تاجات وربنا معانا

**ملحوظه مهمه اهم من البوست

انا مبعرفش اجاوب على التاجات وبحس نفسى غلس وانتوا بتحسوا انى بختصر الاجابه .. رغم انى والله مش بختصرها انا بس مببقاش عارف اجاوب.. انا مش بحلل شخصيتى ومبعرفش اتكلم عنها .. ومعرفش الناس بتبصلى ازاى؟؟ بس اعرف انى محبوب وسطهم.... بحس كده من عيونهم وكلامهم

مش بعرف اجاوب على الاسئله الى بتحطك فى موقف معين وعايزه تعرف تصرفك هيكون ايه ... لانى بتصرف بتلقائيه غالبا.. فممكن الاجابه تختلف باختلاف الوقت ..انا باختصار مبحملش هم فى حياتى والحياه سهله

نيجى بقى للبوست
دلوقتى انا عندى تاجات كتيره اوى اوى هو الحمد لله انهم متشابهين وتقريبا هم تلاته بس متكررين وانا هقول الناس الى مررت لى التاج والى انساه معلش انا اسف

سمسمه ( بحبك يامصر)

سارة على (براءه)

جاليرى

t3alo nfakr sawa

ومها زين ( انها الحياة)

نسيت حد؟؟ المهم انا هدخل كله فى بعضه وبعضه فى كله عشان اعرف اتهرب من اى سؤال

:)

اذكر 6 اسرار لا يعرفها من يقابلك لاول مرة

الى هيقابلنى لاول مره ممكن يفتكر ان نظرى ضعيف ... لانى لابس نظاره :)
بس انا نظرى مش ضعيف دا مينص نص وانا بلبسها بس عشان الكمبيوتر والوسامهD:

تانى حاجه للى هيقابلنى لاول مره وهى لا تقل اهميه عن الاولى ان الى هيشوفنى الصبح بدرى هيلاقى عينى خضرا وممكن يفتكر ان ده لو عينى الطبيعى .... بس احب اقوله ان عينى لونها بيقلب ( اه والله مش بهرج) وهى لما بصحى من النوم واوقات الاجهاد بتبقى خضرا انما هى عسلى D:

تالت حاجه لو حد قابلنى اول مره وقالى اسمه ... هيبقى فاكر انى خلاص عرفته .... بس لو سألنى بعد دقتيقن هيلاقينى طبعا مش فاكره ... لان ذاكرتى فى الحاجات دى ضعيفه جداااااااااااااااااا جدااااااااااااا D:

ايه تانى؟؟ ممكن اقوله للى يقابلنى اول مره بصوا فعلا معرفش الناس بتاخد انطباع ايه عنى اول مره بتشوفنى؟؟ انا بسيط جدا وسهل اوى انك توصل لاغواره

صعب اتنرفز ومش سهل ازعل

بحب الناس وسهل انك تحس بكده من اول مره

وببقى خجول لما بكلم ناس معرفهاش بس لو احنا فى جروب وانا اعرف كذا واحد ببقى عادى يعنى

بحب التهريج جداااااااااا جداااااااااا وبعض الناس - حتى الى يعرفونى كويس - بيتهمونى انى مستهتر من كتر التهريج بس اعمل ايه فى نفسى ..انا بحب الضحك ومش شايف ان فى حاجه ممكن تخلينى اضايق.. ومش بحب اقرف نفسى واشيل نفسى هموم قبل معادها

لما حد بيشوفنى مش قلقان قبل الامتحان , قبل النتيجه , او قبل اى حاجه مهمه بيتأكد بالنسبه ليهم شعور انى مستهتر او مكبر الجمجمه ....بس انا بقول لنفسى انت هتلقلق ليه قبلها لما يجى لا قدر الله وحش ابقى ازعل انما متقرفش نفسك دلوقتى ..ولما بيجى وحش بقول لنفسى ياعالم مش يمكن انت عملت احسن ما انت متخيل ..ولما بتظهر النتيجه بقول يعنى الزعل هيفيد بإيه دلوقتى؟؟ D:

الى بيناقشنى فى اى موضوع - وانا بمل من النقاش - ممكن يحس انى متفق معاه فى وجه نظره لسبب انى فعلا بزهق ومش بحب اتناقش - دا غير النت بالمناسبه بالى طويييييييييييل فى النقاش جدا ومعرفش ليه ؟؟

