2011/08/09

يوم ما اتقدمت لها


مش فاكر اى حاجه من التفاصيل .. كل اللى فاكره انها قبلها بيوم فضلت تقولى بحبك كتير .. وفضلت انا مشغول باللى هيحصل بكره .. " فى ايه يا حبيبتى انتى بتقولى بحبك كتير ليه النهارده " " خايفه تكون اخر مره تسمعنى وانا بقولهالك عاوزه اشبع اوى منها "
يومها فضلت مشغول اوى باللى ممكن يحصل بكره
انا مش فاكر كل التفاصيل مش فاكر فى المكالمه دى غير صوتها وهى بتقولى بحبك , اللى خلانى اخرج من التفكير والترتيب لبكره , واقولها وانا بعشقك.
انا مش فاكر تفاصيل اللى حصل تانى يوم ,, كل اللى فاكره انهم كانوا معايا عشان نتقدم للبنت اللى كنت بقولها بحبك امبارح ,, مش فاكر ايه اللى حصل ..ومش فاكر دا حصل من كام يوم
هو عشرين يوم ولا اكتر ولا اقل 
انا كنت عارف ان باباها رافض عشان عرف انى اعرفها من فتره طويله ,,حس انى اهنته حتى لو كنت جاى اخطبها ,, فحب يخلى الكل يرفض ميبقاش هو لوحده
مش فاكر ايه اللى حصل بالتفصيل بس كل اللى فاكره انه نجح انه فى دا.
كل اللى فاكره انى اول ما خرجت من عنده قلت لعمى انا اسف ,,اسف بجد ,, وفاكر انه قعد ينصح فيا لمده ساعتين ويقولى كلام ممل مش فاكر منه ولا حرف طبعا.
انا فاكر كمان انها قالتلى قبلها بيوم  انا لو واثقه انك هتوافق كنت لميت هدومى دلوقتى وسبت البيت ,, بس انا مش واثقه فيك لو عملت كده 
وفاكر انى قلت لها دا حل كارثى ,, وفاكر انى كنت فى اعماقى واخد قرار ان لو الدنيا فركشت انى هعتبر الدنيا فركشت.
فاكر كمان انى بعد اللقاء اللى حصل مع والدها .. حذفتها من الفيس بوك ومن الماسنجر ومسحت رقم تليفونها ,, انا فاكر انا عملت دا ليه  ,, اضايقت لما لقيتها كتبت حاجه بخصوص الموضوع دا بطريقه محبتهاش ,, وكمان حسيت اننا لازم نختفى من ادام بعض لان الوضع دا مؤلم بزياده.
فاكر كمان اننا مودعناش بعض ولا قلتها انى لسه بحبها اوى وانها وحشانى اوى .. وفاكر الايام دى وهى بتمر عليا ومقتنع انها لازم تبقى مؤلمه وانها هتسمتر فتره لحد ما تنتهى
انا بس كل اللى عاوزه انى افضل فاكر كل التفاصيل حتى اللى محكتهاش .. مش عاوز انسى ولا تفصيله مهما كانت صغيره .. مهما كانت حلوه او وحشه
بس يارب كل اللى طالبه منك انا مش عاوز انساها ومش عاوز اتعذب بيها
يارب عدى الايام دى بسرعه كل اللى بطلبه انها تعدى بسرعه وبس

هناك 17 تعليقًا:

تشاك نولاند يقول...

انا حاسس فيك
ومش حاقدر انصحك
لانو من الاولى اني انصح نفسي بالاول








:(

حفيدة عرابى يقول...

لو تسمح لى
هو أنا فيه حاجات كتير مش فاهماها ولا عارفة حصلت امتى

مش فضول والله ..بس كان نفسى أفهم الموضوع ده لسه قريب ؟؟ ممكن يعنى يحصل فيه كلام تانى ؟؟

لو ده صح ..ممكن باباها ربنا يهديه أو يهده مش مشكلة خالص ويبطل دور الوغد ده حتى لو لايق عليه

التفاصيل عندك وانت مش مضطر تحكيها
لكن لو الموضوع قريب
يبقى علينا نحارب شوية علشانها ونستحمل شويتين معلش تصرفات باباها ومش من أول مرة نمشى كده لو احنا مفيش اختلافات فعلا بينا وبين البنت وبين أهلهاوطريقة حياتهم والحاجات دى

لو الموضوع من فترة كبيرة والأمل فيه ضايع خالص
فكل اللى أقدر اقوله ان ربنا يكتب لك الخير ويرضيك ويفرحك بيه

وكمان عايزة أقولك انك مش هتنسى حاجة ماتقلقش
بس بعد مدة الاحداث اللى أنت عايز تفتكرها حلوة كانت أو وحشة لا سمح الله
هيبقى ليها طعم تانى
هو طعم فيه شجن كده ..شجن بطعم الخبرة اللى اخدتها غصب عنك معلش
بس ساعة ماتلاقى نفسك بتفتكر التفاصيل الحلوة والوحشة وبتبتسم فى كل الاحوال
اعرف انك خفيت خلاص
وهون على نفسك ..ربك كبير

شمس النهار يقول...

