سيبراتك يا مصر

لو كنت من الناس الى ابتلاهم ربنا والنت باظ عندك او لاى سبب بقيت تدخل النت من سيبر فالبوست دا هيعبر عن حالتك جدا ... اما اذا كنت من الذين انعم الله عليهم بنعمه نت فى البيت فانت هتعرف قيمه النعمه دى ..وهتصلى لربنا تمن ركعات شكر على النعمه دى كل يوم

وانا واعوذ بالله من كلمه انا فى الكام شهر الاخارى دول لفيت على سيبراتك يا مصر وشفت 

السيبر الى انا فيه دلوقتى اسمه فلكانو .. وانا مسميه افريكانوا ومعلق معايا اسمه كده

اجمد حاجه فيه ان فى ناس افارقه كتير جدا .. وناس مصريين ... ومن السيبرات القليله نسيبا الى بيبقى فيه بنات  ) انسات ومدامات

وكل واحد فيهم مثير للضحك بطريقه معينه

واجمد حاجه ان المعظم بيتكلم ميك .. ولأن انا من النادر جدا ان احط الهيدفون فى ودانى - لانى مبكنش بسمع حاجه - فبستمتع بالاستماع للصوات المتداخله والمتضاربه .

جميل جدا لما تبقى قاعد وبتسمع اصورات بكل اللغات ... وخصوصا الافارقه الى ببقى مش فاهم منهم اى حاجه 

من الذ الحكايات الى حصلت لى واحد مره كان قاعد جانبى .. وكان فاتح مواقع مش ولا بد ... ولان الاداره هنا بتمنع فتح المواقع دى فالراجل كان عامل فكره لذيذه ... مصغر الشاشه على الاخر .. وبيشوف بالمسطره حته حته لغايه ميكون الصوره فى ذهنه

المهم انا شفته ... فميلت عليه وحطيت ايدى على رجله كده وقلتله ... 

أل هو جوجل مش بيفتح ليه .... مش عايز اوصف لكم شكل الراجل بعدها .. انا خفت يموت وشه احمر وارتبك وقفل الشاشه بور من الربكه 

فقمت قلت له بكل غلاسه .. لأ خلاص فتح اهو شكرا

الراجل تلات دقايق ومشى .. اظن انه قطع الخلف بعدها .. احسن يستاهل

*******

بنت مره كانت بتعمل شات فى السيبر .. والبنت بصراحه قمر  .. بس أمر بالستر يعنى.. هى استغفر الله العظيم اقول ايه المهم وحشه جدا

كانت بتشات مع ولد .. ميك .. انا قاعد فى وشها وتقريبا الوحيد الى شايفها لان الراجل بيحاول يحط البنات فى اجهزه مش مكشوفه اوى

المهم صوت البنت بجد ما شاء الله حلو جدا .. وانا سامع الناس كلها عمال تتلفت وبتحاول تشوف مين البنت الى صوتها وااااااااااااااو دى المهم بقى انا الى ودمها وعارف

- وكله بيحسد العبد لله انه فى وشها - والعبد لله بيحسد الكل انهم فى ضهرها -

بتكلم واد شات .. والظاهر انه زى الناس فى السيبر مشفهاش قبل كده ... 

كلامها معاه ودرجه افورتها توحى انه عمره ما شافها

وده درس لازم يتعلمه اى شاب او فتاه وهو بيشات .. لو يهمك موضوع الشكل ... او لو الكلام اوفر .. انصحك تشوف الى بتكلمه ... او تستغفر ربنا من الذنب ده - لان كفارته صعبه اوى لو معايا صوره للبنت كنت عرفتك اد ايه عقاب ربنا اليم واتعظ يا شاب الموت الى بيجى فى لحظه -  لانى شفت بنفسى وكان نفسى اروح اكتبله يا عم حرام عليك روح كلم ابن عمك احسن..... ميبقاش حرام من الناحيتين على الاقل

**************

مره تانيه كان بنت برضه وكانت بتكلم خطيبها ... ودى انا مسمعتش غير جمله واحد وسرحت وتنحت وفضلت مسبهل

البنت كانت بتقول لخطيبها ...اصل انت بعيد عنى انما هو بيقرب منى ... وبيقولى الكلام الى ببقى نفسى اسمعه

انا تنحت وقلت تفتكر خطيبها هيبقى رد فعله ايه؟؟... بس واضح انه كان سبور

****************

الى قاعد جانبى كان بيشرب سجاير .. والدخان كان مضايقنى جدا 

المهم هو قالى هو حضرتك مضايق من الدخان؟؟

بصيت له وابتسامه تملا كل وجهى .... مضايق؟؟!! امممممممممم ومرضتش

الراجل فهم ... المهم قفل السياجره وبعد شويه ولع واحده تانيه

وبصلى وقالى .. حضرتك مش مضايق اوى صح؟؟

****************

مغامرات السيبرات اكتر من انها تتكتب فى بوست بس انا دول الى فاكرهم دلوقتى ولنا عوده

دعواتكم لان الانتحارات بدأت وأسف لكل الى مش بقدر ارد على كومنتاتهم ولا بتابعهم بس انتوا عارفين الظروف والسيبرات ... والخ

وشكرا لكل الى لسه بيكومنتوا عندى رغم غيابى عنهم

اهو كده وخلاص

فى ايه يا عم انت؟؟ ما تتلم بقى كده وتفوق .. هو كان حصل ايه يعنى؟؟

تعرف انا بدأت اتخنق منك بجد .. كدبت كدبه وصدقتها .. ثم بفرض ان كل الى بتقوله صح لما يبقى يحصل ابقى ازعل .. انما زعلان على حاجه مش اكيده ولسه فى علم الغيب وكمان مش هتحصل قبل سنه كامله؟؟

لا والمصحف ان كده مش بطوط الى اعرفه طول عمرى .. انت بطوط بتاع زمان بذمتك؟؟

خايف من حاجه مش بايدك فى كل الاحوال .. ويا عالم

ثم تعالى هنا يعنى انت عملت كل الى وراك وفكرت فيه اوى يعنى وعندك فراغ من التفكير قلت افكر فى مشكله لسه ياعالم هتحصل ولا لأ ولو هتحصل مش قبل سنه من دلوقتى

انت يا عم انت تعرف حاجه فى الكرون ولا السرجرى؟؟ دا انت حتى متعرفش هيذاكر منين السرجرى ده

طب بلاش دول تعرف حاجه فى الاندور او البروسيزس؟؟ على فكره يا معلم تالته ورابعه سنه واحده يعنى معاليك هتمتحن على كتب تالته ورابعه كمان وانت عمال تشيلى هم السنه الجايه

يا شيخ روح كده دا انت تقرف والمصحف

ولسه الاكس راى امتحانها بعد العيد .. والبيدو ... بس بس بس دا انت تحبط

عايز ايه ياد يا بطوط؟؟

عايز تعرف المشكله الى احتمال تحصل السنه الجايه هتتحل ازاى؟؟

هى هتبقى مشكله لو حضرتك شلت اى ماده اوبح؟؟

هى مش هتبقى بس مشكله هى هتبقى مشكله منيله بستين نيله حضرتك

يعنى تتلم بقى وتبطل تشخبط فى الكشاكيل والكتب بتاعتك كل ما ربنا يهديك وتيجى تذاكر ال ايه بتحل مشكله لسه محصلتش ولا انت عارف هى اساسا مشكله ولا لأ

لا والى يموت من الضحك انك رايح النهارده تشوف كتب الزماله؟؟

الطم على وشك .. طب زماله ايه والنبى وانت لسه وراك هم ما يتلم فى الكتب الى عندك

واد يا بطوط اتلم ابوس ايدك خلينا نخلص
انا لسه فى كلام كتير عايز اقولهولك بسبب الموضوع اياه ... بس انا مش عايز اسيح لك بس لو فضلت سايق العوج ده همسح بكرامتك البلاط
لانى زهقت منك بجد
انتهى وجتك القرف

