومراتتاها تطلب الطلاق .. وناس كانت هتعنس عشان شكل سنانها وحش ... والله بجد الحمد لله انى جيت

 

دا غير حاجات كتير لو قعدت فكرت ممكن اقولهاكم بس المشكله انى بجد مستعجل وبكتب البوست بسرعه رهيبه ومرتجل والله حتى من غير تحضير

المهم حد بقى فيكم يعمل زى المره اللى فاتت - بعد ما وضحت اهو ليكم اد ايه كان مولدى سعاده للبشريه - 

ويجى يقولى كل سنه وانت طيب يا دوك .. سنه سعيده يا بطوط .. هابى برث داى يا ابو البطابيط ... يارب تحقق كل احلامك السنه دى يا دكتره ... والخ الخ من الكلام دا ... احب اقولكم ان دا مش هينفع السنه دى

انا بقى مادى جداااااا ..جداااااا واحمدوا ربنا انى جيت اساسا

اللى هيدخل المدونه وايده فاضيه مش عارف هعمل فيه ايه ..

وعشان مغلبكمش ف التفكير ف الهديه اختاورا واحده من تلاته اظن كده عدانى العيب

• لاب توب أبل ما كنتوش
• كاميرا ديجيتل 10 ميجا بكسل و 12 اكس على الاقل 
• اى فون

تجيب هديه تبقى شاطر ...امور  .. احبك .. احترمك .. اعتز بكوننا اصدقاء

متجبش يبقى سنتك معايا بيضا بإذن الله .. وكل كومنتاتى عندك يجولى وصورى وجواباتى .......وملكش حاجه عندى

عيدا ميلادى لسه يوم 31 الشهر دا يعنى تلحقوا تعملوا جمعيه وتقبضوا الاول ... محدش له حجه بقى ..وربنا يخلينى ليكم ياااااااااارب

انا جبت قطعه جاتوه واحده لحد ما استلم الهدايا وابقى اجيب تورته بقى :P