2008/03/11

أيوه يعنى ايه حضرتك


من أول إمبارح وأنا قاعد أسأل نفسي سؤال بديهي جدا إنما مش لاقى له أجابه مقنعه خالص ..

رغم بساطه السؤال ورغم إنى قريت مليون موضوع بيتكلم عنه بطريقه لا تقل بساطه عن الطريقة إلى هتكلم بيها ..

والى متوقع بالطبع التعليقات إلى هتيجى وهكتبها ليكم قبل ما أقوم أمشى بس مش خسرانين حاجه اهو نقول إلى نفسنا فيه ورزقي ورزقكم على الله ..

الموضوع ببساطه يعنى إيه أنا بحب امى وأخويه واختى والعيال اصحابى ؟؟..أه.. يعنى إيه تعريف الحب ده ؟؟يعنى امتى أقول إننى بحب امى وامتى أقول إنى مش بحبها ؟؟..ولا أقولك بلاش امى عشان السؤال مش هيبقى واضح أوى ..

إنما يعنى إيه بحب أخويه أو اختى أو حد من اصحابى؟؟؟انا قاعد أفكر في السؤال ده رغم اعترافي بغباءه بس هيبان فى الأخر إيه مغزاه ...الاجابه إلى وصلت ليها ان الحب "هو اشتغاله يشتغل بيها الإنسان نفسه ..ويظل يشتغل نفسه ..ويشتغل نفسه لحد ما هي تشتغل لوحدها لدرجه انه لما بيحب يبطل مش بيعرف"..وبعدين قلت لنفسي يا عم أنت ..لأ الحب حاجه تانيه غير كده ..

الحب هو" انك تهتم بحد لما يجرى له حاجه تبقى أنت إلى تعبان ومش طايق نفسك وتفضل كده لحد لما يبقى كويس "

وبعدين قلت طب نسقط الكلام ده على الواقع لما أخويه يعنى يتعب ببقي عايزه يخف وببقي بدعي له في الصلاة وكده .. بس أنا فاكر إنى كنت قاعد من زمايل لي في شقه , ومكناش لسه أصحاب أوى , المهم واحد زميلنا تعب , أنا فاكر إننا غيرنا مواعيد مذاكرتنا كلنا عشان نصحيه ياخد الدوا في معاده , وكنا نرجع بسرعة من الكلية ونعمل حسابنا نجيب له الأكل معنا , كلنا مسافرناش يوم الجمعة عشان نفضل قاعدين معاه لأنه مش هيعرف يسافر لوحده,دا غير الفتاوى إلى قعدنا نفتيها له في شرا ادويه واتخرب بتنا كلنا في الشهر ده شرا دوا له , وكلنا عملنا كده رغم إننا مكناش أصحاب أوى ساعتها -طبعا دلوقتى أصحاب جامد..

يبقى تفسير ده إننا بنعمل كده عشان إحنا بنى ادمين وده شئ جوانا ومش دليل على الحب ولا يحزنون يبقى أكيد فى تعريف تإنى للحب اوتعترفوا إن تعريف الاشتغاله ده تعريف كويس..

طب نيجى للموضوع المتفرع من ده.. يعنى إيه بحب واحده أه حب بين ولد وبنت ؟؟يعنى عاجبنى شكلها وشخصيتها وحصل بنا كميا؟؟اكاد احلف بالمصحف إنى لما كنت زمان بكلم بنات معظمهم عجبنى شكلهم وشخصيتهم وحصل بنا كميا وطبعا حسيت إنى بحبهم بس واحده بس إلى قدرت اشتغل نفسي وأقول إنى بحبها وعشان كده رحت قلتله اوأظن ابسط دليل على ده انك تلاقى ولد أو بنت يقولك أنا مش عارف أنا بحب مين فيهم ..

ممكن يكون تعريفه "انك كل ما تشوف الشخص ده- الى مفروض انك بتحبه - بتبقى مستريح ومش عايز تمشى" , طبعا التعريف ده مش شغال مع أخويه لإنى نفسي يقوم ينام دلوقتى لإنى مخنوق منه ولا هينطبق على ناس كتير جدااااااااا بحس انه مش وقتهم وطبعا التعريف ده مش هينفع مع علاقة البنات مع الولد سواء كانت صداقه - بغض النظر حرام ولا حلال ولا بعض النظر ليه مهو الكل عارف أنها مش حلال يعنى - أو حب (خروج وكلام ) يعنى ده إلى حلال - ههههههههههههههه - مش من أبو إلى في القلب في القلب..

اقصد إن اى ولد هيقعد مع اى بنت - باستثناء البنات الغلسه - مش هيبقى عايز يقوم بغض النظر عن هو بيحبها ولا خلينا أصحاب أحسن..

في تعريف تإنى "هو انك تبقى مهتم بحد وتفضل تفكر فيه"..

هقولكم على حاجه عملتها قبل كده اشتغلت اصحابى لمده شهر أو اكتر وقلت إنى خطبت وفضلت أحكى لهم عن إلى بيحصل بيني وبين بسمه خطيبتي والى اضطريت اسميها بسمه لإنى كتبت ع الدبلة " م محمود ب بطوط" فكان لازم اختار اسم بنت بحرف الباء رغم إنى معرفش حد خالص اسمه بسمه من كتر ما حكيت عنها وكنت مشغول بيها وأنا لوحدى عشان أقول لهم تإنى يوم إلى حصل حبيت بسمه فعلا محدش يسأل مين بسمه لأنها ملهاش وجود خالص مالص دى كانت كدبه بس لانى فضلت مهتم بيها وبحكاويها حبتها

أكيد فى تعريف أنا مش عارفه كويس ويمكن أنا بخلط بين كل أنواع الحب عشان عايز اطلع تعريف جامع مانع لا يصد ولا يرد وعلى أساسه ممكن احدد ......... حد هيقولى طب إيه الفايده من تحديد تعريف للحب..... لا..... هالفرق كبير جدا



  • لو طلع الحب حاجه مش بأدينا الواحد يفقد الأمل انه ينسى إلى بيحبه..


