2009/11/24

وقام زعلان :(



اكتر حاجه بكرهها فى حياتى ان حد يزعل منى .. حتى لو الحد دا اول مره اشوفه او حتى لو كان اخر مره هشوفه  .. مبحبش حد يزعل منى .. دا مش معناه انى انسان حساس وبخاف على مشاعر الاخرين - رغم انى بحاول - بس دا معناه انى مبحبش الناس اللى بتزعل على اقل حاجه.
من الصعب جدا انى اتعمد ازعل حد منى .. ومن النادر يصل للمستحيل انى اقول لحد من اصحابى انك فيك العيب الفلانى بطريقه مباشره. يمكن اصلا لانى بحب اصدقائى بعيوبهم - بل بعتبر ان عيوبهم هى اللى مديالهم طعم . ومبعرفش افصل الشخص عن عيوبه ببقى مش متخيله من غير العيوب دى .
ثم انا من الناس اللى بتقدر تقبل اصحابها زى ما هم .. وصديقى ممكن اعتبره صديق ناجح لو كان - فقط - حد ما بتخنقش من وجوده . واقصى طلب ممكن اطلبه من اعز اصدقائى غالبا هيكون هات لى كذا وانت هناك ,بس لو مش هتروح هناك خلاص متجبش ..او اقضيلى المصلحه الفلانيه وانت هناك .. مستحيل استلف منه فلوس ومستحيل اطلب منه يعملى حاجه مخصوص وهو مش هناك .


اه طبعا احيانا بنقد بس بطريقه غير مباشره .. وعندى طرقتين بقول بيهم لاى حد ان فيه حاجه انا بضايق منها.


الطريقه الاولى : ودى اكثرهم نجاحا ودى كنت قرتها فى كتاب (لنيل كارنيجى) انى امدح الصفه العكسيه فيه .. يعنى مثلا هو بيكدب  وانا عارف انه كداب .. اتعمد كل ما يقول كلمه صدق ادامى ..انى اقوله انا اكتر حاجه بحبها فيك انك بتقول الصدق دايما .. انت اه ساعات بتكدب ( واضحك ) بس فعلا انا بثق فى كلامك جدا ومبتخيليش انك ممكن تكدب عليا انا بالتحديد.
الطريقه دى كان ابويا -  الله يرحمه - بيعملها معايا يمدح فيا ادام اصحابه وانا - فاكر - انه ميعرفش انى سامع. الطريقه دى بتفرق كتير وفعلا بتنجح .
الطريقه التانيه بقى : انى اقوله انت على فكره بتكدب احيانا بس بيكون ليك مبرر كذا وكذا وكذا ... بس فى ناس مبتقبلش الحوارات  دى (واعدل راسى وابص له)  واقوله : رغم انى عارف انه بيبقى ليها مبررها .. بس المبررات دى بينى وبينك اصلا مش مقنعه لكل الناس .بس اهى الحياه كده ..وامدح فيه فى صفه تانيه - موجوده فيه فعلا- ويبقى كلامى بيدور حوالين مدحى له فى الصفه التانيه وايجاد مبررات تافهه لصفته السيئه اللى انا قلت له عليها ونقدى المتغطى للصفه دى.


من يومين بقى معرفش ايه جرالى حسيت انى كنت غريب عن تصرفاتى . فى يوم واحد عملت تاتش مع تلاته اربعه من اصحابى .
واحد رديت فيه حركه قارعه عملها فيا كذا مره .. وقلت بعدها عشان تعرف ان الحركه دى بتزعل .. ويمكن دا اسلوب كويس - بس مش اسلوبى - انا مبعملش كده المهم هو طبعا زعل.
واحد تانى بقى كنت بقوله رأيي فى موضوع خاص بيه ولقتنى بستخدم الألفاظ الحاده فى التعبير عن وجه نظرى وكأنى بشتمه هو .. او كأنى واخد موقف مسبق من اللى بيحكيه .. وطبعا هو زعل. وانا غلطان انى بحكى معاك

واحده بقى - ع النت - وبتاخد رأيي فى قصه حد كانت بتحبه ولقتنى بقولها يا بنتى كل البنات واطيين هتنسيه اسرع مما تتخيلى. وطبعا زعلت .. وانا غلطانه انى بحكى معاك



