2008/06/19

عزيزى معدوم الضمير شكرا


من فتره كده امى حضرت العشا وقعدنا ناكل

عادى جدا وبيحصل فى اى بيت - ومدحدش بيبات من غير عشا

الى مش عادى بقا ان اختى لقت ايه فى العيش ؟؟؟

لقت ايه؟؟

عشان مطولش عليكم لقت صرصار طبعا مفحم

مش بقى تحذرنا... لأ دى قامت تنت العيش وبطلت تاكل وخبته تحت الطبق كده فى الخباثه

وقعدت تتفرج علينا واحنا بناكل... المهم بقى الظاهر احنا صعبنا عليها ولا ايه المهم قامت قايله ... مش انا لقيت صرصار فى العيش

ههههههههههههههههه

هههههههههههههههههههههههههه

ههههههههههههههههه

(دى ضحكه كل واحد فينا الطويله دى بتاعتى)

اكيد بتهرجى ... جتك القرف ... قامت كاشفه الطبق طلع ايه.... عليكم نور طلع الصرصار

انا عن نفسى قلت .. يا بنتى دا صرصار اهله مربوهوش وصاحب الطابونه رباه كلوا كلوا

اخويه قال لأ دا صاحب الطابونه بيوصل رساله لناس معينه ان مصيرهم هيكون زى مصير الصرصار لو حاولوا ياخدوا اكتر من حقهم

.. الظاهر ان الصرصار ده من المعارضه

.. او حزب وطنى وارتد

يبقى الحكومه بتوصل رساله لناس معينه

قامت اختى قالت .. لا دا جايز صاحب الطابونه قعد يقنع فى الصرصار انه يمشى والصرصار مصمم قام قاله انت حر وسابه عشان الصراصير التانيه تحرم متسمعش كلامه - واخدلى بالك انت من حكايه الصراصير التانيه

ههههههههه هو الصرصار كان بيدور على لقمه عيش ربنا يخليلنا الحكومه الى جوعت حتى الصراصير

قام اخويه رد بس شوف نهايه بقت ايه عشان بيدور على العيش ... يبقى دى رساله بتقدمها الحكومه لكل رب اسره

بس ان جينا للحق العيب مش ع الحكومه ... ولا صاحب الطابونه ... العيب على الصرصار ... هو الى صرصار ابن ستين .. صراصار

يعنى حبكت يعنى يدور على اكله هنا؟؟

يا بنى انت مش فاهم الصرصار ده طماع وحاول ياخد اكتر من حقه وربنا انتقم منه ... شوف ربنا دايما ع الظالم ... هه فاهمنى؟؟

امى قالت يا عيال بطلوا تريقه الصرصار مات وانتوا قاعدين تتضحكوا عيب كده

قمنا كلنا قلنا اه بجد طب نعمل ايه؟؟

اخويه قال مش يمكن الراجل بيعلم العيش كده يعنى الرغيف ابو صرصار يبقى رقم عشره مثلا ... والى بحاجه تانيه يبقى رمز لرقم تانى وبكده تبقى الحكومه ضمنت محدش يسرق ولا رغيف كل بالعداد


يعنى دى طريقه الحكومه فى القضاء على تسريب الدقيق..... والله دى الحكومه واعيه


مش يمكن يا اخونا الصرصار مات من الشمس وهو واقف يجيب عيش واحنا الى ظالمين صاحب الطابونه

او يمكن راح يجيب العيش بنفسه من ع السير عشان يمضن انه سخن قام لزق فيه



طبعا الصرصار ده كان حديث تلات اربع ايام ... وانتهى الحوار باننا ضحكنا لحد الموت وعيونا دمعت - حتى ماما -وشلنا اكيد العشا


فيا من ادخلت على قلبنا السرور ... وجب علينا ان نشكرك - حتى ولو كان نتيجه هذا اننا نبات من غير عشا

فعزيزى معدوم الضمير شكرا ... شكرا ... شكرا


** انا مش فاكر كل الى اتقال وممكن انتوا تتخيلوا باقى الحوار وكل ما افتكر حاجه هعمل تحديث اصله كان يوم مسخره

هناك 70 تعليقًا:

الـسـيـدة نـون يقول...

يععععععععع
يعععععععععع

طب اقولك على حاجة يا بطوطى
مرة وانا فى اعدادية كدة
كنت بشرب ازازة سفن اب و إذ فجاتن الاقيلك اييييييييييييه؟
ايييييييييييييون
هو نفسه الصرصار اللى انت لاقيته فى العيش
اكيد مش هو نفسه اوى
اكيد صرصار تانى
بس مش قادرة اقولك على اللى حصل يوميها
اصل على الاقل اختك لحقت نفسها وشافت الصرصار قبل ما تاكل اللقمة
لكن انا شربت بق من الازازة ولاقتلك حاجة مكلكعة فى بقى
يععععععععععععععععععع
يعععععععععععععععععععع

تخيل انت بقى باقى الاحداث

وكل التعليق اللى فوق ده نطلع منه بحاجة واحدة بس
ان انعدام الضمير موجود من زمااااااااان
وفى كل حاجة مش فى العيش بس

سلام
اختك خيخة

فاتيما يقول...

