2008/08/14

يوفوريا

عشان تفهم العنوان لازم تتبع القواعد بالحرف
اولا لما اقولك اتخيل لازم تتخيل .. يعنى لو قلتلك اتخيل ان عندك امتحان اكس راى متقولش انا متخرج من تجاره بقالى عشرين سنه اتخيل ده ازاى
مليش دعوه قلتلك تخيل تبقى تتخيل لكده لا مش هتفهم
انت لازم تحط نفسك فى الموقف
تخيل انك بتحب بنت , بتحبها يعنى بتحبها , وتخيل ان البنت دى اجمل واطيب وارق بنت فى الدنيا .. مش عشان انت بتحبها انما دى الحقيقه وتخيل ان البنت دى كمان بتحبك وبتموت فيك .. وطالما انت كده كده بتتخيل ..تخيل كمان انك متقدرش تستغنى عنها .. انك لازم تشوفها كل يوم ولازم تسمع صوتها وزياده فى التخيل تخيل انك بقالك يجى اسبوع او عشر تيام مشفاتهاش _ كأنها اجازه عيد الاضحى يعنى – وانك نفسك بقى تشوفها وتقولها مليون بحبك ومليون بموت فيكى ونفسك اساسا تخدها فى حضنك بس الظروف


ضيف لكل ده انك بقالك يومين منمتش كويس .. وكمان عرفت ان فى امتحان اكس راى الصبح .. وانت اساسا متعرفش الاكس راى دى اسم ماده عندك بجد ولا بيستهبلوا ؟؟ ولا تقريبا اسم مرض ولازم تذاكر اعراضه وعلاجه الله اعلم
تخيلت كل ده مع بعضه؟؟
طب ضيف انك جيت متأخر للكليه ومش هتعرف تشوف حبيبتك – الى انت تخيلتها- قبل السكشن .. وان فى محاضره مهمه جدا لازم تحضرها وده معناه انك مش هتعرف تقعد معاها .. قشطه؟
تخيل بقى ان السكشن اتلغى وانك خلاص بقى هتشوف حبيبتك .. وكلك سعاده واحساس بالنشوه العامره رغم الاخبار الكئيبه الى سمعتها الصبح ( خبر الامتحان يعنى )
تخيلت كل ده ماشى ندخل بقى على البوست
ازيك يا حبيبتى وحشتينى والله جدا جدا جدا
والله وانت كمان
عملتى ايه فى الاجازه
ياااااااااه دى حصل فيها احداث كتيره
ازاى؟؟
اول امبارح جه واحد اتقدم ليا
يانهار ؟؟
هى ماما موافقه عليه جدا .. ولما كلمتها عنك وقلتلها انى بحبك زعقت فيا .. وعيطت .. وقالت كلام كتير اوى .. اصل انت متعرفش ماما بتكرهك اد ايه
اممممممممممممممم وبعدين
هم قروا الفاتحه .. وتقريبا اتفقوا يجيبوا الشبكه بكره
نعم؟؟!! انتى بتقولى ايه .. بتتكلمى بجد؟؟ انتى اتخطبتى