اصعب حاجة في الدنيا انك تنفصل عن اللي بتحبه اثر زعل كبيييييييييير
وتنفصلوا حتي من غير كلمة وداع ولا تتبادلوا الاسباب اللي ادت للأنفصال

بس صدقني هتعدي
اشغل نفسك بأي حاجة تستحوز علي كل تفكيرك
بحيث من كتر تركيزك فيها ماتقدرش تفكر في اي حاجة تانية
وحاسة انك اتسرعت جدااااااا
في الانفصال
مش يمكن ابوها يغير فكره
ويبقا موقف وعدي
وحبكم اقوي منه
ربنا معاك يهدي قلبك وقلبها

أع ـقل مـ ج ـنـونــة يقول...

اعذرني اتكلم بقلب بنت مش بقلب بنت عاوزة تتطبطب ع راجل !!!!!

انتو تعرفو بعض فترة طويلة
وباباها قال يعاقبكو ويخلي سبب الرفض من الكل
فتقوم انت بكل بساطة تتخلي عنها !!!!!!!!!!!!

انت فاهم انك كدا جرحتهاا؟؟
لانك متمسكتش بيها مهما كان باباها وحش ؟؟

انت يهمك هي ولا باباها ؟؟

الله يكون في عونك وفي عونها
واللي يحب بجد " بالذات الراجل لأنه راجل يتحمل كل شئ " ميتخلاش عن حبيبه !!!!!

والله يوفقك بحق الايام المباركة دي يابطوط يابني :))

Haytham Alsayes يقول...

مش هاعرف انصحك لان حصلي موقف مشابه وبعدت بنفس الطريقة بالظبط
بص انا مش عارف التفاصيل اكتر منك بس لو حسيت انها لسة بتحبك بلاش تتخلي وخللي وسيلة اتصال في الموضوع وحاول مع ابوها تاني يمكن ربنا يكرمك
ولو الموضوع متمش اوعي تزعل
اه هتتعب شوية او كتير بس صدقني الموضوع هينتهي في النهاية
انا بقولك كدة وانا في نفس الموقف
حاسس بيك جدا

ربنا معاك

فاتيما يقول...

واد يا بطابيطو

بص
امبارح قريت البوست
وكدت أعلق بكبلم طبطبة وفقط
واقولك معلش وانتا حاولت وبتاع
بس قولت استنى شوية ...
والنهاردة لما روحت الشغل
قررت ادخل أكتبلك
اللى قاله هيثم بالمللى

ايه بقى اللى بيحصل دا ؟!!!
خلاص سلمت ؟
وهيا كمان سلمت ؟
يعنى دا اول أب يزهق عريس بنته
ويحفرله مطبات ف سكته ؟؟؟

لأ مش اول واحد
ولا انتا اول واحد يحس بالكسرة دى
ولا هيا أول واحدة نفسها يطلع قصير كدا وتتخض م اللى حاصل وتخاف عليك وتقول بلاش ينجرح ويمشى من بدرى أحسن بدل ما اللى بيننا يندبح ...

بصوا انتوا الجوز
لو هيا بتقرى مدونتك
واعتقد ذلك ...
انا اختها الكبيرة
وشوفت ف الدنيا ياما
والزمن اللى جاى دا ..بتاعكو
اكتر ما بتاع أهاليكو ...
ودى حقيقة
ولو هتتعامل مع باباها بأسلوبه دا وتستلموا كدا انتا وهيا
انا هرنكو علقة
ودون أن يرف لى جفن


ايه ؟

مش الحرب جولات برضو ؟
وكر وفر ؟

جرى ايه لما نخسر الجولة دى
ونعيد الكرة المرة الجاية
بإستعداد منك اكتر
وبأصرار منها أكتر
لحد ما الحاج يلين


ومع احترامى الشديد لرأى قرايبك اللى راحوا معاك ...
معلش بقى
اللى ع البر عوام
وكل واحد فيهم انتا متعرفش لما ييجى عريس لبنته ..
هيعمل معاه ايه
هيبقى حلو ولطيف وحسب الاصول قوى
ولاّ برضو هيعمل زى حماك كدا ؟!!

