2008/08/20

كوفى شوب , وقلعه وبس


ملحوظة مهمة جداااااا جدااااا
كلمه "صدمه" في البوست مش اقصد بها معنى سلبي إنما أعنى أنها كانت مفاجئه لي جامدة , مخالفه لتوقعي , سببت لي اسبهلال

في أول لقاء تدويني أكتشفت حاجات كتيره جدا
في البداية اكتشفت مثلا إن اسكندريه صغيره جدا ( عبارة عن كافي شوب , وقلعه , وطريق يوصل بنهم .... وفى الطرق ده مطعم , وعزه بتاع الايس كريم )
رغم انى كنت متخيل إنها كبيرة بس سبحان الله الظاهر إنها كشت!!!

اكتشفت كمان إن الكشري بيتاكل بالكبد ... تقولي ازاى أقولك معرفش بس هو لذيذ الصراحة

اكتشفت كمان إن عزه بتاع الايس كريم المانجه والفراولة بتوعه روعه إنما اللبن مش حلو أوى
اكتشفت ان فى لقاء المدونين مفيش فقره نووووووم.. وفضلت كده نايم اكلينكيا طول اليوم



اكتشفت إن اكتر الناس إلى مكنتش متابع مدوناتهم – او متابعها مش بانتظام - هم اكتر ناس كنت مبسوط انى قابلتهم .... يمكن لانى محصليش صدمه لما شفتهم ... ويمكن كمان عشان أنا أصلا مكنتش حاطط لهم تصور في دماغي وطلع غلط .... فقدرت بسرعة أتعامل معاهم وأحبهم
أفضل مثال لده هو سووووو عجوز عنده 30 سنه .. إنسان بيدخل القلب من غير استئذان ( أبقى استأذن يا كابتن بعد كده)... واكيد احنا بقينا اصحاب رغم ان فيه عيب كبييييييييير اوى .. انه يعرف د عواطف بس انا موافق اخده على عيبه :D
وطبعا شيماء سيمر صاحبه مدونه احتمالات .. وأحمد فهمى والباشمهندس محمد حسن وسكر إلى كنت متغيب عن مدونته بقالي فترات طويلة

اكتشفت إن الناس إلى شفت صورتها - قبل ما أشوفهم شخصيا - كانت أجمل بكتييييييييير في الحقيقة
يمكن لان عنصر المفاجأة كان اختفى .. وفضل الحب النابع من احترام دماغهم وقلمهم أوى
زى .. وروز (د سميره) " بس قافله صفحتها دلوقتى".. وهليوم(د ايمان).. ولماضه (د مروه) بجد حسيت انهم اجمل بكتيييييير لما شفتهم شخصيا.




اتصدمت في ناس كنت اعرف مدونتهم ومتابعهم أوى أوى .. كنت متخيلهم بشكل وطلع تخيلي غلط خالص
ده سبب لي صدمه.
وبصراحة مش عارف طلعوا أجمل ولا أوحش من الصورة إلى كنت متخيلها لهم؟؟ لما افوق من الصدمه ممكن اجاوب
بس هم طلعوا حد تانى غير إلى اعرفه وخلاص ( دول معظم الناس ماعدا إلى قلت أسمائهم قبل كده)

اكتشفت إن القاعدة إلى فوق مش دائمة
مها زين كسرتها .. لأنها طلعت زى ما كنت متوقعها مع اختلافات بسيطة تخليها أحلى وأجمل

اكتشفت انى سببت صدمه لبعض الناس .. ومقدروش يجيبوا اى سبب مقنع يخليني أسمى مدونتي اسم بطوط حبوب
وطلبوا منى أغير اسمها
أنا عارف إن الصدمة كبيرة أوى وخصوصا انك تجيب سبب إنى اسم نفسي بطوط حبوب
أنا أسف ليكم بجد أنا كمان أتسبب لي صدمه من بعض الناس ومقدرتش اربط بين صورتهم واسمهم وأسلوبهم ومش عارف لحد دلوقتى ... ومش عارف هعرف امتى ؟؟ ولا مش هعرف حتى ؟؟