اولا انا اضايقت من نفسى بعد التلات قصص دول وخصوصا ان الفرق ما بنهم مش اكتر من اربع خمس ساعات. وفعلا انا كنت فى مود غبى - رغم ان دا طبعا مش مبرر.
بس لما هديت رجعت اضايقت تانى .. طب ما هم المفروض عارفين ان دا مش اسلوبى وايه يعنى لما اتغابى مره؟ . واول واحد دا بالتحديد مهو انا قلت له قبل ما اعمل فيه نفس الحركه ان حركته دى غبيه جدا وبتضايقنى ثم هو اضايق ليه ما انا بعمل فيه نفس حركته - اللى هو فاكر انها عادى -.
والتانى انا قلت له وجهة نظرى .. لو حذف الالفاظ الحاده تطلع وجه نظرى اللى عاوز يسمعها.
والتالت : اه انا مُصِر ان البنات واطيين .. ويمكن الظروف هى اللى بتخليهم كده .. لو فضلت زعلانه سنتين تلاته على اللى كانت بتحبه هتعنس وطبعا ضغط البيت عليها .. واحساسها ان كل اللى فى سنها ارتبطوا وهى لأ كل دا بيخليهم واطيين.
عموما محدش يزعل .. بس انا زعلان :D



هناك 16 تعليقًا:

Noha El-arabi يقول...

ايه يا دكتور الذكاوة اللي نزلت عليك ده
يعني انت زعلت واحدة بس عشان قولتلها البنات واطيين
دلوقتي و بعد هذا البوست ابشرك ان اي انثي من اي نوع حتي لو سحلية معدية في المدونة ده حتزعل
اشطاط :)))))))))))))
زائد بقي ان موضوع الندالة ده طبع في اي بني ادم لا بتفرق لا بظروف و لا بغيره
الواطي يفضل طول عمره واطي
استلم بقي اللي بعدي
:)))
سلامو عليييكو

مها يقول...

ايه يا بطوط دااااااااااا؟؟؟
واطيين ازاي حضرتك؟؟؟؟؟؟؟؟؟؟
وانت كمان اللي تقول كدة.....؟؟؟؟؟!!!!!!
طبعا لازم التلاتة يزعلوا
وانا كمان ازعل
وكل البنات تزعل
والبشرية جمعاء تزعل
لان المثل بيقول ان طلع العيب من اهل العيب ميبقاش عيب.. لكن لو طلع من ولاد الأصول المتربيين اللى مبيجرحوش حد وما بيدوسوش على حد ... يبقى عييييييب جدا اوى خالص
الكلمة الشريرة تجرح اكتر لو من آخر شخص تتوقع انه يقولها لك.. لو من أكتر شخص بتثق انك مهما كنت سخيف معاه هو عمره ما ييبقى سخيف معاك..
والبنات مش بتنسى عشان هما واطيين بقا .. الولاد هما اللي تييييييت عشان كدة البنات بتنسى

قول يا بطوط قول
قول حقكم عليا قول

آه وكفى يقول...

بطوووووووووطي
ليه كده
البنات مش واطيين بس اي وحدة بتعمل واطية اكيد اتعمل فيها حركة وطينة
وبعدين حط نفسك مكان اي بنت يعني لو واحد ساب وحده ولا سبتو هيقعد يعيط عليها لأ طبعا هينزل يقعد على القهوه يشرب معسل ولا كأن في حاجة وهيتجوز ويجيب عيال ولما يشوفها بعدها هيقول ياربي شوفت الخلقة دي فين قبل كده
هنعمل ايه يعني محدش بيموت من الحب
بس البنات دوول بلسم لعلمك بس هما بئوا واطيين لأن اصلا الرجاله ماتو في 73 خلاص كل سنة وانته طيب يابا بس طبعا الرجاله النادرين اللي زيك المفروض يعملولهم محمية طبيعية او متحف مثلا
P:

عيد سعيد ياضكتور هتقتلني ولا هتكتفي بجلدي 700 جلدة بعد الكومنت ده
D:

مي يقول...

ههههههههههههههههه بجد التعليقات اللى قابلى جميلة جداااااااااا وجابوا حقنا صح
يالهوى ده كنت داخلة اقولك انى زعلانة ليه مش عارفة بس غلاسة بقى ها فى مانع يادكتورنا؟
اه بحسسسسسب