أغلب الظن
هيكونوا زيه
لنه منهج واسلوب حياة

انا مش هقولك متسمعش كلامهم
ولا ملاحظاتهم
ولا خبرتهم ..

أنا هسأل سؤال واحد بس
بعد انتا بتحبها وهيا بتحبك
عشان الاجابة معروفة

انا هسألك بس
انتا واثق فيها وف اخلاقها وف انها الأانسانة المناسبة لأنك تكمل معاها بقية حياتك وتشيل اسمك وتربيلك عيالك ولاّ لأ ؟؟؟
وهيا كمان ..لازم تجاوب ع السؤال
هل انتا ف نظرها الزوج والشريك والحبيب والأب المناسب وبتتمناه ولا لأ؟؟؟

اظن بأقتراح لميت هدومى دلوقتى وسبت البيت دا ...
تبقى المسألة واضحة


وانتا بتحبها وهيا بتحبك
وانتوا الجوز اتعرضتوا لكرت ارهاب
هزكم من جوا جامد ...

انا رأيى
الوقت الحالى كان هدنة كافية
عشان تبعدوا عن الضغوط السودا دى
وترجعوا تفتكروا الحلو الكتيييييير اللى بينكم ..

ولو لسه عاوزين بعض يا محمود
اعمل زى هيثم ما قال
وانا بقولك

حاول تانى ورخم وكن أكثر وغدنة من أبوها ....

صر انك تتقدم تانى
وهيا ترفض أى حد يتقدم
وتقول كلمة واحدة
انا عاوزة محمود وبس

امشى ف خطتك لتحضير بيتكم
وهيا تكمل وكأنها مخطوبالك رسمى
وعيشوا الحياة زى العادة
قلبكم مع بعض
وبتحبوا بعض
وهييجى يوم وعندك وعندها
هيرضخوا ان شاء الله
انتوا لا طالبين حاجة عيب ولا حرام


انا محموقالك قوى
بس متغاظة منك عشان سلمت كدا
انتا وهيا ...
يا عيال الاهل خلقوا عشان يعرقبوا الجوازات مش يحلوها ...
كل واحد عاوز يعيش ولاده حياته
مش حياتهم هما ...

وعشان نغير دا
او حتى نبعد هيمنته علينا
عايزة شوية وقت وصبر
وأصرار وغتاتة وتتبيت ف الحق
وما ضاعت قصة حب وراها اتنين متمسكين ببعض ...

بس كدا

وأسفة لو كنت اتدخلت يعنى
وكتبت كل دا


ربنا يطيب خاطرك
ويراضيك ويكتبلك الخير
ويفرح قلبك انتا واللى بتحبها
يا بنى

اللهم آمييين

ميشوو يقول...

بجد مش قادره اقولك الا ‏‏"ياحبيبي يابني‏"‏..

كلنا مرينا بمواقف مش زيك بالضبط بس زي احساسك بالفتره دي,,وعدت الحمدلله

انا مؤمنه ان ربنا خلق كل شخص وتوأم روحه لبعض والحب لازم يجمع أهله


وبالشهر الكريم ادعي ربنا يكرمك من واسع فضله ‏:‏)‏

Mahmood البطراوى يقول...

ايها القوم الذين علقوا
ينقصحكم التفاصيل
وبس خلاص :(

حفيدة عرابى يقول...

ده أنا كنت حالا هكتب لك تعليق تانى أو أنا كاتباه من امبارح بصراحة بس شجعنى عليه تعليق طمطم

خلاص
أنت الادرى بظروفك ..تعدى الايام دى بسرعة ان شاء الله وربنا يرزقك كل الخير

Mahmood البطراوى يقول...

لا يا رشا هانم
كوبى الومنت وبستيه طالما جهزتيه انا كلى ودان :D

حفيدة عرابى يقول...

