2010/08/03

بوست مش حزين


فكرت النهارده اكتب بوست حزين اوى .. وبعدين حسيت انى مش حزين للدرجه دى .. فقررت اكتب بوست يضحك اوى .. وبعدين حسيت انى مش عاوز احول اللى حصل بنا لموضوع يضحك .. مش عاوزه يتحول لنكته ناس تشوفها سخيفه وناس تشوفها جميله .
قلت احاول انسى كل الحاجات الاخيره اللى حصلت بنا وارجع افتكرك.. افتكرك زى ما كنتى زمان مش زى ما بقيتى دلوقتى
قررت انى اكتب عن البنت اللى بحبها اوى ,, وانسى تماما كل الحاجات اللى حصلت فى الفتره الاخيره
فاكره؟!
فاكره لما كنت ببقى تعبان اوى .. وكل اللى اعمله اتصل بيكى .. يمكن اتكلم عن الحاجه اللى مزعلانى .. بس كتيييييييير اوى اتكلم عن اى حاجه تانيه .. أول ما كنت بسمع صوتك كنت بنسى اصلا انى مخنوق وانى كنت متصل بيكى عشان افضفض معاكى .. فاكره؟
انا فاكر اوى مواقف كتير كنت فيها فى قمه الضيق .. واول ما سمعت صوتك نسيت خالص انى اصلا كنت مضايق .. رغم اننا اتكلمنا فى كلام ملوش علاقه ببعض .. اتكلمنا فى كل حاجه واى حاجه ..كنت بس ببقى محتاج ان صوتك يطبطب عليا .. وقلتيلى ان عندك مشاكل .. عارفه يومها فضلت يومين تلاته مضايق عشانك اوى .. ونسيت ان انا اللى كنت متصل عشان عندى حاجات مضيقانى .. عارفه ساعتها قعدت يومين تلاته متصلش بيكى .. كنت خايف اتصل تانى يوم فتحسى انى بقيت بتصل بيكى كتير فتحطى ضوابط للاتصال بنا .. كنت خايف اوى اوى اخسر الصوت الوحيد اللى بيخرجنى من اسوأ حالات الاكتئاب اللى ممكن اوصل ليها.
عمرك ماكنتى سبب مشكله ليا .. وعمرى ما اضايقت بسببك .. وعمر ما زعلى كان زى فرحى عندك .. كنت بحس بصوتك بيضحك وانا فرحان .. وكنت بحس بحزن لما ببقى زعلان .. كان صوتك ساعتها بيطبطب عليا ..لما كنتى بتقولى انت جميل اوى يا بطوط كنت بفرح انى جميل فى عنيكى .. مجرد ما كنت بسمع صوتك كنت بحس انى هبقى احسن واحد فى الدنيا .. انى هبقى زى ما انتى شيفانى .. تصدقى انى حبيت نفسى بعنيكى؟ .. فاكره كل دا؟ امال حصل ايه؟
دلوقتى مش حاسس انك مصدقه انى هبقى وانى هحقق نص احلامى .. مبقتش بشوف فى عنيكى انك شيفانى زى ما كنتى مصدقه انى هكونه . مبقتش حاسس انك لسه مؤمنه بيا ومصدقه قداراتى .. ويقيتى تتصرفى معايا فى ضوء انى حتمال ابقى حد كويس واحتمال لأ؟