الحكاية عامله زى ما تشوف ( بعينك) ضريح للشيهد ميكى ماوس في السعودية
فتفضل تسأل نفسك هو في السعودية في اضرحه؟؟
وميكى ماوس استشهد؟؟
أظن انك مش تصدق عينك رغم إنها عينك
يعنى أنا بكتب بقالى سنتين واكتر بنفس الأسلوب والطريقة والاسم .. وناس تانيه برضه نفس الكلام
ورغم كده أنا والناس ممكن نكون أتصدمنا في شكل بعض وحصلنا نوع من الاسبهلال
وفضل السؤال الى بيدور فى اذهان البعض ( علاقه الشكل بالاسلوب باختيار الاسم)؟؟
*******************************************
وبعد اليوم ما خلص
قعدت مع نفسى( وخصوصا بعد ما ساجى جاله تليفون واتخنق بس الحمد لله بقى كويس)
لما قعدت مع الناس وبعد كم المفاجآت إلى شفته النهارده
حسيت انى عايز اسأل نفسي أنا مين؟؟
إيه هي حدودي ؟؟ وإيه هي نظرتي – أنا –لنفسي ؟؟
ببساطه أنا عايز أكون إيه؟؟ وفى كل حاجه
فى دراستى ؟؟ فى التزامى ؟؟ فى طريقه تعاملى مع الناس ؟؟ تفكيرى ؟؟ وفـ كل حاجه عنى
واظن ان الفتره الجايه لازم اقعد ادور على اجابه لده

غالبا إن شاء الله هاجي يوم الساقية لانى هكون يومها في القاهرة ... وغالبا برضه هيكون أخر لقاء تدويني هحضره .... لانى مازلت اشعر إن العلاقة عبر الشاشة لها مميزات تفوق ميزه أن تقابل أشخاص رائعين كالذين قابلتهم أمس

بس
### والله بجد اليوم ده كان يوم رائع وكل الناس الى كانت فيه كانت جميله .. ومش بجامل والله
وكل الناس اتبسطت لما شفتهم


خصوصا فاتيما الى تحس كده انها حد قريب منك اوى
وابو خالد الى الواحد مدين له بشكر خاص
وخالد همس الاحباب الجدع جداااا جداااااا
وناس كتيره اوى والله كان نفسى اشوفهم من زمان وكويس انى شفتهم

###

هناك 61 تعليقًا:

abo salah يقول...

بعد السلام عليكم


كثيرا ما تكون هناك أشياء افضل بكثير من الخارج

ودائما ما يكون لرسم مخيلتنا سببا فى صدمتنا

ربنا يجمعكم على الود والحب دوما
أجمل حاجة أنك تتقابل بناس سبق وأنك حبتهم من غير ما تشوفهم

مهما كان اللى هتشوفه هتفضل تحبهم

اتمنى ان تجمعنى فرصة بناس حلوة وجميلة زى اللى أنت شوفتهم

تحياتى ليك
وكل سنة وأنت طيب وإلى الله أقرب

maha zein يقول...

محمود
هو في ايه
يعني ايه صدمة
مخدهاش بمعني سلبي
بس ليه تتصدم
انا اتبسطت اكتر لما شفتك وده بجد
بعكس ناس تانية ممكن يكونوا اختلفوا عن مخيلتي
بس يمكن لاني شفت صورتك
فتخيلتك شخصية ساكتة وحزينة شوية
لكن لما شفتك لقيتك عكس ده
لقيتك انك شخصية رائعو
لا بجد
مش ينفع امدح اكتر من كده
بس يكفي انك تحسها في كلامي
واسأل ساجي اللى قلته
لاننا صراحة نمينا كتير اوي
بس المشكلة
اني اضايقت
وحسيت بصدمتك
من البوست
انا شخصيا مصدومة الان
لاني مش عرفة ايه حصل خلاك تقول كده
اشمعنه اتصدمت فيا
متحولش تقول اني زيدت عندك
بس ليه اصلا اتصدمت
بيتهيألى ان الحياه كانت مشية سلسة
بجد ضايقتني
لان لو حد غيرك كان قال اتصدمت كنت هصدق
بس بردو انت مقدارك زادت عندي
ووانا بقرالك الان حسة اني بقرا لحد انضج واظرف واعقل
تحياتي يا عم المصدوم
يعني لازم تنكد علينا علي المسا كده

Mahmoud البطراوى يقول...

البت دى مبتشفتش بجد
دى الوحيده الى قلت انى متصدمتش فيها

امال الباقى هيقول ايه
:D

Mahmoud البطراوى يقول...

وكمان انا كاتب ان الناس الى شفت صورهم قبل ما اشوفهم ما تصدمتش فيهم؟؟

انزل بوست اشرح فيه البوست ده؟؟
:D

maha zein يقول...