  • ولو طلع اشتغاله الواحد يعرف انه بيشتغل نفسه ويبطل يعيش الدور..


  • ولو طلع اى حاجه تانيه الواحد يحدد لنفسه علاج على أساس ده..

----------------------------------

التعليقات هتيجى كتالي



  • الحب يا محمود حاجه مستحيل تتوصف ترر را رااااااااااااا


  • الحب يا دكتور عباره عن كميا مش ممكن نوصفها انما ممكن نحسها وهرد عليه واقوله ايوه حضرتك يعنى ايه بقى


  • عيبك انك خلطت بين كل أنواع الحب كل نوع وليه تعريف وسؤالي هيكون طب هو نوع واحد إلى عايز تعريفه يعنى إيه بتحب بنت؟؟؟؟


  • وفى ناس هتقولى الحب انك تبقى مدهول بنيله- على فكره دا جالى فى الشات - وهقول ايوه يعنى ايه حضرتك

وفى ناس معينه متوقع تعليقهم بس أحب أشوفها بنفسي عشان أحس إنى ذكى و مش عايز اقعد اقول على كل تعليق ايوه يعنى ايه حضرتك

هناك 58 تعليقًا:

AHMED SAMIR يقول...

انا بحس ان الانسان بيحب يحب
بمعنى انه بيحب الحب نفسه
انا دايما بقول ان الحب قرار
يعني ممكن اقرر اني احب فلان او فلانة واحبها فعلا
وممكن اقرر اني مابحبش البني ادم دة وفعلا اقعد اكره نفسي قيه لحد ما اكرهه فعلا
سيبك بقى من اللي بيقعد يقول قلبي مش في ايدي والكلام دة
تحياااتي

المتمردة يقول...

طيب مهو دلوقت انا معنديش تعريق محدد للحب لانه زى مقولت انواع معنى كدة ان لكل نوع تعريف .....وبعدين الحب دة حاجة فطرية يعنى مهو احنا مش معقول هنفضل نعرف كل حاجة فطرية والا ليه هتبقى فطرية اساسا ..

امواج يقول...

ههههههههههههههههههههههه

حلوه قوى فكرة توقع التعليقات
هبقى اجربها هههههههههههههههههههههه

ومش هاجى اهدى النفوس هنا ولا حاجه


انا هقولك ان الحب هو احساس تجاه شخص من غير ماتكون محتاج منه حاجه غير تبادل نفس الاحساس
يعنى متستناش مقابل

لان لو بقى فيه انتظار مقابل مش هيبقى حب

زى حب الام لابنها
مش مستنيه منه مقابل مهمى جحد ومهما زعلها ومهما بعد بتفضل تدعيله من قلبها

انك لما تدخل فى لف استورى وتحب واحده متبقاش منتظر منها مقابل الحب ده لانه كده مش هيبقى حب هيبقى حاجه تنيه

الحب انتماء
يعنى انت بتحب بلدك
شوارع بلدك اهل بلدك نيلها بحرها ..............
ده حب
مش مستنى مقبال حبك مهما تعبت واتغربت بتشتاق ليها

زى ما قال جاهين

اسيبها واطفش فى درب وتبقى هى فى درب
وتلتفت تلاقينى جمبها فى الكرب

الحب هو عدم انتظار مقابل
انتماء

احساس يجرى فى الوجدان
فى دم الانسان
حب جندى لبلاده بيستشهد فداها
صرخت مسلم لنصرة دينى ويموت عشانه
حب رسول قدوه ومثل رغم انك عمرك ما شفته


الحب معناه اكبر من اننا نعرفه
الحب جماله انه ملوش تعريف ولا تلاقى ليه معنى
نظريه اختلف فيها الفلاسفه والعلماء
هو ده الحب

الفارس الملثم يقول...

انت في اخر تعليق قلت السؤال ايبقي حب الولد للبنت , طبعا لان الحب ليه اشكال كتير , يبقي السؤال عن حب الولد للبنت ؟؟؟؟؟؟؟

خلاص بلاش الكيميا دي مادام مزعلاك

بص اول لما اعرف اقلك عالطول مممممممممممممم

كان في حديث للرسول صلي الله عليه وسلم بيقول " الارواح جند مجندة ما تعرف منها ائتلف وما تنافر منها اختلف"

يعني ايه , يعني الاول لازم يحدث تألف روح مع الشخص ده وبتبقي دي اول خطوة في الحب , وبعدين كل انسان حاطط صورة تخيلية لفتاة احلامه " او فارس احلامه بالنسبة للبنت " طبعا الصورة هنا مش الشكل بس , كمان طريقة تصرفاتها وتعاملها وبتيجي بعد كده مرحلة الاهتمام , يعني انا مهتم اعرف كل شئ عنه وكل ماكانت تصرفاتها بتوافق الصورة التخيلية للبنت المثالية من وجهة نظري بزداد تعلقي بيها , تيجي مرحلة اللهفة يعني كل ما تبعد بحس بحنين اوي اليها ولو حتي قابلت اي فتاة تانية ميبقاش ليا اي اهتمام لان اللي بحبها بتشغل كل تفكيري

ولما بقابلها تاني مش بحس بالوقت وبستغرب انا بجيب الكلام ده كله منين دانا ساعات بقابل ناس وبلاقي الكلام خلص ..

بس انا ليا وجهة نظرة تانية ان الحب بيختلف شكله وطبيعته من شخص لاخر , مش كل الناس بتحب زي بعض , يعني مثلا شخصية لو حبت مش ممكن تنسي حبها ده مهما حصل ومهما مرت السنين , لكن في شخصية مشاعرها بتتبدل زي اوراق الخريف

كفاية كده

سلام يا محمود

shahy يقول...

اسمحلي اقولك اللي فهمتة من البوست دة

فهمت انك كنت بتحب واحدة وعاوز تنساها ومش عارف..........صح؟


اما بقى تعريف الحب نفسة
فأنا بعرف احب بس لكن مش بعرف اعرف
معلش كنت اتمنى اني افيدك


تحياتي

Desert cat يقول...