فاكره لما كنت ببقى عاوز اشوفك .. كان سؤالى دايما انتى فاضيه يوم كذا ؟ .. عمرى ما سألتك هو ينفع اشوفك ولا لأ زى ما بيحصل دلوقتى .
فاكره لما كنتى بتقوليلى انت بترفض الصداقه بين البنت والولد ازاى انا وانت اصحاب وكنت بقولك انا بنيم ضميرى واقول انك لا بنت ولا ولد .. فاكره ابتسامتك ساعتها ؟ .. انا مش قادر انساها .. قلت لك ساعتها بلاش نتكلم فى الموضوع دا .. لو فضلنا نتناقش يمكن نخسر الصداقه دى .. وسمعتك بتقولى انا مش عاوزه اخسرك يا بطوط .. بطوط لما تتجوز ابقى عرفنى على مراتك ونبقى اصحاب ماشى ؟ وعد؟
كنا بنفكر ازاى ممكن علاقتنا تفضل طول العمر وازاى نحافظ عليها .. كنا ساعتها مبنفكرش اننا نرتبط ببعض ... ولا كنا بنفكر نبعد عن بعض .. كنا ساعتها بنبعد عن اى حاجه فى احتمال واحد فى المليون انها تأثر على جمال الصداقه دى .. تأثر عن اننا نبقى قريبين لبعض ..ليه مش حاسس انك لسه بالحرص دا دلوقتى؟
حتى لو زعلنا من بعض مكنتيش بتاخدى قرارات وكأنك بتحذفينى من حياتك .. مكنتش بصحى الصبح الاقى كل الحاجات المشتركه اللى بنا اتلغت .. كنا ساعتها بنحافظ على اى حاجه مشتركه. كنا خايفين اوى نخسر العلاقه دى 
فاكره لما كنتى تقفى فى وسط الكلام وتقوليلى .. بطوط انت زعلت ؟! .. انا مكنش قصدى كذا انا كنت عاوزه اقول كذا .. اوعى تزعل منى؟ رغم ان فى الغالب عمر كلامك ما كان بيزعل .. بس كنا خايفين اننا نبوظ العلاقه دى حتى من غير ما نقصد.

الايام اللى فاتت اعصابى تعبت اوى ؟! عارفه ليه؟! عمرى ما كنت اتوقع انك تبقى عارفه انى زعلان ومحسش فى صوتك انك زعلانه على زعلى .. عمرى ما توقعت انى اقولك انى فعلا مضايق وانتى اللى فى ايدك الحل واحس انك بتبخلى بحاجات بسيطه اوى مش هتفرق معاكى واحس ان زعلى اصلا مش فارق معاكى .. او انك شايفه الموضوع تافه وصغير مش محتاج حتى انك تطيبى خاطرى بكلمه.. عمرى ما تخيلت انك قبل ما تتصرفى تصرف متسأليش نفسك هو دا هيزعل محمود ولا لأ؟
اول مره احس انى مش فارق معاكى وانى فرحى زى زعلى ؟ .. اول مره اشوفك بتاخدى قرارت تبعدنا عن بعض وانتى مقتنعه ان دا التصرف الصح من غير ما تحسى حتى انك محتاجه تشرحى التصرف دا وانتى شيفانى مضايق... عمر ما كان الصح اننا نبعد عن بعض كان دايما الصح العكس .. حتى لو كنا مقتنعين انه غلط لكن صح عشان بيقربنا لبعض.
.عمرى ما حسيت انى عشان اكلمك لازم اتحايل عليكى عشان ترضى , عشان اشوفك لازم اقف على شعرى.
فاكره يوم ماكنتى معزومه فى فرح وانا كنت هناك وفضلنا بره ومرحتيش الفرح؟ .. يومها كنتى جميله اوى مقدرتش امسك نفسى قلت لك على فكره انتى النهارده جميله اوى .. يومها ابتسمتى وقلتيلى ميرسى ... عمرى ما هنسى اليوم دا .. كان اول يوم احس فيه انى بحبك.
انا حاسس ان القرار اللى اخدته النهارده كان قرار صح ..  حبنا بالشكل دا كل يوم بيقل عن اليوم اللى قبله .. خفت الحب دا يختفى .. خفت اخسر اجمل بنت عرفتها .. قلت ابعد شويه .. يمكن ترجع زى ما كانت .. يمكن القسوه اللى بقت ظاهره اوى فى كل تصرفاتها تختفى .. يمكن تزعل لما تعرف انى زعلان زى ما كان بيحصل زمان .. ويمكن يوحشها صوتى .. يمكن تحس انى واحشها اوى فتطلب تشوفنى .. ويمكن تحس انها محتاجه تخاف على مشاعرى ومحتاجه تحترم الانسان اللى هى متربطه بيه .. يمكن تشيل الاسباب اللى فجرت المشكله واللى بطريقه لا اراديه هروح كل شويه اشوف الاسباب دى اتشالت ولا لأ ؟ .. يمكن ترجع تصدقنى وتؤمن بيا زى زمان .. خفت اخسرك نهائيا قلت ابعد شويه ..خفت تخسرينى نهائيا قلت تبعدى شويه ..قلت يمكن لما نبعد كل واحد فينا يتأكد انه زى زمان لسه خايف انه يخسر التانى ومستعد انه يعمل كل حاجه عشان ميخسرش التانى .. وان الصح هو الحاجه اللى بتقربنا لبعض والغلط الحاجه اللى بتبعدنا عن بعض.. تفتكترى هترجعى زى زمان ؟ ولا خلاص كل واحد فينا فى الفتره اللى فاتت انكسر جواه حاجه صعب انه يعوضها.
انا لسه منتظر البنت اللى كنت بموت فيها زمان ..لانها وحشانى اوى .. ولانى كنت بحبها اوى اوى اوى
يارب ترجع