اكيد هى بقى هتعيط
ودامك حل من اتنين اما انك تهون عليها وتفهمها ان ارتباطكم اصلا كان صعب .. وده هيخليك عايز تولع فى نفسك لما تروح لانك معرفتش تعبر عن غضبك
واما انك هتقولها انتى كده بتخونى .. ومتحاوليش تقنعينى ان فى بنت بتتخطب غصب عنها .. وانك لو بتحبينى هتقدرى تقفى ودام الجن الازرق ان شاء الله نتجوز واحنا عندنا 60 سنه ..الى بتقوليه اسمه خيانه بكل المقاييس .. تبقى معايا من يومين وتقوليلى بحبك ومقدرش اعيش من غيرك والنهارده تقوليلى انهم قروا فتحتك وانتى معرفتيش ترفضى ؟؟ هنستهبل ؟؟
فى بقى احتمال تالت خالص وهو ده الى يخصنى فى البوست ده
انك تصاب بحاله من اليوفوريا .. الى هى ..هستريه ضحك غريبه .. متفهمش هى قالت لك ايه بالظبط؟؟
تقعد تكلم نفسك .. هى قالت لى انها اتخطبت ؟؟ طب ازاى؟؟ والكلام والـ.......الى ... يعنى هي.... وبعدين هـ....... طب ازاى؟؟
تفضل باصص ليها عشان تقولك الفقره دى اتصورت عايز تذيع قول ذيع؟؟ وتمد ايدك على شعرها عشان تشيل الباروكه وتقولها اتطلع من دول يا ابراهيم يا نصر
وبعيدين تسيبها وتمشى وانت هتموت من الضحك
اول حاجه هتعملها لو تخيلت انك تصرفت التصرف التالت - غالبا هيكون - انك تتصل باقرب واحد لقلبك وتحس انه هيفهك فى الوقت ده
تقلب فى ارقام الهاتف وتتصل بحد فعلا .. تفضل تكلمه وانت مش عارف انت عايزه يقولك ايه؟؟
بعد شويه هتقرر انك تروح تاكل فى محل نضيف من باب ان تحس انك حد محترم .. او حاسس ان ده هيديك فرصه للتفكير فى الى حصل بالظبط
هينصحك صديقك بانك تطلب كوردن بلو - غالبا - وغالبا هتبقى طالباها معاك فلسفه
فهتقول هى كوردن بلو معناها ايه؟؟ كوردن ازرق
اظن مفيش ازارق من كده

لو سمحتى عايز كوردن فرى فرى بلو ولو فى اسود هاتى

هى دى اليوفوريا حد فهم حاجه؟؟
سؤال البوست بقى .. اذا كان حبيب حبيبى حبيبى .. يبقى خطيب حبيبتى ايه؟؟
التعليق اسفل البوست مش ... الى توجه مشكله فى التعليق يراسلنى رجاءا على batoot_dnt@yahoo.com

هناك 25 تعليقًا:

غير معرف يقول...

1
2
3
تست

صاحب المضيفة يقول...

..
مش مضطر تجاملنى .. لانى عارف نفسى .. فمش هصدقك

ولا مضطر تثبت حضورك .. لان عداد المدونه .. كده كده رصدك



انت واثق في نفسك قوي وواخد مواهب اخوالك يا حلو

:):):):)

اما بقى حبيب حبيبتك بقى ممكن تاخده على أقرب كافيه وتقنعه بان يرجع عن اللي في دماغه بالهدواه كده أحسن من استعمال الغشم معاه ده لو كانت حبيبتك عاوزاك من الاول اصلا وانا على فكرة بهدي النفوس بس


ربنا يسعدك وتلحق امتحان الاكس راي لو كانت اسم مادة اصلا

:):):):))

كل سنة وانت طيب يا جميل

fnoonh يقول...

صدقني ماعنديش تعليق البعملة اني قاعدة اضحك وبس انت عارف انت فكرتني بايه بفيلم حماده هلال البيقول فيه خطيب حبيبتي دا ود منحوس خطبها وهيا عليها فلوس هههههههههه شوفت عرفت اجاوب على السؤال

غير معرف يقول...

هههههههههههههههههههههه
عدوى اليوفوريا انتشرت ف بر مصر بسبب البوست بتاعك يا بطابيطو
أنا مت م التخيل ومن الضحك ..
بس هى دى اسم ماده عندك بجد ولا طلعوا بيستهبلوا؟؟
ههههههههههههههههههه

والا حكاية الكوردون اللى فرى فرى بلو دي!!!!!

عفريت يا بطوط حبوب

والا أحسن نقول بطوط حبيييييب :))))

بص بقا عشان تبقى عارف..
ثبت من خلال التجارب المعملية العملية إن أحسن حاجة فى الأوقات الصعيبة اللى زى دي مش الكوردون بلو.. لأن البلو مش بيليق على اليوفوريا المخططة أم رقبة .. إنما اللى يليق هو العدس أبو جبة حضرتك .. أو البدنجان .. الغوامق كمان موضة جداً في هذا الشتاء الحارق والزمن الوغد صدئ الغمد وصلى ع اللى هيشفع فيك ونزل اعلان شكر وتقدير ف صفحة الاجتماعيات بكرة الصبح لخطيب حبيبتك نظراً للخدمات الجليلة التى قدمها لك وانقذتك من ندم محقق

و... ستاى تيوند :)))))


مها - مشربية

Unknown يقول...