حب ليس هو الحب

وكانت اول من رأت عينى فى هذا الصباح , تطل بوجهها الملائكى الذى دفعنى للنظر إليها متأملا هذا الجمال البديع الذى يطل من خمارها البنى فيظهرها رائعه الجمال.
على وجهها تعبيرات مدهشه , لا تستطيع تفسيرها للوهله الاولى , عيناها تشى بحزن عميق فى داخلها , لكنها سرعان ما تتبسم وكأنها تذكرت موقف ما.
جالسه هى فى ركن بعيد - حين رأيتها- كانت تكتب شئ ... دفعنى فضولى ان ارى كيف تكتب الملائكه.. تصنعت وكأنى اريد ان القى منديلا فى صندوق القمامه - القريب منها - حين اقتربت احمر وجهها خجلا .. فتضاعف جمالها وشدنى للنظر اليها اكثر.
استطعت ان ارى بلحاظ عينى شكل خطها .. صغير جدا وجميل ايضا ..لكنى لما استطع ان اقرأ حرفا واحدا.
إنصرفت بعيدا عن نظرها - اختلس اليها النظر ولا ترانى .
فجأه قامت ومزقت ما كانت تكتب ورمته فى الصندوق - ولعلنى لمحت دمعه على خديها - انتظرت حتى ابتعدت واخذت الورق -احاول ان اجمعه - بفضول طفل.
السطور القادمه هى ما وجدته فى الورقه.
كان مكتوب فيها
" الى صديقى .. رغم اعتراضى على هذه التسميه التى لم توجد قط فى قاموسى .. بل وارفضها كما تعلم صديقاتى - ارفض الصداقه بين الجنسين - لكنك جئت فى طريقى بمصادفه عجيبه لم اتوقعها انا نفسى , خطفت قلبى البك بطريقه لم افهمها حتى الان.
اريدك ان تصدق ان ما اكنه اليك "حب" نعم حب لكنه " حب ليس بمعنى الحب" لكنى احب ان اسمعك , احبك ان تتكلم - يعجبنى قاموس كلماتك التى تبدع فى اختيارها جدا - تدهشنى تصرفاتك , معك انسى نفسى , انسى همومى وأضحك معك من قلبى
صوتك قادر ولو بكلمه بسيطه فقط ان يخرجنى من حالتى النفسيه الاسوأ الى حاله من السعاده لا استطيع وصفها.
حين تنتهى المكالمه- التى اود الا تنتهى- اظل اتذكر بعض كلماتك وابتسم .. واضحك من القلب
انت الوحيد الذى اريد ان اعرفه جيدا , استمتع بمعرفه تفاصيله , فى داخلى فضول لإكتشافك وكأنك جزيره جديده وانا من سيكتشفها , استمتع باسلوبك فى صنع الحكايات , وبطريقك فى تعبيرك عن نفسك .
ارجوك لا تفسر - كل هذا - بأنه حب .. نعم هو حب "لكنه ليس هو الحب الذى هو الحب" , هو حاله من نسيان النفس معك .. ادركها واستمتع بها لكنها "ليست حب الذى هو الحب".
اتمنى وانت تتحدث الا ينتهى الوقت ابدا , اتمنى ان اراك واجلس معك اليوم كله , نتكلم عن اى شئ وكل شئ , اريد ان اراك تتكلم فى كل شئ استمتع بمجرد ان اراك تتكلم , واضحك من تعبيراتك التى تخترعها والتى لا تنتهى.
حين اهم ان اطلب هذا منك اتذكر سؤال سخيف بلا معنى .. بأى صفه؟؟ بأى صفه استطيع ان اجلس معك؟
الحب ؟!! قلت حبى لك ليس هو الحب .. الصداقه ؟؟!! ليست فى قاموسى -بين الجنسين - ولا فى قاموس اهلى واظنه ولا فى قاموسك.
اقع فى الحيره واسأل نفسى هل ستظل فى مكانك وانا فى مكانى مرتبطين بـ حب ليس هو الحب وبصداقه ليس كـ الصداقه؟؟.
امس حكيت لى ما حدث بينك وبين حبيبتك ... تمنيت ان اكون هى , قريبه منك بقدر قربها منك , غضبت منها لأنها اغضبتك , كرهتها .. وحين قلت لى انه خلاف عابر وانتهى ..احببتها لانها اسعتدتك.
غرت منها خوفا ان تأخذنى منك...وكأنك كنت لى.
فى المساء .. وانا على سريرى اتذكر كلامك حرفا حرف .. ابتسم حين أتخيل او أتذكر طريقتك وانت تحكى .

لكن امس توقفت فجأه عند سؤال ارقنى طوال الليل.
هل اخون حبيبتك؟؟ وقف السؤال علقم فى حلقى .. صدقنى لو كنت استطيع ان اقول لك - لأتخلص من هذا العلقم - لا اريد ان اراك , او اسمع صوتك لفعلت . احتاج اليك بشكل يشبه الحب - لكنه حب ليس كالـ حب.
روحى معذبه الان اكثر من الاول .. اسألك لماذا حكيت لى عن وجودها؟؟ أخاف اصبح خائنه لامرأه لا اعرفها .
ترى هل تقبل - وهى التى تراك وتجلس معك وتستمتع بك طوال الوقت - ان احبك حبا ليس هو الحب .. وان تحبنى حبا ليس هو الحب ... ان اكلمك واقابلك كلاما ليس هو الكلام ومقابله لا تعنى المقابله .. وان تصبح صديقى بطريقه غير تلك التى يعرفها الناس.
اريدها فقط ان تصدق اننى احبك نعم .. لكن ليس هو الحب .. اريد ان اشاركها فيك نعم .. لكن ليست هى المشاركه.
وهل يستطيع الناس فهم هذا الذى اتمناه ؟؟ ام ربما سنظل هكذا الى الابد

فقط اريد ان اقول لك
احــبـــــــــــــــــــــــك"

اكتب ثانيه بناءا على نصيحه سومه .. مجنونه فى بلد عاقل واتمنى ان يقدر الجميع غيابى عنهم وعدم تعليقى.

رحله

اليوم يبدأ من الساعه الثامنه

مشاعر كثيره  وافكار مضطربه ... حول ماذا سيحدث فى هذا اليوم؟؟!!

فى داخلى رغبه ان يسير هذا اليوم مختلفا ... مختلفا حتى فى القواعد والقيود والضوابط التى يجب ان تكون

وفى داخلى صراع  وهمى بين ( ما يجب ان يكون) وبين ( ما اتمناه ان يكون) ... افسر هذا الصراع بـ ( التعلق).. عندما تتعلق بشئ او بانسان بدرجه مبالغ فيها .... عندما تحبه وترتبط بكثير  من خصوصياته - التى يشركك فيها - تتمنى ان تُقوى علاقتك به اكثر ...

و

تتمنى ان تمتد خيوط الصداقه لتتحول من مجرد خيوط الى نسيخ قوى يصعب تفتته او

اختراقه .. يحيط بكم فى حاله من الحالات التى لا توصف بمجرد الكلمات

عندما تجد شخص تحترم عقله وفكره .. ثم تحب شخصه وتشعر بقربه منك ... تريد ان تجعله يقترب اكثر متجاوزا كل ( ما يجب ان يكون ) لـ ( هذا ما اريده ان يكون )ء

تتملكك الرغبه للفكاك من كل الضوابط التى تقيد هذا الذى تريده .. تلك الضوابط التى تقيد رغبتك فى تقويه علاقتك به

لتخرج بنتيجه .. ان ارتباطك بما تريد ان تفعله يحجب احيانا حتى صوت ضميرك .. لتجد نفسك لست مضطرا حتى .. ان تقدم الاسباب والمبررات للتتجاوز عقبه ضميرك التى تقف لك غالبا فى مثل هذه المواقف

رغم ان كسرك لقواعدك - التى يعرفها الناس عنك - هكذا .. مهما كان مبرره الداخلى لك .. يجعل بعض الناس يظن انك تغيرت .. او غيرت قواعدك.. ظنا منهم ان هذه اصبحت طبيعتك الجديده
لا يوجد - لديك - رد مقنع  غالبا .. اذ كل الاسباب ليست مقنعه لاحد غيرك...ولن تتخيل حتى ... ان البعض سيفكر فى هذا الا اذا قيل لك صراحه .. فكما قلت تعلقك ربما يحجب حتى صوت ضميرك الداخلى ..
اذا فهذه كانت افكارى فى الثلاث ساعات - هى طول طريق الذهاب-
فى الرحله نفسها .. لا يحدث كثير مما كنت اتمنى ... ولم تكن عندى الجرأه ان اطلبه

بعدها انتهى اليوم  سريعا.. وتبقت بعض الافكار التى كانت هى محور الحديث طول اليوم .. لاعيد ترتيبها فى ذهنى
انظر اى من هذه الافكار يستحق ان يستبدل افكارى .. واى منها هو محض خطأ وغباء من قائلها

انظر فى بعض افكارى التى كانت تملأ كيان فى عقلى اسميه ( غير قابله للنقاش ) ..لاكتشف انها ( قابله للنقاش ) حتى لو كنت مازلت مقتنع ان رايي هو الصواب .. لكن اكتشف ان فى الامر شد وجذب ما كنت اتلفت له سابقا


هذه اللحظه - تجميع وترتيب الافكار - هى الفحوى الحقيقيه من  مقابله شخص تحترم عقله وشخصه وله مكانه فى قلبك

رحله قصيره هى .. ولم تكن بقدر ما تمنيت .. اقصر مما توقعت .. لكنها وضعت امامى بعض الاشياء التى تستحق ان افكر فيها فيما بعد

فى النهايه ورغم كل ما كتبته .. مازالت رغبتى ان تتكرر - هذه الرحله- بالصوره التى تمنيتها رغبه ملحه .. حتى لو كان هذا خارجا عن كل قواعدى .. فكما يقال لكل قاعده شواذ ... وعندى رغبه ان تكون هذه شاذه قاعدتى  