اولالالا انا مش هجاملك والله ولا بدى مبررات لاى حاجى
بس انت فعلا متضايق عشان حد زعل منك وانت فى قرارة نفسك مكنتش عايز ده يحصل
المواقف التلاتة انت كنت صححححححححححححححححححح فيهم
بس كنت اوفر شوية فى رد فعلك
وده عادى اى انسان طبيعى مخنوق من حاجة او ضغط فى الشغل او المذاكرة لازم يزعق او يتخانق لازم نستحملك زى ما انت بتستحملنا برضه واحنا مخنوقين ولو تلاحظ المواقف كلها كانت فى يوم واحد يعنى مش غلطك غلط توقيتهم السىء الموقف الاول انت عملت مع صاحبك حاجة كانت بتضايقك وحبيت تدوقه طعمها وده صح عشان يعرف انها بتضايق
وكده لو زعل يبقى انت كان لك حق تزعل يبقى فى تعادل كده
الموقف التانى خدتك الحماسة وخدت الموضوع على محمل جامد فانفعلت بس انت مش قاصدك شتيمة ولا حاجة مش مطالب تكون هاااااااااااااااااادى وانت مخنوق
التالت بقى
انت مكنش قصدك واطيين بالمعنى المعروف انت من خوفك على البنت دى وانك ايز تطلعها من جو الحزن والضعف والسلبية قلت الكلمة دى لانك بررت خوفك عليها من كده
ونظريتك صح لان البنت لما بتحب اوى بتيجى على حساب كرامتها وشخصيتها وتصبح فريسة سهلة وتصغر فى عين الشخص ده كل ده معنى كلمة واطيين بس بشياكة شوية
انا مش بلاقيلك مبررات مطلقا ولكنك انسان جميل لانك انت اللى زعلان وخايف على زعلهم بالرغم من اللى انت فيه من خنقه وضغط
هون على نفسك صديقى اكيد اصدقائك مزعلوش لان الحلو بتاعك بيغطى على الوحش
اسفة على التطويل ومش زعلالالانة ابدا

صيدلانيه طالعه نازله يقول...

ايه العك اللى انت عكيته ده بقى انت جاى تورينا انك زعلان من نفسك عشان زعلت تلاته تقوم تزعل حريم البلد كلها
جرى ايه يااااااااااااااااض لا بلاش يااااااض دى خليها جرى ايه يا واااااااااد يا دكتور انت بقى البنات واطيين طبعا واطييين لانهم ملقيوش المثل الاعلى اللى يطولوا عشانه و يمكن مش بيحبوا يشربوا لبن الصبح عشان كده نموهم وقف و بقوا واطيييييين برضه
المهم انت خلاص اتحطيت فى الصفيحه السوده لان اللسته السوده مش مقاااااااااامك خاااااالص
خد بالك من نفسك و انت ماشى لان غلاوتك زادت عندى و بقت زى غلاوه الجزائر و اكتر شويه كمان
قااااال واطيييين قاااااااااال
مااااااااشى يا بطوط اشوفك بره المدونه انشاء الله
و انا و انت و الاستاد كبييييييير
ههههههههههههههههههههههه

Helium Atom يقول...

((:

nigro يقول...

جبتلنا الكلام يا عم
مبسوط كده
استلم بقى

قلب الأسد يقول...

واطيين؟؟!!!!!

HeBa يقول...

أحم

زي ما اللي قبلي قالوا .. الموضوع مش موضوع وطينة سعادتك ... موضوع أن الحياة بتستمر وتنتشر وتتوغل

يعني لو أتنين بيحبوا سابوا بعض هيزعلوا شويةوبعدين لايف ويل جو اون وأكتر من كده مش هيحصل غير في الأفلام

هشبهلك الموضوع بحاجة تانية لما بتفقد شخص عزيز عليكي وبيتوفي الحياة بتستمر وأنت مش بتموت وبتعيش بعدها وتكمل حياتك وتحب وتتجوز

الدنيا مش بتوقف على حاجة ولا على حد

ومن هذا المنطلق يا عزيزي ممكن تعتبر البشر كلهم واطييين

الموقفين التانيين بقى ... أنت كنت على حق بس أوفرت الموضوع شوية ده إلى جانب إن الناس فعلا ما تبقلش على نفسها اللي بتعمله مع غيرها

يعني صاحبك بتاع أول موقف ده عارف أنها حركة تييت وانها بتزعل ومع ذلك بيعملها معاك وبيكررها برغم أنك قلت له أنها بتضايقك لكن لو عملتها أنت معاه الدنيا هتوقف ومش هتقعد

الناس مش بتحب الحقيقة الصادمة ولومكنتش قلت لصاحبك إن ده رد على تصرفه معاك مكنش الموقف ده كله حصل من الأساس

كل سنة وأنت طيب يا محمود ويارب يكون عيد سعيد عليك

غير معرف يقول...

زعلان اتفلق

D:
رغم ان ده مش اسلوبى فى التعليق هههههههههه

pinky يقول...

ana gaya a2ool enni 2areet :| bass kida

lily يقول...

thanx dr.battoot
that's really nice of you

غير معرف يقول...

ده انا كده اللى زعلت يا عم الدكتره
طب انت زعلان ومش فى الموووووووود البنات ذنبهم ايه بس!