يا سلام على التوقعات المرئة فى الردود
تصدق انا كنت هعلق اقولك الحب ده لص شريف يتجاهل ابواب ونوافذ منازلنا ولا يدخل الا من القلب
حلو كدا
يعنى دى حاجه بالفطرة موجودة جوانا
وكل يوم وانت فى حب لاهل واصحابك وقرايبك وكل محبينك يا دوكتر

dina seliman يقول...

الحب هذا الشعور الغريب الذى تسطيع معه ان تجزم ان الارض ليست كرويه وان نجوم السماء لاتكفى حبيبك هديه

لكن مينفعش نقول الحب جه بين يوم وليله ومفيش حاجه اسمها حب من اول نظره ولا لمجرد شعور بالكميا
اوتعودك نسميه حب
او سد خانه او رغبه فى الحب


لو بتحب هتلاقى نفسك لاتريد شئ ممن تحب
ولا تستطيع تخيل الحياه بدونه
لا تريد الا سعادته فقط

Empress appy يقول...

الحب يا محمود ترررررررررارررررررا من غير حاجه ههههههههههههه
الحب يا دودو كده زى خبطه الشمس والصداع متعرفش لهم مكان ولا زمان ولا لون
الحب مش زى الالفلونزا ومش بيضيع بالادويه هههههههههههههههههههه
الحب بالعقل اقوى يا ممود وعامل زى الخرفان بتاعتى
اقولك كمان ولا كفايه

nigro يقول...

إيه يا محمود
ليه كده يا بطوط
هي طالبة معاك قوي تعريفات لكل نوع من الحب؟
بص يا سيدي و ركّز معايا علشان الكلام اللي جي ده كبييير قوي
حب الأم هو انك تحب مامتك
حب الأب هو انك تحب باباك ( رحمه الله )
حب الأخ هو انك تحب أخوك
حب الأخت هو انك تحب أختك
حب البنت اللي بتحبها هو انك تحب البنت اللي انت بتحبها
طبعاً كلامي مفهوم و مش عايز توضيح أكتر من كده
و اوعاك تقولي "أيوه يعني إيه حضرتك" لإن الكلام شارح نفسه
صباح الزقزقة يا برنس

مجداوية يقول...

ههههههههههههه عجبنى أوى تعليق نيجرو , بس هو قال الجواب من غير ما يقصد بمعنى ان الحب ليس له تعريف لكنه احساس فقط بيتخلق فى الانسان وينمو وعلى حسب الانسان واحساسه بيكون النمو يا أما يكبر يا أما يقف نموه يا اما يموت يا أما يفضل يكبر ويكبر لحد ما يتعملق فيسعك ويسع حياتك كلها والحب الذى لا ينسى هو الحب الذى لم ينته بالزواج وبديل الحب هو المودة والرحمة بين الأزواج وهى درجة اعلى وأشمل من الحب وتعرف أنك تحب عندما تشعر مع من تحبه أنك أصبحت واحد صحيح فبوجوده أو عدم وجوده هو متمم لك,,اللهم اجعلناممن تحبهم واجمعنا بمن نحبهم فى جنتك يا أرحم الراحمين

Che_wildwing يقول...

حب إيه اللى انت جاي تقول عليه
انت عارف قبلا معنى الحب ايه
ليه بتتكلم عليه
بكره يا دكترة لما تلاقي نفسك بتحب
ومتعرفش ايه اللى انت فيه
هتعرف يعني ايه
وهتعرف معنى الحب

Unknown يقول...

الحب على الارض بعضا من تخيلنا
لو لم نجدة بها لاخترعناة

الـسـيـدة نـون يقول...

عندى بوست اسمه الحب هو
هتلاقيه عندى فى ارشيف شهر فبراير
روح اقراه
ده كان تعريف الحب من وجهة نظرى انا

اللينك بتاع البوست اهه

http://nouranelshamly.blogspot.com/2008/02/blog-post_05.html

الـسـيـدة نـون يقول...

ابقى قولى رايك هنا يا حودة لما تقرا البوست
وزى ما قلتلك هتلاقيه فى ارشيف شهر فبراير
بعنوان الحب هو
تحياتى ليك
اختك خيخة

بطوط حبوب يقول...

واضح انى جيت اكحلها عمتها ومن موقعى هذا تحياتى ل شاهى وده الى خلانى اقول جيت اكحلها عمتها قعتدوا تعرفوا الحب تعاريف تخليى افقد الامل وانا اكتم فى قلبى واقول هيسكتوا اهم انما محدش سكت فقلت لازم اجى اسكتكتم كلكم منك لها له لها له
-----------------------------------
سمير
اهو انت الى جبت من الاخر يا مان بس الناس الى جت بعد كده مش عاجبها كلامك انا جاى اهدى النفوس ومليش دعوه

-------------------------------
المتمرده
ههههههههههههههههه يعنى تبع حزب ايوه يعنى ايه حضرتك بس بجد نوتينى

*********************************

امواج

ايوه حضرتك؟؟؟ هههههههههههههه وعاجباكى فكره توقع التعليقات طب يعنى ايه مش مستنى منه حاجه اقرى الحته الى كتبتها موووووف

*******************************

الفارس الملثم

الارواح جنود مجنده صدق رسول الله صلى الله عليه وسلم

بس الى فهمته من كلامك انك تصادف حلمك فتقوم تحبه مش غريبه دى شويه؟؟؟؟؟

**************************

شاهى
نورتى البلوج وحطيتى ايدك على الجرح هاااااااا هتقولى ايه بقى ؟؟؟

**************************

ديسرت كات
ايوه يعنى ايه حضر تك ؟؟؟؟؟ ههههههههههههه

بطوط حبوب يقول...