بص يا بطوط أنت فى التدوينة دىهتستدعى كل تجاربنا السيئة المشابهة
أنا كمان زيك و زى نوران
لقيت صرصار من نفس العائلة الحشرية دى فى رغيف عيش من ييجى عشرين سنة كدا ...
طبعاً قعدت سنتين مكولشى عيش بلدى خاااالص
و بعدين تكيفت مع الآم التجربة
و نفضت أحزانى
و رميت الماضى ورا ضهرى
و كلت عيش بلدى تانى
بس بقيت بفصص الرغيف تحسباً لظهور وريت للصرصار الفقيد
أحسن يطالبنى بشقة
فى الرغيف
تحياتى يا بطوطى
و لسه الناس معاها فلوس تجيب عيش ؟؟
بكرة يبطلونا نشتريه هوه كمان

بنت مصريه يقول...

وعمالين تضحكوا
والله انا لو حصللى الحكايه دى مجبش عيش لمده شهرانا بقرف من خيالى اساسا
الله معنا
بوست مقرف
احييك

nigro يقول...

بتهزر .. صح؟
ما شاء الله .. ده انتم نفسكوا حلوة خاااااالص
لأ و أختك عادي لقت الصرصار في الرغيف و سكتت و لما اتكلمت عملتوها مضحكة

قال صرصار في الرغيف
ده كنت قضيتها رز و مكرونة بقية حياتي

حرام عليك يا محمود
اوعي تعمل تحديث بحاجة
كده مرضية اوي يا عمنا

يععععععع

يلا سلام

المـــفـــــــقــــــــوعـــــة مــرارتـهــا يقول...

احنا شعب مابيشيلش الجمايل
وهي الصراصير دي ايه
دي بروتينات ياعبيط
مش معقولة دكتور ومش عارف فايدة الصراصير
اللي بياكلها بتجيله قدرة فائقة علي المشي علي الحيط وبيتحول لقدرة قادر إلي سوبر صورصار

NilE_QueeN يقول...

وسع بقي

معلش مش كل حاجه على قفا الحكومه وصاحب الطابونه

مش يمكن الصرصار دا عطل فنى

الخطأ البشري وارد جدا


بس اقول الحق بردوا

عندنا ف نفس المدينه العيش بيفق من منطقه للتانيه

يعني المنطقه النص نص عيشها نص

المناطق الراقيه عيشها مفيش احلى منه

mostafa rayan يقول...

ايه ياعم حوار الصراصير اللي مالي مدونتك دي انت وخيخة
اهم حاجة انكم كملتو العشا على خير
بالهنا والشفا ياعم

Ghada , Rofayda يقول...

على فكره هو العيب في الصراصير ...
لان كل الناس تقريبا اتعرضت للموقف ده بشكل او بآخر....
والموضوع ملووووووش علاقه بالضمير خااااااالص.....
للأسف احنا ظالمين الضمير معانا..

ولا انت تقصد "عزيزي معدوم الضمير" اللي هو الصرصار ؟؟؟؟!!!!!!

اول مره ادخل مدونتك بس مش الاخيره ان شااااااااء الله

تحيااااااااتي

دمت متميزا....

Miss. Sosa يقول...

هههههههه

انها حقا عائلة محترمة

ياابني الحكومة بتغذيكم جايبلكم العيش بالغموس انتم اللي شعب ناكر للجميل

الحكومة غلبت معاكم مش عاجبكم العجب ولا الصيام فى رجب

هم مش في السعودية باين بياكلوا الجراد وفى الصين بياكلوا الضفادع وفى مناطق اخرى على وجه البقيعة بتاكل سحالى وتعابين

احنا بقى المصريين بناكل الصراصير وبكرة ناكل بعضنا

kochia يقول...

لا يا جماعة انا لقيت ذباب الحمد لله
اصلي بخاف من الصراصير
لكن دبان ماشي

تحياتي

الساحرة يقول...

ليه كدة يا بطوط

دة انا العيش عمالي عقدة نفسيه

منز مان ولحد دلوقتي بعمله فحص

دقيق تحسبا لاي ظروف لاني انا اللي

كنت بكتشف البلاوي اللي في العيش

وكانت بتقلب لتهريج يفضل اسبوع

كل ما حد يجي ياكل

ايه الارف دة هههههه

Unknown يقول...

الصرصار دة عميل اسالنى ازاى اقولك ازاى...بص يا سيدى:الصرصار دة من المعارضة وحب يفقع اسفين فى الحكومة فقال يعمل عملية انتحارية عشان بطوط يلاقى صرصار فى العيش ويقعد يتكلم على الناس اللى ما عندهاش ضمير و اكيد هتيجى سيرة الحكومة بالوحش يبقى هو كدة نال مراده وشوه صورة الراجل الفران وكمان خلاكم تشتموا فى الحكومة يبقى عميل وللا لااااا رد بقى.......

Bongo يقول...

:S :S :S

ايه البوست اللي مش هيخلينا نتغدي ده ؟!

ربنا يسامحك يا بطوط

بس طبعا الغرض من البوست واااضح جدااا ..
سعادتك بتساعد الشعب انه يرشد استهلاكه للعيش علشان الأزمة الحالية

ربنا يقويك !

