2011/10/19

تفاحه ماما


وانا بتكلم انا وماما وهى بتلقح بالكلام وبتقول " البنت الكويسه عامله زى التفاحه فى اعلى فرع فى الشجره , محدش يشوفها ولا يلمسها ولا يشمها الا اللى يطلع لحد عندها , والبنت المش كويسه هى التفاحه اللى على الارض , اى حد يقدر يشوفها وفى الاخر هى مجرد تفاحه بايظه ومعفنه"
لما خلصت وجه نظرها لقتنى بحب فعلا التفاحه اللى على فرع قريب سهل اوى اى حد يشوفها , أو حتى التفاحه اللى على الارض .
ايه الميزه اصلا فى التفاحه اللى فى اعلى الشجره ؟ 
ومين غريب الاطوار دا اللى مستعد يطلع كل دا رغم انه هيقابل مليون تفاحه عشان خاطر يروح يقطف اللى فوق خالص دى ؟
ايه المغرى فيها ؟
وازاى شاف الاغراء دا ؟ 
وايش عرفه انه فى الاخر ولما يطلع فوق ويطلع عينه مش هيلاقيها تفاحه وحشه؟ عشان رأى الناس؟ مين الناس اللى الواحد ممكن يطلع عشان واثق فى رأيهم.. شجره زى دى مين قاله انهم صح؟
ثم التفاحه اللى فوق فى اعلى الشجره دى شكلك ايه ادامها وانت عبيط كده وطالع كل دا عشان خاطر تفاحه. .. تفاحه فى شكلها كتير او قريب منها على الاقل وكان موجود فى الاغصان الاقرب.
وبعدين مين قال انك لما هتوصل لفوق اوى كده هتقدر تشوفها كويسه ولا لأ؟ اكيد الوضع فوق وانت فى اعلى قمه الشجره مش مريح .
واكيد هيبقى كل همك ساعتها انك تنزل "بام التفاحه دى " للارض. هتعرف منين بقى اذا كانت كويسه ولا لأ .. ذوقك فى التفاح ولا لأ؟
ثم برضه هى التفاحه دى هتعملى ايه عشان اعمل كل دا عشانها .. انا شخصيا اعتقد ان لو مكانش فى تفاح بيقع او مكانش فى تفاح على الاغصان الاقرب . مكنتش هاكل تفاح الا لما يبقى عندى سلم كبير او عماره طويله جنب الشجره دى .. عشان اوطى وانا باخد التفاحه اللى فوق دى وكأنى برضه باخدها من على الارض.
لكن التفاحه اللى فى الغصون القريبه .. مغريه .. لذيذه ومشتهاه .. لولاها مكناش عرفنا ان التفاح حلو اصلا .
التفاحه القريبه هى اصلا تعريف التفاح فى عنينا .. هى اللى بتلمع باثاره لما تيجى عليها الشمس ..وهى اللى ريحتها هتجذبك ..  وهى اللى هتعاكسك وتقع فوق راسك وانت قاعد تحتها .. فتلهمك انك فعلا محتاج تفاحه دلوقتى .. هى اللى هتقدر تشوفها وتلف حواليها .. كل عيوبها هتعرفها اوى .. وممكن تحب العيوب دى من كتر ما بقيت بتحبها.. هى اللى ريحيتها هتجذبك ليها ... هى تعريف الاغراء بكل معنى الكلمه 
هى اللى هتقدر تخليك تيجى لحد عندها وتقولها انا عاوزك.
وبعدين مين قال انه التفاحه الكويسه لازم تبقى فوق .. دا ميزه التفاحه القريبه انك هقدر تشوفها .. هتميز بينها وبين اى تفاحه تانيه .. هتشوفها اتقطم منها قطمايه قبل كده؟
عيال لعبوا بيها فبقى شكلها من بره حلو لكنها من جوه عصير .
هتقدر تميز اوى كل اللى فيها
انا بحب التفاحه اللى تيجى .. مش التفاحه اللى تتعبك .. القريبه , المغريه , المثيره 
مش الممله البعيده الصعبه.
=== واد انت ..انت فاهم انا اقصد ايه بطل استهبال  "دا صوت ماما "
--- لما تبقى عاوزه حاجه ابقى قوليهاعلى طول بلاش لف ودوران احنا برضهبنعرف نصيع :))
** البوست ليس بالضروره يعبر عن وجه نظرى الحقيقه .. هومجرد سفسطه للرد على منطق ماما :)

هناك 16 تعليقًا:

غير معرف يقول...

ما تجمع السفطسه دى فى كتاب علشان اشتريه :)

أع ـقل مـ ج ـنـونــة يقول...

بس اعتقد
ان التفاحة اللي فوق الشجرة
احلي واغلي
لانها بتكون محفوظة
مش زي اللي في الارض
متعرفش كام ايد مسكتها
وكام عين اتفرجت عليها !

عشان كدا
انا مقتنعة بوجهة نظر ماما
:-)

nigro يقول...

تصدق جعت

شمس النهار يقول...

الامهاااااااااات دايما صح

وبتعجبني الام اللي بتضرب الامثال

ام فيلسوفة

هي دي الام المصرية
بكلمتين خالتك تكتب بوست كله حكم

المُوكْنة دى بتاعْتى لسارة الشريف يقول...

اتصدق آنتا فقعت مراراتى وآنا لو من طنط آجيب تفاحة وأديهالك على دماغك :D
عشان البنت اللى عجباك دى القريبة فى غيرك كتير شافوها كويس آآآآآآوووووووى وشموها وبصولها من كل الجوانب براحتهم
وهى آصلا مش مستنياك تقدرها ولا تقول رآيك لآن رآيك مش فارق معاها لآن غيرك كتير قالوا رلآيهم :D والميزةاللى فى الفوق دى يا حدق مسمحتش لحد حتى آنه يقربلها حتى عشان يبص عليها :@

غير معرف يقول...