دينا

ايوه يعنى ايه حضرتك؟؟؟؟؟
منكرش طبعا ان الكلام جميل ههههههههههههه
********************************

اّبى
نورتى يا اى ولو حد غيرك قال الكلام ده كنت هرد عليه واقوله ايوه يعنى ايه حضرتك نما انتى مقدرش ههههههههههههه
بس بجد كلامك جامد انتى بتحبى ولا ايه؟؟؟؟؟؟؟ ومش لاقيه علاج هههههههههه
*********************************

نجرو
ال دى شبه رقاصه وبترقص ههههههههههههه
يا عمنا انت نورت وتعريفاتك زادت الموضوع الى ملوش لون ده ذادته غمووووووووووض وبقى زى افلام الرعب نوتنى وبجد تعريفك من احسن التعريفات

****************************

مجداويه

نورتى بجد وعجبتنى الجمله دى اوى وقاعد افكر فيها لحد دلوقتى أنك أصبحت واحد صحيح

***********************

شى ولدنج

لما اجرب هعرف ماشى يا برنس اوعى تكون انت جربت ومش عايز تقولى ههههههههههههه فكرتنى بمسرحيه ريا وسكينه لما عبد المنعم مبدولى كان بيقول وهم هيفضلوا فى الاوضه لحد ما افهم هههههههههههههههه


*****************************
ايويه عجبنى جدااااا جداااااااا بتين الشعر دول

بطوط حبوب يقول...

بنت خيخه

الله على روعه البوست بتاعك بجد قلب على المواجع
بس بيتكلم عن الحب بين اهل الاسره ومش ده الى كان يهمنى فى الاخر
الى كان يهمنى يعنى ايه بقول انى بحب بنت؟؟

ربنا يسعدك يااااااارب

HeBa يقول...

مش عارفة يا محمود

بس هو أكيد مش اشتغالة

أنا بحس أنه بيبدأ بإعجاب .. يعني مثلا تعجبك صفة معينة في الشخص أو يلفت نظرك تصرف عمله أو رد فعل في موقف .. يعني حاجة تلفت نظرك في الشخصية مش في الشكل

أنت أكيد عندك تصور معين لشريكة حياتك مثلا فلو شفت بنت فيها الصفات دي هتبتدي تنجذب ليها

أو تكون فيه بينكم حاتجات مشتركة تخليكوا تقربوا من بعض مثلا

وبعدين الإعجاب يتحول لاهتمام فتلاقي نفسك مهتم أوي بالشخص ده وعايز تعرف أخباره

وفجأة بعد فترة تحس إن اهتمامك بقى حب

يعني توقع في الحب من غير ما تحس

مش عارفة الافتراض ده صح ولا غلط

أنا عن نفسي لسه مجربتش صراحة

بالنسبة بقى لحبك لأمك وأخواتك وأصحابك والمجتمع والناس

فالنوع ده من الحب بيبقى فطري

يعني زي ما غريزة الأمومة فطرية في الأنثى

حبك لوالدتك وأخواتك بيبقى حب فطري موجود جواك

بس كده

helium atom يقول...

انا مش هاقول اى رد ... و انت فاهم

هههههههه

واد غلبان يقول...

الحب هو
"مضاد الشعور القائم بين طالب الثانوية العامية وبين كتبه"
تحياتى

موناليزا يقول...

من وجهة نظرى انك تكون متأكد ان فيه حد بيشاركك مشاعرك وكل حاجة سواء حزن او فرح حتى وهو بعيد عنك يعنى
ده غير ان الحب برضه انا شايفاه عطاء دون انتظار المقابل وكمان يعنى التضحية بما هو غالى ونفيس دون ضيق وكمان التمتع بالصحبة حتى لو وجوده مش بيفيدك
بص بقى هو حاجات كتير حلوة واهمها انك تحس انك لقيت نصك التانى
كفاية كده لان الموضوع مش هيخلص بالطريقة دى

فرنسا هانم يقول...

الحب يا محمود حاجه مستحيل تتوصف
الحب يا دكتور عباره عن كميا مش ممكن نوصفها انما ممكن نحسها
الحب انك تبقى مدهول بنيله

هههههههه
انا مرضيتشى ازعلك وسألتك عن كل اللى انت توقعته

مها يقول...

محمود
كويس أوى إنك تسأل يعنى ايه حب لأن ناس كتير بتدخل فى تجارب مؤلمة ظناً منها إنه حب وعمرها ما بتتعلم لأنها مسألتش سؤالك ده .. واللى اجابته مش غامضة ولا مستحيلة..
مبدئياً معظم الناس بتخلط بين الإعجاب والصداقة والحب.. يعنى لو عجبتك بنت عشان عينيها حلوة أو ضحكتها أو حتى حنيتها .. بتتشد لها لفترة وتفضل تعد النجوم وقلبك يدق لما تشوفها ..إلى آخر الأعراض اللى معظمنا مر بيها.. ولكن ده مش حب .. ده إعجاب .. إزاى نعرف؟ لما ندى نفسنا فرصة نقرب من الإنسان ده ونختبر ما هو أعمق .. فإذا لقينا تفاهم وتناغم بين الشخصين حتى لو كانت طباعهم مختلفة شوية.. يبقى فيه أمل فى قصة حب ناجحة .. يعنى لازم يكون فيه تفاهم كبير جداً فى رؤيتهم للحياة وفى ترتيب أولوياتهم فيها .. التفاهم بيسهل التعامل من غير شد وجذب طول الوقت .. الحب مش صراع وبكاء وآهات .. الحب انسجام عقول وقلوب وأفكار ورغبات .. الحب مش علاقة تستنزف مشاعرك أو تسئ استغلالها .. الحب بالعكس بيطور مشاعرك ويقويها ويثبت جذورها عشان بعد كدة مافيش قوة تقدر تكسرها.. الحب تضحية لكن عمر التضحية ما هتحصل إلا لو الاتنين كانوا متفاهمين .. لأن عدم التفاهم معناه صراع وعند وجفاء ولما التلاتة دول يكونوا موجودين لا يمكن طرف هيضحى عشان التانى .. والحياة مسئولية وليست نزهة وكل يوم مطلوب تضحى عشان الحياة تستمر هادئة ومحتملة رغم قسوتها .. وبصفة عامة إذا لقيت فى الطرف التانى تصرفات مش عاجباك وبتتكرر بانتظام يبقى مافيش تفاهم .. والأحسن تبعد .. ليه؟ لأن غالباً الناس مش بتتغير .. يعنى ما تراهنش على إن الوقت هيغير حد .. حتى الحب مهما كان قوى صعب يغير .. عشان كدة تلاقى ناس بيموتوا ف بعض لكن مش عارفين يعيشوا مع بعض.. لأن فيه طول الوقت صراع بين رغبتين متضادتين.. إذن الحب مهم كمشاعر لكن لازم يكون فيه تفاهم ونقاط التقاء كثيرة .. الحياة يا محمود سلسلة من المسئوليات والواجبات اللى مجبر تعملها سواء بتحب أو مش بتحب ( ده لو كنت انسان كويس طبعا وأصيل) .. فلو عملت الواجبات دى وانت بتحب .. هتحس إنك بتعملها وانت سعيد .. لكن ايه ضمان استمرار الحب عشان تستمر تحس بسعادة وانت بتؤدى الواجبات دى؟ الضمان هو التفاهم .. لأن غيابه بيقتل الحب..
امممم .. يعنى ايه حضرتك؟ :))))
يعنى لازم يكون فيه حب لأن الحياة تصبح غير محتملة بدونه .. ولازم يكون فيه تفاهم عشان الحب يدوم ..