البوست حاله تجمع بين الرمز والحقيقه ... حاول ان تفككه بطريقتك لتخرج منه بشئ بعيدا تماما عن معنى كل لفظ فيه ... فالبوست يجمع بين ما هو رمز وما هو حقيقى بطريقه ما وبين الذاتيه والحكى عن الغير
سيبك من كل ده المهم انت ايه رايك

وتأتى الافكار

سبحان الله بجد

لا فعلا سبحان الله .. لما ببقي فاضي ومش لاقى حاجه اعملها بحس بـ جفاف في الأفكار .... ولما أبقى مشغول وفعلا مفيش وقت لاى حاجه ... ألاقى الأفكار عماله بتتصارع في دماغي

طبعا أنا دلوقتى مش مشغول أوى كده بالدرجة إلى ممكن تبان من الكلام ... بس النت في البيت مقطوع .. وكمان كنا في رمضان ... وفى العشر الأواخر في اعتكاف ( رغم انه كان جزئي السنة دي بالنسبالى لظروف الكلية ) .. وكمان الشقة إلى في الدور التامن علوي أو التاسع من الأخر والى مجرد ذكر اسمها بتوجع كل عضلات رجلي

بس فعلا عندي رغبه كبيره في الكتابة .... وعندي استعداد انشر كل يوم بوست ... بس طبعا مش هينفع

مش عارف الرغبة دي وليده إيه؟؟ يمكن لأنكم وحشتونى أوى بجد .. وده بجد والله لانى مرتبط بناس كتيره هنا جدا .. والوقت إلى فات كنت بعيد عن متابعه مدونتهم بس يااارب يتلمسوا لي الأعذار

أو يمكن تكون الرغبة دي –  في الكتابة – وليده الوقت الطويل إلى الواحد بيقضيه في حاجات ملهاش لزمه ... وقت طويل في طلوع السلم مثلا

والى بيعملى حاله من هستيرية الضحك كل مره أطلعه فيها .. مش عارف ليه؟؟

بس هو ممكن يكون إحساس بالتخلف العقلي إلى خلاني اسكن في شقه في الدور التامن – آل من قله الشقق يعنى –

المهم بفضل طول الطريق

-إلى  بياخد في المتوسط من ساعة لساعة ونص :D-

 اضحك لدرجه انى بخاف السكان لو فتحوا الباب يفتكروني مجنون

إحساس في منتهى الروعة مزيج بين تعب الجسم .. وبين ادمانى لتحويل كل شئ غبى ورخم وسخيف إلى ماده من الضحك والسخرية

ويمكن عشان كده تروادنى مئات الأفكار في كل مره تصلح لعمل بوستات كتيره ربما انشرها في يوم من الأيام

أو ربما تكون تلك الرغبة – في الكتابة – وليده تلك اللحظة الرائعة التي ادخل فيها الشقة بعد عناء من يوم شاق في الكلية وفى السلالم

لأجد نفسي مرمى على أول سرير أشوفه -إلى هو في الصالة حضرتك حيث الصالة  اوضه نوم زى ما انتم عارفين- لأجد عضلات رجلي تعزف كل عضله منها على انفراد سنفونيه اااااااااااااااه

أما عضلات الضهر فتبدأ في عزف سنفونيه ياااااااااالهوى وهى سنفونيه – لمن لا يعرفها – أكثر آلما من الأولى

بعد ذلك يبدأ المشوار الأقل تعبا .... مقارنه بما سيأتي بعده

ألا وهو الطبيخ ... ولمن لا يعرفني ..فـ أنا لا أواجه اى مشكله في الطبخ ... المشكلة كلها تكمن في أنى بآكل إلى بطبخه .. والى بصراحة بيكون عقاب اليم يتعدى عقاب طلوع السلم والنزول منه

مشكله الميه إلى مش راضيه تطلع .. والراجل بتاع امن الكلية إلى نسى شكلي ... واحساسى انى أول سنه لي في الكلية – رغم انى في البكالوريوس بسبب نزولى السنه الى فاتت-... والمغامرات مع الزملاء الجدد ... ثم في النهاية شكلي الجديد – الله يسامح إلى كان السبب فيه – ولا الناموس إلى بيطلع الدور التامن أكيد مش كتير منكم يعرفه .... أو صاحبنا التالت إلى مقدرش يقعد اكتر من يومين وروح بتهم .... والتلاجه ام باب صغير زى العين السحريه

J

 كل دي حاجات إن شاء الله هكتب عنها

لكي اثبت لكم إن ... الحياة رائعة بكل معنى الكلمة ... وكل ما فيها مثير للضحك

وللموضوع بقيه بطريقه أكثر ترتيبا وبأسلوب أكثر بطوطيه بس مضطر اقفل الموضوع عشان الحق أروح أقرا بوستاتكم الاخيره ...

** بعض الناس لا يحب بعض البوستات الشخصية أرجو منكم أن تطلبوا منى التوقف إذا شعرتم بهذا

دعوتكم

الدور التامن ..... ان ان اااااااااااااااااه

طبعا انا مدين للكل بالاعتذار عن عدم متابعتى مدوناتكم طول الفتره الى فاتت .. بس طبعا انت عارفين ظروف رمضان.. وبصراحه انا كنت ناوى انى استمر فى الغباب لحد اخر رمضان بس حصلت ظروف هتخلينى اغيب اكتر من كده فقلت اجى اسلم عليكم واشرحلكم الظروف وهنيالك يا فاعل الخير والثواب

الموضوع ببساطه شديده هو انى بقالى فتره بدور على شقه .. مفروشه فى القاهره.. عشان بقى الدراسه
وكل ما اشوف حد اقوله ادعيلى انى الاقى شقه كويسه ورخيصه وقريبه وبنت ناس
وطبعا المعادله دى صعبه جدا .. واللمشكله ان معانا واحد كل ما نشوف شقه يقول ... لأ يا بطوط دى غاليه اوى .. عايزين حاجه ارخص.. وطبعا عينى وعينيه بتطلع فى اللف والتدوير والكلام مع السماسره


المهم بركه دعاكم .. وواضح انكم دعيتوا كتير اوى اوى خالص
لاننا لقينا شقه قريبه بالعرض .. بعيده بالطول

الشقه قريبه جدا من الكليه ( بالعرض)
انما هى  فى الدور التامن .. ومن غير اسانسير( ده الطول حضرتك)

فبعد ما عينى طلعت على ما لقينا الشقه ... دلوقتى بقى مش عينى بس الى هتطلع عشان اعرف اوصل للشقه
دا عينى ورجلى وكلى هيطلع اساسا

الموضوع
اننا رحنا للسمساسر قلنا طلبكم عندى
شقه شرحه وبرحه .. ومفروشه اخر احاجه .. وفى الدور الخامس .. ومش عايزه نص كلمه

يااااااااه ما انت كريم يااااااااارب اكيد دى بركه دعا امى

لتتحول الشقه البرحه الشرحه .. لشقه اوضتين ومفيش صاله
او صاله واوضه .. يعنى الصاله فيها سراير ومفروشه كأنها اوضه نوم
ويتحول الدور الخامس بقدره قادر ... الى التامن .. رغم انى مصمم انه العاشر

اتصل بامى اقولها تبطل تدعى .. هنروح فين تانى بعد التامن؟؟!!!
:)

بعد بقى ما اخدنا الشقه لقيت السمسار بيقلع كده الجلبيه فى الشارع
انا قلت هيعمل ايه؟؟
قالى يا دكتور عندى حبه وجعانى جدا متدينيش لها علاج

قولت له والله انا اسنان ... اسناااااااااااااااااااااااااان ....والمصحف اسنان .. لانى اتعقدت اسنان
قالى مهو انتو برضه بتبقوا عارفين

قلتله لا مش عارفين .. لما يجى دكتور محمد ابقى اسأله ( دا محمد زميلى .. بس ممكن يفتى شويه .. اهو يعرف اسماء ادويه على الاقل 

المهم طبعا الشقه مفيش فيها كمبيوتر ..واكيد انا مش هنزل ال 8 ادوار عشان اروح نت  .. انا اه بحبكم بس الصراحه مش للدرجاى


:)

اضافه ان السنه الجايه دى بجد بتمثل لى اهميه خاصه .. ويكاد يكون متوقف عليها انا هشتغل دكتور .. ولا هشتغل اى حاجه تانيه
وده بجد

دعواتكم لى فى العشر الاواخر بقى جامد
وربنا يعينكم يااااااااااااارب
وان شاء الله هتواصل مع الناس الى اعرفهم بس هبقى مقل شويه سامحونى ... وبنا تليفونات للناس الى اعرف رقمهم .. والى عايز رقمى يبعت ميل بقى :)

سلام 
 

عن ( لعلكم) اتحدث

اعوذ بالله من الشيطان الرجيم

يَا أَيُّهَا الَّذِينَ آَمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ

البقره 183

اختلف العلماء فى تفسير

( لعلكم تتقون )