سلام

غير معرف يقول...

يعنى بجد الفران ذنبه ايه
دى اوامر الحكومة طبعا لحل ازمة الرغيف وحل طابور العيش اللى للاسف مازل المسلسل مستمررر
وكمان هى بتدى للناس غموس وبروتين ههههههههه بالهنااااااااااااااا

غير معرف يقول...

ااااااااااااااااه
مالئتش غير الصراصير يابطوط
ده انا لو شفت صرصار معدي اصلا ببئى هقع من طولي عيزو يطلعلي فالعيش
عارف لو فار
ممكن ألعب معاه لكن الصرصار ده كوم تاني خاااااالص

من منظرو لشكلو لمشيتو وشنابوه بئى ماقولكش على شنبه
بس البت اختك دي جدعة ولا اتخضت ولا انفعلت ولا بان عليها اي اعراض اغماء او قرف حتى

يانهار اسود صرصار فالعيش .. دانا لو لئيت شعرايه بقعد ايام وشهور قرفانة جداً يطلعلي صرصاااااااااااار بحالو ومتفحم

بس على فكرة في حاجة تقريباً ماجتش على بالكم انو يكون صاحب الفرن عامل مسابقة اللي يجمع 5 صراصير ياخد رغيف مليان هدية

جايز برضو .. ولا ايه رأيك

Unknown يقول...

عزيزى الصرصار احنا معشر الصراصير قررنا نعمل اضراب ونتضامن مع هذا الصرصار شهيد رغيف العيش ولنتكاتف معا نحو رغيف عيش أفضل
شكرا

دعاء مواجهات يقول...

ههههههههههههههههههههههههههههههههه

الله يحرقك

طب انا مستنية التحديثاات بقى

انا اصلى بحب المسخرة مووت

ربنا يعافيينا ياابنى

منورنا يابرنس...

Mafrousa يقول...

يستاهل كل اللي يجراله
علشان عينه فى أكل غيره
إلا قولي يا بطوط الرغيف ده ابو ربع و لا ابو شلن...اه
ماهو احنا لازم نعرف
اصل ابو شلن فيه حديد ..فممكن كنت تلاقى الصرصار صاحي اصلا .. و لا فرقت معاه النار
و ديه التجربه اللي بتعملها الحكومه
ايوه
علشان تشوف قوة الاحتمال
حتقولي الحاجات ديه بتتعمل على فران تجارب
حقولك الرغيف دلوقتي بقى اصغر من فار التجارب...مش حيعرفوا يخبوه ياحدء

محمد الهادى غانم يقول...

ياسلام علي الحظ ده انتوا محظوظين بس انا عايز اسأل هما كانوا بيعجنوا العجينه بالصرصار والا ايه بالظبط واللي بيعجن كان ايه بينتقم اكيد من الصرصار علي العموم كان صرصار طيب ميستحقش انه يموت كده كان الأولي له انه يقف في الطابور ويستني اجله زي الناس .
علي العموم انا اول مرة اقرأ لك مواضيع واسلوبك عسل .
وانا بدعوك لزيارة اول مدونه ليه مستنييييييييييييك متتأخرش

غير معرف يقول...

دايما ظالمين الحكومة شعب مش بيطمر فيه
مش يمكن الصرصار دا يكون كان بيتجسس للحكومة علي صاحب الفرن عشان شموا خبر انه بيسرب الدقيق قوم ايه الراجل حس بحركة غريبة منه ف قام حالف ليدوق الناس اللي دايقه من الحكومة

اول زيارة لمدونتك تقبل وافر تحياتي علي ابداعك وجمال المدونة :)

مدحت محمد يقول...

والله الموضوع ده حصل برضه مع والدتى

ومرضتش تقلنا

بعد كام يوم رايح اجيب عيش قالتلى متجبش من الفرنة دى

لما سالتها ليه

قالتلى

بقت نفسى مسدودة من العيش الصراحة

الجواز و سنينه يقول...

ياااااااااااااه فكرتنى بالذى مضى
انا كمان لقيت واحد صرصارايه
اضاهر انه من نفس العيله
بس مش عايزه اقولك عملت ايه
انا و الله من الخضه رميت الرغيف و قعدت ابصله حاله من القرف و الرعب الفظيع و طبعا ما اكلتش طول اليوم و لغايه دلوقت منظر الفقيد بيرعبنى

بطوط حبوب يقول...

نوران

ههههههههه احسن حاجه تشربى البسيبس بالشاليمون
وبكده تضمنى ان الموقف ده ميكررش تانى

-----------------------------------فاتيما

بستدعى كل التجارب المتشابهه ايه؟؟
انا كان قصدى اشكر الاستاذ معدوم الضمير مش اكتر
نورتينى

-----------------------------------

بنت مصريه

لا احنا ضحكنا اصل اخواتى اتقرفوا ف الاول بس اول ما بدأنا ضحك كله ضحك

-----------------------------------نيجرو

لا والله مش بهزر
متخافش مش هعمل تحديث
بس احنا فعلا اتقرفنا فى الاول وبعدين لما بدأ التهريج خلاص

-----------------------------------
المفقوعه مرارتها

لا انا شلت الجمايل وشكرت الاستاذ معدوم الضمير
يبقى انا اكيد مش من الشعب ده
ههههههههههههههههههه

-----------------------------------

نيل كوين

هو وراد انه خطا بشرى بس خطأ فادح

-----------------------------------

مصطفى ريان

وانت بالف صحه

-----------------------------------

غاده وروفيده
ان شاء الله متكنش اخر مره ليكى هنا
ومتخافيش مش كله صراصير
نورتينى

-----------------------------------
مس سوسا

احنا منكرناش الجميل وادينا بنشكر الاستاذ معدوم الضمير
لو سمحتى اسحبيها
هههههههههههههههههههه

-----------------------------------

كوشيا

عقبال ال.........
ههههههههههههههه

بطوط حبوب يقول...