فهمتك
اه
بص
اتصدمت في ناس كنت اعرف مدونتهم ومتابعهم أوى أوى .. كنت متخيلهم بشكل وطلع تخيلي غلط خالص
ده سبب لي صدمه.
وبصراحة مش عارف طلعوا أجمل ولا أوحش من الصورة إلى كنت متخيلها لهم؟؟ لما افوق من الصدمه ممكن اجاوب
بس هم طلعوا حد تانى غير إلى اعرفه وخلاص ( دول معظم الناس ماعدا إلى قلت أسمائهم قبل كده)

اكتشفت إن القاعدة إلى فوق مش دائمة
مها زين كسرتها .. لأنها طلعت زى ما كنت متوقعها مع اختلافات بسيطة تخليها أحلى وأجمل


******************
انت تقصد بقه ان يعني انت اتصدمت في ناس
ودي كانت قعدة
بعدين رحت انا كسرت القاعدة
وطلعت بت كده ملهاش حل
ههههههههههههههههه
صح كده
ولا ايه يا باكباشي
انا قريت البوست تاني وبتانى عشان افهم
بس لاني جيت بعد حتة
ان فى ناس انت متعرفش تخيلك عنهم طلع وحش ولا حلو وانك اتصدمت فيهم
فهمتني

سمر الشافعى يقول...

لسه مقرتش بس قلت احتل المركز السادس قبل مايضيع هوا كمان

سمر الشافعى يقول...

والله يابطوط عندك حق اذا كنت انا اوقات بتصدم لما بشوف صوره مدون كنت حاطاله شكل تانى احلى حاجه هنا فالتدوين انه بيديلك مساحه كبيييييييره للتخيل بالظبط زى ماتكون بتسمع مسلسل فالراديو وتفضل تتصور شكل الابطال ولبسهم وعايشين فين وكدا

تحياتى عالبوست المعبر اللى كنت خايفه منه احسن يطلع زى ماقولتلك

Wael يقول...

حلوة اوى الصدمات دى
ولو انى برضو رايى ان الشاشة لها سحرها الخاص , والخيال سيظل اجمل من الواقع بمراحل

بس هى اللقاءات دى مفتوحة ولا بدعاوى ولا ايه بالظبط ؟ لانى اول مرة اعرف ( مينفعش الحاجات اللى تحت الطربيزة دى ) , ولو لقاء لساقية ده مفتوح ممكن اجيلكم لانى كده كده رايح قريب وعايز اشوف الشخصيات الجميلة دى عن قرب .

nigro يقول...

بص يا محمود
أنا الصدمة الوحيدة اللي حصلتلي و كمان بمعناها السلبي و السلبي جدا
و حاسس إن فيه احتمال إني أقطع الخلف بعد الصدمة دي
هي الصورة البشعة اللي انت حاططها دي
يا عم محمود
مش علشان انت دكتور و قلبك جامد يبقى تشعفنا معاك
الله يسترك يا بني
ده أنا اتخضيت حتة دين خضة
بقى دي صورة تحطها برده

لأ .. أنا بقى اللي زعلان منك .. و زعلان بجد
و مأموص كمان



يلا سلام

Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
Asmaa mahaba يقول...
أزال المؤلف هذا التعليق.
غير معرف يقول...

شكرآ للمجاملة الرائعة دى يا بطوط

و دا يمنعش ان الصورة اللى فى دماغى هيا هيا (سنة و ماسكة فرشاة) .. انا عارفة مافيش فايدة


انا كمان اتصدمت بس بطريقة مختلفة .. مختلفة تمامآ عن الصدمات اللى انت ذكرتها


بشكرك مرة تانية

Asmaa mahaba يقول...
أزال المؤلف هذا التعليق.
فاتيما يقول...

بطوط يا حبوب
حمدلله ع السلامة
أنا كمان حسيت أنك حد بيدخل القلب بسرعة و يفرح قوى
أشكرك على رأيك فيا
و فينا كلنا عموماً
تحياتى ليك و أشوفك دايماً على خير
ملحوظة على جنب
القط اللى فى الصورة لطيف قوى
و مستغربة ليه خاضض نيجرو
مع إنه قط لطيف بجد

Asmaa mahaba يقول...
أزال المؤلف هذا التعليق.
غير معرف يقول...

يا جماعه لا شكر الا على واجب مشوا بس البت سومه من هنا لحسن قرفتنى
برااااااااااااااااا انا مسدوم مش عاوز اشوف حد خالث :))

غير معرف يقول...

القط دا بتاعى وهو دا المسؤل عن تفجيرات بكاكا داسو واى حد حيخاف منه حطخه عدل

غير معرف يقول...

لا بقى القط دا شبه القط بتاع ايفر ريدى طاقه اكتر سرعه تتحمل المستحيل

غير معرف يقول...