السلام عليكم ورحمة
الله تعالى وبركاته
هو انت لسه بتحبها!!
مش كنت انتهتوا من فترة
(اخر مرة زرت هنا بقالى كتير)
وكلنا ساعتها قالنا لك خيرها فى غيرها!!
يبقى اللى باعك بيعه واحمد ربنا زى مها مابتقول كده

Mina يقول...

تصدق بايه
الموقف ده حصل معايا كتير جداااااااا
مش مرة ولا اتنين
واخر مرة امبارح
ولسة كاتب بوست عن الموضوع ده عندي من 3 دقايق
البوست عبارة عن ضحك
بس ماعلينا
نعيش وناخد غيرها
اكيد مش اخر مرة
هههههههههههههههههههههه

لحظة يقول...

السلام عليكم

ارجو ان تتقبل كلامي بصدر رحب

اولا انت غلطان لانك سمحت لقلبك انه ينجرف بتلك المشاعر وانت لسه طالب وعارف انك مش هتقدر ترتبط رسمي دلوقتي خالص

واللي حصل معاك ده فيلم عربي اتعاد قدامك اكيد مليون مره بس الناس ما بتتعلمش

ثانيا هتقوللي ازاي هو فيه حد يقدر يقف قدام الحب والمشاعر والكلام ده هاقوللك اللي عايز يعمل حاجة هيعملها واللي عنده ارادة مافيش حاجة هتهزم ارادته ولو انت كان عندك هدف من الاول انك هتتخرج الاول على دفعتك من اول يوم في الكلية وما فيش حاجة هتقف قدام ولا تعطلك ولا تشغلك ولو الجن الازرق كنت هتركز وتحقق هدفك بدل مانت محتاس في الاكس راي دلوقتي

ثالثا فيه واحد بيكتب في الدستور اسمه خالد كساب انا مختلفة جدا معاه ولكن ساعات بيكتب حكم منها ان قلبك لما يوجعك تقطعه حتت وترميه للبوبي
وان اللي يبيعك تسكع وراه الباب وما تدلهوش لحظة من تفكيرك

ورايي الشخصي ان كل الطلبة والطالبات اللي بيحبو من اول ابتدائي لحد جامعة عارفين انهم بيهرجو وبيمضوا وقت ظريف ومش اكتر من كده وانه ساعة الجد كل واحد بيدور على مصلحته

انت بكره هتميل لغيرها وغيرها وهتبقى مقتنع ان ده حب العمر وهي خلاص اتخطبت وهتغرق في الجواز والخلفة ومشاكل العيشة واللي عايشينها

ركز يا بني البلد محتاجة دكاتره عدله الله يخليك

وما تزعلش مني انا فرق بيني وبينك 15 سنه ومتطلبات الحياه بتعقل الناس وتفوقهم

ابني مستقبلك وارتبط باللي تبني معاك مش تهدك وتخليك تكلم نفسك

لحظة يقول...

والدليل التعليق اللي قبلي علىطول

مش قلت لك بتهرجو والغريبة انكو مصدقين التهريج وبتقلبوه بجد

ست البيت يقول...

بلاش اقول اللي في نفسي يا بطوط
احسن اخلي النت كله بلو وبلو بلاك كمان

بص الموقف دا حاجة من الاتنين
يا أمي الفيلم العربي اللي بتعمله كل بنت عشان اللي بتحبه يقصر ويجيب دستة الجاتو ويترزع في صالون بيتهم يضم في كتافه قدام ابوها وهي تدخل عاملة مكسوفة

إما بجد هي سلبية زي حلاتي ومتعرفش تقول لأ
الحالة الأولى احسن حل ليها كان اليوفوريا دي اللي حصلتلك وعادي اكس راي دي مادة عندكم بجد

واي كان الموقف والحالة أنا ضد الارتباط اساسا في الجامعة
يا بني بص للتعليقات اللي قبلي
كل واحد قالك حيدوروا على مصلحتهم
ودا حال الدنيا ...