**********************************

من انت؟

تلاقى الاجابه فى شمال المدونه من فوق

بطاقتى الشخصية

اسمى محمود
طالب فى اخر سنه طب اسنان القاهره
ومن قويسنا منوفيه

تاريخ ميلادى 31/3/87

ماهى احلامك؟

حلمى ابقى كويس فى كل حاجه ........ وكويس جداااااا

من اقرب شخص ليك؟

كل اصحابى .. محدش عنده تدوينه منهم فمش هتعرفوهم فبلاش اكتبهم بقى D:

اية معنى السعادة ؟من وجهة نظرك حاسس انك سعيد ؟

السعاده انك تبقى راضى عن نفسك .. وحاسس ان ربنا راضى عنك

امتى حسيت انك ظلمت انسان ؟ولية ؟ محتاج للحظة غفران منة ؟

مفتكرش انى حسيت الاحساس ده قبل كده .. انا لسه

21سنه ملحقتش اظلم حد D:

بتعمل اية لما تكون مضايق بعد ما تصلى ؟

انا مش فاهم السؤال ... يعنى ايه مضايق بعد ما تصلى .. يعنى مكنتش مضايق وبعد ما صليت اتضايقت ؟؟ ده مش بيحصل
معرفش بس لما يكون مضايق بنام واهرب

امتى حسيت انك اتظلمت ؟ولية ؟

زى ما قلت انا لسه 21 سنه لا ظلمت ولا اتظلمت لسه بدرى اوى على الكلام ده - على فكره دى فلسفتى فى الحياه دايما بقول لنفسى كده يا بنى انت لسه بدرى اوى على ما تزعل .. وعلى ما تحس بالظلم والكلام الكبير ده

اية اكتر احساس بيراودك هذة الايام تجاة نفسك والاخرين ؟

احساس كويس

امتى ممكن تتنازل عن حق من حقوقك ؟ والسبب ؟

لو حسيت انى بخسر من اعصابى عشان اطالب بحقى اكتر من الى بخسره لما بسيب حقى ده

حلمى القديم

أردت أخيرا أن أتفحص كم الضحايا ... أن ابني لِهم الاضرحه .. أو أسلمهم لأقرب أهلهم .. وابني للباقي نصب اسميه الجندي المجهول

ِِ

أردت أن أتفحص كل شئ بنفسي .. انظر إلى بقايا المائدة المستديرة ..

انظر موقع الجريمة بنفسي لأحاسب المسئول الذي تسبب في كل ما أرى

في البداية كنت أظن أن سلاح الجريمة كان خنجر .. والمجرم راح يطعن به مئات الطعنات بين الضلوع...

حين رأيت الأشلاء في كل مكان فهمت أن سلاح الجريمة كان لغم مزروع

ليكن الكلام أكثر وضوحا فلست أحب الألغاز

فأنا أكلمكم ألان وأنا انظر لأشلاء قلبي

والتحقيق المبدئي أشار إلى انه كان انفجار لغم ...

أهذا يعنى انه كان في قلبي لغم ؟؟!! هل حبي لها كان هذا اللغم ؟؟!! ربما

هل كنت بهذا الحمق لأزرعه – في قلبي – بنفسي وأنا متعمد أن يملأ اكبر جزء من قلبي .. أن يتسرب داخل دمى

التحقيق المبدئي يشير أن بصماتى تملأ هذا المكان

لا يهم .. فألان كما قلت على أن اجمع الأشلاء .. وابني قبر الجندي المجهول

*******************************

أتفحص قلبي – مستودع ذكرياتي – هنا نعم هنا صوره لها وهى تتبسم .. وهى تضحك .. وهى تقول احبك

هنا مكان أحبه جدا فقد كانت تجلس فيه .. كثيييييييير من الذكريات أراها ألان رغم أنى أوصدت عليها الباب جيدا .. لكن الانفجار تسبب في فتح كل الأبواب

مئات الذكريات أراها ألان من قلبي .... مفتوح هو ألان .. مجروح بقدر تستطيع أن ترى من خلاله كل شئ