الساحره
الفحص بقى شئ ضرورى والى يشوف صرصار فى العيش ينفخ فى الزبادى
ايه العلاقه معرفش

-----------------------------------

انجى

هههههههههههههههههههه
عميل وابن عميل
والحكومه زى الفل ومفيش فيها عيب فقام ايه
قله مندسه حطوا الصرصار
-----------------------------------

بنجو

بالظبط انا برشد الاستهلاك
ههههههههههههههههههه

-----------------------------------

نبع صافى

ربنا يحيلها من عنده
اسعدنى تعليقك

-----------------------------------

نوره الخشن

هههههههههههه
الى يجمع 5 صراصير ياخد الطابونه هديه

ربنا يستر ونفوز

-----------------------------------

ايمن بدر

كلام الثورجيه دى مبيدقش دلوقتى

-----------------------------------

دعاء مواجهات

هههههههههههههههه
مفيش تحديث بالعند بقى

-----------------------------------

واحه مفروسه

فعلا يستاهل انما احنا ذنبنا ايه؟؟

-----------------------------------

محمد الهادى غانم

انت الى عسل وشرفتنى زيارتك

-----------------------------------
انسان

شرفتنى بالزياره
-----------------------------------

مدحت محمد

ههههههههههههههه
بوس ايد الوالده
واحمد ربنا

-----------------------------------

الجواز وسنينه
هههههههههههههههه
دا الاستاذ معدوم الضمير منتشر بقى

رئـــــيسـة حزب الأحلام يقول...

صرصار واو
انا مرة لاقيت طوبه ومرة زلطة ومرة ازاز يعن بلصلاه على النبى شعب خارق
تحياتى لك وعودا احمد

الفارس الملثم يقول...

هههههههههههههه

بداية حمدالله علي السلامه يا محمود وان شاء تكون وفقت في الامتحانات

نجي بقي للصرصار

انت عارف الخكاية دي تنفع فيلم تسجيلي يكسر الدنيا ويسموه مأساة صرصار , ومش بعيد بتوع حقوق الانسان يدخلوا ويصدروا قرار دولي يلزموا في مصر بوضع الاحتياطات الامنيه في الافران لضمان سلامة الصراصير والحكومة المصريه اتشجب طبعا وتؤكد ان الصرصار ده مختل عقليا وانه هو اللي انتحر بارادته ..

انقول ايه بس كم فيكي يا مصر من مضحكات ولكنه ضحك كالبكاء" قول لاحد الرحاله"

تحياتي
محمد

صيدلانيه طالعه نازله يقول...

من عشر سنين كده لقيت صرصار بس كان فى مقتبل العمر كده بس فى ساندويتش حواوشى و من محل محترم جدا عندنا و كان برضه يوم مسخره لانى كنت انا و اخويا ايام الكليه لوحدنا و ايام التفليس نجيب المدعو حواوشى اووووم يطلع لنا المفأجأه دى
هوه كده قليل البخت يلاقى الصرصار فى الحواوشى
و من ساعتها و انا مضربه عن الحواوشى
الله يجازيك يا بطبط فكرتنا بأيام الكفاح

ادم المصرى يقول...

ايه ياعمونا ده بس الله يكرمك انا عمتا لو دخلت شارع لقيت فرن عيش بهرب عشان مشفش الى الناس بتعملو عشان تجيب بنص جنيه عيش الله يكون فعنا غير بقه ونبى البوستات دى

Wael يقول...

اوعا تكون رميته !!!!

دى مسابقة جديده عاملاها وزارة التموين
جمع 5 صراصير , تاخد قفص عيش هديه D:

الله يسامحك , كنت جعان , بس خلاص بقا

nice post :)

صاحب المضيفة يقول...

حلو انكم تقبلوا الموضوع عن اصرصار بالشكل ده

لو الموضوع ده حصل عندنا لا قدر الله


هايكون نفس التعليقات بالشكل ده برضو


تحياتي

حمامة يقول...

هههههههههههههههههههه

عسل والله

Noha El-arabi يقول...

شوف يا اخي المواطن المصري ده اصله ظنه وحش بحكومته حبيبته بنت الحلال
قال صرصار قال طب افرض مثلا كان جهاز تسجيل عشان يعرفوا المواطنين اللي زيك من القلة المتشرذمة المعترضة من امثالك رأيها ايه
فتشت الصرصار قبل ما تتكلم اصلا؟؟
و بعدين ده مخطط يا محمود عشان الشعب يخس علي اعتبار انه انتخ كده و بأ بكروش عاوزينه يخس يقوم يشتغل فنحط حاجة لطيفة في الاكل تسد نفسه عن الدنيا
بلاش الظن السئ ده

هبة المنصورة يقول...