على كل من اسمه يندرج تحت الحروف الابجديه ا ب ت ...الخ
لا تترك تعليقا فى المدونه المدونه فيها قط قاتل

غير معرف يقول...

محدش يصدق مباحث قرعيا دول فشارين وكدابين كمان دول عملاء لسومه المجنونه

AHMED SAMIR يقول...

عايز اشوفك ان شاء الله في يوم السبت في ساقية الصاوي
انا ان شاء الله هاكون موجود
انا نازل لي موضوع في العدد دة
مش عارف بقى هاكون من اللي بيصدموا ولا اللي بيتصدموا
اتمنى ان نلتقي
تحياتي

دعاء مواجهات يقول...

عم الصريح

اهلا اهلا

للأسف لسة متعودناش ع ثقافة النقد والافصاع عن الصدمات فى وجة صاحبها مهما حدث

فعلشان كدة محدش هيتقبل البوست دة اوى بالمعنى اللى هو يعنى ..

بس سيبك انا عجبانى الصراحة

وعاجبنى اكتر العنوان الغامض الغريب دة

عمرى انا بقى ف حياتى ماشوفت واحد بيحكى عن يوم جميل بالعنوان دة

وبعدين محسسنى سيادتك انك عمرك ما روحت اليكس قبل كدة

عموما ممكن عادى بتحصل..

_______________________

بس سيبك انا اللى مفرحنى اوى انك شرفتنا كدة واعتزيت بمنوفيتك وكنت سفير آااخر نجحاان

بيس يادووك.

maha zein يقول...

يا عم انت
يا مزيف
ادخل شوفني وانا مخدوعة فيك
كتبت بوست اسكندرية
يلا حالا

غير معرف يقول...

عارف يا بطوط؟

انت فى البوست دا عامل زى الطفل الصغير اللى لسة مفتح عينيه ..و لسة بيشوف بنى ادمين لاول مرة

زى البابى اللى حاسس بمامته و هوا فى بطنها .. بس لما شافها قعد يبصلها كتير اوى عشان يربط احساسه بصوتها اللى سمعه و بشكلها اللى شايفه
(طبعآ مع الاختلاف ان حضرتك مش بابى و لا احنا مامهاتك)


على فكرة انا كمان ادايقت انى كنت عارفة سوووو قبل كدة لما شوفته لانه شخصية سكرة ... واتضايقت اكتر لما دخلت صفحته بعد ما روحت لان صفحته عجبتنى اوى

بس اكتر حاجة لفتت انتباهى لسوووو ...انفعلاته .. بيعمل حركات غريبة بوشه تخليك تقع من الضحك


انا اتشرفت بناس كتير اوى


بس برده اتصدمت بشكل مختلف عنك

maha zein يقول...

مش ملاحظ انك عمال تقول بت
بت
بت
يعني اديني وضعي طيب
انا صيتك
بقولك ايه
انت كده تمام
انت خلاص بقه تقدر تعتبر صورك اتصادرت
مش عملي عينك خضرا
يبقه تمام
ماشي يا برنز

maha zein يقول...

انا ضيفت ميلك اللى في المدونة
مش هو ده
بس انت مقبلتش الاضافة
يعني اعمل معاك ايه اكتر من كده
بيتهيقلي انا عملت معاك المستحيل يا برنز
هاه
اتنفضلي كده؟

maha zein يقول...

وبعدين ايه امور يعني وايه جو القلق ده
هه
يعني بذمتك ينفع كده
وعيلة محافظة كمان؟
طيب ايه
هو عشان قلنا عينك حمرا تنخدع في روحك كده
كده غلط صدقني
طيب ما انا عيني بتطلع حمرا في الصور بردو
اروح بقه اقول امورة ومش امورة وعيلة محافظة
هه
ولا ايه حكايتك
منوفي صحيح

Unknown يقول...

سلامتك من الخضة
انا كنت مبسوطه جدا انك جيت يا بطوط بجد
ولعلمك زي ما اتخيلتك لاقيتك متصدمتش ولا حاجه
بالعكس الحمد لله اللقاء ده ناس كنت اتمنى اشوفهم من سينين
والحمد لله حصلت
بس قرار انك متحضرش لقاءات تانيه ده انا بأيدك فيه
لاني بفكر فيه جديا دلوقتى
مع ملاحظة ان لقاء امبارح كان حلم بالنسبالي وملوش علاقه بالقرار ده

Mafrousa يقول...