لذا فقد أحطته بشريط اصفر – كهذا الذي يطوقون به الحوادث – في الأفلام الاجنبيه

يافطة كبيرة مكتوب عليها .. هنا مسرح الجريمة ممنوع الاقتراب

*******************************

أما أنا ففي الداخل أرى وأتذكر ما لا أريد أن أراه ولا أتذكره ... اشعر بالحماقة اننى كنت محتفظ بكل هذا وبكل هذه الذكريات

هنا مكان كبير مخصص لأول مره قلت لها اننى أحبها ... وهنا مكان رائع يتحرك فيه لسانها بقول أحبك

اقرب بعض الصور أكثر .. كم كانت جميله في هذا اليوم .. رائعة في هذا أيضا .. سرقت لبى هنا .. و ...و..و.

لم اشعر برغبة في البكاء ... ولم اشعر بالحمق ولا بالغباء ... كنت اشعر ببعض الشفقة على قلبي ... لكن حين أرى موقف لها – داخل قلبي – ابتسم وأتذكر كل تفاصيله

*******************************

فجأه

اسرح بخيالي إلى ما قبل حبي لها .. أتذكر شيئا مهما جدا

قد كنت في الماضي ارسم صورا لفتاه احلامى ... أتخيلها ..بكل تفاصيلها ..شكل العينين , لونها , شكل الشفاه .. كنت ارسم صورا لكل هذا

كل المميزات التي أريدها .. وحتى كل العيوب

اسأل نفسي

أين هذه الصور؟؟

يفترض بها أنها موجودة هنا في – قلبي – في مكان ما ....... افحص كل الأشلاء ثانيه لكي ابحث عن ملفي القديم .. عن حلمي القديم

كم هو قاسى أن تعيش فقط وسط الذكريات .. حتى بدون أحلام

أفتش عن احلامى القديمة .. فما عدت قادر على صنع حلم جديد .. ليس امامى ألان إلا البحث

ساعات متتالية من البحث المستمر .. لم اصل له ...واشعر جدا بالتعب

يخطر ببالي أن اتصل بها .. فقط لأسألها هل رأت - وهى تجول في غرفات قلبي ذات يوم - حلمي القديم

فهي تعرف هذا المكان-قلبي - أكثر منى

قبل أن اتصل بها امسك قلما .. أحاول عابثا أن اعصر مخي لارسم وجها يشبه حلمي القديم الذي لا أتذكره

أتعمد أن اجعل العينين لا تشبه عينها .. الأنف .. الشفاه.. كل شئ

الصورة تشبهها تماما .. أمزقها .. أعيد رسمها .. مئات المرات.... مغيرا كل تفاصيلها

وبداخلي رغبة جادة أن اصل له بنفسي دون أن اضطر للاتصال بها

لكن لا اعلم لماذا – في كل مره - تشبهها من كل وجه

رغم أنى اقسم أنى متعمد أن ارسم صوره بعيده عنها

اعقد العزم أخيرا أن اتصل بها فقط أرجوها – بحق أيامنا الخوالي ... لا أن تعود لي – فقد صار هذا مستحيلا -.. ولكن فقط لتعطيني حلمي القديم

كأنى معرفتش

بصوا الموضوع بالظبط عامل زى إيه؟؟

زى واحد بيعدى الطريق السريع .. وهووووووووب خبطته عربيه .. بس العربية مش مخالفه السرعة .. لأ دي ماشيه عادى بسرعة الطريق - إلى هي سريعة أصلا -

أكيد طبعا الواحد ده أدغدغ حتت كل حته فيه أتكسرت والحمد لله انه مامتش أصلا

أول ما وقع على الأرض الناس اتلمت حوليه

كل واحد قال كلمه .. إلى قال يا بنى أنت مش تفتح وأنت بتعدي

هي روحك دي لعبه .. ازاى مشفتش العربية

المهم نقلوه المستشفى وجبسوه كله تقريبا وكمان هو لسه حاسس بألم في كل عضمه في جسمه

أهله وصلوا .. وهو تعبان جدا ..

