2010/08/09

Asl plz



النهارده وانا بكلم د علا على الشات .. دخلت اقولها .. هاااااااااى ممكن نتعرف 
قامت كتبتلى ASL plz .... اول ما كتبتها ضحكنا انا وهى اوى ..
حد فيكم فاكرالايام دى ؟ .. ايام الاى سى كيو .. وياهو شات طيب الله ثراهم.
asl plz يعنى قولى  السن , الجنس , المكان Age Sex Location

كنت ساعتها فى ثانوى وكان اول مره اعمل شات .. وانا طول عمرى عندى مشكله مع الانجليزى .. ومكنتش اعرف شات عربى فكنت ادخل على الشات الاجنبى.
فاتح قاموس إلكترونى على الشاشه .. وعمال اعصر دماغى عشان اكتب للناس اللى بكلمهم.
الشات بالنسبالى كان بيبقى عباره عن اربع جمل ...
هاى ...
asl plz ..
r u virgin؟
دول تلات جمل الجمله الرابعه بقى كانت دايما بتبقى شتيمه ردا على الجمله التالته :D 

اللى بشات معاها تشتمنى بافظع الالفاظ الاجنبيه " اللى انا طبعا هحفظها عشان اشتم بيها الناس بعد كده " وانا اسبلها بالعربى والاجنبى ويخلص الشات.
كانت ايام المراهقه .. وتخيلوا انا بمجتمعى المقفول جدا ايامها بعمل شات مع ناس فى اروبا والدول المتقدمه .. وفكرتى عن الدول دى كانت زى فكره بلال فضل عنهم اللى كتبها النهارده فى مقاله .."كنت أعتقد كالبلهاء الآخرين أن مدن الغرب هى مواخير متحركة يضاجع الناس فيها بعضهم فى الطرقات وتطير فيروسات الأمراض الجنسية فى الهواء " .. وكل فكرتى عن البلاد دى ان مفيش فيها ولا ست فيرجن (عذراء للى مبيعرفش جريكى على رأى سو)  .. وكنت زى اللى بيعمل احصائيات كل ما كلم واحده اقولها .. كلمه فى سرك كده يا اختى - احنا ستر وغطى على بعض - انتى فيرجن ولا ايه نظامك؟
فاكر فى مره مسكت المايك فى غرفه الشات العام وفضلت اقول  I'm arabic
والناس تضحك وتشتم .. وانا اعتبرت ان دا اهانه للعروبه اللى انا بمثلها دلوقتى.. والحماسه خدتنى .. وفضلت اعصر فى دماغى كل الشتايم اللى اتعلمتها بالانجليزى .. وصوتى على وانا قاعد فى السايبر ..بس ولا همنى انا الجلاله خدتنى بقى ..
لحد ما جه واحد عربى فى الغرفه بعتلى رساله عمرى ما هنساها 
"يا حيوان طالما مبتعرفش انجليزى ماسك ام المايك ليه اسمها I'm Arabian
عملين يتريقوا عليك يا حمار وانت شغال شتيمه .. الله يحرقك بجاز"
طبعا انا فضلت شهرين مبدخلش نت لشوف الواد دا تانى.
مره وحيده اللى طولت فى الشات مع واحده ... قلت لها هاى ؟ قالتلى هاى 
قلت لها الاخت فيرجن ولا ايه نظامها ... والست فضلت تشتكى انها كبرت فى السن ولسه فيرجن .. وقعدت تقولى انها بتعانى من حاله نفسيه .. طبعا انا ولا كنت فاهم نص كلامها الا بالقاموس اللى انا فاتحه جانبى.
وفضلت اكلمها عن مصر واقولها صدقينى انتى كده ست عشره على عشره فى مصر .. يو ار تن اوفر تن هير ان ايجيبت .. فهمانى ؟؟ يو اندر استناد ولا انتى ايه بالظبط.
شكلك حماره مبتعرفيش انجليزى .
طبعا كنت بكتبلها مفاتيح الكلام واسيبها تتكلم هى .. اخوكم كان ساعتها بعافيه اوى فى الانجليزى وانه يكتب جمل كامله كان امر مزعج جدا...
كان الشات بتاعنا عباره عن كلمه منى ومليون منها
انا اقولها ايجيبت بيرمدز .. هى تقول اوووه فانتاستك .. وتفضل ترغى بقى عن ازاى مصر حلوه اوى ويا بختنا اننا عايشين فيها
وانا اقولها يس يس 
عمرى ايامها ما كلمت ولد .. اول ما اقول انا ولد يقوم يقفل فى خلقتى .. ويقولى سورى مان انا ببحث عن فيميل وكان داينا بيبقى راجل ذوق .. ويبعتلى موقع قليل الادب ال يعنى المفروض اسلى نفسى فيه على ما ربنا يرزقنى بواحده .. وكنت دايما اشتمه.
واكتبتله بالعربى ..اساسا اساسا السايبر اللى انا فيه.. مسطب برنامج ويب بلوكر .. اللى هو يقفل اى موقع قليل الادب .. دا بيقفل يا مؤمن الهوت ميل عشان كلمه هوت .. يبقى هيفتحلى موقع زى دا يا سافل. اخص عليك يا اجنبى يا زباله.
قعدت افتكر مع دكتوره علا.. الايام دى وافتكرنا مواقف كتير اوى وبعدين مره واحده قلت لها عارفه؟
بابا الله يرحمه زمان لما كان يقعد يفتكر ذكرياته .. كان يقول على حاجه حصلت من عشر سنين انها حصلت قريب اوى .. كان عمرى ساعتها بتاع 12 سنه .. وكنت اقعد اقوله باستغراب كبير 10 سنين قريب؟؟ .. دلوقتى بقيت انا كمان احكى مواقف من يجى 8 او 7 سنين .. وبحكيها كأنها قريبه اوى برضه؟
هو الواحد كبر اوى كده؟ ولا العشر سنين فعلا اللى صغيرين اوى كده؟ يااااااااه تصدقوا انها كانت ايام .. 
لو افتكرت اكتر هرجع احدث البوست دا .. البوست انا كتبته بسرعه ومن غير ترتيب ومن غير تنسيق ولا اى حاجه ... انا اصلى كنت عاوز اكتب فكتبت ومصدقت لقيت موضوع فمعلش انى ضيعت وقتكم فى قرايته :)
اللى عنده ذكريات عن الايام دى يكتبلى فى الكومنتات انا من ساعه الشات من د علا وانا حاسس انى مبتسم وكل شويه افتكر حاجه.