وأعجبنى (تفسير الزمخشرى) قال

الصوم عبادة قديمة أصلية ما أخلى الله أمّة من افتراضها عليهم ، لم يفرضها عليكم وحدكم { لَعَلَّكُمْ تَتَّقُونَ } بالمحافظة عليها وتعظيمها لأصالتها وقدمها ، أو لعلكم تتقون المعاصي ، لأنّ الصائم أظلف لنفسه وأردع لها من مواقعة السوء . قال عليه السلام : فعليه بالصوم فإنّ الصوم له وجاء " أو لعلكم تنتظمون في زمرة المتقين ، لأنّ الصوم شعارهم أ.هـ

فقط اردت ان ألفت نظرالجميع - ونظرى قبلكم - ان بعد ( كتب عليكم الصيام ) التى نعلمها - وسنفعلها ان شاء الله - جميعا ... ( لعلكم تتقون ) التى ننسى تطبيقها

الله المستعان

ولتوضيح المعنى اكثر

عن أبي هريرة رضي الله عنه قال قال النبي صلى الله عليه وسلم : من لم يدع قول الزور والعمل به فليس لله حاجة في أن يدع طعامه وشرابه رواه البخاري

(صحيح)

وروايه النسائي من لم يدع قول الزور والجهل والعمل به
**********************************************

وعن أبي هريرة رضي الله عنه أيضا قال قال رسول الله صلى الله عليه وسلم :
قال الله عز وجل كل عمل ابن آدم له إلا الصيام فإلي وأنا أجزي به والصيام جنة فإذا كان يوم صوم أحدكم فلا يرفث ولا يصخب فإن سابه أحد أو قاتله فليقل إني صائم إني صائم

(الحديث صحيح رواه البخاري واللفظ له ومسلم)

**********************************************

وعن أبي هريرة رضي الله عنه قال قال رسول الله صلى الله عليه وسلم :
ليس الصيام من الأكل والشرب إنما الصيام من اللغو والرفث فإن سابك أحد أو جهل عليك فقل إني صائم إني صائم

(حسن )

**********************************************

وعنه رضي الله عنه قال قال رسول الله صلى الله عليه وسلم :
رب صائم ليس له من صيامه إلا
الجوع ورب قائم ليس له من قيامه إلا السهر

(صحيح على شرط البخاري)

وروايه البيهقي .. رب قائم حظه من القيام السهر ورب صائم حظه من الصيام الجوع والعطش

( حسن صحيح )

*********************************************

ولا ننسى حديث

زيد بن خالد الجهني رضي الله عنه عن النبي صلى الله عليه وسلم قال من فطر صائما كان له مثل أجره غير أنه لا ينقص من أجر الصائم شيء

( صحيح)

اللهم بلغنا رمضان .. واغفر لنا فيه

حقك على راسى

قابلت النهارده خالد همس الاحباب وسكر

وقبلهم شفت التعليقات الى جت لى على البوست الى فات

وفى الوسط التعليقات والحوارات الى جت شات

ولأنى بحترم كل الى بيدخل هنا قررت اشرح الى كنت عايز اقوله فى نقط

وياااااااارب اعرف اوصل الى عايز اقوله وكمان ده يمكن يعرفكم بيا اكتر

خالد قالى ان بعض الناس افتكرت من اسلوب البوست ان يوم اسكندريه انا محبتهوش

واكدت له واقسمت له- والقسم عندى غالى- ان الكلام ده ملوش اى اساس من الصحه.. وانى استمتعت جدا

قام سألنى سكر وقالى امال بس ايه الى انت كنت كاتبه ده

قلتله انا نقلت للناس مشاعر واحد بيكتب بقاله سنيتن و اول مره اشوف مدونين فى الواقع

الناس كانت تلات اقسام من وجه نظرى

ناس مش متابع مدونتها اوى( عرفتها لاول مره .. شخصيات زى العسل وتدخل القلب بجد)

ناس متابع مدونتها وشفت لهم صوره( اجمل بكتير من الصوره .. وسعيد اننا بقينا اقرب)

ناس متابعها اوى وعمرى ما شفت لهم حتى صوره( اتفاجأت بيهم)

وقلت انطباعى كل كل فئه من دول

يمكن مكنتش موفق فى اخيار لفظ "صدمه" .. الى كنت اقصد بيه مفاجأه كبيره

زى لو لقيت "عادل امام " ماشى فى الشارع واجاى ياخدك بالحضن ويبوسك .. وينادى عليك باسمك .. تتصدم .. تتفاجأ .. تتـ .... مش عارف

اهو هو ده الشعور الى كنت بعبر عنه بكلمه "اتصدمت" على اعتبار انه شئ مش متوقع

اليوم كان ممتع فعلا وحكايه النوم والكشرى واسكندريه الصغيره

دى .. كانت تهريج كنت بقوله طول اليوم معاهم والى حضر طبعا فهم

بس والله -غير حانث - فعلا انا استمتعت وانبسط باليوم ... وزعلت انى معرفتش انقله لكم بالشكل الى كنت عايز اقوله

*****************************************

التدوين من وجه نظرى فى كلمتين اتنين بس ... قول الى انت عايزه

قول الى انت حاسه

ملكش دعوه برأى حد غيرك ... ومتقلش كلام انت مش مصدقه ... (كوبى) الى انت عايز تقوله بالظبط ومن غير تذويق ... واعمل له( بست )فى المدونه

التدوين من وجه نظرى هو تأريخ لبعض الاشياء الى عايز آأرخها... يمكن بعد عشر او عشرين سنه احب اشوف انا كنت بفكر ازاى فى الوقت ده

عشان كده بضحك احيانا .. وببكى احيانا ... وبشكى احيانا .. ومش واضع نفسى فى اطار

هقول هنا ان انا بحب ... وهقول بطلت احب ... وهقول نفسى الاقى حد احبه

هقول انا عايز ايه احيانا ؟؟ ... وهضحك على حاجات عملتها غالبا لانى بحب اعمل كده

المدونه يهمنى فيها انى اكون صادق ... لانى بكتب لنفسى .. وبحب اوريكم الى كتبته لنفسى ده

وببقى سعيد انى اسعدكم ....او انكم تحبوا الى بكتبه

******************************************

احيانا بفشل زى البوست الى فات

واحيانا بنجح زى البوست الى قبله

وفى كل الاحوال انا بجد بحبكم كلكم وبحترمكم ومش عايز حد يزعل منى

*************************************
بعض الناس غضبت من الجمله دى

غالبا إن شاء الله هاجي يوم الساقية لانى هكون يومها في القاهرة ... وغالبا برضه هيكون أخر لقاء تدويني هحضره .... لانى مازلت اشعر إن العلاقة عبر الشاشة لها مميزات تفوق ميزه أن تقابل أشخاص رائعين كالذين قابلتهم أمس

ورغم اننى لا افهم وجه الاعتراض فيها ... واظنها ايضا حريه شخصيه

لكن بالفعل هذا قرار ليس نهائى.. حتى انا قلت " غالبا " مش اكيد

وكمان ملوش علاقه بموضوع اسكندريه خالص بجد والله

وسكر قالى النهارده مش هتقدر متجيش

:D

*****************************************
الى زعل من الصوره بقى حقه على راسى

كوفى شوب , وقلعه وبس

ملحوظة مهمة جداااااا جدااااا
كلمه "صدمه" في البوست مش اقصد بها معنى سلبي إنما أعنى أنها كانت مفاجئه لي جامدة , مخالفه لتوقعي , سببت لي اسبهلال

في أول لقاء تدويني أكتشفت حاجات كتيره جدا
في البداية اكتشفت مثلا إن اسكندريه صغيره جدا ( عبارة عن كافي شوب , وقلعه , وطريق يوصل بنهم .... وفى الطرق ده مطعم , وعزه بتاع الايس كريم )
رغم انى كنت متخيل إنها كبيرة بس سبحان الله الظاهر إنها كشت!!!

اكتشفت كمان إن الكشري بيتاكل بالكبد ... تقولي ازاى أقولك معرفش بس هو لذيذ الصراحة

اكتشفت كمان إن عزه بتاع الايس كريم المانجه والفراولة بتوعه روعه إنما اللبن مش حلو أوى
اكتشفت ان فى لقاء المدونين مفيش فقره نووووووم.. وفضلت كده نايم اكلينكيا طول اليوم


اكتشفت إن اكتر الناس إلى مكنتش متابع مدوناتهم – او متابعها مش بانتظام - هم اكتر ناس كنت مبسوط انى قابلتهم .... يمكن لانى محصليش صدمه لما شفتهم ... ويمكن كمان عشان أنا أصلا مكنتش حاطط لهم تصور في دماغي وطلع غلط .... فقدرت بسرعة أتعامل معاهم وأحبهم
أفضل مثال لده هو سووووو عجوز عنده 30 سنه .. إنسان بيدخل القلب من غير استئذان ( أبقى استأذن يا كابتن بعد كده)... واكيد احنا بقينا اصحاب رغم ان فيه عيب كبييييييييير اوى .. انه يعرف د عواطف بس انا موافق اخده على عيبه :D
وطبعا شيماء سيمر صاحبه مدونه احتمالات .. وأحمد فهمى والباشمهندس محمد حسن وسكر إلى كنت متغيب عن مدونته بقالي فترات طويلة

اكتشفت إن الناس إلى شفت صورتها - قبل ما أشوفهم شخصيا - كانت أجمل بكتييييييييير في الحقيقة
يمكن لان عنصر المفاجأة كان اختفى .. وفضل الحب النابع من احترام دماغهم وقلمهم أوى
زى .. وروز (د سميره) " بس قافله صفحتها دلوقتى".. وهليوم(د ايمان).. ولماضه (د مروه) بجد حسيت انهم اجمل بكتيييييير لما شفتهم شخصيا.