أنا مع إنهم بيرقموا الأرغفة.. أصل أنا لقيت دبانه قبل كده سيادتك.. يبقى أكيد رغيفى كان رقم خمسه أو سته.. وكل مالرقم يعلى كل مالهديه بتبقى أكبر.. ربنا يتولانا برحمته

مواطن مصرى نايم يقول...

يا راجل
دلوقتى صراصير
ااااااااه
ممكن عشان الحديد بقى غالى
طب الواحد يلحق يلم الصراصير اللى فى السوق
قبل ما يحتكرها احمد عز
و تغلى هى كمان
تحياتى
eslam

عًٍمًرٌٍوٍ آلنْوٍبٌَِى يقول...

هما كترو للدرجة دى
دى عيلة كبيرة بقا متوزعة على الافران
انا شوفت واحد منهم برضو كان متفحم كده بس فى رغيف عيش فينو فاكر الفينو ولا نسيت شكلو زيى كده اصل بعيد عنك بطلتو بقالى بتاع شهرين دلوقتى ..
ونبى يا جماعة الى يشوف اى حد من عيلة الصراصير بتاعت الافران يقولى علشان طلع عليهم تار بايت .....
بوستك يجنن يا بطوط يا ملك الضحك والفرفشة

خمسة فضفضة يقول...

السلام عليكم ورحمة الله وبركاته

كويس انكم فعدتوا تضحكوا وماقمتوش ترجعوا اللي فبطنكم
:)))))

عارف بقي انا زماان ايام ما كنا لسه بنشتري عيش ومش بنخبز لقيت ايه في الرغيف
والله مش هاتصدق

































لقيت




















قطنة بمركريكروم



تصدق بقي

ماهو كل واحد بيلاقي الحاجه اللي ليها علاقه بتخصصه

ههههههههههههه

سلام

Asmaa mahaba يقول...

يا خسااااااااااااره وديتو فين العشا يا بطوط يا راجل انتوا اول مره تلاقوا صراصير ...؟؟؟
اللى يلاقى صرصار يشيله يركنه على جنب يكمل بالهنا والشفا
ههههه اعتقد ان دى رساله من سونه اللى حيتكلم حيكون مصيره شبه الصرصار
تحياتى ليك سومه_87

Empress appy يقول...

ههههههههههه لا بجد الموضوع لما قلب بضحك بينكم هون الموضوع وبتحصل عندنا فى البيت الا قولى حاجه مهمه الصورصار ده كان لابس هدومه ولا لا اصله ممكن تكون امن الدوله مكهرباه ههههههههههههههههه
يعععععععع بقى اكل ازاي دلوقتى واتا جعانه

عبده الرايق يقول...

بطوط ياخويا مش كل حاجه نقول الغلطان فلان وعلان
نو
نو
نو
انتوا يا بطابيط اللى غلطانين
يس
انتم اللى راكبكم الغلط من يور فوووت تو يور هيد
لانكم ببساطه مفروض تشتروا جهاز تحطوه على باب الشقه
زى الجهاز اللى بيبقى فى المطار وبيعدى من تحته الناس والشنط ولو الجهاز شم حاجه كده ولا كده بيصفر
انتم بقى مفروض تشتروا الجهاز ده بكام مليون جند مش مهم
المهم ان العيش يعدى من تحته
لو الصرصار اللى فى العيش دكر يصفر
ولو الصرصاره اللى فى العيش انثى يغمز بعنيه

hamssah يقول...

اول زياره ليا للمدونه بتاعتك اقوم الاقي صرصار طيب شكرا
بس بجد بوست لذيذ واسلوبك خفيف ومشوق
همسه

بطوط حبوب يقول...

رئيسه حزب الاحلام

ههههههههههههه احنا شعب ناكل الزلط
الله يطمنك يااااااارب

--------------------------

الفارس الملثم

الله يسلمك ومتنساش تدعيلى عشان النتيجه ربنا يستر
هههههههههه والله يامان فكرتك جامده بجد
وخصوصا حكايه ان الصرصار مجنون دى
دايما كده بتضيف للموضوع بتعليقك
والراجل الى قال بيت الشعر ده يبقى المتنبى

--------------------------
صيدلانيه طالعه نازله
ههههههههههههه
احلى ايام فى الدنياايام التفليس بس واحلى منها جو الاكشن لما تلاقى حاجه زى دى
ههههههههههههههههههه

تعيشى وتفتكرى ايام الكفاح

--------------------------
ادم المصرى

ولا يهمك البوست الجاى ملوش علاقه بالعيش
ابسط ياعم
--------------------------

د وائل
هههههههههههههههههه

لا ما حنا لسه بنجمع ربنا يستر

--------------------------

صاحب المضيفه

النفس الحلوه ليها الجنه

ولا ايه؟؟

--------------------------
حمامه
انتى الى عسل

--------------------------

نهى العربى

يا فندم انا من مكانى هذا باشيد بسياده الريس وبكل المسئولين وبقولهم احنا معاكم وانتوا احسن واجدع ناس

والشعب فعلا انتخ وانتوا بتعملوا لنا الصح

هااااااااااا اقول اكتر من كده؟؟

--------------------------

هبه المنصورى

ههههههههههههههههه
احمدى ربنا انك مختيش الرغيم الخمسين الله اعلم بيعلموا بايه؟؟
هههههههههههههه

--------------------------

مواطن نايم

متخافش فى حمله صرصار لكل مواطن هتدافع عنك

--------------------------

بطوط حبوب يقول...

