2008/02/18

شئ منافس للونرار وبنشوفه كل يوم يبقى ايه؟؟؟؟؟ المترورار





من زمااااااااااان جدا وانا بقعد اتخيل ازاى الونرار ده بيشتغل يعنى بيضغط الملفات ازاى الملف تلاقيه على الهارد " القرص الصلب" بتاع 100 ميجا تقوم تدوس عليه كلك وبقدره قادر يتحول لشكل الكتب اللذيذه دى وينقص حجمه النص 1/2 او اقل


والونرار صاحب فكر اشتراكى معروف جدا فالملفات تدخله بكافه امتداها لتخرج جميعا بشكل الونرار وبامتداد واحد الا وهو rar
لا فرق بين اغنيه ولا فيلم ولاصوره او حتى فولدر فاضى الجميع امام الونرار متساوى جدااااااااااااا


الكل يدخل بفعل الضغط ليتحول وينصهر فى داخل الونرار


كم تمنيت ان يجعلوا الونرار شفاف عشان اعرف اشوف ايه الى بيحصل جواه


وفجأه اكتشفت انى غبى جدا


فانا ارى الونرار كل يوم وارى كيف يعمل وكيف ينفقص حجم الملفات للنص وربما للربع وربما لمفيش خالص


وانا على رصيف المتروو فى محطه انور السادات تحديدا جاء الالهام ............... الناس كانوا على "الرصيف الصلب"- بمساحه لا تقل عن 20 كم2 واذا فجاءه المترو يوصل لتجد كأن احد داس كلك عليهم ليصبحوا جميعا بامتدا واحد الا وهو مترورار وتجد ان المترو رار حولهم من 20كم 2 الى 1/2 متر ومش مربع


الغريب بقى ان لسه فى سؤال واحد مهم


هوالملفات بتبقى بتتسارع كده عشان تدخل الونرار اصلك لما تيجى تشوف النسخه المتطوره من الرنامج ده الى اسمها مترو رار تلاقى الناس كلها بتدخل بسرعه واندفاع شديد جدا ليس لهم هتاف الا عايزين نتحول لمترورار عايزين نتحول لمترورار............... بوم بوم........... عايزين متروار لتجد نفسك تسأل ببلاهه شديده يا ترى مين وراهم؟؟؟؟؟؟؟؟


بنفس استرايجيه عمل الونرار يعمل اخيه المترورار فتجد الناس جميعا تحولوا لشكل واحد لا تستطيع ان تميز بين مذكر ومؤنث انسه ومدام فالجميع فى المترو اسمهم عبد السميع "لذلك ينصح خبراء المترو انك لو راكب مع واحد صاحبك او حتى لو راكبه مع صاحبتك انك تعليمه علامه مميزه لانه جوه محدش بيعرف ابوه"


فكره عمل المترورار قعدت افكر فيها طول الطريق وطلعت بسيطه جدا


المترو ببساطه بيدخله جماهير الشعب المطحونه ليحولهم الى جماهير مصحونه ليستغل الفرق بين الطحن والصحن لاضافه مزيد من الجماهير


فاضل بقى كام سؤال شاغلين بالى جدا


هل الونرار عامل مكان للسيدات - يعنى لو منزل صور بنات حلوين -اطفال محدش يفهم غلط-هيحطهم فى حته لوحدهم ولا هيسبهم مع الملفات الغلسه اكله لحوم الصور؟؟؟؟؟؟؟؟؟؟؟؟


طب الى مش بيقطع تذكره فى الونرار بيدفع برضه عشره جنيه؟؟؟؟ ولا بيعلملوا فيه ايه ولا بيرموه من الونرار وهو ماشى


سمعتم عن ونرار اتحرق ولا خبط فى ونرار تانى اهو ده بس عيب المترو رار انه حوادثه مقارنه باخوه الونرا كتيره شويه


وعلى غرار اعلان التكييف شكرا لكارير انه اخترع لنا التكييف احب اقول شكرا لعم حسنى الى اخترع لينا المترورار


ملحوظه اخيره وانا راجع قلت ارجع بحاجه غير المترو لاكتشف اننا اول دوله فى العالم تعممم نظام الرار فى كل حته فى البلد فقد وجدت الاتوبيس رار والمكروباص رار وكل عائله رار يعنى بالصلاه على النبى البلد كلها بقت رار والى هيجى يتكلم معنا نص كلمه هنقوله " رار شعبك الاول وبعدين ابقى تعالى كلمنا" هوه ده دور الرياده للمصر ولا بلاش

هناك 31 تعليقًا:

فرنسا هانم يقول...