اتصدمت في ناس كنت اعرف مدونتهم ومتابعهم أوى أوى .. كنت متخيلهم بشكل وطلع تخيلي غلط خالص
ده سبب لي صدمه.
وبصراحة مش عارف طلعوا أجمل ولا أوحش من الصورة إلى كنت متخيلها لهم؟؟ لما افوق من الصدمه ممكن اجاوب
بس هم طلعوا حد تانى غير إلى اعرفه وخلاص ( دول معظم الناس ماعدا إلى قلت أسمائهم قبل كده)

اكتشفت إن القاعدة إلى فوق مش دائمة
مها زين كسرتها .. لأنها طلعت زى ما كنت متوقعها مع اختلافات بسيطة تخليها أحلى وأجمل

اكتشفت انى سببت صدمه لبعض الناس .. ومقدروش يجيبوا اى سبب مقنع يخليني أسمى مدونتي اسم بطوط حبوب
وطلبوا منى أغير اسمها
أنا عارف إن الصدمة كبيرة أوى وخصوصا انك تجيب سبب إنى اسم نفسي بطوط حبوب
أنا أسف ليكم بجد أنا كمان أتسبب لي صدمه من بعض الناس ومقدرتش اربط بين صورتهم واسمهم وأسلوبهم ومش عارف لحد دلوقتى ... ومش عارف هعرف امتى ؟؟ ولا مش هعرف حتى ؟؟

الحكاية عامله زى ما تشوف ( بعينك) ضريح للشيهد ميكى ماوس في السعودية
فتفضل تسأل نفسك هو في السعودية في اضرحه؟؟
وميكى ماوس استشهد؟؟
أظن انك مش تصدق عينك رغم إنها عينك
يعنى أنا بكتب بقالى سنتين واكتر بنفس الأسلوب والطريقة والاسم .. وناس تانيه برضه نفس الكلام
ورغم كده أنا والناس ممكن نكون أتصدمنا في شكل بعض وحصلنا نوع من الاسبهلال
وفضل السؤال الى بيدور فى اذهان البعض ( علاقه الشكل بالاسلوب باختيار الاسم)؟؟
*******************************************
وبعد اليوم ما خلص
قعدت مع نفسى( وخصوصا بعد ما ساجى جاله تليفون واتخنق بس الحمد لله بقى كويس)
لما قعدت مع الناس وبعد كم المفاجآت إلى شفته النهارده
حسيت انى عايز اسأل نفسي أنا مين؟؟
إيه هي حدودي ؟؟ وإيه هي نظرتي – أنا –لنفسي ؟؟
ببساطه أنا عايز أكون إيه؟؟ وفى كل حاجه
فى دراستى ؟؟ فى التزامى ؟؟ فى طريقه تعاملى مع الناس ؟؟ تفكيرى ؟؟ وفـ كل حاجه عنى
واظن ان الفتره الجايه لازم اقعد ادور على اجابه لده

غالبا إن شاء الله هاجي يوم الساقية لانى هكون يومها في القاهرة ... وغالبا برضه هيكون أخر لقاء تدويني هحضره .... لانى مازلت اشعر إن العلاقة عبر الشاشة لها مميزات تفوق ميزه أن تقابل أشخاص رائعين كالذين قابلتهم أمس

بس
### والله بجد اليوم ده كان يوم رائع وكل الناس الى كانت فيه كانت جميله .. ومش بجامل والله
وكل الناس اتبسطت لما شفتهم

خصوصا فاتيما الى تحس كده انها حد قريب منك اوى
وابو خالد الى الواحد مدين له بشكر خاص
وخالد همس الاحباب الجدع جداااا جداااااا
وناس كتيره اوى والله كان نفسى اشوفهم من زمان وكويس انى شفتهم

###

عريس؟؟.. يبقى سيبونى عليه

الموضوع فعلا بسيط يا اخونا بس لازم تمشوا على القواعد

وبما ان انا الكبير ... فكــ واحد خبره فى الموضوع ده قلت لازم اكتب خبراتى عشان مبقاش حرمتكم من اى حاجه

طبعا لان اختى بتتخطب من وانا فى اعدادى(فى كليتنا قبل سنه اولى) .. فكونت خبره من ازاى تتعامل مع الخطيب الجديد.
ضيف لده جه لاختى من اول عم عبدو البقال .. لحد سفير مصر والسودان وعشان كده جت اول قاعده

اولا : المعاد لازم يكون بعد صلاه المغرب

تقولى ليه؟؟ .. اقولك انا

لو طلع العريس يخنق وملوش اى لزمه فتقوم انت تنقذ اختك او بنتك
وتقوله .... ما تقوم نلحق صلاه الجماعه

طلع العريس فله وشمعه منوره.. تقول لنفسك ... وقت العشا ممتد

وطبعا ده مفيد عشان تبتذ اختك ..
تبصلها كده بطرف عنيك وتقولها ( كله بالعين) .. والله اسيبك قاعده معاه- دا لو انت شايفها مخنوقه يعنى -

تقوم هى بطرف عنيها برضه تقولك .. والله هتشتغلك خدامه لمده اسبوع بس خلصنى منه خد دهبى وفلوسى وجوهراتى ومشى الراجل ده

تقوم انت تقولها .. انا بقول نديله فرصه

تقوم هى ( كله بالعين ) تقولك هولع فيا وفيك وفيه لو ما مشتهوش من ودامى حالا

وتبدأ المفاوضات العينيه - نسبه للعين - بينك وبنها وممكن تاخد منها امتيازات كتيره جدا

طبعا لو حاسس انها موافقه ممكن تقولها بالعين برضه.. انا بقول نروح نصلى

ثانيا : تقعد انت يا بوب - لو كنت اخوها او يا عمو لو كان حضرتك والدها - الاحترام حلو برضه - ودام العريس بالظبط

وتستمتع بقى بانك تبص له وهو بيحاول يبص بطرف عينه ليها وانت بتكلمه

صدقنى احساس بالغباء لا يوصف ..

ثالثا: اياك تقع فى شر اعمالك

مره جه لاختى عريس ماشاء الله ولا قوه الا بالله

هو طولى حوالى اربع مرات والعرض عرضين ... اساسا هوا الكلام وهو خارج من بقه ممكن يكسر الشقه

وكان بيتصل ياخد معاد .. بس صدقونى انا لو فى نص جسمه .. عمرى ما اخد معاد انا اجى وافرض شروطى كمان

هو اتصل بينا .. ممكن اكلم دكتور محمود

المهم خد معاد .. وانا معرفش انا هشوف ايه بقى

جه اليوم الموعود .. دخل وانا قاعد كمشان فى الانتريه .. لا بنطق ولا بتكلم

دخلت ماما يومها .. قعدت تتكلم معاه .. ( رغم انى الطبيعى لو حد مش عارفينه زى ده انا بتكلم معاه الاول وبعدين بقى يتكلم مع اختى وكده) انما انا بصراحه خفت اقول كلمه كده ولا كده يقوم يطربق الشقه

امى عماله تتكلم .. وانا عمال اتوسل لعم عصام ( امام المسجد ) - فى سرى -انه يأذن العشا بقى

خايف امى تغلط بكده ولا كده يقوم يكسر عفش البيت كله بقبضه يده

المهم بعد ما مشى اختى قالت طبعا مستحيل اتجوز ده

قلتلها ايه ؟؟ بتهرجى .. وده مين هيقوله انك رفضاه .. معنداش بنات تقول لأ .. هتتجوزيه يعنى هتتجوزيه

اختى قعدت تبتز فيا .. مش انت الى بتعمل وتسوى وتقول .. روح بقى يا فالح قوله اننا مش موافقين .. خليه يعجنك

انتى بتتكلمى بجد يا حبيبتى ونور عينى.. هوا انا ليا اخوات غيرك .. دا انتى الشمعه .. اطلبى اى طلب الا انى اقف ودام ضلفه الباب ده واقول لأ

انا كده بجرح كرامته ورجولته .. ومعرفش هو ممكن يعمل ايه.. تسيبى اخوكى ودام القطر يا مفتريه

صدقونى الراجل ده اتصل وقلتله وانا برتعش اننا رافضين .. بس لو كان جه وسألنى وجه لوجه .. كنت هجوزهاله ان شالله يحصل ايه

رابعا : مش كل الناس بتفهم

فى عريس مثلا جه لاختى .. معرفش اساسا جاى ليه؟؟.. اولا من غير ميعاد .. امى كانت فكراه من شكله كده واحد صاحبى بيته قريب مننا.. فمش لابس لبس خروج يعنى