عمرو النوبى

عمووووووور الجامد احنا لازم نعمل رقم ساخن للبلاغ عن العيله دى احنا مش هنسك على تارنا ابدا

ههههههههههههههه

-------------------------
خمسه فضفضه

وعليكم السلام ورحمه الله وبركاته

قطن بمكركروم
الحمد لله انى ملقتش ضرس ولا سنه
احمدك ياااااااااااااارب

-------------------------
سومه

ههههههههههههههههههه
والله يا بنتى انتى دمك شربات بجد

-------------------------

ابى
هو هدومه كانت محروقه فالطبيب الشرعى معرفش اتحرقت قبل ولا بعد الاكل

-------------------------

عبده الرايق

هههههههههههههههههههه

انت مشكله بجد
طيب ليك نسبه ع الجهاز؟؟
انا مش هدفع لك نسبه اكتر من 100 جند شغال؟؟

-------------------------

هماش
ولا يهمك بكره تلاقى حاجات احلى

aya يقول...

الف حمدالله على السلامة يا دكتووور ازيك يا حودة
اخبارك ايه

معلش انا اسفة انى مش سالت عليك
بس نعمل ايه فى الدنيا

اولا بالف هنا وشفا بقى العيش
ثانيا الله يرحم الصرصار كان ابن صراصير كويسة

ثالثا
ربنا يبسطك ويكرمك

رابعا بقى
تحياتى يا دكتور
وطمنى على النتيجة بتاعتك

t3ban يقول...

أقول اه؟
كنا بنزعل من الخشب و المسامير
ادينا طلعلنا صراصير
طب متبصلها من زاوية اخري
متكونش الدولة رفقا بحال الشعب الممؤوت و غلو اللحمة و الفراخ و السمك
قالت تدعم العيش بالبروتين

Maha Shahen يقول...

هو لازم اول كلمة تتكتب تكون ييييع طبعا
بس انا سمعت الاسوء من كدا في رغيف العيش وغيره ومش هقوله لأن معدتنا هتعمل ايه لو مبقاش في عيش
نص الحاجات اللي بناكلها غير صالحة للاستخدام الادمى شكل الحكومه مش بتعتقد اننا من فئة انسان ابدا
حسبى الله ونعم الوكيل
تقبل تحياتى
نور

Asmaa mahaba يقول...

تعالى صبح عليا وشوفنى وانا بنهق اقصد شوفنى وانا حماره
سومه_87

بطوط حبوب يقول...

د ايوه
انا هبدا برابعا وهقولك ادعيلى جامد وبما انى بدأت برابعا فنفسى اتسدت
ههههههههههههههههه

------------------------

تعبان

انا باصص من كل الزوايا الدور والباقى ع الحكومه

------------------------

نور شاهين

هههههههههههه لا الحكومه بتعمل تجارب تثبت فيها ان الانسان اصله حاجه تانيه

Abo 7anf يقول...

السلام عليكم
هيدا عادى
وفله شمعه منوره
صريصار
صرصار حبنا يمان
اهم حاجه انك تاخد بال منوا
بس بصراحه موقف اللقى الصرصار عجبنى جدا

bota يقول...

السلام عليكم

فكرتني بالذي مضى من حوالي اربع سنين كنت مريضه فكنت اختي الصبح بتفطرني
المهم كنت باكل ساندوتش مش فاكره كان فيه ايه بس هو فينو
وهي كانت بتاكلني بقى ابص مره واحده الاقي في الفينو
الاقي خنفسه يععععععععععععععععععععع
انا كنت في البلكونه وقتها تقريبا كنت هرمي نفسي بس اختي لحقتني
وقعدت فتره لغايه ما ابتديت اكل تاني اصلا وكنت مقاطعه الفينو مدة طويله جدا بس اتعالجت وبقيت اكله بس شكلهم هيخلوني اقاطعو تاني بس من باب الدايت الاقتصادي
على الفكره تعليقاتكم على الصرصار تحفه ربنا يخليكم لبعض ويبعد عنكم جميع الحشرات هههههههههه

blue-wave يقول...

يا سيدى وماله؟
يعنى الحق على الحكومه بتحطلكم بروتينات فى العيش وبرضه مفيش فايدة فيكم
ناس معندهاش دم:))

ذربونة هانم يقول...

هههههههههههه
و الله انتوا عيله دمااغ
انا عن نفسى كنت هرجع كل اللى كلته

بس بجد مسخرة ان صاحب الفرن بيعلم العيش

هههههههه

Dr. Ibrahim يقول...

بالهنا والشفا..