جهاد خالد يقول...

هو تقريبا كل اليل فهمته الاكس راي عشان عندي امتحان اكس اري يوم التلات وعاملي كاللو في دماغي


بس غير الاكس راي أحب اقولك إن أحسن حاجة تعملها فعلا إنك تدخل في حالة يوفوريا بدل ما يجيلك سكتة قلبية

وكان الأحسن والأحسن بس انت ملحقتش نفسك إنك تنفض للموضوع من زمااااان أوي طالما انت عارف ان البنات بيخلعو بدري بدري
>>> انا بنت على فكرة بس ماتاخدش ف بالك
D:

لا بجد نيصحتي لكل شاب وفيتاه انهم ياكلو شندوشتات حلاوة ويشمو كللة
ويخليهم في دراستهم لغاية لما البت نصيبها يجيلها والواد يكون مستقبله وامه تختارله عروسة كوويسة وبينت حلال
>>> رجعية جدا عارفة
بس هو دا الحل السليم بجد
ومفيش احلى واصفى وادوم واسعد من الحب اللي بيجي من باب البيت

..........
انا قلت كل الي في نفسي اهو
D:
سلام

maha zein يقول...

يا نهارك احمر
علي خفة الدم اللى صابتك
بجد بوست ولا احلي

ايه ده طيب
لا بجد
يعني اقولك ايه
وربنا وهم

اصلا اساسا الحل التاني هو الاصح
ليه بقه
عشان مفيش بنت بتتخطب غصب عنها
واي حاجة تمثيل في تمثيل
وقصة الشبكة دي انا سمعتها بتاع خماشر الف مرة

وحاجة غلب وهم صراحة

اذاي بقه تمشي تضحك وتسيبها
لا طبعا
ده انت تجيبها من شعرها
او اقولك
تزعق فيها وتنزل شتيمة لحد ما يبانلها خطيب

او تولع فيها البت دي

دي خاينة وعوزة ضرب النار وخسارة بسببها تتهور وتروح تطلب كوردون بلو في مطعم المينيمم تشارج بتاعه مش اقل من خمسين جنيه مثلا
حرام
دي بت مش تمام

قال اكس راي قال
عليا وعلي اعدائى

روح ذاكر يا ابني امتحاناتك قربت
النظري
ولا تحب احكيلك عن النظري والكلام ده
لو ناسي ارجع لبوست النظري والعملي تاع زمان ده بتاع ايام ما كان دمك خفيف مش تقيل ذي دلوقت
هىهىهىهىهىهى

انا حره يقول...

هههههههههه شفت بقى ياسى بطوط عشان بس متقولش عليا بخرف ولا بقول اى كلام

انا معرفش ولا حد من اللى علقو عندك بس كلهم اتفقو مع كلامى ومعظمهم لو تلاحظ بنات

انتو بس اللى مش بتحبو تسمعو الحقيقه

كلام مها ولحظه والنجمه الصاعده وغيرهم كتير هوا الكلام الصح ركز فمذاكرتك ونفض للاى حاجه ملهاش لازمه

Unknown يقول...

اهم حاجة عشان تفهم التعليق دة انك تتخيل

اة اتخيل

يعنى لما اقولك ان عم برعى استحمى النهاردة متقوليش ازاى وهو لسة مستحمى يوم الوقف انت لازم تتخيل


تخيل كدة وانت خارج من السكشن وفرحان اوى انك هاتشوفها اخير

تلاقيها بتقولك انا ضحكت عليك وانا اتخطبت للانسان اللى بحبة

حلوة دى اهى

وبكدة انت واد كفائة ولا تقولى خيانة وتظلمها ولا بتاع

اقولك اتخيلها سفاح بيقتل الرجالة

اتخيلها فى اى حاجة بس الاهم انك هاتخرج من خيالك دة ومش قدامك غير انك تذاكر بسرعة عشان امتحان الاكس راى

mohamed ghalia يقول...

محمود يا بطراوى
يارب اكون تخيلت غلط
ويارب اطلع مش فاهم حاجة أصل لو طلعت فاهم حاجة تبقى مصيبة
ويلا بقى قوم ذاكر وريحنا
بالتوفيق يامان

فاتيما يقول...