فدخلته .. انا معرفوش .. لقيته

بدأ بمقدمه .. طبعا انا عارف ان الانسه ما شاء الله جميله ومن بيت كريم ومن عيله .. واخواتها ما شاء الله يشرفوا .. واعمامها حاجه ترفع الراس فعلا ما شاء الله .. وخالها فعلا ربنا يخليه لكم

شوفوا بقى كل المقدمه دى .. يعنى عارف احنا ايه كويس اوى اهو

كنت عايز اقوله طب بذمتك انت ؟؟ ايه المبرر ان احنا نوافق عليك؟؟

فعلا فعلا مفيش تكافئ تماما.. بس اديه بيحاول

والغلاسه بقى انه اترفض تلات مرات .. اخرهم الجمعه الى فاتت

خامسا :سيب اختك تتكلم مع العريس
عشان تعرف انت تشرب العصير وتاكل فاكهه من بتاعه الضيوف
:D

سادسا : عيب اختى انها بتدور على حد بعقلى وذكائى ووسامتى وعبقريتى واخلاقى وتربيتى
... رغم انى غلبت اقنعها ان مفيش زيي بس مش عارف اعمل ايه؟؟

متنسوش تدعولها ربنا يرزقها بحد كويس عشان هى تستحق بجد
ربما للحديث بقيه
:D
الموضوع كان المفروض غير كده نسبيا بس الرقابه حذفت منه معلش

يوفوريا

عشان تفهم العنوان لازم تتبع القواعد بالحرف

اولا لما اقولك اتخيل لازم تتخيل .. يعنى لو قلتلك اتخيل ان عندك امتحان اكس راى متقولش انا متخرج من تجاره بقالى عشرين سنه اتخيل ده ازاى

مليش دعوه قلتلك تخيل تبقى تتخيل لكده لا مش هتفهم

انت لازم تحط نفسك فى الموقف
تخيل انك بتحب بنت , بتحبها يعنى بتحبها , وتخيل ان البنت دى اجمل واطيب وارق بنت فى الدنيا .. مش عشان انت بتحبها انما دى الحقيقه وتخيل ان البنت دى كمان بتحبك وبتموت فيك .. وطالما انت كده كده بتتخيل ..تخيل كمان انك متقدرش تستغنى عنها .. انك لازم تشوفها كل يوم ولازم تسمع صوتها وزياده فى التخيل تخيل انك بقالك يجى اسبوع او عشر تيام مشفاتهاش _ كأنها اجازه عيد الاضحى يعنى – وانك نفسك بقى تشوفها وتقولها مليون بحبك ومليون بموت فيكى ونفسك اساسا تخدها فى حضنك بس الظروف


ضيف لكل ده انك بقالك يومين منمتش كويس .. وكمان عرفت ان فى امتحان اكس راى الصبح .. وانت اساسا متعرفش الاكس راى دى اسم ماده عندك بجد ولا بيستهبلوا ؟؟ ولا تقريبا اسم مرض ولازم تذاكر اعراضه وعلاجه الله اعلم
تخيلت كل ده مع بعضه؟؟
طب ضيف انك جيت متأخر للكليه ومش هتعرف تشوف حبيبتك – الى انت تخيلتها- قبل السكشن .. وان فى محاضره مهمه جدا لازم تحضرها وده معناه انك مش هتعرف تقعد معاها .. قشطه؟

تخيل بقى ان السكشن اتلغى وانك خلاص بقى هتشوف حبيبتك .. وكلك سعاده واحساس بالنشوه العامره رغم الاخبار الكئيبه الى سمعتها الصبح ( خبر الامتحان يعنى )

تخيلت كل ده ماشى ندخل بقى على البوست

ازيك يا حبيبتى وحشتينى والله جدا جدا جدا

والله وانت كمان

عملتى ايه فى الاجازه

ياااااااااه دى حصل فيها احداث كتيره

ازاى؟؟

اول امبارح جه واحد اتقدم ليا

يانهار ؟؟

هى ماما موافقه عليه جدا .. ولما كلمتها عنك وقلتلها انى بحبك زعقت فيا .. وعيطت .. وقالت كلام كتير اوى .. اصل انت متعرفش ماما بتكرهك اد ايه

اممممممممممممممم وبعدين

هم قروا الفاتحه .. وتقريبا اتفقوا يجيبوا الشبكه بكره

نعم؟؟!! انتى بتقولى ايه .. بتتكلمى بجد؟؟ انتى اتخطبتى

اكيد هى بقى هتعيط

ودامك حل من اتنين اما انك تهون عليها وتفهمها ان ارتباطكم اصلا كان صعب .. وده هيخليك عايز تولع فى نفسك لما تروح لانك معرفتش تعبر عن غضبك

واما انك هتقولها انتى كده بتخونى .. ومتحاوليش تقنعينى ان فى بنت بتتخطب غصب عنها .. وانك لو بتحبينى هتقدرى تقفى ودام الجن الازرق ان شاء الله نتجوز واحنا عندنا 60 سنه ..الى بتقوليه اسمه خيانه بكل المقاييس .. تبقى معايا من يومين وتقوليلى بحبك ومقدرش اعيش من غيرك والنهارده تقوليلى انهم قروا فتحتك وانتى معرفتيش ترفضى ؟؟ هنستهبل ؟؟

فى بقى احتمال تالت خالص وهو ده الى يخصنى فى البوست ده

انك تصاب بحاله من اليوفوريا .. الى هى ..هستريه ضحك غريبه .. متفهمش هى قالت لك ايه بالظبط؟؟

تقعد تكلم نفسك .. هى قالت لى انها اتخطبت ؟؟ طب ازاى؟؟ والكلام والـ.......الى ... يعنى هي.... وبعدين هـ....... طب ازاى؟؟

تفضل باصص ليها عشان تقولك الفقره دى اتصورت عايز تذيع قول ذيع؟؟ وتمد ايدك على شعرها عشان تشيل الباروكه وتقولها اتطلع من دول يا ابراهيم يا نصر

وبعيدين تسيبها وتمشى وانت هتموت من الضحك

اول حاجه هتعملها لو تخيلت انك تصرفت التصرف التالت - غالبا هيكون - انك تتصل باقرب واحد لقلبك وتحس انه هيفهك فى الوقت ده

تقلب فى ارقام الهاتف وتتصل بحد فعلا .. تفضل تكلمه وانت مش عارف انت عايزه يقولك ايه؟؟

بعد شويه هتقرر انك تروح تاكل فى محل نضيف من باب ان تحس انك حد محترم .. او حاسس ان ده هيديك فرصه للتفكير فى الى حصل بالظبط

هينصحك صديقك بانك تطلب كوردن بلو - غالبا - وغالبا هتبقى طالباها معاك فلسفه

فهتقول هى كوردن بلو معناها ايه؟؟ كوردن ازرق

اظن مفيش ازارق من كده

لو سمحتى عايز كوردن فرى فرى بلو ولو فى اسود هاتى

هى دى اليوفوريا حد فهم حاجه؟؟

سؤال البوست بقى .. اذا كان حبيب حبيبى حبيبى .. يبقى خطيب حبيبتى ايه؟؟
التعليق اسفل البوست مش ... الى توجه مشكله فى التعليق يراسلنى رجاءا على batoot_dnt@yahoo.com

خبر حلو .. والتانى على حسب

اعزائى المدوينين عزيزاتى المدونات ( حلوه الدخله دى ؟؟)

{عندى خبر حلو} ... و{خبر مش حلو, أو يكاد يصل لوحش عند البعض} ...... وقد يصل لروعه عند الاخر ..... ويبقى الاتنين- عنده - حلوين

ابدأ بأى واحد الاول ؟؟

انا بقول اخلى الحلو للاخر

الخبر الى على حسب ... ان اعمال السنه الى فاتت يا حلوين خلاص هترفع ... ومفاضلش غير اسبوع ... ربنا يٍطّلع على اعمال العباد فى الشهر ده

عن أسامة بن زيد رضي الله عنهما قال

قلت يا رسول الله لم أرك تصوم من شهر من الشهور ما تصوم من شعبان.. قال ذاك شهر يغفل الناس عنه بين رجب ورمضان وهو شهر ترفع فيه الأعمال إلى رب العالمين وأحب أن يرفع عملي وأنا صائم ... رواه النسائي والحديث صحيح

وللأمانه العلميه الاحاديث الى بتتكلم عن رفع الاعمال فى ليله النصف من شعبان ضعيفه بس فى كل الاحوال الاعمال بترفع الشهر ده وكل البلاوى الى عملناها والطاعات برضه هتطلع

ده الخبر الوحش او حلو على حسب كل واحد عمل ايه

الخبر الحلو بقى والى ممكن يغطى على الخبر التانى هتلاقوه فى الحديث ده

وهى ليله لا تلحقوا لا متلحقوش ...تناموا فيها انتوا احرار... تقوموا الليله كلها انتوا احرار برضه ... الى بياكل على ضرسه .. بينفع نفسه

