أنا نازل أصلى الفجر أول امبارح
ونازل متأخر كمان يعنى بعد ما المؤذن أقام الصلاة
من باب قم للوضوء متى سمعت الاقامه
المهم المفروض الناس كلها تبقى جوه بتصلى مش المفروض أنهم واقفين ودام باب الجامع كده ولا إيه؟؟
ألاقى إيه
يجى نص الجامع واقف بره انا قلت هو كل الناس بقى بينفذ قاعده قم للوضوء متى سمعت الاقامه ولا ايه
وكلهم في صوت واحد أول ما شوفنى خارج من باب العمارة
دكتووووووووووووور محموووووووووووووود
أنا طبعا مصدقتش أنهم بينادوا على أنا فماشى عادى من غير ما أسرع خطوتي حتى ....... اصلهم مش كلهم سنانهم وجعتهم فى ساعه واحده دلوقتى
المهم بدأوا ينادوا بشكل أكثر هستيرية وأنا ولا فاهم
وصلت للمسجد إلى هوة قريب من بتنا جدااا
ألاقى الناس بتقلى ادخل يا دكتور بسرعة بسرعة
أنا؟؟
اااااااااااااااااااه
ليه؟ ( أنا بصراحة الفار لعب في عبي )
أنا قلت يمكن مش لاقين إمام مثلا فعايزينى أنا أصلى بيهم
دخلت المسجد بسرعة بقى وداخل على المحراب عشان أصلى بيهم كأنهم من غيري مش هيصلوا
ألاقى إيه
واحد مغمى عليه في المسجد وبيتشنج
أنا شفت كده ففهمت بقى إيه حكاية دكتوووووووووووور محمود دي
وطبعا أنا كـ طالب في طب أسنان ومش عارف هينجح السنة دي ولا لا ربنا يستر أول ما شفت الراجل تنحت
وده اعمله إيه ده أنا معرفش أتصرف
انا اساسا اول ما شفته وشى احمر واتخضيت الراجل شكله بيموت بيجد وانا معرفش اى حاجه عن الاسعافات الاوليه
وبكل حزم قلت......... ارفعوا رجله فوق
أنا قلت كده والله لقيتلك كام واحد مسكوا رجله ورفعوها
بلف يمين لقيتلك واحد ماسك موبايل وبيقولى خد اتصل بالإسعاف
قولهم أنا الدكتور محمود وعايز عربيه إسعاف حالا
( على فكره أنا مش بهرج والله حصل بجد )
قمت مسكت الموبايل مش عارف هقولهم إيه أنا لسه طالب وكمان اسناااااااااااااااان يعنى على الأقل مش هتصل بكل الثقة إلى الراجل بيتكلم بيها دي ....وأقولهم أنا الدكتور محمود ( تخن صوتك وانت بتقراها وقلها بكل الاطه )......
على الاقل هم ميعروفنيش ما أنا لسه مش مشهور اوى كده
قلتله استني وقمت واخد شبشبى وجارى رايح البيت
هم فهموا أنى هجيب الشنطه
إنما أنا رحت عشان اتصل بالإسعاف بس مش ودام الناس
اتصل مره
واتنين
وتالته إن حد يعبر اهلى محدش عبرنى
المهم نزلت تانى عشان الصلاة بقى
الناس لسه واقفة
أول ما وصلت كلهم سألوني إيه عملت إيه
قلتلهم اتصلت بالإسعاف بس محدش بيرد
ودخلت للراجل تانى
وعمال أقول في سرى أبوس ايدك فوق متفضحنيش
استر على إللهى يستر عليك
طبعا الناس قعدوا يدلكوا في رأسه ورجله عشان الدم يجرى وكمان لسه رافعين رجله
فين وفين لحد ما جه ابنه ( ابنه بالمناسبة دكتور ) وانتهت الحكاية والرجل فاق
وأنا اخدت شبشبى من سكات كده ومشيت ولا من شاف ولا من درى
وربنا ستر المره دى والحمد لله
ومن مكانى هذا احب اقول لاى حد عايز يغمى عليه
بلاش يعمى عليك جنب دكتور سنان
لانك هتخليه يقطع الخلف من الرعب ومش هينقذك وان حر