انا قلت كده قبل كده
قلت مش عاوزه اشوف المدونين وجها لوجهه...كفايه عليا اني اتعرفت على فكرهم عن طريق المدونات...
قالوا عليا بتتآلط
بس و الله بعد اول مقابله...الحمد لله اللى شوفتهم مش صدموني...للوحش
و عنها قلت الحمد لله جت سليمه
و بعدها امتنعت تاني

الفكرة فى التدوين انك بتخاطب فكر..زيا بيعجبك يا لأ
و بتشوف اسلوب... مع العلم ان فى كتير خلف الشاشه مش بصورتهم الصحيحه
و لكن ممكن تعرفهم و سهل جدا انك تعرفهم من اسلوبهم
المهم خلينا فى المفيد...انت ليه حطيت صورتك بتاعة الفيس بوك
ههههههههههه
انا شخصيا كنت متخيلاك شكل تاني خااااالص
هههههههههههههههههههه
سلام و رمضان كريم

مواطن مصرى نايم يقول...

ههههههههههههههههههههههههههههه
و الله انا حزين بجد كان نفسى ابقى معاكوا بس راحت عليا نومة
و خوفت انزل ما الاقيش حد
و ايبى قالت لى روح بس خوفت تكونوا مشيتوا
بس يا ريتنى كنت نزلت
ان شاء الله المرة الجاية

على فكرة يا بطوط
انت كده يبقى ماشفتش اسكندرية
اسكندرية على شكل مثلث
رأس المثلث هو القلعة
لكن لو خلت من المنشية
عالم تانى
و مناطق كتييييير جدا
و لو دخلت من سيدى جابر عالبح لسموحة و المناطق دى عالم تانى برضوا
و كل ده غير خط العجمى
و ده اساسا بعيد عن المكان اللى كنت فيه

اسكندرية اكبر من اللى انت شوفته
البحر يساوى مثلا 25 % من اسكندرية و الباقى جوا بقى

المرة الجاية ابقى معاكوا ان شاء الله
و افرجك على اسكندرية فعلا بقى

حمدالله بالسلامة يا جميل

همس الاحباب يقول...

هههههههه
ايه يا عم بطوط ده بوست ولا اضغاث احلام
ولا ايه بالظبط
ااااااااااه كله ده من تاثير قلة النوم وفقرة النوم ضاعت عليك
يلا يا عمونا خيرها فى غيرها
والمرة الجاية هجيب سرير صغير على قد بطوط ولا تزعل نفسك
بس بجد كنت سعيد جدا بتشريفك ومقابلتك

غير معرف يقول...

السلام عليكم بطراوي باشا

الأول وحشني جداااااااااااااا.....

وإن كانت حدة الوحشة قد قلت بالتليفون الأخير ...[س هتفضل توحشني برده

المهم البوست جميييل جدا وأحاسيسه رائعة

بس مش عارف خوفتني من يوم الساقية

أنا اتشجعت أوي لما عرفت الخبر .......

بس بعد ما قرأت البوست بتاعك ...حاسس إن فيه تردد

ادعيلى نشوف بعض هناك ....وربنا يكرمك يا عسل

ويلا سلام

حمامة يقول...

الحكاية عامله زى ما تشوف ( بعينك) ضريح للشيهد ميكى ماوس في السعودية
فتفضل تسأل نفسك هو في السعودية في اضرحه؟؟
وميكى ماوس استشهد؟؟

هههههههههههههههههه


انا حصلت معايا صدمة بس مش كبيرة اوى
بس مش فالمدونيين لانى حظى العاثر لحد دلوقتى مش عارفه اقابل حد

بالنسبة لأسكندرية انا دوقت الايس كريم بتاع عزة الحليب ولقيته وحش موت
وقعدت اتسال الراجل ده مشعور ازاى وايس كريمه وحش
وطلعت عليه سمعه وحشه :D

كويس انك وضحتلى سوء الفهم ده

mamato2010 يقول...

السلام عليكم
محمود
يا عم ليه تتصدم من أساسه.يعنى بجد الناس اللى انت قلت عليهم دول ناس زى العسل.سواء ايجابى او سلبى بس بردوا مش لدرجة الصدمة .و انا والله نفسى أتجمع أنا و المدونين هنا فى القاهرة نفسى أشوفهم و يشوفونى بس الموضوع مش سهل. على العموم أنا سعيد انى زرت مدونتك و اتمنى انك تزور مدونتى المتواضعة. و مستنى تعليقك كمان.سلام

Maha Shahen يقول...