هناك 10 تعليقات:

FAW يقول...

إسمحلي أقول رأيي
أنا مش عارف ليه حاسس إن إنت أصلا مقلتلهاش إنك بتحبها !!!
معتقدش إنها حتي لو بتحبك هتفضل مستمره في العلاقه اللي ملهاش معني دي وهتعمل وقفه و تعيد التفكير
أنا بصراحه مش مؤمن بحاجه إسمها صداقه بين بنت و ولد , و إنت نفسك قلت إنك كده بس منيم ضميرك شويه
إتوكل علي الله وكلمها و قولها إنك بتحبها ومتقدرش تبعد عنها أكتر من كده , بس الأول قرر إنت عاوز إيه , لو مش متأكد إبعد أحسن بدل ما تعذبها و تعذب نفسك
تحياتي . .

رحلتنا في الحياة يقول...

مش هقول غير جملة صغيرة لانى بصراحة الكلام مؤلم مش بحب اشوف نهايات حزينة ولا ناس بتتالم بعد ما كان الحب بيملى قلوبهم
البنت عندها قرون استشعار على فكرة وبتكون عارفة واثقة من حب الانسان اللى قدامها بس بتكون محتاجة دليل قوى وكلمة منه تثبت دا
مش هى اللى هتيجى تقولك انا لسه بحبك ومقدرش اعيش من غيرك
وانت قولت انها مش مقتنعة بصداقة الولد والبنت واكيد ضميرها كل شوية بيالمها
ويمكن دا السبب الاساسى فانها اتغيرت وبعدت
صدقنى هى منتظرة رد فعل ايجابى منك تثبت بيه حبك
وربنا يجمعكم على خير يااااارب

علي رياض يقول...

ياسي بطوط افندي ابقي خلي بالك من الكتابه لأن اسلوبك في الأول اسلوب مؤنث..وشد حيلك وتجدعن كده..

غير معرف يقول...

يااااه يابطوط حصلي نفس الموقف اللي بتمر فيه البنت
مكنتش عايزه ساعتها الا انو يقولي بحيك ومقالشي
تخيل تأنيب الضمير اللي بتحس البنت فيه وهي بتكلم حد
مش من اهلها وتفكر دايما ان ربها بيشوفها
احساس مؤلم جدا انها تختار اللي بتحبو واللي مش
عارفه اساسا اذا هو يبادلها نفس الشعور وبين ربها

ياتحبها وتخطبها يا انك تعمل موقف شجاع وتسبها

ويكا يقول...

تعرف يا محمود

مش عارف ليه عندى قناعه انكم مش بتحبو بعض .

ده حاجه تانيه خالص ....... بس يمكن انت سميته حب لان ده اسهل اوارضى واريح لنفسك ...... لحاجه ما انتش عارف ايه اسمها ......

صدقنى الحب مش اللى انت وصفته ده ....... ده حاجه تانيه ، قد تكون كويسه ، وقد تكون وحشه ...... (وان كان شرعاً هى وحشه مفيش خلاااف ).