ايوه كده كوبيته وبسته اهو بدل ماهو مركون من امبارح :)


---------

عشرين يوم
يعنى الموضوع لسه قريب خالص :(

شوف أنا هاحكيلك حكاية لو الموضوع فيه نصيب افتكرها كل شوية

مفيش نصيب خلاص اعمل نفسك مش واخد بالك

اتنين قرايبى ولاد عم وبين العائلتين حاجة شبه اللى بين عائلة روميو وجولييت

الولد الغلبان راح اتقدم لباباها طبعا طبعا يعنى رفضوه
مش يسكت بقى ...ده شغل غدة الرخامة على الاخر واتقدم اكتر من مرة
وكل مرة يترفض لاسباب هما الاتنين مالهمش أى ذنب فيها

بابا البنت مات

الولد استنى شوية واتقدم لمامتها
مامتها مش ممكن ابدا توافق علشان المشاكل وعلشان كمان الراجل اللى مات ده وهو مش موافق ازاى نتعبه وهو ميت يعنى
الولد شغل غدة الرخامة على الاخر
واتقدم اكتر من مرة لمامتها وكل مرة يرفضوه

قوم ايه بقى ...اوعى تكون زهقت ولا نمت ولا حاجة :)

قوم ايه بقى أم البنت تموت هى كمان
الولد استنى شوية وراح يتقدم تانى
طبعا رفضوه وانت عارف ليه مش هارغى كتير تانى :)

والبنت كمان رفضته
ماهو مش معقول يعنى ده موت باباها ومامتها

وبدأت هى تمشى فى موضوعات خطوبة تانية وهو كمان
لغاية مااتقابلوا سوا صدفة فى عزا برضه
ماهى العيال دى نكد أصلها

وهو قالها بصى مش بمزاجك أنا هاخطبك يعنى هاخطبك البنت مااعترضتش حقيقى

وهما مخطوبين انا شخصيا كنت قاعدة وسامعة مكالمة تليفون بين مامته وأخته بيتفقوا فيها على خطط جهنمية علشان يبوظوا الخطوبة ويطفشوا البنت
خطط رهيبة فعلا وانا تخيلت ان الخطوبة دى مش ممكن هتكمل
وكملت واتجوزوا وزى الفل ماشاء الله عليهم دلوقت


كل ده ليه بقى
لو ليكم نصيب لما باباها يطلع حبيب العادلى شخصيا ولا ده هيكون ليه تأثير
بس نحاول ومش نستسلم بسهولة


مفيش نصيب ..خلاص بقى أمر ربنا انت عارف
وفى كل الاحوال ربنا يرزقك الخير

فاتيما يقول...

النبى يخليكى ليا يا فيدوووو
أيون كدا
دى التعليقات المشجعة
وإلا فلا


واد يا محمود
متخضناش بجملة انتوا متعرفوش التفاصيل دى ...
مش هتخض انا ..واتخرع
وأسكت ...

التفاصيل باينة بين السطور
وأعتقد انك مش بس محبط من ابوها
انتا محبط منها هيا شخصياً
بس خد بالك
انك قفلت معاها قفلة سودة
وبعدت عنها بعنف
(من وجهة نظر نون النسوة أسمه عنف)
ومن وجهة نظر الرجالة اسمها رجولة ومحاولة للجدعنة وعشان مصلحتها وكدا ..

انما لأ بقى
لما فيه معاناة و حروب وقسوة وعذاب ومجهود بيتبذب ف الفراق والبعاد
طب يا جماعة
منخليى كل الجهد دا ف الأتجاه العكسى
الأيجابى
يعنى نتعذب ونتبهدل و نتحارب ونقتل ونتقتل ..واحان سوا
جنب بعض
ساندين بعض
ليه كل واحد يروح ف سكة
وانتوا عاوزين حلال ربنا ...

قصة فيدو ملهمة والله
بس احنا مش عاوزين عيالكم يطلعوا بلا جدود كدا ...
دول بركتنا
:))
طولّ بالك
وبلاش الحمقة البطوطية دى والنبى
و كلمة ف سرك
ومستشعراها بين سطور البوست
ومن زمان اصلاً ...
انتا عارف تبينلها حبك صحيح
بس مش عارف تطمنها كفاية للأسف
ودا اللى يمكن بيخليها ساعات
بتستلم هيا كمان
بس انا أزعم انك الطرف الأقوى ف العلاقة دى وبالتالى عليك مسئوليات مضاعفة ...
الا وهى الثبات والتماسك
بالنيابة عنك وعنها
انا عارفة ان دا صعب وبيستنزفك
بس بص لمقابله قدام ...
وقول يا رب ساعدنى
وسيبها ...
تلاقيها اتحلت ان شاء الله


هذا والله المستعان
وأسفة لو كانت تعليقاتى حشرية زيادة ع اللزوم
بس انتا زى ماجد
ولو شفته كدا ...
هقول نفس الكلام دا بالحرف

ربنا يسعدك ويهنى قلبك

اختك الحشرية
ام يوسف

حفيدة عرابى يقول...