هناك 25 تعليقًا:

мαησηα يقول...

بالعكس ع فكرة انت ضحكتنى جدااااااااااااا الله يسعدك وبجد

خرجتنى من مود كئيب الحمد لله

تسلم ايدك مش سهل حد يضحك حد ويخرجه من مود الاكتئاب

adel يقول...

ههههههههههههههههه
فكرتيني يايام مقولكش عليها بقي
:):):)
بس الحمدلله انا من اهل الهوت ميل من ايام قريش
:):):)

ليس فقيرا من يحب يقول...

ههههههههههههههههههههههههه

مش ممكن خفه الدم دى

البوست زى السكر وانا عماله اقرى وفطسانه على روحى من الضحك وامى تقولى مالك يابت انتى اتهبلتى

شكلى فاتنى كتير علشان مجتش هنا وتابعت

الحمد انا فاشله معنديش ذكريات معسله فى الموضوع ده لانى تقريبا كنت زى اللهو
ومش عرفت عالم الشات ده غير لما فتحت المدونه والفيس وحتى كمان مش بصورة كبيرة
ربنا يسعد ايامك

Sarah .. يقول...

مساء الخير :)

البوست دمه خفيف اوى .. وضحكتنى جداااا
ربنا يكرمك يا دوك

كل سنة وانت بخير
ورمضان كريم عليك يارب :):)
تحياتى ..

ميشوو يقول...

ههههههههههههههههههه ياااه ايام الشات كانت ايام

اول ما عرفت الشات كان عمري ١٢‏ وطبعا كان شي كبيييير

كنت بالمدرسه اذا احد تكلم عن الكمبيوتر كنت بكل فخر

اقول اني بدخل شات مع انه مافي شي يدعو للفخر دي مصيبه اصلا

وكانو بالشات بسرعه يعرفون اني صغيره وياكثر ماحذفوني هع

وبعدها قمت ادخل على اساس اني ولد ومشي الحال هههههههههه

والحين الحمدلله تبت توبه نصوووحه ‏:‏)‏

Mostafa Abdelmoneam Badr يقول...

"هو الواحد كبر اوى كده؟ ولا العشر سنين فعلا اللى صغيرين اوى كده؟ "

معاك حق احنا بنتخطف ومش واخدين بالنا
أنا باستغرب لما أشوف العيال اللى اتولدت على ايدى وكلت سبوعهم ليهم شنب فى وشهم وعندعم اهتمامات وآراء.