لكن صدقنى دى حاله اكتر منها حب عاطفى ( حب جواز ، راجل لانثى) .

قد تكون هذه الحاله ، جيده ورائعه افضل من اى حالة حب اخرى ......
الا انها لا تزال ليست حب ، فبالتالى لابد من التعامل معها على هذا الاساس .

قد اكون مخطئ
بس صدقنى ان ده اللى انا حاسس بيه اوى من كلامك .

لان الحب مش اللى انت حكيت عنه ده.

مش تقليلا من احاسيسك لا والله. بس توصيفاً ليس الا

عموما دمت بخير.
وانت فعلا شاب شكلك شاطر وذكى جدا كمان وجدع.

وان شاء الله هنبقى اصحاب ، وان كنت مش عارف امتى .... بس ان شاء الله هنلتقى يوماً ما. (انا ولد طبعاً ، هههههه ) بس عادى يعنى احنا بنقدروا الرجاله برده .



سلام

محمد فاروق الشاذلى يقول...

البعد مش حل يادكتور (على الأقل من وجهة نظرى)، لو سمحت لى أنا شايف إن المناقشة أحسن، كل واحد فيكم يقول أسبابه فى التغيير اللى بيحصل وبصراحة شديدة علشان تقدروا تشيلوا أسباب الابتعاد ده وترجعوا زى زمان.

Unknown يقول...

طب لو بتحبها بجد، ليه مقضى كل الوقت ده معاها تحت شعار صديق مع انك لا تؤمن بالصداقه بين ولد وبنت، وبجد المفروض لما تبتدى حاجه تكون عارفلها أخر، انت أسأل نفسك، نفسك يكون ايه الأخر,و اتصرف على الأساس ده. لو بجد بتحبها وشايف دى الشخص اللى انت محتاج تكمل باقى حياتك معاه حسسها بالأمان وانها اغلى ما عندك وهى لو جد بتحبك اكيد هترجعلك ويمكن احسن من الاول وأهم حاجه أتصرف كل حاجه على اساس رضى ربنا لو ربنا رضى عنكم كل حاجه وحشه بينكم هتزول و استعينوا بالله.

marwa mahdy يقول...

حبيت نفسي بعنيكي حلوه جدا الجمله دي يابطوط ..........شايفه انك بتحبها جدا وهي كمان والموضوع بسيط جدا الصراحه في المواضيع دي بتريح........ لازم تثق في احساسك لأنه ساعات كتير بيحركك ومعني كده انه احساس قوي. ومش عابر.......

فاتيما يقول...

يا لهوتينى يا بطوط !!!

عشرين تلاتين جملة قريتها و كنت عاوزة اشاور عليها و اقولك الله عليك و ايوه انا حساهم جدا و يخربيت الصدق اللى بينط من بين السطور و يخربيت الحزن كمان اللى طالل من كل حرف انكتب و يخربيت العجز اللى بيشل الحركة و يخلى المشاعر دى كلها تدبح من غير نقطة دم واحدة تسيل ...

معرفش اقول ايه

بس لو انتا منتظر الانسانة اللى كنت بتموت فيها زمان و وحشتك
طب ما تشوف انتا كمان راحت فين عيونك بتاعت زمان اللى كانت بتخليك تشوفها كدا ؟!!

مش يمكن حصل حاجات كتيييييير الفترة اللى فاتت و خلت فيه غلوشات كدا ؟

انتاو الرجالة يا لهوى عليكم
رد فعلكم تجاه الأشياء غريب
لا يقل غرابة عننا
يعنى مثلاً
انا لو مكان ليلاك الجميلة
اتصور اننا كلنا مزيج واحد كنون نسوة يعنى و بنحس زى بعض
لو انا مكانها
مش هبقى عاوزاك تسألنى انتى فاضية عشان عاوزة اشوفك النهاردة و تتردد كدا
لأ
هبقى عاوزاك تقولى انا هشوفك النهاردة و اتصرفى لو سمحتى لحسن آجى تحت بيتكم و اعمل هوليلة لحد ما تنزلىىىىىىى
لو مكانها هتمنى اسمع منك دا
دايما اقول الجملة دى يا بطوط
اى واحدة نفسها فى حد ميخفشى على جاكتة قلبه لتتكرمش
معرفش ليه حسيت ف البوست دا انك خايف قووووى ع الجاكتة دى بشكل عجيب

مختلفة مع تعليق ويكا
اللى بيقول انك مش بتحبها
يا لهوتينى يا ويكا لو دا مش حب اومال يبقى إيه؟؟؟!!!!