والله انا فكرت زيك يا بطوط في مره
لكن مش بنفس الشكل انا بصيت للموضوع من زاويه اخرى
انك لو اتعرفت علي صاحب مدونة كنت بتحبه قوى وطلع شيء تانى غير كتابته وعقليته دى , يا ترى لو ضاع الانبهار هيحصل ايه هتخسره بالتأكيد
لكن الشكل وان الواحد ينصدم في حد كان متخيله شيء تانى مش مشكله قوى , لانه في الاساس كان مجرد خيال ولازم نرضى بالواقع بحلوه ومره بقى ههههههههه
بس الاجمل فعلا لو تقابل اللي تلاقيه احسن بكتتير قوى من الخيال وتحس انك ظلمته بخيالك دا
بس الحقيقه هى تجربه تستحق ان الواحد يغامر ويخوضها والله المستعان
وعامة اسم بطوط حبوب حلو ومميز ومش مهم يمت بأى صله للشخصيه الحقيقه
مش دايما الاسم بيعلن عن شخصية حامل الاسم
تحياتى ليك متفكرش تغير اسمك انا بقولك اهو بس هيه هههههههههههه

غير معرف يقول...

ياعينى ده انت اتبهدلت اوى فى التعليقات... عموما انا هجبر بخاطرك يابنى لآحسن صعبت عليا اوى
يوم التلات ده كان من اجمل الايام اللى مش هنساها ابدا...كان نفسى احضر الكلام كله لكن قدر الله وماشاء فعل
...كنت رايحه عشان بطوط بس_(مع انه مأكدش عليا انى اجى ولا قال لحد يأكد عليا)_لكن لقيت ناس كتير اتبسطت اوى انهم موجودين...مش فاكره كل الاسماء لكن اكيد مش ناسيه اشكالهم لآنى مش بنسى شكل بنى ادم شفته فى حياتى ابداااااااا

مها زين
حنين
م/محمد حسن
سووووووووووووووو ;)
ابو خالد
واحد مش فاكره اسمه بس هوه تالته حاسبات ومعلومات D:
وبطوط طبعااااا

سعدت جدا بلقاءكم لعله لا يكون الاخير

:)

حنين القلب يقول...

ايه يا دكتور
هو انا كنت قاعده تحت الكراسى ولا ايه
ماشى يا بطوط ولا يهمك
بس انا اتشرفت جدا بيك
واتمنى يتكرر اليوم ده تانى

سلام

مؤمنه يقول...

السلام عليكم ورحمة الله وبركاته
نفسى اوى اتعرض لمفاجأه بالشكل دى ياسلام لما تكون مصور ناس فى دماغك بشكل وتقابلهم تلاقيهم حد تانى مفاجاه من نوع لذيذ ليه لانك بتتعرف كده على شخصين فى شخص واحد شخص على النت وشخص فى الاقع وقدامك فرص اختيار مع ايهما ستستمر
اكيد النت بيعكس صوره مغايره
بس عايزه اقول لحضرتك حاجه
شخصيات الافراد هذه فى مدونتهم الى طلعت عكس ما كنت تتخيل دى مش معناه انهم كانوا بيتجملوا او بيتصنعوا شئ مخالف للواقع لا انا من وجهة ظرى ان الكتابة بتعكس الروح والمقابله الواقعيه بتعكس الشكل الخارجى وهناك الكثير الذى لا يستطيع ان يعبر عن نفسه كما هو بالشكل الصحيح
والسلام عليكم ورحمة الله وبركاته

Unknown يقول...

دى خيااااااااااااااانة والله خيانة كدة تيجى بلدنا و انا ما اعرفش؟؟؟؟
على فكرة جيلاتى الصعيدى احلى من جيلاتى عزة والكشرى بيتاكل بالكبدة عادى و اسكندرية كبييييييييييرة بس بردو دى خيانة

Soooo يقول...

بطابيطو حليب هارتي

والله انا اللي مبسوط اني اتعرفت عليك يابطابيطو

بص ياسيدي .. الحياه التدوينيه غير الواقعيه في حاجات
زي بالظبط لما تجيب روايه وتقراها وبعدين تشوفها فيلم .. الخيال بيلعب دور كبير في الحاله دي

الناس عموما فيهم مزايا وسلبيات .. لما يجي اي انسان يتكلم عن نفسه بيحاول انه يبين عيوبه قليله او مافيش .. وده عادي من الناحية السيكولوجيه لان كل واحد فينا شايف نفسه احسن واحد .. اللهم الا عدد قليل ودول اللي بينطبق عليهم المثل القائل
علمتك ماعلمتكش .. ماشي ولا هامكش
!!!!
ايه المثل الغريب ده؟؟؟؟

على اي حال .. لو عايز تستمر في الحياه الواقعيه التدوينيه .. يبقى احسن .. وراعي انك ماشفتش كل الناس لسه


ملحوظه
مالها بقى طنط عواطف .. طب ده انا كنت ناوي اخدك من ايدك كده يوم السبت ان شاء الله ونروح نسلم عليها .. لكن انت شكلك خفت لا تجبلها هديه ولا حاجه .. منوفي منوفي يعني




سلاموووووووووووز

Soooo يقول...