باحس ان العمر فاتنى لأنى لسة من يومين كنت زيهم وكنت بفكر بنفس الغرور والبساطة وحاسس إن مافيش حاجة مستحيلة.

بأكون عايز أفوقهم لكن باتماشى معاهم واسيبهم يعيشوا زى ما أنا عيشت وجربت.

رجعت فلبى للورود

تقبل تحياتى

سارة درويش يقول...

ههههههههههههههههههههههههههههههههههههههههههههههه

انا ما فصلتش ضحك بجد ههههههههههههههههههه يو آر تن اوفر تن يا حلاوة ههههههههههههههه

والله مشكلة انا ما عاصرتش الأيام دي بصراحة

كمان عمري ما دخلت شات كده اللي هو مفتوح ع البحري دا علشان اعرف انه مش محترم وكده

فاخويا علشان عارف اني منكاش ومش ههمد إلا لما اعرف مش محترم ليه وعلشان ما يبقاش حارمني من حاجة دخل قدامنا شات واتفرجنا شوية واشتغلنا ناااااااس وكده احنا التلاتة وبعدين في شخصٌ ما اكتشف انه بيشتغله فشوفنا الشتايم أو كنا ع وشك نشوفها اخويا اول ما لاقاه بيعك وزعنا :D

دعاء العطار يقول...

ههههههههههههههههههههههههههه

ههههههههههههههههههههههههههههههه

يخرب عقققققلك

انا بجد ممسكتش نفسى من الضحك

انا عمرررى ع فكره مادخلت شات بس بصراحه عمرى برضه ماشوفت حد بيتكلم عن الشات بالاسلوب اللى يفطس من الضحك ده

كللل مااتخيلك وانت فاتح القاموس وقاعد تقولها يس يس ولا وانت بتقول iam arabic

بجد مسخرررررررره

هههههههههههههه
ههههههههههههههههههههههههههه

ميرام يقول...

(:
ببتسم .. بشدة ....(: (:
كل سنة وانت طيب (:

FAW يقول...

يا عم ده كلام زي الفل والله الواحد فعلا بيقعد يفتكر حاجات عجيبه كان بيعملها وعشر سنين دي ولا حاجه كنت ماسك موبايل 3310 و طاير السما بيه , و كان عندي كمبيوتر 10 جيجا وكنت بتباهي بيه وسط صحابي . .
سبحان الله
بس iam arabic دي كارثه بصراحه D:

مي يقول...

ههههههههههههههههههههههههههههههههههههههههه يالهوى عليك يبطوط عثل عثل والنعمة ولا اسالتك ههههههههههههه ايه ال.......... هههههههه ولا بلاش عيب
انت فضحتنا على فكرة
بس يلا فدااااااك
ار يو ؟؟؟؟؟؟؟؟؟؟ بطوط ( وش بيغمز وخبيث وبيكركر)

Unknown يقول...

هههههههههههههه والله كانت أيام .. ياااااه دي غرف الشات دي - المتخصصة فى تعليم الإنجليزي على البال توك - هي اللي علمتني الإنجليزي وخليتني لبلب

ايام شات الياهو دي كانت حياة تانية بجد .. فى ناس اتجوزوا بنات اجنبية واسلموا وجم عاشوا هنا فى مصر وسمت نفسها أمينة

والنكتة بقى ان جوز أمينة مابيعرفش انجليزي وامينة الأمريكانية مابتعرفش عربي ههههههههههههههه وكل سنة وانت طيب وهابي نيو شاااااااات

P A S H A يقول...

كل سنة وحضرتك طيب وبألف خير وصحة وسلامة إن شاء الله
:)
رمضان كريم

لاسع افندى يقول...

كل عام وانتم بخير

ورمضان كريم


تحياتى

محمد فاروق الشاذلى يقول...

أنت ماكبرتش يا دكتور، العشر سنين هى اللى قليلة فعلاً، أنا خدت بالى من الحكاية من يومين تلاتة كده، كنت معدى من جنب الجامعة وافتكرت أيام الدراسة واكتشفت إنى متخرج من 11 سنة (تصور!!) علشان كده قلت مش أنا اللى كبرت الأيام هى اللى عدت بسرعة.
أما موضوع الشات ده فالحمد لله إنى فشلت فى محاولاتى الأولى فيه فبطلته بدرى بدرى.
كل سنة وانت طيب يا حودة ورمضان كريم

غير معرف يقول...