هههههه
زمان كان اسمها كرار
دلوقتى بقت رار
يعنى الفرح
يعنى السويس
يعنى المترووووو
يعنى الاتوبيسات
يعنى الناس المحشوره
يعنى علب السردين
يعنى الرار
وكمان مره الرار
سمعنى سلام غريب الدار

دكتورة سنان يقول...

ههههههههههههههههههههههههههههههههههههههههههههههههههه
بجد تدوينه دمها شررربات
وعلى فكره انا فى سنه تالته اسنان بردو.. زمااايل يعنى بس انا فى المنصوره
ميرسى لزيارتك الجميله لمدونتى :)

Wael يقول...

هههههه
تشبيه حلو والله , على كده بقا مصر عبارة عن " هارد " كبير اوى ييجى 72 مليون كيلوبايت , وهيئة المواصلات هى " البروسيسور " بتاعنا , بس بروسيسور زى منتا شايف " بنتيوم 3 " D:
بس ياترى شغالين على " ويندوز " ايه ؟
اكيد نسخة " حوس حوس xp " ههههه

بطوط حبوب يقول...

ماشى يا فرنسا تحبى تسمعى اغنيه تانيه؟؟؟؟؟
انتى فى مدونه ما يطلبه المستمعون ههههههههه
ال بالحق هوه كان اسمه كرار سبحان الله برضه قريب من الرار

بطوط حبوب يقول...

د/ نوسه نورتى المدونه والف شكر على المجامله

بطوط حبوب يقول...

د وائل نوتنى يا مان وهوه زى ما انت قلت بس من غير بنتيوم مش 3 انت مش مذاكر جغرفيا كويس
هههههههههههههههههه

History Of Me!!! يقول...

هي نفس الشيء
لا يوجد غير اختلاف واحد
ان في المترو الناس بتتسرق
بس مش مشكلة الشعب كتير
اصدي الملفات كتير

مدونة جميلة

ابو صهيب ( الجمعاوي الاصيل)سابقاً يقول...

هههههههههههههههههههه

اضحك الله سنك

صدق يوسف بك وهبي

ما الدنيا الا هارد كبير

ومصر هي الونرار بتاع الدنيا

عايز تتضغط اي حاجة

يبقى انت اكيد اكيد في مصر

اول زيارة وان شاء الله مش الاخيرة

ابو صهيب ( الجمعاوي الاصيل)سابقاً يقول...
أزال المؤلف هذا التعليق.
Marwa Friday يقول...

صباحك ورد يا دكتور بطوط
والله أكتر ما عجبني انك شبهت المترو بالونرار.. انا عمري بقى ما ركبت مترو ههههههه آه والله!.. يمكن رحمة من ربنا
كل سنة وانت طيب
تحياتي

aya يقول...

÷ههههههههههههههه

الله ينور يا دكتور
هو انا ليه مخدتش بالى من الحكاية ديه قبل كده
مع انى كل يوم بيحصلى رار
وببقى آية.رار
ههههههههههههههههههههه

بجد تدووينة زى العسل
واحلى سلام لبلد الرار

عشان يعرفوا ان احنا متطورين وسبقناهم بمراحل

تحياتى يا دكترة

FadFadA يقول...

محمود
من الحاجات اللي كنت باستغرب جدا لما بشوفها هي
كيف يتحول البشر من الثري دي إلى التو دي ؟
و أخيرا فهمت السبب و وجدت التفسير
فعلا هو الرار

مش محتاج أقولك أن أسلوبك لذيذ جدا

محمد

ana ga3an يقول...
أزال المؤلف هذا التعليق.
ana ga3an يقول...

حقيقي تخيل ظريف جدا
والله استمتعت بقرأتها
بص بقي يا سيدي فكرة برامج ضغط الملفات بتشتغل ازاي
بطريقة بسيطة كدة

مثلا عندك ملف وورد في كلام
جبنة لحمة و جبنة تاني
البرنامج هايعبر عن الجبنة ب B مثلا
و ال C يعني و
فا تبقي
b="cheese"
c="and"

to get:

b c meet c more b
وطبعا نفس الكلام عن الصور لانها بتتشفر بارقام

بطوط حبوب يقول...

مروه عندنا يا مر حبا يا مرحبا
على فكره انا كنت من خوفى عليكى هشيل التعليق اصلهم بيقولوا ان الى مركبش المترو هيسحبوا منه الجنسيه
ده طبعا يا بنتى 3 حاجانت بيميزوا المصرى عن غيره
شرب من نيلها
وجرب يغنيلها
وركب المترو فى عز زحمتها

بطوط حبوب يقول...