الحديث اهو

قال رسول الله صلى الله عليه وسلم[ إن الله ليطلع في ليلة النصف من شعبان فيغفر لجميع خلقه إلا لمشرك أو مشاحن ] . ( صححه الالبانى)

هى ليله الجمعه .. الخميس بليل يعنى ..اوك؟؟!! ...تصوموا بقى 13,14,15 من الخميس للسبت وتقوموا ليله الجمعه

وامانه عليكم تدعولى ربنا يغفرلى

--------------------------------------

النهارده قابلت لاول مره فى حياتى مدون هو مصطفى (ساجى) صاحب مدونه (حلم وسط الضباب , ومدونه ازاز) مش هلاقى كلام اقوله عليه بجد شخصيه تتاكل أكل

اصلا كان فى حب من طرف واحد من زمااااااان ..... بس اخيرا حس بيا واتقابلنا وبجد شخصيه زى العسل

شكرا يا مصطفى على اليوم اللذيذ ده بجد وان شاء الله تترد الزياره

هى

فى الحقيقه ورغم كل شئ فـ أنا مدين.... لكى بتلك المشاعر التى ما اكتشفت قدرتى على اخراجها .. او حتى امتلاكى لها الا معك

رغم كل شئ فـ أنا مدين لكى.... بتلك اللحظه التى قلتى لى فيها "بحبك " و " انا بموت فيك اساسا" وتلك اللحظات الى رددتى على كلمات الحب التى قلتها لك متلعثمه من فرط الخجل بـ" وانا كمان
رغم كل شئ فـ أنا مدين لكى .... بتلك الرعشه التى كانت تتنتشر فى جسدى كله حين- كنت- اراكى من بعيد
رغم كل شئ فـ أنا مدين لكى.... بلمحه التفاؤل والثقه التى كنتى تبثيها فى بين الحين والاخر.. ذلك الامل والتفاؤل الذى لا ادرى لماذا تلاشى عنك رغم انك من علمته لى


رغم كل شئ فـ أنا مدين لكى  ....بلحظات بكاؤك امامى وانا عاجر ان اضمك فى صدرى .. ذلك العجز الذى كان يتحول لطاقه من الحب والعمل ربما دامت لوقت

رغم كل شئ فـ أنا مدين لكى .....بمشاعرى البكر التى شعرت وكأنى اطير فوق السحاب .. تلك المشاعر التى ما شعرت بها ع احد غيرك


رغم كل شئ فـ أنا مدين.... لتلك الاماكن التى شاهدتنا معا .. تلك الشوارع التى احتضتنا حينما كنا نريد ان نبتعد عن الانظار من اجل كلمه " احبك" بدون خجل

رغم كل شئ فـ أنا مدين .....لرسائلك المعطره التى علمتنى الحب .. ومكالماتك التى كانت تمحى عنى الحزن وتضع اسمك مكانه .. كأنه وشم السعاده الابدى 


رغم كل شئ فـ أنا مدين لابتسامتك التى -كان - يكفى ان اتذكرها لانسى كل هموم الحياه
رغم كل شئ فـ أنا مدين لكى...  بفهمى لمعنى الحب 

رغم كل شئ فـ أنا مدين لكى ....... بتلك المشاعر التى شعرت بها وانتى بعيده عنى .. مزيج من الحزن والامل والرغبه الجامحه
رغم كل شئ فـ أنا مدين لكى .....  بتلك الليالى التى سهرت فيها على امل ان اقول لكى مليون بحبك وعلى امل ان تقوليها لى

رغم كل شئ فـ أنا مدين لكى ...بكونك حبى الاول .. حتى لو كان الحب الاول وهم كبير .. فانا مدين لك بوهمى الكبير
رغم كل شئ فـ أنا مدين لكى   ....بتلك المعانى التى دخلت فى قاموسى ..وتلك الفترات التى مررنا بها معا .. مدين لك بالصداقه التى نشأت بيننا اولا .. بالحب بكل درجاته التى مررنا بها .. بدايته , فتوره ,عنفوانه , حماقاته , صوابه , خطئه , بتلك الرغبه ان اضمك بين ذراعى , او حتى ذلك الجفاء الذى يحدث بدون مقدمات , بالرغبه فى البكاء بين يدك , بالشعور بانى اقوى رجل فى العالم , بالخلافات التى نشأت بيننا , وبلحظات السعاده التى مرت بنا , بالاخلاص .. وحتى بالخيانه مدين لك بكل هذه الاشياء التى مرت بنا او مررنا نحن عليها

رغم كل شئ فـ أنا مدين لكى .... بلمسه يدك ..بجلوسك بجوراى متمنيا ان تتلاشى المسافه التى بيننا

رغم كل شئ فـ أنا مدين لكى ...... بكل الاخطاء التى  حدثت .. بكل الاشياء التى لم تحدث وبكل الاشياء التى تمنيت ان تحدث
رغم كل شئ فـ أنا مدين لكى .... بذلك الندب الذى سيظل فى قلبى الى الابد .. بتلك المشاعر التى اشعر بها الان من جراء خيانتك .. وبذلك الامل الذى يراودنى حين افكر هل سأستطيع ان احب اخرى كما احببتك؟؟
رغم كل شئ فـ أنا مدين لكى....  برغبتى ان اكتب فيكى شعرا اغوص فيه بداخلى لأبحث عن معنى جديد يصف حبى لكى فى لحظه عنفوانه .. مفرداته بعيده عن فلسفه النحويين .. وجمله بليغه بمنطقى انا لا بمنطق البلاغيين .. ورائقه كعينيكى .. منهمره كدموعك التى كانت تعتصر قلبى .. كلماته بعيده عن الواقع الاليم  , يصفك حتى يعرفك الناس كما كنت - اظن - انى اعرفك .. ليشعروا بالسعاده التى - كنت - اشعر بها وانا معك.... وفى النهايه اتمنى ان اسمعهم وهم يصفقوا لى بعدها
رغم كل شئ فـ أنا مدين لكى .... بتلك الدمعه التى تحبسها مقلتى.. تلك الرعشه التى فى صوتى .. وذلك الحزن الذى فى قلبى ..من يوم رحلتى
رغم كل شئ فـ أنا مدين لكى ....بتلك الحيره التى تنتابنى حين اسأل نفسى لماذا؟؟ 

لماذا رحلت حتى دون ان تُشعرينى انك قاومتى ؟ دون ان تُشعرينى انك كنتى تريدينى؟؟ دون ان تشعرينى انك لست خائنه

رغم كل شئ فـ أنا مدين لكى .... باحتلالك قائمه اخطائى التى احببتها ولو عاد بيا الزمان لكررتها كما هى

ورغم كل ما قلته .. فـ انا لست مدين لكى باى شئ

ورغم كل قلته ...فسأنتظر حبا جديدا .. يضحى ويخلص ويأمل كما سأضحى واخلص وأعيش بهذا الامل له

ورغم كل ما قلته .. فـ انا لا اتمنى عودتك  

بعض الاصدقاء الى بيتابعوا مدونتى مش فاهمين ايه حكايه البوست الى فات واكيد نفس السؤال هيكون عن ده بسبب .... بوستات قديمه كتبتها عن قصه نهايه حبى

الموضوع ببساطه انى ممكن اكون بخلط بين الواقع والخيال .. وترتيب الاحداث فى المدونه مش شرط يكون مطابق للواقع .. رغم انه مطابق بس عشان اقول ازاى هحتاج لشرح طويل

على كل الاحوال الى بكتبه هو شعورى فى اللحظه الى بكتب فيها وبس

عارف اخر تسع بوستات كتبتهم كانوا اقل بكتير من بوستاتى قبل كده - فى حد قالى كده - وخصوصا انهم خدوا طابع شخصى حزين وبمعالجه سيئه 

انا اسف بجد وان شاء الله كل الامور تتصلح

قبل رمضان شعبان .. تصدقوا؟؟

كواحد عادى جدا بنتظر رمضان ..... وخصوصا لما بحس انى فعلا بعيد عن ربنا فى الفتره دى .... فببقى منتظر جدا رمضان بكل روحانياته

السنه الى فاتت بالتحديد بدأت أغير وجه نظرى دى

وبدأت اعتقد انى فعلا كنت غلطان وانى مش بستفاد برمضان زى مالمفروض انى استغفاد منه

غيرت تفكيرى السنه الى فاتت .... وخصوصا فى ايام العشر الاواخر

الجوامع بتكون مليانه فى التراويح وفى القيام

بس كان معانا واحد فى الاعتكاف شخص تحبه من اول ما تشوفه .... لما صليت جنبه من اولما الامام قال ( بسم الله الرحمن الرحيم) وانا حاسس بدموعه

حاسس بيه بينتفض ... رغم انه مش بيطلع صوت نهنه

واحنا بليل بعد ماالناس خلصت صلاه ومشت ومبقاش فاضل غير المعتكفين رحت وسألته

بصراحه انا كنت محتقر نفسى جدا ... الراجل ده بيبكى من اول الفاتحه ... بحس فيه بصدق عالى اوى

المهم رحت وسألته ؟؟ ...