كل رغيف عيش وصورصار ..وانت طيب

الحكومة محرمتكوش من حاجة أهو

حتى الصراصير بتعطيها هدية مع العيش شوفت يا أخى إزاى

:)

بس انا عايز أعرف الميكانزم اللى دخل الصرصور فيها رغيف العيش ؟ حاجة

غريبة إزاى دخل بين الطبقتين إلا إذا كان الخباز قاصد بقى

أحسن لو كان جاى مع الدقيق هيشوفه وهيشيله

ومش هيعرف طبعاً يدخل وهو فى الفرن

د/هيما

واحد من البلد دى يقول...

السلام عليكم

يا بطوط يا حبيبى

كويس إنك لقيت الصرصار ده

لأنه يعتبر إكتشاف علمى مهم

إوعى بس تكون أختك رمته

ده اللى يثبت لكل المشككين إن لسه فيه

كائنات غيرنا عايشة فى -كوكب مصر العربية-وما هربتش على كواكب تانية..........
يا سلااااااام على الوفاء بتاع الصراصير يا آخى...
الصرصار الوفى ده فضل إنه يتحرق فى بلده و ما يسافرش لبلد تانية....

إنه فعلا........

صرصار من زمن الأوفياء


بكره يعملوا له مسلسل


ويجيبوا أى ممثل بشنب يقوم ببطولته

ولما يستضيفوا فريق العمل
يقوم المؤلف بمنتهى الثقافة الجاهلية يقولنا....
أنا حبيت أوضح فى المسلسل ده الصراع بين الطبقة الصراصيرية و الطبقات الكفروسولية الآخرى فى الوقت الذى إختفت فيه الشباشب من البيت المصرى...

بالذمة مش سيناريو يجنن

سلملى على الطابونة و العيش و الرغيف
...
...
...
...
و الفاتحة على روح المرحوم


ملحوظة.
إنتوا ما لقيتوش معاه أى حاجة تثبت شخصيته..
ليكون صرصار أمريكانى
تبقى مشكلة


ههههههههههههههه

Unknown يقول...

هههههههههههههههه
يخرب بيت فقرك انا مش شايفه من كتر الضحك عنيا دمعت
بجد ملكش حل

ftafeet يقول...

ايييييييه ده صروصار يامامى انا بخاف منهم اوى

رغيف ايه وكلام فاضى ايه اللى لقيت فيه صروصار يابنى وانا صغيره وقعت فى بلاعه يعنى مصدر الصراصير كلهااااااااااا اللى بتوزع الصراصير على البلد ليك انك تتخيل بقى اومال انا بخاف منهم وعندى عقده منهم من شويه ربنا يرحمنا برحمته
يييييييييييييييييع بجد مش قادره حرام عليك بجد مش هاكل عيش تانى وانا اصلا بتلكك على عدم الاكل لييييييه بس ليييييييه


nonaaaaa

An Author يقول...

عادى جدااااا خااااالص
الحق عليهم انهم عاوزين يغذونا و يحطوا لنا بروتين حيوانى فى العيش..
مش الصراصير بروتين برضه ؟

وبعدين انا اسمع ان فى بلاد بتاكل صراصير معلبة ،احنا بقى بننقل هذا التقدم التكنولوجى لبلادنا الحبيبة..

حمادة زيدان يقول...

أوع

أنا هرجع يا عمنا من الكلام

أول مرة أجيلك ألاقيك عازمنا على عيش بالصراصير !!!!
أنا كتير شوفت عيش بالخشب أو بالمسامير لكن بالصراصير دي جدييدة أوى أول مرة أسمع عنها

وأخبار معدتكم إيه بعد الترجيع قصدي الأكل
على فكرة كتاباتك دمها عسل
سلاموز ادخل الحمام أرجع وأرجعلك

Mafrousa يقول...

بطوط انا عاوزه اعلق على الموضوع اللي شلته

موضوع:
الجبن الذي يصنع من اللبن ممكن؟

كنت عاوزه احكيلك حكايه يمكن تفيدك
و لو مش فادتك تبقى سلتك
تحياتي
و انت احسن بطوط

Marwa Friday يقول...

ههههههههههههه
صباح الفل
والله متخيلة اكتر من كده كمان.. مش ممكن الصرصار ده كان واحد من عمال الفرن وكان صاحب الفرن ساحر وحوله لصرصار!! ههههههههه حلوة حلوة حكاية صرصار معارض
ربنا يكفيك شر الصراصير يا بطوووووط

دمكم خفيف يا محمود
فعلاً يبقى انت أكيد أكيد في مصر
:))

إيثار يقول...

ربنا يعين الشعب المصري
على الحكومة
و معدومين الضمير
و يا رب محدش يكون اكل صرصار بالغلط

ههههههههههههه
ههههههههههههههههههه
هههههههههههههههه

تحياتي

بطوط حبوب يقول...