انا اتحولت رديت على مروه قبل الى فوق معلش اصل مروه ليها معزه خصه عندى - اصلها اول واحده علقت فى مدونتى - هههههههههههه

روزا شكرا لتشريفك مدونتى وفعلا الشعب كتير وكتييييييييييير واى بلاش حسد

بطوط حبوب يقول...

جمعاوى انا شفت مدونتك تحفه بجد ونورتنى فعلا ويارب ومتبطلش زياره ليا

بطوط حبوب يقول...

د ايه نورتى المدونه
مهو انا مكنتش عارف زيك كده انى كل يوم ببقى محمود .رار
وسلميلى على بلد الرار الى مررش لا

بطوط حبوب يقول...

رئيس جمهوريه انا جعان عندنا
اولا شكرا على المعلومه
ويارب متكونش اخر مره

بطوط حبوب يقول...

نورت يا عم محمد ( فضفضه) وتصدق برضه حكايه التلات ابعاد دى ممكنه انت فى بلد العجايب

khobayb يقول...

اسمحلي ..

أنت رائع

أسلوبك رائع وممتع للغاية وتشبيهك أروع

اسمحلي بإضافتك للمفضلة

Empress appy يقول...

والله انت غلبتنى فى اسلوب السخريه فى حياتنا وسلبيتنا اللى مش عاوزين نغيرها عارف بره مصر المترو مرسوم على الارض سهم داخل وواحد خارج يعنى باب وباب والناس واقفه فى نظام جدا ومحدش بيقع ولا بتعرر زى هنا فى مصر بس سيبك دى سلوكيات ناس مش كويسه وتحيا الزحمه ويسقط الصبر والنظام فى حياتنا
آبى المتغاظه المفقوع مرارتها

Dr.khaled يقول...

انته كنت من ضمن الملفات اللي اضغطت في المترو؟؟؟

على فكرة الدولة بتتجه حاليا لاستخدام برنامج الضغط الرهيب جدا
KBG Archiever
قريب جدا هتلاقي فكرته انتشرت :(

اتفضل هنا عشان طريقة وضع خطبة او ملف صوتي (وإن كنت أفضل انك متحهوش علشان في ناس بتحب تقرأ بس)
انا حطيته فقط لأمر معين
وهاشيله ان شاء الله انهارده
http://ta3leem-khaled.blogspot.com/2007/03/blog-post_109.html

Unknown يقول...

كان المثل زمان بيقول المضطر يركب الصعب
تم تعيدلة الى المضطر يركب المتروا
تحياتى

kareem azmy يقول...

ههههههههههههههه

بجد بوست رائع
انا قعدت اضحك قوي و انا متخيل نفسي كده و اني بقيت عبد السميه و داخل المترورار

تحياتي
كريم عزمي

t3ban يقول...

لست وحدك
عندنا في اسكندرية الترام رار
و في كمان العيش رار
و بالنسبة للمحدرات
مدرج رار
و استاد رار الدولي
و كل حاجة في البلد دخلتلها خاصية الرار

بطوط حبوب يقول...

خبيب
انت الى رائع وانت فى المضله كمان هههههههههههههه


----------------------------
ابى
واحنا نيجى جنبك فين؟

-----------------------------------

د خالد
الف شكر على المعلومه

--------------------------------
ايويه

فعلا احسن حاجه المضطر يمشى ويريح نفسه ههههههههههههههه

---------------------------------
كريم


نورتنى وشكرا على المجامله


--------------------------------
انوار
ما انا قلت اننا اول بلد نطبق نظام الرار كل سنه واحنا رار ورار ورارا

غير معرف يقول...

لانه جوه محدش بيعرف ابوه"

المترو ببساطه بيدخله جماهير الشعب المطحونه ليحولهم الى جماهير مصحونه

تحفه ...تصور انا برده كنت بفكر فى الموضوع ده بس الصراحه مش على المترو .. على الترام فى اسكندريه وتحديدا الساعه 2 ... ربنا مايوريك اللى بشوفه لما بضطر اسفه اركبه... وبعدين ليه مش بتنقل المواضيع دى هناك على 360 عشان نشوفها

بطوط حبوب يقول...

نورتى يا روز

Soooo يقول...

ده انا هقتل آآبي عشان لسه قايلالي على مدونتك وعلى الموضوع ده من يومين بس

احساسك ساخر مووووووووووووت
بجد مقارنه ولا اروع

هاروح اشوف باقي مواضيعك



سلامووووووووووووز

بطوط حبوب يقول...

سوووو

ربنا يخليكى دا من ذوقك
واقتلى اابى لو مصممه لانها مسمبيه عربيتها بطوط وانا بدور ع حد يقتلها فكويس ان جه متطوع