استدراك

اسكندريه مش كوفي شوب وقلعه ومحل عزة وبس .. انت نسيت مسجد النبي دانيال ولا ايه؟؟؟؟

وفقرة النوم زي ماقلتلك .. بعد فقرة البلياتشو على طول




سلاموووووووووز

Ahmed Fahmy يقول...

بطوط اتصدم يا منز
كلمة صدمة دي كبيرة يا عم اوي مش لدرجة صدمة
بس انت بقي ممكن تسميها مقارنة عن اللي رسمته ف دماغك
و لما تفوق بقي من المقارنات الكتير دي و عملية السيميلاريتي هتلاقيه حاجة عادية نوعا ما
بطل تريأة علي اكل اسكندرية
معاك ف الاكل بس كشر ي بالكبدة دة موجود عاااااااادي
ساجي باعتباره منوفي تتوقع منه اي حاجة
و الله زعلت اوي اليوم دة عشان هو كان اكتر واحد عايز اشوفه ف الاخر
...........
رومانسييييييي

مها يقول...

بطوط حبوب

كلامك حيرنى..
يعنى الأحسن نشوف بعض والا بلاش نشوف؟

انت قلت ان معظم اللى شفتهم طلعوا غير ما اتخيلتهم ..

وفى الآخر قلت إن مزايا علاقة المدونين ببعض عبر الشاشة أكتر من اللقاء ف الحقيقة..

لكن رغم كدة رجعت تانى تقول انك هتروح لقاء الساقية!!
=========

على العموم الصدمة دى حاجة طبيعية

اللقاء فى العالم الافتراضى لقاء أرواح وعقول وقلوب..

اللقاء فى العالم الحقيقى لقاء شكل وملامح ..وصوتك ..واسمك ..ولابس ايه وعندك دقن .. وليه عندك دقن .. وليه بطوط مع انك مش بطوط..


مش ده معناه إن اللقاء فى العالم الافتراضى لقاء حقيقى أكتر من اللقاء
فى العالم الحقيقى؟؟؟

Mona Shereif يقول...

ههههههههههههههههههههههههههههههه
ايه يا بطوط عملت ايه فى الناس
التعليقات تفطس من الضحك
هههههههههههههههههههههههههههههه

بس تعرف وجهة نظرك انا فكرت فيها لما قررت اروح اللقاء بتاع مدونى الدقهلية وناقشت واحده صاحبتى فيها
قالت لى يتريت تخليكى تعرفوا بعض من على المدونات بس .. يعنى عايشين فى خيال بعض
مش جايز تلاقيهم مش زى مانتى متخيلاهم
يعنى نخلينا اطيااااااااااااف

عموما رأينا دايما ممكن يتغير تبع الظروف.. او انا بتكلم عن نفسى

اااااااااه مش تباركلى مش انا نجحت
سلااااااااااااام

FloNa يقول...

انا اول مرة ادخل مدونة حضرتك بس عجبتني وسبحان الله جيت على البوست اللي حضرتك بتوصف فيه لقائك بالمدونين

بما اني يعني افضل التعامل عن طريق الشاشة المستطيلة الروتينية لاترك شغفي بكل مدون داخل قلبي ينمو :) :)

بس استمتعت جدا بتدوينة حضرتك ووصف الاشخاص والصدمات :) :)

ربنا يكرم حضرتك يارب ...

ضــى القمــر يقول...

اخى بطوط ..

أولا زيارتى البسيطه دى هى الزيارة الاولى لك للأسف .. وبجد ندمت على انى لما ادخلها من زمان ..

لكن حظى الجميل انى دخلت على بوست مهم جدااا ..

بوست عرفنى اكثر بالجميع .. طريقه كلامك عنهم رسمتلى شكلهم .. وحسيت بمدى جمالهم الشكلى والخلقى .

ولكنى اختلف معك قليلا يا اخى ..

فلما يكون لقائك هذا أخر لقاء ؟؟

فما اجمل ان نصادف ناس تمتعنا بفكرهم قبل رؤياهم .. كم هو رائع ان نصادف بشرا أحسسنا بقربهم قبل تبادل الأعين .

بحق أحساس رائع بمعنى الكلمه .