:)
ممكن أقول لطمطم تسلم الايادى وهو ده الكلام
وأهم كلام
----
انما لأ بقى
لما فيه معاناة و حروب وقسوة وعذاب ومجهود بيتبذب ف الفراق والبعاد
طب يا جماعة
منخليى كل الجهد دا ف الأتجاه العكسى
الأيجابى
يعنى نتعذب ونتبهدل و نتحارب ونقتل ونتقتل ..واحان سوا
جنب بعض
ساندين بعض
ليه كل واحد يروح ف سكة
وانتوا عاوزين حلال ربنا ...
------
ممكن اقولك كمان اسمع كلام أختك فاتيما
علشان لما يحصل نصيب فرحتك هتبقى اكبر كتير


والله ياطمطم مش اقصد خالص موضوع الجدود ده بس هما اللى راحوا بقى هاعمل ايه
بعد الشر عن الكل :)

Lady E يقول...

ربنا يكون في عونك ويصبرك ويداوي جرحك
ويعملك اللي فيه الخير

رأيي من رأي حفيدة عرابي وفاتيما علشان حتى لو قررت تبعد يبقى عملت كل حاجة ممكنة قبل ما تنفذ القرار الصعب ده تجاه انسانة بتحبها ومن كلامك عنها واضح انها هي كمان بتبادلك نفس الحب

Mahmoud Alam يقول...

هو ده بجد ولا حكايه ؟

غير معرف يقول...

السلام عليكم:

يعنى أنا مش فاهمة وداع ايه و ذكريات ايه اللى حضرتك بتتكلم فيها .. اعتقد ان بعد الستاتس و البوست اللى حضرتك شتمت فيهم ابويا مافيش اى ذكريات!!!


يا حضرت، انت لو كنت متجوز و طلقت، ماينفعش ابدآ تتكلم على نسايبك بالاسلوب دا مهما كانت الاسباب .. على اساس ان تربيتك و دينك هايمنعوك انك تتكلم على ناس بقوا أغراب عنك .. ما بالك بناس انت أصلآ كل اللى قالوه بمنتهى الادب "احنا أسفين" .. حضرتك أصلا لو باقى على ذكريات -زى ما بتقول- يبقى اقل حاجة انك مش هاتعمل حاجة انت عارف انها هاتجرح البنت اللى بتحبها .. وهاتجرحها اوى كمان (بشتيمتك أبوها و أهلها)1

انا لو بالغت فى رد فعلى عندى على البروفايل .. ف انا ولا قلت مناسبة ولا أشخاص (عكس اللى انت عملته) و كمان مسحت الكلمة بعدها و انت عارف انى مسحتها .. وانت عارف انا ليه قلت كدة (من غير اي تفاصيل، ايه ممكن يخللى واحدة بمنتهى الغباء تقف قصاد أهلها عشانك اول النهار .. و تغلط اخره) .. وبعدين ايه اللى خلاك متأكد انك انت المقصود فى الستاتس عندى؟!!

يعنى المفروض ارد ازاى .. اشتم فى والدة حضرتك فى المقابل؟! .. للاسف أهلى ربونى

حضرتك شتمت ابويا .. حسبى الله و نعم الوكيل
أنا كمان جالى رسالتين واحدة من ولد و التانية من بنت بعد الستاتس بتاعتك قالولى انهم عارفين انى انا البطلة، دا غير رسالة بعد البوست من واحد كان صديق مشترك و باعت رسالة قال ايه بيواسينى وبيشتم فى حضرتك .. حسبى الله و نعم الوكيل

حضرتك ماطلعتش راجل قدام أهلى .. ولا طلعت راجل قدامى .. حضرتك مش راجل أصلا، مافيش راجل يحكى على تفاصيل خاصة و حساسة كدة فى وسط الناس من غير اى اعتبارات .. و انا أصلآ استاهل الالم و البهدلة اللى انا فيها دلوقت .. انا اصلا غبية و أسأت الاختيار

اتق الله فى واحدة انت ماشوفتش منها غير انها حبتك .. حسبى الله و نعم الوكيل

إمضاء: بطلة البوست

غير معرف يقول...

حضرتك مش بتهتم غير بالدراما .. ازاى البوست يطلع حلو بغض النظر عن الكلام نفسه و تأثيره .. انت كده سبحان الله


أنا اسفة انى بوظتلك نهاية القصة