ارفع راسك لفوق انت مصرى :D

Mona Shereif يقول...

غلباوى ولمض
:D

بس كويس انك مقتنع برأيها
ربنا يخليهالك

غير معرف يقول...

نظريه برده D:




روز

وصف الاحساس يقول...

كتير من جرايم بترتكب باسم التفاحه
يعني كان ذنبها ايه تفاحه نيوتن انها استوت فنرلت لقت راسه فاكتشف الجاذبيه ومات وهو بيدافع عن اكتشافه
ولا ذنبها الي التفاحه ال انتشر انها خرجت ادم من الجنه مع ان الشجره اصلا مش تفاح
وتفاحه مامتك دي مين عنده خلق يطلع ره ويقطف تفاحه من فوق ولا من تحت ولا حتي من علي الارض
المثل الفعلي
انك بتروح تشتري تفاح عندك حل من اتنين اما انك تجيب من الراجل ال فارش علي الرصيف ال كل الناس قلبت في تفاحه قمنها ال اتعور ومنها ال ما بقاش نضيف
او انك تشتري تفاح من عند الراجل ال فاتح محل فكهاني وحاطط علي كل تفاحه تكت وبين كل تفاحه والتانيه منديل ورق
يعني التفاح مالي السوق وكل الناس شايفاه بس فيه فرق انت بتختاره منين وازاي وسعره في سوق التفا ح كام
تحياتي ليك ولمامتك ولكل التفاح الامريكاني

خوخه هانم يقول...

ههههههههههه
السؤال اللي يحير
التفاحه عامله ايه دلوقتي

لا بجد حلو البوست وسلمي ع ماما
اوي

غير معرف يقول...

صح التفاحة عاملة ايه دلوقتى يا بطوط؟

Mahmood البطراوى يقول...

خوخه هانم
مفيش تفاح دلوقتى :(( :((

غير معرف يقول...

بيقولك يا بطوط "اتقل عشان تاخد جاحة نضيفة "

و من المؤكد إن التفاحة اللى وقعت
على الارض .. اتوسخت و مبقتش نضيفة .. ممكن تجبلك نزلة معوية _بعد الشر عليك طبعا _


المهم بقى و اللى خلانى أعلق ..
حمدلله على سلامة إسم المدونة
"تفاصيل ما حدث " مكنتش لايقة عليك
على الأقل بالنسبالى أنا .. أنت بطوط و هتفضل طول عمرك بطوط .. و ستظل هذه المدونة تحمل لى الكثير من المعانى التى أعتز بها

admelmasry يقول...

البوست اكثر من رائع
.
.
عارف !!!
.
يخليك فعلا تقبل بالاختيار الاخر وانت عارف انه غلط ومتاكد انه غلط
ويمكن يكون مخالف تماما لمبادئك او مقاييسك في الاحكام
.
.
لكن وجهة نظر قوية
.
.
رغم الشاهد من الحديث فعلا .. ان التفاح القريب السهل والمغري المثير اللي واضح ومكشووف لاي ايد طايلاه .. بيكون في العين احلي بكتير جدا من البعيد اللي مش معروف عنه حاجة ... بالظبط مبدا .. عصفور في اليد !!
.
ايه اللي يخليني اسيب تفاحه حمرا قصاد عيني ريحتها حلوة .. وبتلمع ومثيرة جدا ... عشان اطلع اجيب تفاحة يا عالم .. هيبي شكلها ايه ؟؟؟؟
.
.
لكن يا صديقي احذر !!!!!
ــــــــــــــــــ
من يري بعينيه فقط يسهل خداعه
.
ثم هناك من لا ياكل ولا يضع يديه ناحية الطعام اذا شك مجرد شكا .. ان هناك من قلب فيه وعاينه وقد ربما ضاقه من قبل
.
.
بالظبط تخيل معايا لو انت قاعد ع القهوة .. وطلبت فنجان قهوة مظبوووط مثلا
قام القهوجي وهو بيحطة قصادك ... داق لك الفنجان .. وقالك مظبووطة يا بيه زي ما طلبت
.
.
هتقدر تكمل الفنجان .... قس علي ذلك التفااح .. بلمعانه واغرائه ورائحته الفواحه المغرية المثيرة والتي قد تجذب بشرا وغير بشر .. ستري ان التفاحه الاصعب .. تستحق بعضا من المغامرة والتعب
.
.
تحياتي للموضوع الرائع والسلام

غير معرف يقول...

انا مع كلام مامتك بس عوزه اعرف حاجه هو انت كنت غيرت اسم المدونه وسمتها تفاصيل ما حدث ولا مش عرفه ايه لا اسم مدونه بطوط دي حلو اوي حتي تحس انه مش جد كده لو الاسم جد اوي هتلاقي ناس مش هتدخل لكن اسم بطوط مغري للواحد اتنه يدخل يشوف جوه ياتري ايه ولما يدخل هيلاقي حاجات كتير وتنوع وفن dr.tweety

غير معرف يقول...

انا مع كلام مامتك بس عوزه اعرف حاجه هو انت كنت غيرت اسم المدونه وسمتها تفاصيل ما حدث ولا مش عرفه ايه لا اسم مدونه بطوط دي حلو اوي حتي تحس انه مش جد كده لو الاسم جد اوي هتلاقي ناس مش هتدخل لكن اسم بطوط مغري للواحد اتنه يدخل يشوف جوه ياتري ايه ولما يدخل هيلاقي حاجات كتير وتنوع وفن dr.tweety