شفت بقى؟
الوصفة سهلة .. لكن صعب تلاقى المقادير!!!!!!!!!!

ههههههههههه

اتمنى لك كل سعادة وحب .. وتفاهم

Wael يقول...

انا كنت قريت تعريف زمان بيقولك ايه :
"الحب هو أن تفتقد شخصاً وانتم متفرقين، ولكن بطريقة ما تشعر بدفء داخلك لأن قلوبكم مرتبطة "

اما بخصوص الحب الحقيقى بيعيش يا هريدى , يعنى الحب الرومنسيكى , فقريت برضه تعريف بيقولك ايه :
"لقد قرأت مؤخراً أن الحب هو عملية كيميائية... ويبدو أن هذا هو سبب معاملة زوجتي لي كنفايات سامة " .

اكيد طبعا هاتقولى : يعنى ايه حضرتك

هو كده معرفش . الجميع اتفقوا على وجود الحب , لكنهم اختلفوا جميعا على معناه . حقيقة علمية .

khobayb يقول...

أستأذنك تقرأ الموضوع ده ؟؟

http://khobayb.blogspot.com/2008/01/blog-post_29.html

وتقولي ايه رأيك في النظرة دي للحب ؟

--

عموما : الحب : أن تهتم

فإذا لم تهتم فأنت لا تحب

إذا لم تهتم بطاعة الله ، فأنت لا تحبه وإن زعمت العكس ( مش انت يعني ، انا باقول عموما )

إذا لم تهتم بمرض أخيك ، فأنت لا تحبه وإن زعمت العكس

--

طيب هل كل اهتمام حب ؟

لأ

قد يكون الاهتمام بدافع المصلحة ، أو الرجولة ، أو أي شئ آخر

يعني : كل حب يتبعه اهتمام ، وليس كل اهتمام حب

الحب معناه ألا تتوقع مقابلا لاهتمامك ( لا فلوس ، ولا شهرة مثلا ، ولا مدح )

Empress appy يقول...

بحب ومطولتش يا محمود تررررررررراررررر
زى حضرتك كده انا من البدايه فاهمه ومن فهمى ده قولت لك معانى الحب الغريبه دى يعنى حاجات صعب علاجها ههههههههه
ترررررررررررارررررررررر

أشرف حمدي يقول...

طب حضرتك انت بقى كده ماسبتلناش حاجة نقولها :)
ههههههههه أقولك ايه طيب بس ؟
لو قلت إجابة وطلعت من الإجابات الـتراراراااا دي حيبقى شكلي وحش .
بص ، حقولك إجابة جديدة
الحب هو انفلات المشاعر الحنجهورية في غياهب الميتافيزيقا
طبعا حتقولي يعني ايه حضرتك ؟
حقولك خش ذاكر Operative عشان أكيد الامتحان قرب
ههههههههههه
انا حضيف مدونتك عندي ، تعلقت بيها بجد
تقدر تقول "حبتها" هههههههههه
تحياتي

انين الحزن يقول...

محمود
الاول كدا بقه انا مبسوطه اني عرفت مدونتك وزعلانه اني معرفتهاش من زمان

حلو الموضوع يعني افهم من كدا ان الحب في نظرك مجرد انك بتشتغل نفسك

انا مع رأي احمد سمير الحب قرار
الحب دا حاجه حلوه اوي فيه سعاده وبتحس انك طاير كدا لو كان صادق وبجد ودا طبعا من الطرفين
انا طبعا بتكلم عن الحب بتعنا الولد والبنت يعني
طولت عليك انا
سلاموووووووووز
وزة

بطوط حبوب يقول...

هوبه

برضه فكره انك تحب التصور الى فى دماغك ده هى عباره عن تحوير لفكره الاشتغاله انا حاسس كده انتى حاسه ايه ونقول ايوه يعنى ايه حضرتك

***********************************

هيلوم اتوم

نورتى هنا زى ما انتى منوره هناك وانا عارف رأيك طبعا والمعنى فى بطن الشاعر

*********************************
واد غلبان

ايوه حضرتك الثانويه هى السبب هههههههههههههههههههههه نورت وربنا ينصرك على الى حاطين الامتحان الحياه بقت صعبه اوى
**********************************

موناليزا
اوك بس ده الحب بمعنى عام وده معنى مشترك بين حتى لو بتحب القطه بتاعتك
وبرضه شعور انسانى وجربى تروحى فرح ملكيش اى علاقه بيه من الافراح الى بيبقى فيها فرح مش السكيتى وهتحسى انك طايره من السعاده رغم انك متعرفيش حد
*********************************