أناتخيلت قوى
و حاولت أضحك زيه
معرفتش
قلبى وجعنى بصراحة
بس موقفها متوقع
هيا جابت من الآخر
لسه هتحب و توجع قلبها مع أهلها
ما جه العريس الجاهز و هيخلص الليلة
البتاعة الفرفوريا اللى بتقول عليها دى
نعمة من ربنا
بينزلها على الواحد كدا بدال ما يطق و يجراله حاجة
الحمدلله إنها جت على أد كدا
بس أنا تخيلت قوى
قوى

kochia يقول...

اولا شكرا علي معلومة اليوفوريا
تاني حاجة بعد التخيل والتفكير .. المحاولة لاخر وقت وبعدين كله علي الله
لو فيه نصيب المحاولة هتنجح ولو مفيش هتفشل
لكن ساعتها لن الوم نفسي علي الفشل
وقد الوم نفسي لاحقا علي النجاح

تحياتي

حاسوباتيه يقول...

تعبت من التخيل خصوصا اني بنت بس خليني اتخيل اني مكانك خلاص هسيبها بقى هعمل ايه دي اتخطبت

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

غير معرف يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

Maha Shahen يقول...

انا لو منه معملش كل دا الحكايه بسيطه جدا
يقرب منها بشويش خالص ويبص في عنيها قوى وعلي فجاءه يقوم طااااااااااااااخ علي صرصور ودنها علشان لا تنفع ليه ولا لحد تانى هههههههههههه
دا ايه دا كدا يفقد النطق الراجل مع كل اللي حواليه دا هيتجنن فعلا
بس عامة هى متستاهلش اى تعليق الا انه يسبها ويمشى منغير ولا كلمه ولا اى ريئكشن خالص والله خساره فيها حتى اى كلمه ولا فعل ولا نظرة عين تبين حاله
ثم هى اصلا جايه تقوله ليه انا محروق دمى مبحبش الناس الاندال دى اللي تخون وتيجى تقول ببساطه اصل الظروف وحصل وكان وكأنهم هواااا ملهمش اى رأى وقيمه
والاوحش بقى انهم بيأكدوا لينا مدى غبائنا اننا حبينا ناس بالشكل دا وقد ايه كنا مخدوعين و.... ابو اربع رجلين وودنتين هههههههههههه
وكفايا كدا بقى بقى
مشكور للشرح والتوضيح

مهرة سالم يقول...

السلام عليكم...
إزيك يا بطوط...
...........
بقى بعد التخيل العميق ده ..
البنت إتخبطت آسفه إتخطبت ..
ربنا يوفقها ...
وحضرتك عمال بتحب وجايب كوردون بلاك ...
ومش عارف إيــه هو الإكس ري ولا لزومه إيه..
يابني سيبك منها وركز في الإكس ري ..
هو بالحق عملت إيه فيه ..
.....
دمت بخير..

Che_wildwing يقول...

كل ده عشان اليوفوريا
ياعم كنت قول كده من بدري
كنت هقولك اشرب سوجارتين حشيش وهتعمل احلى يوفوريا
وانت دكتور وسيد العارفين
اي نعم دكتور اسنان ووجع ضروس
بس اكيد هتعرف برضه
بقالى كتير مجتش عندك
بس لما جتلك عرفت تضحكنى
أضحك الله تغرك

حياتي كلها لله يقول...

السلام عليكم
أنا بس حبيت أجاوب علي سؤال الحلقة "قصدي سؤال البوست "..

مغفل
خطيب حبيبتك يبقي مغفل

تحياتي
سلمي

غير معرف يقول...

انا ما ضحكتش زى اى حد
ولا جالى نفس اضحك
كلامك مش بيضحك يا بطوط .. كلامك يحزن ويزيد على الحزن هم
وقلبي اتعصر .. مش عليك ولا عليها
من الجو اللى انت حاطط مفسك فيه في وقت زنقه كدا وبالشكل المريب دا

اللهم اجعل له من كل كرب فرجا .. ومن كل ضيق مخرجا

غير معرف يقول...

الطيبون للطيبات والخبيثون للخبيثات

لا تعلم من لا يصلح لمن