أول كلمه قالتها أمه…حرام عليك يا بنى إلى بتعلمه فيا ده مش تاخد بالك

وأخته قالت .. يعنى ما كل الناس بتعدي الطريق وكل مره أنت بتعدي الطريق اشمعنى المرة دي

أخوه قاله .. يا سيدي المهم انك كويس .. بس ابقى خلى بالك بعد كده

دا غير عمه وعمته وباقي العيله والكل يدور حول .. أنت بيستهبل

هو نفسه حس انه كان بينتحر وكان قاصد يعنى .. هو نفسه حس إن هو إلى غلطان وهم كلهم ملهمش ذنب ..

هو نفسه قال.. أنا غلطان أنى كنت بفكر في مليون موضوع - بسببهم وبسبب غيرهم - ومخدتش بالى وأنا بعبر الطريق

يشعر هو بقمة الألم ألان .. محاط بألم الكسور .. لوم الآخرين له كأنه هو الجاني وهم مجني عليهم ( على الاقل هو الجانى والمجنى عليه برضه).. ألم عدم إحساس الناس بألمه .. وألمه النفسي انه مش قادر يتحرك

مجرم انه عبر الطريق من وجه نظر الجميع وكأنه كان قاصد يقتل نفسه

مجرم في نظر الجميع .. دون أن يسأل الجميع أنفسهم مش يمكن إحنا إلى ضغطنا على أعصابه لدرجه خلته

يسرح وهو ماشى في الشارع.. أو حتى ينتحر او بلاش احنا يمكن اتعرض لضغط نفسي في الشغل أو في اى حته تانيه

الطبيب أمره بملازمه السرير لمده طويلة

لاشئ يستطيع أن يصنعه لنفسه الأن فهو ملازم الفراش .. كل ما يفعله هو التفكير ..والتفكير ..ثم التفكير في كل ما حدث .. وما سيحدث

يسأل نفسه هل سيستطيع أن يعود كما كان؟؟ أم لا؟؟

في هذه اللحظات سمع كلام بعض الناس .. وعدوه بالوقوف بجواره حتى يعود لحالته وأفضل .. لكنهم لم يوفوا بوعودهم وتركوه عندما طال وقت شفاؤه .. رغم انه لم يطول أكثر مما حدده الطبيب من أول يوم

ضيفوا ده للآلام بتاعته

عندما تم شفاؤه - رغم انه مازال يعرج بقدمه .. ذهب لعمله ثانيا .. يتطلب عمله للوصول إليه إن يعبر الطريق

يشعر بالخوف ... لم يعد يتذكر انه عبر هذا الطريق مئات المرات سالما

لا يتذكر إلا انه عبر الطريق ..فحدثت له حادثه ..جعلته يلزم الفراش لوقت طويل.. وجعلت الجميع يلومه .. وبعضهم تخلى عنه

حين نجح في عبور الطريق لم يفرح!!

ولم يفرحوا له!!

فما فعله هو الطبيعي جدا فكل الناس تعبر الطريق سالمه .. وكل ما فعله هو تصحيح خطأ ارتكبه - عمدا كما يزعمون-

****************

أتذكر بعض الكلمات التي قالها لنا مدرس الأحياء في الثانوية العامة ( أنا بدرس لقمه الهرم بتاع الثانوية ) باعتبار انه بيدرس لطلبه علمي علوم إلى المفروض ينافسوا على طب وصيدلة والمفروض مجموعهم عالي في السما

كنت واحد من دول في قمة الهرم .. لم أكن يوما في قاعدته

هل نظرتم لقمه الهرم مره؟؟

انظروا لها .. بس كبروا حجمها .. هتلاقوها هرم برضه بس أنا في الهرم ده فين ؟؟ في القمة ولا القاع

****************

ظهرت نتيجة السنة دي

مفرحتش ؟؟ .. مزعلتش ؟؟

.

فما فعلته هو تصحيح خطأ السنة الماضية

لذا لم يفرح الجميع .. ولم يغضب احد ... وكأنها لم تظهر أصلا

****************

العام القادم اقسم أن اثبت فيه لنفسي اننى سأكون طبيب ناجح وما حدث – وتم إصلاحه - لم يكن أكثر من حادثه مهما كانت وجه نظر الآخرين

لم استطع جدالها

قالت لى " كل ما بيننا انتهى"

لم استطع ان جدالها

فقد كانت عندها اسبابها المنطقيه جدا ........ لدرجه انها اقنعتنى تماما

فكل اسبابها قالتها عندما قالت " تستحق ان تربط بواحده افضل منى "