هو حضرتك بس انا عايز اسألك سؤال.. انا كنت بصلى جنبك ويعنى حصلت حاجه كده

اتفضل

هو بصراحه انا مثلا ممكن ابكى فى الصلاه ... لما اسمع ايه عذاب ... لما اسمع ايه تخوفنى رغم ان حتى ده مش بيكون كتير ومش دايما .... يمكن فى رمضان بس ..... أو لو صليت فى مره كده بليل ركعتين ولا حاجه وكنت حاسس انى عايز ابكى .. وكل ده قليل جدا جدا جدا ,....انما حضرتك ما شاء الله يعنى ...........؟؟ ,وذنوبك مش اكتر مش ذنوبى انا عارف نفسى ....

قالى بص انا هقولك على كلمه واحده لو عايز تحس بالخشوع...الحكايه شغل سنه ... او بلاش شغل سنه ... هو شغل فتره

انا منصت جدا له

هفهمك اكتر ... انت لازم تشتغل على قلبك طول السنه ... متتوقعش انك ممكن تحصل على نتيجه سريعه فى رمضان ... لازم تاخد بالك من قلبك طول السنه ... مش عمال تقتل فيه ... تقتل فيه .... وعايزه يقوم يصحى دلوقتى ... صعب جدا يا ......

اه نسيت اقول لحضرتك اسمى محمود

تشرفنا يا استاذ محمود الى عايز اقوهولك انت طبعا عارف حكم التباكى فى الصلاه

قلتله اه لو ظهرت (نهنه) او حروف زى( ااااه) و(أوووووه) و(ايييييييه) وكل (حروف التسهيل) دى .. تبطل الصلاه

طبعا الا لو خرجت غصب وكان بكى من الخشوع ... مش تباكى

قالى طيب احنا حودنا بالموضوع بعيد ... الى عايز اقولك عليه باختصار ... انك لازم تستعد لرمضان قبلها بفتره

دا لو عايز يكون قلبك فى رمضان شفاف اوى ... وتستفاد منه اوى

ومتنساش ان شهر شعبان ده شهر تأفيل الحسابات ... الاعمال بترفع فى شعبان فـ انت لازم على الاقل تشتغل على قلبك فى الشهر ده

الحوار ده افتكرته ... وحبيبت انقله ليكم يمكن حد يستفاد منه حاجه

انما وللامانه انا كاتبه عشان انا عايز اكتبه وافتكره وارجع له كل شويه

الموضوع ببساطه ان الراجل ده لفت نظرى انى لازم اوى اوى استعد لرمضان عشان اعرف استفيد منه .... لازم اوى ابدأ اقرا قران من شعبان على الاقل ...لازم ابدأ اصلى بليل ... اتعود اقعد فى المسجد لفتره طويله ... اتعلم اتصدق ... اتعلم كل حاجه انا عايز اعملها فى رمضان

لو عايز تخرج من رمضان بروحانيات عاليه ... وتستفيد منه اوى ... وتاخد فيه حسنانات كتيره اوى ... اظبط قلبك قبل رمضان

لو عايز تقرب لربنا اوى اوى اوى لازم تبدأ قبل رمضان بفتره ...و رمضان يساعدك انك تزيد

ربنا يكرمه يااااااارب فعلا استفدت منه كتيييييييييير اوى وربنا يعينى يااااااارب

وصله النت

دخلت مدونتى النهارده وانا فى نيتى حاجه من اتنين

إما هقولكم انى هقفل المدونه لفتره لانى حاسس بجفاف فى قناه الافكار

وإما انى اكتب

بس من مكانى هذا بشكر الراجل صاحب محل النت كافيه الى احنا موصلين من عنده وصله النت

لانه لازم وحتما ولابد اى حد موصل من عند الراجل ده ... يلاقى افكار وافكار وافكار

بصوا انا هكلمكم عنه .... وهوه متجوز على فكره احسن حد يطمع فيه ويلطشه ... واحنا الصراحه منقدرش نستغنى عنه

امال ايه؟؟ ... دا احنا بنحبه حب وبندعي عليه دعا .. قصدى بندعيله... بلاش توقعونا فى الغلط

الراجل ده انا بقيت بحقد عليه بجد

لان بيكسب مكاسب هائله مبالغ فيها جداااااااا

مشروع كسبان مليون فى الميه

واحسبوا معايا من باب الحسد يعنى

بصوا هو موصل لـيجى بتاع 20 بيت ماشى؟؟

اضربوهم فى متوسط عدد كل بيت 4 ماشى؟؟

متوسط كل واحد مخصص له - الراجل -نص ساعه

دا بالميت

بيقى النتيجه 20 فى 4 فى نص ساعه فى 30 يوم فى الشهر

يطلع المجموع 1200ساعه

ما بين شتيمه .. ودعا .. وسب .. وقذف

حولوا دول بالحسنات له .. يطلع مشروع مربح مليون فى الميه

سامع حد لئيم هنا.... بيقول زى محمد اخويا

يعنى هو يغلس ويرخم على مخاليق ربنا ولما نقول غلس ورخم ياخد حسناتنا

يعم مش هياخد حاجه دا راجل ابن ستين تييييييييييييييييييت

دا ناقص بقى بعد كل الى بعمله ده انه ياخد من حسناتنا كمان

*****************************************

الحكايه بكل بساطه ان الراجل من اهم شعار عنده ان ( اخر حاجه راحه الزبون ) ولا يكتفى بهذا بل ويزيد ( زبون ايه الى هنقرف نفسنا بيه ) ما الزباين على قفا من يشيل

اولا ودى شهاده حق .... الراجل وهو بيكلمك فعلا ذوق ويفضل يتكلم معايا بكل ادب .... لدرجه انى بحس انى فعلا غلطان ....و ان راجل بالادب ده عمره ما يعمل الى انا جاى اتخانق بسببه

بصوا هحكيلم من الاول

انا رحت قلت للراجل ده انا عايز اوصل وصله من عندك ... اوك؟؟

قالى والله يا دكتور صعب ... وانا مش بوصل لحد ... بس هوصلك انت خدمه كدا.. بس متقولش لحد ..( على اعتبار ان امه لا اله الا الله كلها مش هتشوف السلك خارج من المحل )

المهم قلتله اوك

قالى وكمان متعملش دون لود طول ما انا فاتح ... اعمل بليل انت حر لحد الصبح

قلتله اوك

قالى كمان متعملش دون لود لاكتر من 5 جيجا فى الشهر.. والنت اصلا سريع الخط بتاعى واحد ميجا ( خلو بالكم من دى)

قلتله كويسين شغال

قالى خلاص هات سلكك وحواراتك ووصل

لحد كده تومام

المهم شهر ... شهرين... تلاته وبقينا يجى 20واحد دا فى اقل تقدير

والخط نزل ل512 ... المهم هو مصمم لحد دلوقتى انه لسه ميجا

وبدأت الحرب والمكيده ... كل الناس بتستخدم النت كت ... وبرامج تانيه . .. وبما ان الدون لود بليل بس ... فالحرب تبدأ كل يوم الساعه12

ونفضل نقطع على بعض .. والى يكسب بقى

الصبح لو اى حد فى 20 سولت له نفسه انه يدون لود ايه الى بيحصل بقى؟؟

الراجل بمنتهى الهدوء ينزل يشيل كل السلوك... لحد ما السلك والله باظ وبقى يعلق لوحده

اقوم انزله يا عم فصلت النت ليه

يقولى حد بيعمل دون لود

اقوله طب بتفصل ع الكل ليه؟؟

يقولى وانا اعمل ايه ؟؟

طب شغله ... يقوم مشغله ... عشر دقايق ويفصله

يا عم انت والله ما بعمل دون لود

يقولى عارف يا دكتور بس لازم عشان محدش يقول حاجه

يقول ايه يا عم وصل النت مش فاضيلك

مره نزلت لقيت ابنه ... بقوله فاصل النت ليه ؟؟

قالى اصل بلعب لعبه اون لاين عايزه سرعه

كنت هولع فيه يومها بجد

يوم نتيجه الثانويه ... مش معترض انه يفصل النت .. انما معترض انه فصله من الساعه 7

دلوقتى بقى لسته الشروط بتاعته

ممنوع دون لود الصبح

الروتر يستريح ليله كامله كل اسببوع

مواعيد فتح المحل من 8 الصبح ( والله بجد) لحد 12بليل

الى هيدون لود فيهم هيقطع رقبته

النت سرعته 512وهفضل اقول انه ميجا وان كان عاجبكم

دلوقتى كمان بقى يستخدم النت كت

شفت محل فى الدنيا يفصل بنت كت عن زباينه؟؟

نزلت قلتله انت فاصل النت بنت كات ( انا عندى برامج تعرف الكفت) قالى اه

قلتله ما انا هفصل عنك انا راخر

قالى هقوم شايل السلك بتاعك

تنحت له وقلتله طب شغل النت ربنا يهديك

فى الاخر انا وصلت لشعار الراجل ده ممكن يحطه على باب المحل

هنا محل ****** لتوصيل النت شرك للبيوت

والمثل بيقول يغور الشرك ولو فى العشا