ابو حنفى
وعليكم السلام
ماشى يامان شمتان ؟؟
ههههههههههههه
ال صرصار حبنا ال
----------------------------
بوتا

وعليكم السلام
ربنا يبعد عنا الحشرات
هههههههههههه
والله دعوه كويسه
ما احنا فى زمن العجب
واعى تعيي تانى

----------------------------
بلو ويف

احنا الى غلطانين انا عارف

----------------------------

زبونه هانم

احنا عيله دماغ امال صاحب الطابونه يبقى ايه

نورتينى

----------------------------

د هيما
المكيانيزم الى دخل بيه الصرصار العيش؟؟

انا اعطيك رقم هاتف الطابونه وانت تتصرف

ايه رايك؟؟

----------------------------

واحد من البلد دى

وعليكم السلام

كائنات غيرنا عايشه فى كوكب مصر هههههههههههههههههههه

يخرب بيت مخك بجد
لا متقلقش الصرصار موجود

----------------------------

لماضه

احنا نيجى جنبك ايه؟؟

نورتينى

----------------------------

فتافيت

فتافيت هانم القاطنه فى حى مش عارف ايه
لا تقتربى للعيش
العيش به صرصار قاتل

ههههههههههههههههههه

----------------------------

جيداء

بروتين يا فندم
امال ايه؟؟
احنا الى شعب مش بيطمر فيه
ربنا يا خدنا عشان نريحهم

----------------------------

حماده زيدان

معلش مش كله كده
نوتينى

----------------------------

واحده مفروسه تم ارسال ايميل

----------------------------

مروه جمعه

هههههههههههههههه صاحب الفرن بيحول الناس اللى شغاله لصراصير ويحرقهم
والله قادر ويعملها
ههههههههههههههههههه
----------------------------
عاشقه الحب

ولا ياكل بالغلط
مهو بالغلط

امواج يقول...

والله يابطوط انا دخله اشوف اخر اخبار المدونين والدنيا حصل فيها ايه
معدتى قلبت بجد
يععععععععععععععع

Asmaa mahaba يقول...

فى ايه يا حج طوط كل دا مفيش تحديث ولا بوست
مش بقولك مفيش نت فى المنوفيه تقولى فيه
شكلك رحت مطرح ما انا كنت
هههههههه تحياتى ليك سومه_87

Unknown يقول...

والله انتم عائلة متفاهمة جدا ومقدرة للظروف الصعبة اللى الصراصير بتعيشها فى البلد
ربنا يخليكم دوما نصير وعون لكل الصراصير
ومعدوم الضمير عمره مااستحق الشكر الا فى حالتكم النادرة
بجد انا لو مكانكم مكنتش كلت عيش لمدة شهرين تلاتة كده حاجة مقرفة جدا وكويس انها ماحصلتش لى قبل كده
شكل الصراصير مقدرة ظروفى
بوست هايل

تحياتى

semsem يقول...

ههههههههههههههههههههه
هههههههههههههههههههههههههه
مسسسسسسسسسسساء الخير
ايه يابنى
انا كنت داخله اكل
متشكرين ياحج
عادي يعنى بحب اكل الفجر
بس بجد الموضوع دمه خفيف
ومقرف
يععععععععععععععع
بوست حلو يا بطوط

عايش... ولكن !!!! يقول...

بعيدا عن القرف اللى فى البوست
بس ده العادى بتاعنا دلوقت
ايه يعنى صورصار
دى حتى لذيذه وبشنبات
كل كل ده بيقولوا الصراصير بتقوى القلب وتمنع السكر وتثبت ضغط الدم و......
ياااه دانت المفروض تضرب كل يوم كبايتين عصير صراصير ع الريق
ههههههههههههه

معليش بقا قرفتك شويه اصلى مجرب ومخنوق
تحياتى
علاء

غير معرف يقول...

شوف يادكتور انا عندى تجارب كتير فى الموضوع ده وكنت اكتر واحده موسوسه وبتقرف فى الدنيا لغايه لما لقيت مفيش فايده كده مش هعرف اكل خالص ...خد بقى خلاصه تجاربى...سمى الله قبل الاكل وتوكل عليه ان شاالله يكون فار حتى مش هيحصلك حاجه


اقولك على فكره بقى بالمناسبه دى... خلى الصرصار عندك عشان تمسكه على صاحب الفرن..وكل يوم الصبح تقوله هتدينى العيش ولا اقول ع السيكو سيكو

مها يقول...

يا بطوط غمس وانت ساكت .. هو حد لاقى ريحة الزفر ؟؟ وبعدين نسيت تقولنا هو كان صرصار بلدى ولا هجين ؟؟ والعيش اللى كنوتا بتاكلوه مدعم والا من أبو 40 قرش وطبقة برجوازية بقا ومخبى ع الشعب ؟؟ لو عيش مدعم يبقى الصرصار ده معندوش طموح علشان كدة وقع ف معجنة عيش الفقرا .. ولو عيش من أبو 40 قرش يبقى الصرصار ده وصولى ومتسلق وعنده نوايا احتكارية واضحة !

حـــلـــم كـــان يقول...

انا مش هعلق عشان لو علفت هعلق الحكمومه من ودنها

samarpinky يقول...

ana marra la2eet debbana bas fe pizza
ah wallahi - m7all kbeer w mo7taram w fel pizza debbana 3al wesh
ana b kol basata a5adt el silce elli feeha debbana w 2ata3t nossaha kida mn 7awaleeha wkamelt akl 3aaaaaadi
w ma2oltsh li ay 7ad mn elli kano m3aya till now
bs mn yomha msh ba2dar akol pizza barra
:D
bt7sal ya batoooooooot enta akeeeeeed akeed fe Masr :P