و متفقة مع قلب مصرى الجميل ان المواجهة هى الحل ..كل واحد فيكو يواجه ضعفه و مخاوفه و يرميها قصاد التانى ..جايز يحصل تجريح و ايلام لكن الحب هيسند ..المفروض يسند

اما مرام ..فمعاها ان الامان مطلوب جدا ..بس المشكلة التى أظن انها لب المسألة ان انتا كمان يا بطوط مش حاسس بالأمان و كل واحد فيكو رامى العبء دا ع التانى ..مبقتوش زى الأاول واثقين ف بعض انكو تقدروا تكملوا و دى المشكلة الحقيقة و كلمة بحبك مش هتحلها او تهديها


و بناء عن تجربة
كلمة بحبك ممكن متتقلش من الراجل
لكن تتحس فى كل تصرف و فعل


و الحب زى طفل صغير بيتولد
و بيكبر بين اتنين
الطفل دا
عاوز صبر يا ناس

الكلام دا موجه للطرفين على فكرة
ليك يا بطوط
انك تصبر عليها
و لليلى كمان
انها تصبر عليك


زمان كان فيه صبر بس مكنش فيه انتظار لشىء بعده
دلوقتى الوضع اختلف
الأنتظار بيحاول يغلب الصبر بضربة قاضية او حتى بالبطىء

انتوا الاتنين ف ايدكو القرار
يا تهزموا الخوف بالصبر
يا ترموا الحلم و يموت من الغهمال

ربنا يسعد قلبك
يا أجدع دكتور سنان ف مصر
و الدنيا

Mahmood البطراوى يقول...

moustafa fawzy

معرفتش البوست كبوست عجبك ولا لأ .. سيبك منى انا وانا قلت لها بحبها او مبحبهاش يمكن اصلا البوست تأليف
المهم البوست كبوست عجبك؟

*********************************
احاسيس آيوشه

احتمال يكون كلامك صح انا هفكر فى الجزء االخير من كلامك بعين التركيز
نورتى المدونه يا فندم :)

*********************************
علي رياض

انا مش شايف كده بالعكس انا بحب اسلوب كتابتى جدا
مع ملاحظه ان دى مدونه شخصيه يرجى مراجعه بوست "شايفك يا بوب" وشكرا على تعليقك

*********************************
غير معروف

شكرا على النصيحه جداا ويارب يكون البوست عجبك فى العموم

***********************************
ويكا

مع احترامى التام لكلامك بس انا مقتنعتش فيه بولا حرف الا اننا هنبقى اصحاب فى يوم من الايام :)

**********************************
قلب مصرى (محمد فاروق)
دا مش بعد يا ابو رقيه .. دا حاله بتحصل كده ملهاش وصف الا ان كل واحد يختبر حب التانى له ويختبر بعد التانى عنه شويه
مش عارف اوصفها بس كنت حاسس انى محتاجها

**********************************

Maram

طب لو بتحبها بجد، ليه مقضى كل الوقت ده معاه؟
اكيد فى اجابه ومظنش ان الاجابه عن السؤال دا كان هدف البوست
المهم البوست كبوست عجبك
تشرفت بزيارتك للمدونه جدا

**********************************

marwa mahdy
يا دكتوره ثنائك على تعبيراتى بيخلينى ماشى كده اتفشخر بنفسى :)

ربنا يخليكى ليا يارب

**********************************
فاتيما
طماطم قريت تعليقك اربع مرات لحد دلوقتى
وهعلق عليه بعد شويه او فى السكرته بقى ;)