وبعدين يا دكتره ايه المشكله يعنى لما مودك مره مش يبقى تماااام هو يعنى لازم طول الوقت تبقى مبتسم ولا دمك خفيف
الله يكون فى عون الشباب بردو...... وفى نفس الوقت ماتجيش على ارق الخلق وتقول دول واطييييين :(
وبعدين انا عارفه الحاله دى بجد المود ده بيكون كده مود غبى اووووى بتبقى من جواك عندك كبت داخلى كده او متضايق بس مش باين عليك ومابتصدق تلاقى الشخص وتنفجر بقى وممكن يكون شخص واتنين وتلاته وخمسه كمان
لو مش لقيت بقى اشخاص تطلع مودك ده عليهم يا ايما تتلكك وتدور انت على ناس تنفجر فيهم
او ان المود بيستمر اطول فتره ممكنه يعنى بدل ما يبقى يومين مودك مش تمام يبقى اربعه خمسه
انا مجرباه المود الغبى ده وعاارفاه بس انا بيحصلى علشان انا لسه مخلصه دراسه وقاعده فااضيه عاطله فى البيت من حال الكليه والاصحاب والمذاكره والانشغال
لحال الروقان والفضا والكسل فلازم اطلع المود على اى حد
انت بقى اكيد كان فيه سبب لكده .... وبردو عادى مافيش مشكله لو الانسان كان فى مود مش كويس مره ولا اتنين
المهم انو هو اصلا مش كده ومش قاصد يجرح حد بكلامه
وبردو انا زعلااااااااااااااااانه علشان مش كل البنات واطيين ومش كل البنات بتعرف تنسى بسهوووووله
ومافيش حاجه اسمها مبدأ التعميييييييم
وبس خلاااااااااص

صاحب المضيفة يقول...

ساعات باعمل زيك كده وأدخل شمال في حد لكن ده غالبا مش بيحصل الا بعد لما اوصل لحد لا يمكن السكوت عليه واخواتي بقوا عارفين كده

باسكت على تصرفات غبية كتير صغيرة لكن لما الامور بتزيد يبقى ربنا يستر عليه اللي قدامي

:):):):)

وهايبة بقى يا معلم

:):):):):)

ست البيت يقول...

واضح ان الناس شايطة منك والبنات تحديدا
بص يا بطوط الموضوع مش وطيان
الموضوع ان الحب الخيالي مش موجود احنا في واقع الألف جنيه ما يشتروش حاجة
وهو فين الراجل اللي ممكن واحدة تثق فيه يا معلم
نادرا
وفي الغالب الراجل اوطى يا صاحبي
قولي ليه
الست لما بتضايق من جوزها في الغالب بتقعد تعيط
أما الراجل بيزعق ويعمل البيت حريقة ومش بيراعي نفسيه المرأة أبدا ولا الضغوط عليها
الراجل لما مراته تطلع مثلا مش بتخلف
بيتجوز عليها يا أما يعيشها في حاله انا مضحي عشانك
أو الالاثنين يعني يبقى متجوز عليها وفي نفس الوقت مشيلها الهم
لو هو اللي مش بيخلف وطلبت الطلاق عشان نفسها في طفل يا دي المصيبة ست ناكرة للجميل ست مش ولا بد والمجتمع يطلع عليها تشنيعات مش بس شائعات
الراجل مش بيصبر كتير ع مراته ولا خطيبته لأنه عارف أن البنات بقت كتيييييير قوي مش لاقيه جواز
والاوطي من كده انهم بيستغلوا الظروف
يعني عاوز واحد متدينة حلوة زي القمر وشعرها طوله مترين في 180 وطولها لا يقل عن 175 ومتخرجة من مدارس لغات وبعدين لما نيجي للجد يقدم شهادة فقر مترضخ البنت واهلها لأن الشباب حيجيب منين
عرفت بقى مين الواطي يا بطوط ومن غير زعل
بس ع الصعيد الجواني فيه برضه رجاله صح بجد وشباب مصحصحين
وفي بنات عاوزة الحرق واطييين
الدنيا يا بني على ادي ودي
ولا تزعل نفسك
لما ام مشاكل تولد حجيبلك مشكولة الصغيرة ويمكن مشكول
اللي ربنا يقسم بيه
قول يا رب

just waiting يقول...

ههههههههههههههههههههههه
تصدق انت عسل
بس ايه حكاية وطيين دي
علشان بينسو بسرعة يعني ومين قالك انهم بينسو بسرعة
لو كنت سمعت اللي بيقولك ان قلب المرأة محيط عميق من الاسرار كنت فهمت
وبعدين مالازم نعمل كدا لان اكيد الانسان اللي بننساه دا جرحنا يبقى هو الواطي لان هو اللي سابنا الاول