فرنسا هانم

ربنا يخليكى لينا مش عارف من غيرك هعمل ايه انتى الوحيده الى جاوبتى صح تستحقى جايزه الفقره تحبى تسمعى ايه فى نهايه البرنامج
*********************************
مها


عجبنى اوى كلامك عن الحب وطريقتك فى التحليل واضحه يفهما اى حد ان شاله يكون مبيعرفش يقرا بس لو كنتى بتجاوبى على سؤالى انا.... فهو كان يعنى ايه انا بحب ؟؟؟؟؟؟
لو حسيتى ان فى فرق فى الاجابه قوليلى عليه وانا ممكن اعطيكى تلميحه
لو عايز انسى انسان انا اقنعت نفسى انى بحبه - بس خلاص مبقاش ينفع نكمل- بتعريف يعنى ايه اصلا انا بحبه ده هيسهل - بطريقه او باخرى -
********************************

وائل

بالعند فيك مش قايل ايوه يعنى ايه حضرتك
هقولك عنى ايه من غير حضرتك ههههههههههههههه
***********************************
اّبى

بتحبى ومطولتيش ليه ؟؟ هرب ونفد بجلده ههههههههههههههه
طب بجد ولا حتى الشاربه بتنفع فى الموضوع ده انتى مجربه واسأل مجرب وخصوصا لو كان طبيب
**********************************

خبيب

موضوعك الى فى اللنك هايل بجد بس مش حاسس انه كلام صعب تنفيذه انت حسيستنى انك بزرار ممكن تنسى حبيبك عشان بيتعارض مع اى حاجه
******************************
د اشرف الفنان
يا عم طب احنا نيجى جنبك فيييييييين
وانت عارف بتوع سنان كلهم مهيسين
وكلامك بجد اسعدنى جدا ودى مش دماغ اوبرتف دى دماغ باثولوجى ربنا يبعده عنك هههههههههههههههه

وانا لو قلت مش فاهم الميتافزيقا هيبقى شكلى وحش فقول ايوه هى دى الاجابه حضرتك هههههههههههههه

أميرة يقول...

ايه الفلسفة الجامدة اللى انت عايش فيها دى انا معنديش تعليق الحقيقة
البوست بتاعك لخبطلى الكلمتين اللى اتعملتهم فى دنيتى

Eman Eltaher يقول...

هههههههههههه
مدونتك لذيذة و روحها حلوة

الحب كلمة مش محتاجة تفسير حقيقى
لانها بتتحس مش بتتفهم

متهيألى الرأى ده مكنش ف الحسبان :)

بس بجد عجبنى موضوعك لانه مهم جدا
والحب بجد كلمة صعب وصفها

معلش انا دخلت كده
دى اول زيارة و ان شاء الله مش الأخيرة

Mona Shereif يقول...

انا معرفش يعنى ايه حب
بس انا بحب

خلااااااااااااااااااااااااص
فنيتو
النهايه

كلنا بنحب ومنعرفش ايه هو الحب

وياريت بقى ترد لو سمحت
ايوه يعنى ايه حضرتك

jessy88 يقول...

طيب ايه رأيك مش هقول ولاتعليق من اللى انت تنبأتهم ...اسمع بقى
يعنى ايه كوسة؟ يعنى واسطة ولا يعنى الكوسة اللى بناكلها ..اكيد معظم المصطلحات لها اكتر من تطبيق وبالتالى اكتر من معنى والحب كدا فى حب فطرى او غريزى انا بسميه اعتياد والاعتياد دة يخليك متمسك بوجود اللى انت اعتدت عليه ودة اللى بيحصل مع بابا وماما واخوك يعنى مثلا انت ممكن تبقى اصلع وكاره صلعتك بس لو حد قالك طب اقطعهالك؟ هتوافق ؟؟اكيد لأ لانك رغم انك كارها الا انك اعتدها ...اما بقى حب الولد والبنت فدة بيبقى انجذاب يحدث بين الجنسين ومرتبط باختلاف النوع لانى ببساطة ممكن يبقى ليا صاحبة قمر وشخصيتها تحفة ومع ذلك مش ببقى عايزة اتجوزها!!! لكن ممكن لو انا ولد كان الامر اختلف اذا فحب الاهل والاصدقاء هو اعتياد ممزوج بارتباط وارتياح نسبي فى التعامل اما حب الولد للبنت والعكس فهو كميا او انجذاب يحدث للجنسين زى المغنطيس وشكراااااا

د/اجدع بنوته يقول...

لا يامحمووود

محمود مين ؟؟

انك تتولد بتحب باباك ومامتك ودينك وربك واخواتك

ده حب غريزى ملناش دخل فيه

انك بعد كده تختار تحب مين وتكرهه مين

ده الاجمد

انك بتقرر هتحب ده لان صفاته حلوه لان شخصيته كزا ..

لكن لو ابوك او اخوك مثلا فيهم ديفيكت او حاجه بتضايقك برده هتحبهم غصب عنك

خد التعريف بقى

الحب ..

احساس .. تتوحد فيه مع من تحت ..

تختلف درجاته ومستوياته باختلاف شدة التعلق بالطرف الاخر

تبدا م مشاركته اهتماماته وما يحب

مرورا بالاستعداد للتضحيه م اجله بالفلوس والاكل

انتهائا بالاستعداد للتضحيه م اجله بالروح والحياه

يبدا م امكانية الاستغناء عن الحبيب بارادتك

ثم بصعوبه ثم بالاستحاله

شعور بالحنين ..

وزى ماقلنا نوعين

ارادى وغريزى

واقواهم الارادى ع الاطلاق

تحياتى

بطوط حبوب يقول...