:)
عندى والله زكريات بس زى ماتقول كده الواحد صايم وتعبان ومش عارف يفكرولا يكتب....اشوفك بعد الفطار


روز

babosha يقول...

كل سنة وانت طيب ورمضان كريم البوست جميل قوى وكلنا حصل معانا كدة كنا بنعافر مع الانجليزى بس الحمد لله ربنا تاب علينا اما موضوع العشر سنين ده فعلا الايام معدش فيها بركة وبقيت بتعدى بسرعة قوى

ابو المفاصل الواصل يقول...

يارب اجعل ايامنا اعياد والكل يفرح ونعيد/
ونعيش فى سلام وامان وبالتوفيق نتأيد..../
ونعلو ونسمو ونملك ارادتنا بانفسناونتسيد/
ولا يتحكم فينا كأننا من كان لاعبد ولا سيد/
وعن الشر نبعد بعيد ونكون بالخلق الجيد/
ونغفر ونسامح ولا نكون بالطبع الكيد..../
وبالاخلاق والمثل والقيم نتمسك ونتقيد/
ونقيم جسور الحب مع البشر نبنى ونشيد/

ابو المفاصل الواصل يقول...

يارب اجعل ايامنا اعياد والكل يفرح ونعيد/
ونعيش فى سلام وامان وبالتوفيق نتأيد..../
ونعلو ونسمو ونملك ارادتنا بانفسناونتسيد/
ولا يتحكم فينا كأننا من كان لاعبد ولا سيد/
وعن الشر نبعد بعيد ونكون بالخلق الجيد/
ونغفر ونسامح ولا نكون بالطبع الكيد..../
وبالاخلاق والمثل والقيم نتمسك ونتقيد/
ونقيم جسور الحب مع البشر نبنى ونشيد/

seema sama يقول...

يسعد قلبك يا دكتور ضحكتني والله وانا كنت مكهربة من الفيس بوك والبلاوي اللي تتحذف علينا في الفيس بوك .. بجد طلعت من الحالة على كلماتك الخفيفة الظريفة يجعل ايامك كلها ابتسامات وكل سنة وانت طيب ومن اهل الذكر والطاعة يا رب ^_^

dr_tweety يقول...

tb3n enta 3arf r2y fik bgd enta to7fa (de mosh shtima 3la fkra)bgd 3ndk kodra rahiba enk td7k ay 7ad 7ta lo depressed..w tba3n ana ma3srtsh ayam el shat de l2ny mn 2orib bs kont bft7 el e mail bl3afia...hhhhhhhhh

pinky يقول...

fel wa2t da ana kont harya nafsi islam chat
room 18. w room 7
w konna bneshtem aktar ma netkalim 3an el islam
la2in el nas da5la tehagem msh tetna2esh
w yawman ma fo2t al7amdolillah w fahamt en kol da useless
w enno esa2a lil dein aktar mn ay 7aga tanya, 5soosan ama t23od m3 nas gahala fakreen en el muslimeen by3bodo elah esmo ALLAH msh God :P
fa etwaka3 ay 7aga b2a
w sebt el rooms w bada2t fel blogs
w kont kol ma3mel modawana w tgeeb high number of views, yeegy wa2t w a3mel delete li kol 7aga
sada2ni msh 3arfa leeh, bas kont ba7es eni kida arya7
w b3d kida as7abi 2aloli 3al facebook, konna a5er sana koleya
w kanet fikretna 3anno eno simply a way for us to communicate after graduation
w nkeep in touch w kida, makontsh lessa 2areet postak el a5eer ( elli b3d da 3la tool )
w afham el facebook aswa2hom 3ala el etlaaaq
anyway el wa7ed kol mabyekber tamasoko bel 7agat dee by2ell
beyb2a more involved in 'real life' 3'asb 3anno msh b mazago
la2in bel nsabalna e7na ka nas addit sneen morahket'ha behind a screen, we didnt know what we were missing
w it's time for life to start
aw 3al a2al ana :P
thanks for sharing ya batoot
fakartini bellazi mada ;)

علومجى ..و ربنا يستر يقول...

فاكر انا الايام دى..يمكن مش بنفس التفاصيل...بس الفكرة العامه موجودة

غير معرف يقول...

أنت معـــــــلم
جامدة

غير معرف يقول...

انت بجد حد جمييييييييييل قوى انا شفت المدونه بتاعتك بالصدفه وقريت كل مواضيعك كلها دمها خفييييييف قوى ربنا يسعدك و ييسر احوالك