أتمنى من كل قلبى ان احضر لقاء تدوينى ..

ولكن الله وحده اعلم بمتى سيكون ذلك متاحا

تحيتى لك ولمدونتك الرائعه جداا جداا جداا :)

Mahmoud البطراوى يقول...

اختصار الكومنتات

اقول للناس التى لم يعجبها الموضوع ؟؟

اولا انا لا انقد اليوم - لانى مصر انه كان يوم من احلى ايامى - لكن كنت انقل مشاعر مدون فى لقاء مدونين لاول مره وبصدق

بصدق تام


بعض الحضور نسيت اذكرهم ؟؟

اسف سوء ذاكره ةمدين لكم فعلا بالاعتذار لكن اعلم ان قلوبكم اكبر وستسامحنى

----

Sourah يقول...

سلامو عليكو اولا ..
يا دكتور محمود واضح ان السبب الاصليي الصدمة دي لما سبت حر القاهرة و روحت لهوا اسكندرية العليل .

و على فكرة يا بختك انك كنت و يا الجماعة الفوللالي دول ،،، اولا قرايتك ليهم هي اللي حببتك فيهم بالرغم من اختلاف صورهم عن ما كنت راسملهم في خيالك، فده عادي جدا . عارف انت فكرتني بيه ، بفاتن حمامة في فيلم بين الاطلال ، لما كانت بتتعرف على عماد حمدي و راسماله صورة في ذاكرتها على انه طخين و بكرش و شعره ابيض .
بالنسبة لحكاية النوم ، فيه واحدة صاحبتي دايما تقول لما بنتجمع عندهاو خلاص يادوبك كلها ساعتين و نبقى مطبقين 24 ساعة، كانت تقول(( القاعدة الحلوة ما تتعوضش ))..
فخدها مني من الاخر:
قضي وقت لطيف ، استمتع على اد ما تقدر، هيعدي عليك وقت تاني هتبقى لوحدك ، ساعتها ابقى سوي فيه الهوايل ..

بس على فكرة انت جبت الخلاصة ، كوفي شوب و قلعة، بس للاسف نسيت تقول اكلة سمك ، واضح انكو ماعدتوش على الحاج ابو اشرف و لا الكاتعة - دول مطاعم سمك من الاخر- ، عموما تتعوض مرة تانية لان الموضوع عاوز ميزانية..

المهم في الموضوع ده انك اتبسط ، و قضيت وقت جميل مع ناس الى حد ما بيفكروا زيك ،و تقريبا ليهم نفس اهتماماتك، و لما بيتكلموا بيقولوا درر .

آآآخ ، لولا الغربة كان زماني كنت وياكو، و على فكرة انا مش من اسكندرية ، بس بنتمي لرابطة مشجعي البلد دي ..

و آخر الكلام.. سلاااام !!!

Empress appy يقول...

يبقى مش هخليك تشوفنى خالص على كده بدل ما يجيلك غيبوبه هههههههههه

آه وكفى يقول...
أزال المؤلف هذا التعليق.
oRiGiNaL HeArT يقول...

ايه ده هما المدونين بيتقابلو:O
من وراياا!!!!!!!!!
ماااااااشى
........
بص انا بحس ان الانسان على النت مختلف تماما عن نفسه فى الواقع
اكيد مش كل الناس كدة
بس المعظم بيحاول يكون زى ماهو نفسه مش زى ماهو فعلا فى الواقع
بنحب نتعامل بطريقة مختلفة
من غير قيود كتيير بتاقبلنا فى واقعنا
فبنختلف بكل حاجة وبنتكلم بطريقة تانية وبشكل تانى
دة بقى ممكن يخلى اللى بيسمعنا يرسملنا صورة تانية خالص
صورة غيرنا
غير حقيقتنا
رسمها من الحاجات اللى شافها مننا
زى الاسلوب والتعبيرات والافكار وكدة
ممممم
انا اتلغبطت على فكرة وشكلك مفهمتنيش
بص لو مفهمتش قثدى قول
وانا هاجى بعد مارتب الافكار فى دماغى تانى :))

oRiGiNaL HeArT يقول...

هههههههههههه
هى التعليقات عاملة كدة ليه
فى حركة تزييف وانتحال للشخصيات

Mahmoud البطراوى يقول...

تم الرد فى موضوع منفصل

:D

اسكندراني اوي يقول...

حبيبي
في ايه بس هما معملوش معاك الواجب ولا ايه
معلش المره الجايه حنخلي فقره النوم اجباري مش اخنياري
ههههههههههههههههههههههه
سعيد اني قابلتك