انين الحزن
ايه الفرق بين قرار ةبين بشتغل نفسى؟؟؟؟
ونورتى مدونتى ومدونتك بجد حلوه اوى
********************************
اميره ويلز
كويس انى قدرت الغبط الكلمتين الى اتعلمتيهم اكيد هتستفادى بكلمتين تانين والحياه علام

**********************************
ايمان
حلو تعريف بيتحس ده وايوه بقى يعنى ايه حضرتك؟؟ ههههههههههههههههه

*************************

سم تيمز

على النعمه انت جبت من الاخر الف شكر ع الزياره ونورتنى بجد

********************************

جيسى
كلام جميل وكلام معقول مقدرش اقول حاجه عنه
ايوه بقى يعنى ايه؟؟؟
******************************

داجدع بنوته

سيبك انتى انا عجبنى حكايه التضحيه م اجله بالفلوس والاكل وخصوصا الاكل
نوتينى بجد

yas يقول...

انا بقي شايفة ان مفيش حب خالص 100%
مامتك حبها مفروض واجب انت بتتولد لازم تكون بتحب مامتك وباباك واخواتك ده الطبيعى اصحابك لازم يكون عندك اصحاب مش هتعيش لوحدك يعنى مش لازم تكون بتحبهم اوى على الاقل مستريحلهم البنت اللى بتحبها ممكن علشان كل صفاتها حلوة او انك لازم تحب وبتقنع نفسك انك تحبها وعموما انا مقتنعة اوى برأى a.samir
انا شايفة ان مفيش حب او يمكن اللى بنعمله دده اسمه حب بس اكيد هو مختلف تماما عن الحب البيرفيكت اللى بتلاقيه فى الكتب
عموما ماتشغلش دماغك انت الدنيا مش مستاهلة انا حسيت وانا بقرأ البوست ان الموضوع شاغلك اوى وكمان افكارك داخلة فى بعض
يالا سلام

عبده الرايق يقول...

انا عجبنى قوى حكايه انك تقعد انت ويوور فرندس
مع صديقكم المريض
فرى فرى جود
بط
كان ممكن اتنين منكم يسافروا معاه لغايه بيته علشان يقعد مع اهله والباقى يروح بيته
ولو كنت قتلى
انا كنت بعت لك طياره مخصوص
اصلى عامل بيزنس مع شركه الطيران المصريه وهادفع بعد الكادر

فضفضة يقول...

والله سؤال صعب جدا

وعجبتنى فكرة توقع الردود جدا جدا هههههههه

وعايزة اقولك طالما انت رافض للكيميا

فهو فعلا كيميا

والحب هو انك تبقى مدهول فعلا

ومعبط وفاتح بقك

وحاجات نازلة منه يععععع

بجد بجد

تحب واحد بكل عيوبه وبلاويه

وتبقى الناس مستغربة ازاى بتحبه

وانت تبقى شايفة قمر

والناس شايفاه ابو قردان

ههههههههه بس خلااااص

وااااااااية

رئـــــيسـة حزب الأحلام يقول...

احنا فى زمن مافيهوش حب الا فى دنيا الاحلام

بطوط حبوب يقول...

ياسمين

لا الموضوع مش شاغلنى زى مابين بس اكيد فكرت فيه وكنت عايز رد واقتنعت انه لما يجى هبقى اعرف
والافكار داخله فى بعض لانى معرفتش اخرجهم
نورتينى
*********************************
عبده الرايق
والله يا مان الواد اصله من اسيوط واحنا كنا فى القاهره فمينفعش حد يروحه لانها فيها بتاع 6 ساعات رايح و6 جاى غير لسه الى هيسافر بلده وبعدين احنا كنا تلاته بس فى الشقه هو التالت
وكمان مكنش لسه فى كلام عن وجود الكادر ده وعموما شايلينك للمستقبل
*******************************
فضفضه
ايوه يعنى ايه حضرتك ههههههههههههههههه

هبة المنصورة يقول...

إحم إحم
أول مرة أعلق هنا.. ولازم أقول كلمتين حلوين مش كده؟
عاجبنى أوى كلامك عن صحابك.. ده نوع م الحب.. وماينفعش تحط الكلمة وتختزلها ف تعريف سخيف طال أو قصر.. لإنه كذا موقف وأنت يمكن ذكرت موقف واحد بس قدرت توصل بيه معنى كبير

بالنسبة لحب النص الحلو..فلما تلاقيه أكيد هتلاقى نفسك بتكتب عن التجربة بنفس درجة الإتقان اللى كتبت بيها عن الصداقة

كل اللى أقدر أقوله إنها تجربة وخبرة تتعاش الأول قبل ماتتوصف.. وساعات ناس ماتقدرش توصف وناس تانيه توصف ف شعر وناس ف نثر وناس ف تعاملات
باحب أوى كلمة قالتها كاتبة أمريكية وكنت ولازلت حاطاها ف بلاست الياهو
Experience is an abler instructor than direct enlightenment from man or woman for it works by suggestion
بمعنى إن الخبرة معلم أقدر بمراحل من أى إنسان يحاول يعلمك بشكل مباشر- بالتلقين يعنى.. فالخبرة تؤدى إلى تعلم بالإيحاء (باشوف الخبرة زى رحلة بترجع منها متحمل بكم هدايا وتذكارات وكمان مواقف حلوه ووحشه كفيله بإنها تعلمك كتير وكل اللى هتعرفه من خلال خبرتك أنت هيبقى أحسن من مليون تعليق هنا.. وساعتها مش هتحتاج تقول "أيوه يعنى ايه حضرتك؟"..لإن وقتها هتبقى أنت اللى بتحاول توصل التجربة بتاعتك) :) تحياتى

Unknown يقول...

اخى الفاضل -- اختى الفاضلة
ادعوكم للتضامن مع دعوة الداعية الاسلامى الكبير ( عمرو خالد )والانضمام
الى ---- ( حملة حما يه ) ------
فى انتظاركم ولاتترددوا نحن فى حاجة اليكم
برجاء التواصل للمساهمة وشكرا لكم مقدما....للمزيد يمكنك زيارة مدونتى
او زيارة موقع عمرو خالد مباشرة

Rosa يقول...

هههههههه
بوست جامد يا بطوط
يمكن الحب يكون لخبطيطه من كل الي قلته ده
في اعتقادي الشخصي هوه مشليه ستاندراد و مقياس هنقف عليه
كل واحد تعريفه هيختلف تبع عوامل كتيــــــــــــــــــــــــــر قوي قوي بتأثر فيه و بيأثر فيها
سووو ماتفكرش كتير
تعريفي الجامع المانع هو حاجه كده مع نفسها بتختبر فيها كل المشاعر الانسانيه جمعاء جمعاء
هههههه
هااا ايه رايك في التعريفاشن ده؟

دكتورة سنان يقول...

انا جيت متاخر اووووووى كده
بص الحب يعنى
يعنىىىىى
يعنىىىىىىىىىىى
يعنى لما اشوف حبيبى احس انه العيد جه مثلا
لما يكلمك تحس انك ليك لازمه
لما تتخاصموا تبقى الدنيا سووده فى كحلى فى رصاصى
لما تتصالحوا تبقى عاوز تمشى تاخد كل اللى يقابلك بالحضن

معرفتش افيدك كتيررر :(
اصلها حاجه متتوصفش يادوك :)

امواج يقول...

تعرف انا دخله المرادى اقولك ايه يامحمود


انا بحقد على عدد الردود ال عندك فى المدونه


هههههههههههههههههه

وشوفت الحته الموف زى ما قولت

أشرف حمدي يقول...

لقيت واحد حاقد على عدد الردود عندك قلت لما أزودهم رد
:P

Ma 3lina يقول...

كنت هقولك الحب احساس بس انت قلت خلاص

هههههههههه

بجد مش عارفة تعريف محدد للحب ماا علينااا

البوست جميل تسلم ايدك

مها يقول...

محمود
نحن الآن فى انتظار بوست جديد فحت وروش طحن :))))))))))))))))

عروسة ننوسة يقول...

الحب اجمل شىء فى الوجود وبدون الحب لا نستطيع ان نحيا ابدا ...تحياتى

عروسة ننوسة يقول...

الحب هو انك تحس انك موجود فى عالم سحرى ياخذك الى دنيا الاحلام والخيالات الورديه ...الحب شعور مبهج سعيد متفاءل لكن مع من يستحق

بطوط حبوب يقول...

هوبه
نورتى الصفحه يا قمر
واجابتك فكرتنى زمان لما كنا بنسأل عن حاجه ويقولوا لنا لما تكبر هتبقى تعرف
ههههههههههههههههه
على الرغم من انها فعلا مقنعه جدا
نورتى بجد
********************************

روزا

حاجه بتجتمع فيها كل المشاعر الانسانيه امممممممممممممم ايوه يعنى ايه حضرتك ههههههههههههه

*******************************

د /نوسه

تراااااااااااا رااااااااا رااااااااا

ايوه ياعم محدش ادك

*******************************

امواج


انا هبخر الصفحه
هههههههههههههههههههه

********************************

د/ اشرف

مش عارف اودى جمايلك فين انا شفت تعليقك عن لماضه لما يجيلك المليون جنيه
على النعمه يا شيخ لو لقيت مليون جنيه لاديك نصهم - الى على الشمال بالاماره -
ههههههههههههههههههههههه

**********************************


ما علينا

اممممممممممم ايوه حضرتك هههههههههههه

*****************************
مها

انتى تأمرى يا قمر وبجد انا فرحان ان بوستاتى بتعجبك

********************************

جنه

ايوه يعنى ايه حضرتك

Noha El-arabi يقول...

و بتسال ليه؟؟
م اللي يحب يبان في عنيه
يا سلام شايف القافية
يعني ببساطة روح بص في المراية لغاية ما تجنن
بس
صباح فل مورد

ROSE يقول...

نعتبر الموضوع ده حضرتك من اسباب قفل الصفحه القديمه ولا ايه الحكايه...لو عايز ترد عليا هنا مش هعرف اقرا الكلام تانى
سلام يادكتور

(;

إخوانى حتى النخاع يقول...

الحب حاجة جوا الإنسان ....

عاوز اسألك سؤال

هوا المصرى دلوقتى فاضى الى هوا يحب ؟؟؟

الواحد متبهدل .....



أخوكم إخوانى حتى النخاع
http://ikhwangeeee.blogspot.com

بطوط حبوب يقول...

نهى العربى

الحب يبان فى علينه ايوه حضرتك؟؟ هههههههههه

روز واخوانجى نورتونى

Unknown يقول...

عجبتنى جدا المدونة وموضوعاتها وعجبنى قوى تدويناتك فيها. المهم بتقول عاوز تعرف معنى الحب
أنا هتكلم بس عن الحب بين الولد والبنت

مش هنقدر نقول تعريف للحب بس ممكن نقول مظاهر للحب وهى:
1- إنك تشوف كل حاجة فى اللى بتحبه حلوة معنويا وجسديا
2- إنك تكون معجب بآرائه وشخصيته
3- إنك تتمنى إنك تقضى طول العمر معاه
4- إنك تقدم حسن الظن فى معاملتك معاه
5- حتى لو هجرك اللى بتحبه بتحس إنه مش غلطان بالعكس تحس غنك غلطان وده أسمى معانى الحب

ماشى يا د/ محمود عاوز أشوفك فى مدونتى بقى
سلام

بطوط حبوب يقول...

ايمن بدر

انا اضفتك اليوم للريدر تبعاتى
وهتابع الجديد ان شاء الله
بس الاول ايوه يعنى ايه حضرتك

sarah(Ocean fragrance)1 يقول...

eshte3'ala kbeera awi
ah tedar tbatal tsht3'al nafsak
belnesba l7ob bent...byb2a e7'tyar bel3a2l we zay ma2olt ay wlad a3ed ma3 ay bent mosh 3'elsa hay7baha we mosh hyb2a 3ayz ymshy
ezay te3raf enaha the one..da naseeb we bta3 rabena ...enwy we e7'tar we esta7'eer ..we doos..law tmaam yeb2a rakez we matshatetsh nafsak

da inshort ma3a eno tawel
we ma3rafsh ana olt gdeed walla la2